Uei : 23/06/2018

Malika Verlaguet contaira nomada e enrasigada

Per un còp, aquela roergata nos a parlat de son istòria en plaça de contar las istòrias dels autres.

Atal poiriá començar : un còp i aviá un ostalon de pèira talhada al bòrd d’un riu... Èrem dins lo país de Menerbés mas las planas cobèrtas per una mar de vinhas èran luènh darrièr. Aquel ostalon èra plantat al pèmont de la Montanha negra. Levat qu’aquò es pas un país imaginari d’ont poirián sorgir lo Drac e l’enfant polit. Es d’un endret plan real (e encantaire) que la contaira Malika Verlaguet nos a respondut... Dins un païsatge de transicion entre climat mediterranèu e climat montanhòl. Per aquela jova avaironesa, originària de Sant Laurenç d’Òlt, tot a començat suls bancs de l’universitat Paul-Valéry (Montpelhièr) ont estudièt l’anglés e l’espanhòl amb l’occitan en opcion.

L'espectacle « Òmes e femnas dau Landés » a Bordèu (33)

La companhia Nordack que presentarà un espectacle bilingüe « Òmes e femnas dau Landés » au musèu d'etnografia de l'Universitat de Bordèu, lo 7 de març a 17 ò 45 (pendent 1 ò). Que haràn descobrir la vita deu monde de la region emboscada situada au sud-oèst deu departament de Dordonha. Lo comedian Michel Feynie que contarà l'istòria deus òmis e de las hemnas d'aqueth parçan arbohit dens la memòria collectiva deu Peiregòrd.

En s'ajudar de tradicions musicaus, de contes tradicionaus e de momentòts de vita, l'espectacle que hè un ligam subtiu enter ger e uèi.

Encontre dab l'actor a la fin de l'espectacle.

Inf. : Musèu d'Etnologia de Bordèu, 3 ter, Plaça de la Victòria a Bordèu — Entrada a gratis sus reservacion au près deu MEB : 05 57 57 31 61 — Mèl : This email address is being protected from spambots. You need JavaScript enabled to view it.

Ça-vietz Cridar au Carnaval Biarnés deu 8 au 11 de heurèr

Que s'i torna lo Sent-Pançard, Sa Majestat responsabla de tots los maus de la Tèrra. Que s'i torna tà la soa sempiternau reconquista de la vila de Pau e deus còrs deus hartanèrs. Arron estar estat apercebut en Aragon la dimenjada passada, lo Pançard que devararà los Pirenèus dab las soas tropas aragobearnesas e que harà un purmèr estanc a Acós en vath d'Aspa dissabte qui arriba.

L'associacion Carnaval Pantalonada qu'organiza la 32au edicion deu Carnaval Biarnés. Augan, Pançard que crida las nostas penas atau com los nostes plasers, espèrs e susmautas ! Arron lo tèma « Poder » qu'ei lo de « Cridar » que causeish.
Los purmèrs carnavals que s'acabavan tots dens lo barri deu Hedàs. La navèra equipa de Carnaval qu'avè decidit de tornar-i en 2016... Après ua edicion de l'eveniment a Hauta Planta, la hèsta mitica que tornarà dens lo quartièr deu hedàs tad aquera edicion 2018. Qu'i serà installat lo Temple de la hèsta.

Carnaval Biarnés, mòde d'emplec

L'equipa de Carnaval que balha ua atencion particulara a la compreneson deus còdis de Carnaval e que perpausa despuish quauques mes ua video « pedagogica » - ça-i junta e tanben disponibla suu site oficiau (www.carnaval-biarnes.com) – a l'entorn de l'istòria de Sent Pançard e deus autes personatges qui l'entorneja. Lo liberet deu programa que contien d'ara enlà dens las soas purmèras paginas, un descriptiu de cada personatge dab los lors signes particulars, entà miélher compréner los agís deus uns e deus autes pendent la hèsta. Ua atencion dont se regaudí lo Jean Lacoste, en carga de la cultura e de la vita associativa de Pau, au moment de la presentacion oficiau deu programa ger vrèspe a la mairia de Pau (Fòto ©LS). L'òmi politic qu'a tostemps amuishat lo son estacament au Carnaval deus mainatges, que serà donc servit un còp mei augan dab lo tribalh realizat dab e per las escòlas de Bearn tot tau Carnav'escòlas lo 1èr de heurèr. Mei de 1000 mainatges que s'arretrobaràn tota la jornada au Hedàs entà hestejar Carnaval. Au demiei de las animacions, lo procès de Sent Pançard jogat peus escolans deus collègis Calandreta e de Pierre Emmanuel.

 IMG 3545

Lo dissabte 3 de heurèr, que'vs poderatz causir un costume tà Carnaval o miar vestits a la purmèra edicion de las tistas de Carnaval au Foiralh. Aqueth barri deu còr de vila qu'arcuelherà los taulèrs de vestits atau com los Menestrèrs Gascons, DJ Hellvis e los Saxopithéques per animacions musicaus. La Calandreta de Pau que s'aucuparà de l'estanquet.

Qu'ei la Nueit de l'Ors qui aubrirà la purmèra grana serada de Carnaval lo 8 de heurèr. Qu'ei aqueste ser que los ors an causit tà desvelhà's. Dens ua corruda desfrenada tot au long de l'arrua Serviez, Joffre dinc a la Plaça Récaborde deu Hedàs, los caçaires que perseguiràn los ors qui eths medishs perseguiràn las Rosetas e tot aquerò, en musica dab la participacion deu slamaire deu grop L'Envoûtante, Bruno Viougeas. A comptar de 22 òras, que començarà la serada Bars-Bars. Los estanquets N°5, L'Imparfait e lo Bondi Beach Pub que'vs perpausaràn concèrts dab respectivament lo Duo Queuille Perrut (jazz), The World (Rockfusion) e The Wooden Pearls (Power Trio Rock).

L'endedia, qu'ei au torn de Carronha d'estar la reina de Carnaval. La hemna de Sent Pançard que prenerà lo poder e qu'impausarà la soa lei per ua serada musicau e teatrau. Los actors de Carnaval que son acompanhats despuish quauquas setmanas per la companhia treatrau baionesa Jour de Fête. L'arribada de la reina a 20 òras que promet d'estar majestuosa e dinamica.
Courtial X Kogane (ròck occitan), La Dame Blanche (Cumbia reggae) e La Caravane Passe (electro ròck balkano-manoish) que hicaràn lo huec dens lo Temple de la dança, barri deu Hedàs.

 28dissabteser7

Lo 10 de heurèr qu'ei la data deu procès de Sent Pançard. Qu'i serà jutjat per totas las catastròfas qui's debanèn en 2017 en Bearn e aulhors, e dont ei plan segur responsable. Arron la « Sèga » (barricada deus notables qui vòlen empachar Sent Pançard d'entrar dens la vila), lo gran passacarrèra (Har Córrer Carnaval) que partirà deu Baloard deus Pirenèus. Que passarà per la Plaça Reiau on lo rei de la hèsta harà un estanc a la mairia e se vederà reméter las claus de la vila peu maire de Pau, François Bayrou. Lo passacarrèra que s'acabarà Plaça de la Liberacion a 17 ò 30 peu procès de Sa Majestat.
La serada que contunharà dab Bal a tu a jo ! / Ping Pong Bal. Quate musicaires, quate culturas diferentas e un bal. Camille Raibaud (Gasconha), Jean-Marie Nivaigne (Bretanha), Noëllie Nioulou (Auvèrnhe) e Leo Correia que crearàn un espectacle en mesclar las lors culturas, las lors danças, las lors identitats singularas.
Lo Trad Roots de Centre de França de La Machine e lo beatbox breton de Krismenn e Alem que harà tremolar lo parquet deu chapitèu de la Plaça Récaborde a partir de 22 ò 30.
Aquesta 32au edicion deu Carnaval que's clavarà peu tradicionau Mercat de Carnaval lo dimenge 11 de heurèr. Que poderatz descobrir los produits deus productors locaus en escotar los condes deus personatges mitologics pirenencs de Daniel Cabarry. Arron la cantèra de 11 ò 30, lo joen grop de trad occitan Le Plaque e Le Peuple Etincelle qu'animaràn la vrespada consacrada au Bal gascon.

Ua edicion qui mesclarà com d'acostuma la tradicion a la modernitat a la perfeccion peu plaser deus petits com deus grans.

Fòto : Michel Astier

  • Publicat dens Culture

Pavia (32) — Campanha de don per la 20ena edicion de Trad'Envie

Trad'Envie es un festenal dedicat a la musica e a la dança occitanas que se debana cada annada a Pavia en Gèrs (32). Creat en 1991, l'eveniment mescla rencontres musicals eclectics.

Dempuèi 2014, doas novetats, la sala del Dôme a Aush aculhís l'un dels espectacles de Trad'Envie e la creacion del salon de luteria. Artisans venon de totas las regions de França mas tanben de l'estrangièr (Granda Bretanha, Holanda o encara Espanha).

Per l'edicion de 2017, foguèt invitat lo Bal Brotto Lopez e l'Orquèstra d'Armonia de Tornafuèlha per un espectacle especiau aniversari del Bal, los « 15 ans en armonia ».

La novèla e 20ena edicion de Trad'Envie se debanarà del 9 au 12 de mai de 2018. Per la preparacion, los organizadors an lançat una campanha de don aicí. Podètz donar tant coma volètz.

Inf. : http://www.tradenvie.fr/

  • Publicat dens Culture

Comptinas — Dens lo monde imaginari de Turlututú 2

20 ans après la sortida deu purmèr libe de comptinas « Turlututú », l’associacion CORDAE-La Talvera que sorteish lo son dusau volume. Un navèth obratge qui s’adapta enqüèra mei aus besonhs pedagogics deus ensenhaires. « Turlututú 2 » que promet d’estar autant estimat e de seguir lo medish camin que lo son davancèr.

Creada en 1979, l’associacion CORDAE-La Talvera que tribalha a la conservacion e a la valorizacion deu patrimòni culturau occitan. Que’s ditz Centre Occitan de Recèrca, de Documentacion e d’Animacion Etnograficas. Au demiei de las lors diferentas activitats, la de l’édicion de publicacions ( colleccion « Mémoires sonores », « Cosina nòstra » o enqüèra « Virolet ») e la formacion au près deu public joen dab l’organizacion d’animacions, estagis de formacion a la lenga, a la dança, a la canta e aus instruments de musica. Vint ans après la sortida deu libre « Turlututú », pareishut en 1997 e qui coneish enqüèra un gran succès, l’associacion que decidí de har paréisher lo dusau volume. « Turlututú 2 » qu’ei 40 cançons e 24 comptinas. Los ensenhaires e los pairs que pòdon apréner e har apréner cantas tradicionaus e creacions aus dròlles en ajudà’s de las introduccions qui explican la canta, de las paraulas, de las particions mes tanben deus CD qui acompanhan lo libe (canta+instrumentau). Daniel Loddo, artista e director de l’associacion CORDAE-La Talvera, que’ns digó mei sus aqueth navèth utís pedagogic deus complets :

Entervista audio de Daniel Loddo

Inf. : talvera.org — Tel. : 05 63 56 19 17. Mèl : This email address is being protected from spambots. You need JavaScript enabled to view it. 

  • Publicat dens Culture

Sortida del segond vòlume de « Turlututú »

20 ans aprèp la sortida del primièr vòlume del libre, « Turlututú 2 » arriba. Aquel album pedagogic compren 40 cançons de creacion e 24 comptinas en occitan. Foguèt realisat amb lo sosten del Departament de Tarn, de la Region Occitània/Pirenèus-Mediterranèa e de la DRAC Occitània. Lo libre serà presentat oficialament lo divendres 8 de decembre a 18 oras a la sala Jean Jaurès de l'ostal del Departament a Albi, en preséncia de Thierry Cintas, presiddent e de Daniel Loddo director de l'associacion CORDAE-La Talvera atal com Christophe Ramond, President del Conselh departamental de Tarn e Catherine Rabou, conselhièra departamentala del Tarn, delegada a l'occitan.

Retrobatz l'entrevista de Daniel Loddo sul trabalh de creacion del « Turlututú 2 » dins lo numerò a venir de La Setmana, que pareisserà lo 8 de decembre !

  • Publicat dens Culture

Lèu la sortida de « Tralhaires » en filme e CD ?

Lo fotografe etnològue Felix Arnaudin qu’immortalizè a la fin deu sègle XIXau-començar deu Xxau, los paisatges de la Hauta-Lana, en memòria sus pellicula. Malurosament mei trufat que sostienut dens lo son procediment, Félix Arnaudin que coneishó ua consecracion postuma. Lo compositor e cantaire Joan Francés Tisnèr que decidí de har vàler l’òbra deu landés. Dens lo son espectacle, « Tralhaires », que declina sus fotografias en negre e blanc d’Arnaudin, cantas, condes, arreproèrs, e l’ensemble que balha paisatges sonòrs. Dab aqueth procèssus creatius, JF Tisnèr que vòu questionar la transmission de la cultura e deu patrimòni immateriau atau com l’importància deu collectatge. Sus l’empont, l’artista qu’ei acompanhat per Jakes Aymonio a la votz, a las guitarras, a las creacions e difusions video, François Dumeau au sintetizader modulari e generacion de sons dirèctes e Domenja Lekuona au tèxte e a las difusions video. L’artista qu’a un projècte en cap, perpausar « Tralhaires » devath fòrma d’enregistrament sonòr e filmat. Entad ac har, qu’a causit de har aperet a Zeste de La Nef.

« Lo perqué lo concèrt multifonic Tralhaires ei recebut dab un hòrt interès pertot on lo jogam. M’arribè l’enveja de dar au men torn un traç sonòr e en imatges d’aqueste concèrt qui s’apelha de fòrmas divèrsas quan lo tribalham per Provença o Peitau, Vascoat o Catalonha. Qu’ei lavetz trenat dab modalitats de l’occitan diferentas deu gascon e d’autas lengas, deu francés au basco en passar peu catalan », çò escriu JF Tisnèr entà explicar lo son projècte. L’enregistrament audio de l’espectacle que’s hasó en deceme de 2016, lo filmatge en març de 2017 (per Piget Prod). Los còsts totaus deu projècte que son estimats a 19 117 euros. JF Tisnèr e la soa equipa de l’associacion Lo Nau que financèn 70 % de la soma, e que hèn aperet au finançament participatiu entà la rèsta. Lo finançament participatiu de Zeste que serà obèrt pendent drin mensh de 70 dias.

p11 tralhaires

Inf. : https://www.zeste.coop/fr/decouvrez-les-projets/detail/tralhaires-de-j-f-tisner Site : http://www.joanfrancestisner.com Data a viéner : 13/01/18 a Salias, sala deus Congrès.

  • Publicat dens Culture

La Tireta Duberta que canta Nadau

Lo grop La Tireta Duberta, devath la direccion de Michel Pertuis, que presentarà au public lo son navèth repertòri de cantas de Nadau lemosinas, gasconas, provençaus mes tanben de cantas mei contemporanèas. Lo grop que s'acompanharà d'un musicaire dab la soa harpa celtica. Nadau qu'ei la celebracion d'ua hèsta mes tanben lo periòde qui permet de har víver tradicions qui conjugan las valors solidaritat e convivialitat.

La Tireta Duberta que serà en concèrt divés 8 de deceme a la sala deu Tribunau de Nontron (Dordonha) a 20 ò 30 dab cantas de Nadau e « istòrias de país » dab Patrick Ratineaud. Lo grop que serà a Bussièra Badiu (Dordonha) lo 10 de deceme a la glèisa romana a 15 òras dab en purmèra partida la corala Carillon de Nontron qui cantarà cançons de Nadau deu monde sancèr. Lo 15 e lo 16 de deceme, que's produsiràn a Escuras (Charenta), puish lo 17 de deceme a Sent Marçau de Valeta au Domeni de Montagenet a 15 òras dab en purmèra partida la corala Lyra Libra de Marval. Darrèra data a quauques dias de Nadau, lo 22 de deceme a la glèisa romana de Saint Pardoux de Mareuil a 21 òras.

Inf. : L'Union occitana « Camille Chabaneau », tel. : 05 53 56 61 89 — Véder videos deu grop

  • Publicat dens Culture
Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+