Uei : 24/11/2017

Preson landesa : Rugbi entà apatzar las relacions

Despuish lo mes de genèr, cap a 200 presoèrs deu centre penitenciari deu Mont qu'an la possibilitat de jogar au rugbi. Que's hè dens l'encastre d'un dispositu experimentau en França, qui pren l'exemple d'un modèle espanhòu quasi generalizat dens las presons de la peninsula iberica.

Los volontaris qu'an de signar un reglament interior e que s'engatjan a arrespectar règlas de comportament e a participar a 25 òras d'activitat tota setmana. La tòca qu'ei de lutar contra las violéncias en mitan carcerau. En contrapartida, los detienguts que benefician d'ua libertat de movement. En efèit, las pòrtas de las lors cellulas que son obèrtas mei anar mei sovent, las passejadas quotidianas que son causidas. La lor conduita qu'ei avalorada cada setmana e que'u balha accès a avantatges (activitats esportivas la dimenjada, permissions multiplicadas e parladers perlongats).

Lo retorn deus susvelhants qu'ei meilèu positiu. Questionat peus confrairs de France 3, un detiengut que reconeish que « Quiò, que melhora las relacions, que torna hicar tot lo monde au medish nivèu e puish, que mia ua sòrta d'escapada, qu'ei a l'airejada, qu'aledam que ».

Dusau preson qui s'ensajarà ad aqueste dispositiu esportiu : lo Centre de detencion de Neuvic en Dordonha.

Fòto : 34 supers héros

  • Publicat dens Sport

Europeada 2016 : Sostien financèr tà l'equipa Occitana de Fotbòl

L'Associacion Occitana de Fotbòl qu'estó creada en 2004. Un grop a l'entorn de Pèire Còsta que decidí d'apitar ua equipa de fotbòl qui representaré Occitània. En grana majoritat ensenhaires de Calandreta e que jogavan fotbòl drin pertot en lo parçan de Besièrs.

Petit tornar a l'endarrèr suu caminament de l'equipa Occitana. En 2005, l'AOF que jòga la soa purmèra partida contra Monegue a Besièrs. Qu'acaba en partida nulla dab ua equipa qui estó « apitada au darrèr moment » segon los mots de Didier Amiel, actuau seleccionaire, « que hasom bricòla ». En 2007, la dusau partida que's hasó contra Chechenia e que's debanè un còp mei dens condicions non-professionaus. La mèrca finau qu'estó de 14 a 0 tà Occitània. En 2008, Occitània que participa a la soa purmèra Europeada organizada peu FUEN (Federal Union of European Nationalities). Aquesta que vòu organizar un campionat d'Euròpa de fot reservat a las minoritats nacionaus e a las Nacions shens nat Estat d'Euròpa. L'eveniment esportiu que's debanè enter Austria e Soïssa deu 18 au 22 de junh de 2008. A l'epòca, enqüèra professor d'espanhòu en activitat, Didier Amiel qui coneishèva lo fotbòl regionau, estó convidat en assemblada generau a Besièrs. La proposicion de tornar préner la seleccion de l'equipa tà l'Europeada que'u estó hèita, « Lhevat que'm disón aquò au mes de mai, tà partir au començar deu mes de junh ! ». Didier que perpausa a partir d'aquiu, navèths objectius, « jo que coneishi hèra bons jogaires d'autas equipas, que vau multiplicar lo nivèu per dètz. Per contre, los tipes, ne son pas briga occitanofònes. Que perpausi de seleccionar monde qui aiman la nosta region, qui son estacats a la nosta cultura e la nosta tradicion, e qui eths, haràn l'esfòrç d'apréner l'occitan ».

  • Publicat dens Sport

6 Nacions : pas de miracle pel XV de França

I aviá plan de rasons d'èsser triste dissabte de ser, a la fin de l'ultim rescontre de las 6 nacions. França perdèt (encara) contra Anglatèrra (condicion agravanta) que capita ela lo grand chelem (la darnièra gota de poison de la serada).

Escòri final, 31-21, e aquò pòt semblar brave pels blaus que marquèron pas un ensag quand Albion ne plantèt 3. Pasmens la desfacha foguèt a l'encòp logica e dolorosa. Coma los franceses beneficièron d'un molon de penalitats que los daissèron en vida fins a las 5 darnièras minutas, l'espèr de la victòria nos quitèt pas abans. Se podiá somiar a una victòria panada, exactament coma en 2014. Mas aqueste còp son los Angleses que tirèron en darnier.
Ca que là, totas las penalitats que venèm d'evocar (e que transformèt fòrt plan lo Machenaud), aquesta indisciplina daus òmes en blanc pròva ben pr'aquò qu'en fàcia daus nòstres se trapava pas un monstre dau rugbi internacionau. En contra i aviá una còla fòrta dins la conquista au sòl, dins los aires, en defensa. Se mostrèt plan mai realista que lo XV francés, emai se laissèron de punts en rota e qu'aguèron quauques dificultats en mesclanha.

  • Publicat dens Sport
Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Papagai

Papagai es la revista occitana dels pichonèls. Prepausa cada mes doas istòrias, de jòcs, una pagina de vocabulari e un dorsièr en rapòrt amb un dels dos 

+