Uei : 22/05/2018

Vistedit qu'apèra l'Ofici Public de la Lenga Occitana a tornar sus la soa decision de non pas acordà'u nada ajuda en 2018

Vint-tres ans a, qu'estó creada per la societat Vistedit La Setmana,lo purmèr setmanèr en lenga occitana. A l'epòca, n'èra pas ua jòga aisida. Har un setmanèr papèr qu'èra dejà mauaisit ; mes hà'u en occitan, qu'èra enqüèra mei riscat. Totun, que calèva qu'existisse un organe d'informacion dens la lenga.

Au medish temps, Vistedit qu'avè creat duas revistas mensuaus taus mainatges. Despuish 1995, la premsa qu'a cambiat e las dificultats que son vadudas mei granas. La Setmana, Plumalhon e Papagai que son estadas confrontadas aus problèmas generaus de la premsa escriuta aus quaus cau ajustar las dificultats ligadas au hèit de tribalhar dens ua lenga en perilh e mautractada. Pendent annadas, Vistedit qu'a hèit esfòrç deus importants. Los lectors de La Setmana tanben que son estat sollicitats a mantuas represas entà ajudar lo jornau. Los salariats de Vistedit qu'an hèit sacrificis deus grans tanben. La societat qu'a tot hèit entà adaptà's a las mutacions tecnologicas. Mes entà lutar, que cau aver mejans.

Navèras manifestacions deus agricultors uei

Las manifestacions deus agricultors que contunhan uei pertot en França. Los espleitadors agricòlas que blocan axes rotèrs dens mantuns departaments entà denónciar lo desclassament deus territòris plaçats dinc a uei lo dia en zònas desaforizadas. Aqueth estatut que'us permetèva de recéber ajudas au nivèu europèu. Aqueth classament qu'ei considerat com « vitau » dens uns parçans pr'amor que permet de mantiéner ua dinamica e d'ajudar los joens a installà's.

A Aush en Gèrs, lo mot d'òrdi qu'ei « Toca pas a la mea ZAD (Zòna Agricòla Desfavorizada) ». Los accès au còr de vila que son blocats peus manifestants. A Tarba (65), au matin, cap a 200 agricultors que manifestan tot au long de l'A64 entà limitar las entradas e sortidas sus l'autorota.

A Pau, 150 tractors que's desplaçan actuaument rota de Tarba entà denonciar lo desclassament de 49 comunas (sus la 121 classadas) de las zònas desfavorizadas. Au nivèu de la sortida de l'autorota a Artics, la circulacion que vad mauaisida.

Uei lo dia, d'autas manifestacions que's debanan a Niòrt, Vierzon e Orleans. Arron los acamps que s'èran debanats quauques dias a, mei que mei a Tolosa e Carcassona, los sindicats que s'èran escaduts a obtiéner la revision de la carta de las ZAD. Totun, lo ministre de l'Agricultura, Stéphane Travert qu'avè presentat modificacions qui n'a pas satisfèit la FNSEA.

Representants agricòlas que seràn recebuts peu Ministèri de l'Agricultura uei.

Fòto : Captura d'ecran Twitter Prefècte de las Hautas-Pirenèas

L'IEO lança una crida a donacion

L'Institut d'Estudis Occitans lança una crida a donacion. Foguèt assabentat al mes d'octòbre que tocariá la mitat solament de sa subvencion per 2017, balhada per l'Ofici Public de la Lenga Occitana. En mai d'aquela baissa, s'ajusta las incertituds dels engatjaments de la Region Auvèrnhe-Ròse Aups. « Estent aquela situacion, l'IEO pòt pas faire autrament que de chamar en totei de sostenir, un còp de mai, l'associacion e sei tòcas, permetre son foncionament e organizar sa preséncia e seis accions per l'annada 2018 », ce escrivon dins lo comunicat signat pel President de l'Institut, Pèire Brechet.

Se volètz ajudar l'IEO, podètz mandar vòstre don a l'associacion per chèc al sèti Institut d'Estudis Occitans, 11, carrièra Malcosinat — 31000 Tolosa. O telecargar lo bulletin de don aicí.

Inf. : Site www.ieo-oc.org

800 000 euros mei acordats a la Region Occitania tà la pesca e la conquilicultura

Ua envolòpa mei de 800 000 euros, qu'estó atribuida a la Region Occitania tà las soas activitats de pesca e de conquilicultura. Ua ajuda complementària acordada peu Hons europèu taus Ahars maritimes e la Pesca (FEAMP). Que s'ajusta aus 12 milions d'euros dejà balhats tà finançar projèctes de las enterpresas aquacòlas de la Region.

La Region que s'engatgè a acompanhar l'economia de la pesca, de la conquilicultura e de l'aquacultura. Que son 22 enterpresas deu litorau que tocaràn aqueras ajudas mercés a la Comission permanenta deu Conselh regionau. Quate Grops d'Accion Locau tà la Pesca e l'Aquacultura deu litorau, Pyrénées Méditerranée 66, Etangs et Mer 11, Thau et sa bande côtière 34, e Vidourle Camargue 30, que perceberàn 2,43 milions d'euros deu FEAMP tà finançar los lors projèctes respectius en 2017.

Lo FEAMP qu'ajuda los pescaires a adoptar practicas de pesca duradissas, las populacions costèiras a diversificar las lors activitats economicas, que permet de finançar projèctes destinats a crear emplecs e a melhorar la qualitat de vita au long deu litorau europèu e que facilita l'accès au finançament. Aqueths hons que miran a estimular lo relanç per la creishença e l'emplec en Euròpa.

Fòto : F Lamiot

Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+