Uei : 18/06/2018

Omenatge a l'anciana Rectritz de l'Acadèmia de Tolosa, Hélène Bernard

Hélène Bernard se moriguèt lo 28 de mai a l'atge de 61 ans, aprèp una longa malautiá. Èra estada nomenada retritz de l'Acadèmia de Tolosa per decret pres pel president de la Republica lo 24 de julhet de 2013 e assegurèt sas foncions fins al 15 de febrièr de 2018, abans la nominacion de Dòna Bisagni-Faure. Lo ministre de l'Educacion nacionala, Jean-Michel Blanquer, e la ministra de l'Ensenhament superior e de la recèrca, Frédérique Vidal, an rendut omenatge a « una femna exigenta e determinada qui a consacrat sa vida al servici de l'Estat ».

Capitada del « Printemps Occitan » dels salariats en cauma del CFPO MP

Sèt meses aprèp, los sièis salariats del Centre de Formacion Professionala d'Occitània-Miègjorn-Pirenèus, lo CFPO, son totjorn en cauma. Dissabte 19 de mai, an organizat « Lo Printemps Occitan » a Tolosa, una jornada de sosten mas tanben de reflexion sus la precaritat dels salariats del mitan associatiu e del mitan del trabalh en general. L'idea d'aquela jornada èra de trapar de mejans novèls de desvolopar l'emplec dins lo mitan occitan d'un biais qui respècta los salariats.

La jornada comencèt amb una discussion a l'entorn de la volontat d'un occitanisme novèl.

La Dintrada s’aprèsta !

Lo forum ciutadan occitan pausarà sas valisas a Tolosa lo 22 de setembre 2018. Mas quinas seràn las tematicas ongan ? Començam d’i véser mai clar ! Lo comitat de pilotage que recampa de jornalistas anóncia una « Dintrada » plan diferenta de l’an passat ambe lo matin un estat dels luòcs d’Occitània, region per region. La tòca es de tornar trapar la dimension « pan-occitana », de metre en evidéncia çò que marcha, e çò qu'avança pas. Per cada region, de personalitats faràn un bilanç que cobrirà totas las tematicas que pertòcan los ciutadans occitanistas : ensenhament de la lenga, mèdias, cultura, democracia. En mai, un convidat europèu pausarà son agach sus la situacion nòstra en comparason ambe çò que se passa dins son país e pertot en Euròpa. Un debat seguirà aquelas presentacions per completar o precisar las causas. Aurem aital en fin de matinada un panoramà pro complet de l’espandi occitan, de sas fòrças e de sas flaquesas.

L’aprèp-dinnada promet d’èsser mai ofensiva ambe dos grands talhièrs que se debanaràn en parallèl. Los participants deuràn causir entre los dos questionaments prepausats : « Una granda manif ? » o « Una novèla organizacion politica ? ». Efectivament, 50 ans aprèp mai de 68, l’ora es venguda de se bolegar ! De personalitats seràn convidadas per s’esprimir sus cada problematica, e d’activitats en pichons grops seràn prepausadas.

Per clavar la jornada, una plenièra permetrà de far un bilanç de cada talhièr, e serà seguida d’un escambi… que se perlongarà de segur a l’aperitiu !

 

Brunò Cecillon, Uc Jourde, Esther Mimart-Rangel, Gisèla Naconaski, pel comitat de pilotage.

 

Fòto presa lo 26/04 per un acamp telefonic del comitat de pilotatge a Ràdio Occitània, Tolosa (31). (DR)

Estudiants contra l'ORE — Los blocatges e las manifestacions contunhan

Las universitats occitanas, totjorn en dificultat. L'Universitat Paul Valèry de Montpelhièr travèrsa una de sas crisis mai importantas amb una grèva de 4 meses e son blocatge que la paralisa dempuèi un mes. Los estudiants se mobilizan contra la lei Vidal de l'ORE, relativa a l'Orientacion e la Reüssida dels Estudiants.

L'Universitat occitana a decidit de far passar los examèns als estudiants d'aicí la fin del mes de mai. 780 examens se faràn pel biais del numeric via la platafòrma Moodle o per corric. Una solucion importanta per la direccion per pas penalizar los 20 000 estudiants de la facultat. D'estudiants e sindicats estudiants son pas convençuts pel manteniment dels examèns. Sonque la mitat dels cors foguèron balhats en rason de la grèva. « es un non-respècte de las modalitats inicialas d'examèn, çò qu'es totalament inadmissible. En sabent que per un examèn, cal èsser prevengut doas setmanas a l'avança que totes los estudiants sián al fial », ce diguèt Dyla, estudiant en Istòria L1.

Manifestèron per l'Occitan a la television

Lo Collectiu Occitan organizèt una novèla manifestacion a Tolosa e a Montpelhièr lo 3 de febrièr. Vòlen l'occitan cada jorn a la television : « L'occitan cada jorn a la TV es a dire a França 3, volèm nòstre occitan cada jorn e la mobilizacion es d'autant mai necita que i a una ventòla de reduccions de crèdits a la television publica », çò escriu lo Collectiu dins son comunicat. E lo movement occitanista d'anar mai luènh en demandar una vertadièra « TV de país », amb de redaccions localas. Cap a 200 personas participèron a las doas manifestacions.

« A l'ora de la reforma de l'audiovisual public, la question de las missions de la television publica en region se pausa. Quand d'antenas localas son menaçadas de disparicion, lo Partit Occitan prepausa al contrari de renfortir l'ancratge territorial de France 3, per èsser una vertadièra fenèstra d'actualitat de nòstras regions e un ligam amb los ciutadans, a costat d'autras iniciativas privadas com ViàOccitanie », escriguèt lo PÒc dins un comunicat abans la manifestacion. Demanda al govèrn francés de daissar lo modèle centralizat per donar mai de libertat a las televisions regionalas qui justament poirián d'aprèp eles, se diferenciar amb una ofèrta de programas novèls e « desvolopar tanben d'autres formats per respondre a l'evolucion de la consomacion dels mèdias, especialament via lo web pels mai joves ».
« Justament, cal pas faire una contradicion, la television sul web e la television classica son compatiblas. Si on obten mai de preséncia de la lenga a la tele, serà totjorn benefic per l'occitan. I a encara de monde qui agachan la television ! », çò nos diguèt Joan-Pèire Laval del Collectiu occitan.

Una delegacion del Collectiu serà recebuda a 14 o 30 uèi a Tolosa pel delegat regional de France 3 Occitània, Carlos Belinchon.

26ena edicion del Forom de las lengas del mond

Lo Forom de las Lengas del Mond es nascut a Tolosa en 1992. Es una fièra a las lengas, plaça del Capitòli ont de locutors/ promotors de las lengas parladas a Tolosa (mai de 180) illustran lor patrimòni sus de taulèrs. D’iniciacions a las lengas, de presentacions d’obratges, de filmes projectats, calligrafia, de concèrts e d’escambis son organisats tot lo manne del jorn. Per la 25ena edicion del Forom, un centenat de taulièrs de lengas : arabe literal, armenian, basaa, bulgar, estonian, finés, occitan, medumba (parlada al Cameron), ourdou (nòrd d’Índia e Paquistan) o encara, sango (centra Africa) e Zaza (Turquia). Una taula ronda sul tèma « Las neurònas escrivon pas de poèmas ? » amb Jean-Luc Nespoulous, professor emerit en Sciéncias del Lengatge a l’Universitat de Tolosa 2 Jean Jaurès, Gérard Dessons, professor de lenga e literatura francesas a l’Universitat París 8 e Georges Daniel Véronique, professor emerit de lingüistica francesa e d’estudis creòlas a l’Universitat d’Ais-Marselha dempuèi 2005. Sa capitada creis cada annada amb entre 2 a 3 000 visitaires a cada edicion. Lo forom es organisat per l’associacion Carrefour Culturel Arnaud Bernard. Ongan, lo rendètz-vos cultural se debanarà lo dimenge 27 de mai 2018. Acamps de preparacion amb las associacions participantas son previstas lo dimècres 21 de febrièr e lo 21 de març a 19 oras a la sala Castelbou (22 carrièra Léonce Castelbou, 31000 Tolosa) e los 9 e 16 de mai, meteis orari.

Inf. : www.arnaud-bernard.net

  • Publicat dens Culture

Malgrat l'ajuda de la Region Occitània, los salariats del CFPO Tolosa totjorn en cauma 4 meses aprèp

Fa quate meses que los salariats del Centre de Formacion Professionala d'Occitània Miègjorn-Pirenèus de Tolosa son en cauma.

Un acamp se debanèt lo 30 d'octòbre a l'Ostal d'Occitània entre membres del burèu e salariats. A malgrat dels esfòrces dels dos costats per discutir, lo rencontre s'es acabat sens cap d'avançada.

Lo burèu aviá mandat un comunicat de premsa apuèi. Los salariats publiquèron ièr un pòst sus lor compte Facebook « CFPO en luta » per remembrar qu'èran totjorn en cauma, aprèp un vintenat de jorns sens novèlas sus FB. Denóncian lo « patetic » de la situacion : « Comble du pathétique, nous savoir que tout a été anticipé par nos administrateurs, […] jusqu'à la liquidation, le dépeçage et le blocage d'une éventuelle reprise de la structure par les salariés ».

Aprèp aver ensajat de desblocar la situacion amb l'ajuda de la Region Occitània/Pirenèus-Mediterranèa, sens cap de capitada, e sens cap de salari dempuèi 17 setmanas, los salariats dison téner còp gràcia als sostens que recebon. Una canhòta es en linha per o ajudar. 

 

 

XVIIIau Collòqui d'onomastica a Tolosa

Despuish dimèrcs e dinc au ser, que's debana lo 18au collòqui d'onomastica a Tolosa. Qu'ei organizat cada dus ans e qu'a per tèma augan la circulacion lingüistica e l'onomastica occitana.

Lo collòqui que comencè suu tèma de las circulacions lingüisticas, las categorias denominativas e las lors relacions en onomastica en preséncia de Jean-Louis Vaxelaire, professor a l'Universtat de Namur en Belgica qui parlè de las tipologias onomaticas, e de Daniela Butnaru de l'Institut de filologia romana qui s'interessè a las relacions enter uns noms de lòcs rebatuts dens un diccionari toponimic.

L'endedia, las discutidas que pertocavan las relacions enter categorias dens lo domèni de la toponimia. La cercaira Marcienne Martin, de l'Universitat de La Réunion que hasó ua presentacion suu subjècte « Deu totemisme a la toponimia : l'exemple deus grops amerindians ».
Jean-Claude Bouvier, professor emerit d'Ais-Marselha Universitat que presentè « Deus “toponimoïdes” aus toponimes. Quauquas reflexions sus l'emergéncia deus toponimes dens l'escriut e dens l'orau ».

Uei, lo tèma tractat qu'ei l'onomastica occitana dab convidats especialistas com Hervé Lieutard de l'Universitat Paul-Valéry, Aitor Carrera de la Cadièra d'Estudis Occitans de l'Universitat de Lhèida, Paul Burgan, SFO, o enqüèra Patrick Sauzet, professor a l'Universitat Jean Jaurès de Tolosa. Pierre Bréchet, president de l'IEO qu'explicarà cap a 16 òras 30, quin restituir la soa toponimia tà ua lenga minorizada e quin estructura ua dinamica associativa en hialat.

Lo collòqui qu'ei organizat per la Societat francesa d'onomastica (SFO), lo laboratòri CLLE-ERSS (CNRS - Universitat Tolosa Joan Jaurès) e Lo Congrès permanent de la lenga, dab lo sostien de la DGLFLF, de la Region Occitania/Pirenèus-Mediterranèa per l'OPLO, e de l'Universitat Joan Jaurès de Tolosa.

Programa deu Collòqui

Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+