Uei : 13/12/2017

Quan lo magnetisme suenha

Tot, dens la nosta vita qu'ei ua question d'equilibri, e ne podem pas demorar en bona santat fisica e mentau shens respectar los equilibris de la natura. Totun, cada dia que patim d'agressions mei o mensh importantas qui fragilizan lo noste equilibri energetic e vibratòri. En medecina chinesa, aqueste equilibri qu'ei explicat dab las nocions de yin e yang. Quan los problèmas de santat que s'apièlan, quan n'arribam pas mei a trobar l'origina de las malaudias, que cau ensajar un reequilibratge energetic dab los asimants. Quin fonciona ?

Aquiu l'article sancèr de Cecília Mesple

Cronica Curiós de santat : Quan lo magnetisme suenha

Tot, dens la nosta vita qu'ei ua question d'equilibri, e ne podem pas demorar en bona santat fisica e mentau shens respectar los equilibris de la natura. Totun, cada dia que patim d'agressions mei o mensh importantas qui fragilizan lo noste equilibri energetic e vibratòri. En medecina chinesa, aqueste equilibri qu'ei explicat dab las nocions de yin e yang. Quan los problèmas de santat que s'apièlan, quan n'arribam pas mei a trobar l'origina de las malaudias, que cau ensajar un reequilibratge energetic dab los asimants. Quin fonciona ? En polarizar las extremitats deu còs, on son concentradas lo mei de terminasons nerviosas, la circulacion energetica que torna. Atau que cream un camp magnetic actiu, e que preservam las nostes resèrvas energeticas. Lo reequilibratge energetic que's practica en pausar las paumas de las mans o las plantas deus pès sus asimants. Lo reequilibratge energetic dab las mans qu'influencia tota la partida superiora deu còs : lo cap, lo cervèth, los ueis, lo nas, las aurelhas, la boca, lo torax, los braç, las espatlas, los cobdes, los punhets, las mans, los paumons, lo còr, lo hitge, los arnelhs. Lo camp magnetic aus pès qu'ageish sus la partida inferiora deu còs : l'estomac, la meussa, lo pancreàs, los intestins, la veishiga, los organes sexuaus, lo baish de l'arrea, las cueishas, los jolhs, las camas, los cavilhars, los pès. L'asimant « pòle nòrd » que's posiciona a la man o au pè de dreta. L'asimant « pòle sud » a la man o au pè d'esquèrra. Los asimants qu'an ua color o ua marca distintiva entà reconéisher la cara sud e nòrd mei aisidament. Segon la vòsta sensibilitat, que i aurà ua hèra leugèra sensacion de calor quan lo camp magnetic ei hicat en plaça. La sensacion de benestar qu'ei a còps immediata. L'energia atau balhada que libèra los blocatges, las tensions. Lo còs qu'arretròba ua fluiditat dens totas las foncions vitaus. En principi la sesilha que dura vint minutas. E que la cau practicar cada dia de cap a un benestar generau, o cada còp qu'en sentéishetz lo besonh. Las personas espasmofilas qu'an aciu un bon mejan de desténer los lors muscles. Los pairs que trobèran dilhèu un mejan naturau de har baishar las tensions deus lors mainats iperactius shens medicacion.

Magnetizar l'aiga

Ua auta aplicacion benefica deus asimants qu'ei l'aiga magnetizada. Qu'avetz dilhèu entenut a parlar de l'aiga meravilhosa. L'aiga sosmetuda a un camp magnetic, qu'a las medishas proprietats que l'aiga d'ua hont termau de hauta qualitat. Com si aquesta aigas qu'an a traucar un perhons rocalhós dab camps magnetics poderós. Devath l'accion d'un camp magnetic dab asimants, las moleculas de l'aiga que s’estructuran per tres. Cada molecula d'aiga qu'ei com un dipòle electric, dab 2 petits atòmes d'idrogèn (positiu) e un atòme d'oxigèn (negatiu). Devath l'accion d'un camp magnetic, las moleculas que s'organizan diferentament. Las soas proprietats que son amelhoradas. L'aiga magnetizada qu'ajuda per exemple au drenatge. Monique Vial, especialista de magnetoterapia, dens lo son libe « precís de magnetoterapia » qu'explica qu'aquesta aiga que dissòlv mei los gas e donc l'oxigèn. Los mineraus de l'aiga magnetizada que son solubles mei rapidament. Las reaccions quimicas que's passan mei aisidament. La circulacion de la sang qu'ei melhorada dens la mesura que la magnetizacion que contraria los solins dens las artèrias, dab la soa capacitat mei hòrta de dissòlver los elements que l'aiga encontrada. Atau, l'aiga magnetizada que haré esvaní's los calculs d'arnelh, baishar lo colesteròu, lo diabèti, que combateré la constipacion, las insuficiéncias biliaras e epaticas. Lo principi qu'ei simple : crear un camp magnetic qui trauca l'aiga. Entà la magnetizacion la traca deu recipient n'a pas nada importància. La botelha, lo pishèr, la tassa que pòt estar de veire, de tèrra, o de plastic. Dus blòcs asimants ferrites de detz centimètres carrats que convienen entà magnetizar un litre d'aiga en trenta minutas. L'aiga que consèrva las soas proprietats pendent vint-e-quate òras o quaranta-ueit òras au refrigerator. Hicatz un blòc en devath deu recipient, pausatz l'aute au dessús. Qu'existeish tanben estuits de botelha hèra practics o supòrt en U entà magnetizar tot un pack de 6 botelhas d'aiga.

Melhorar lo som

Los asimants, en melhorar l'estat de tension deu còs, que facilita l'adromida. Que permeten tanben lo som lent pregon. Un som de qualitat, que depen de mantuns factors com lo brut, la lutz, la digestion, l'estrès. Que cau examinar tanben d'autes factors en particular l'environament de noste liet. Ne pensam pas pro sovent au au factor magnetic. Que çò qu’ei ? Lo camp magnetic terrèstre normaument omogenèu qu'ei perturbat peus elements magnetics de la maison, (cables electrics, herratalha deu beton, aparelhs electrics...) La Tèrra que seré tanben vestida d'un vast hialat de radiacions magneticas dab punts d'intensitat mei hòrta. Que s'apèran nods de Hartmann e que son nocius. Pendent lo som qu'ei important de ne pas demorar dens ua zona de desformacion deu camp magnetic. Quan avetz lo som perturbat, ensajatz los diferents tipes e derivats deus asimants : mascas entà hicar suus ueis, sus-matalàs, coishinèras, capcerons , placas d'asimants a hicar devath lo matalàs, plaid de viatge, cobèrta... Que restableishen un camp magnetic mei unifòrme o ua orientacion mei favorabla. Jo que tròbi qu'aquestes produits e son drin cars. Mes n'èi pas lo som perturbat e com ac dit lo lengatge popular, un bon som n'a pas nad prètz. Qu'ei avut quauques testimònis tanben sus jòias qui foncionan hèra plan : braçalets, corets... A vosautes de m'ac díser !

Cecília Mesple

Octòbre Ròse, un mes d'animacions e de sensibilizacion au càncer de la popa

La manifestacion « Octobre ròse » qu'estó creada en 1994 per la Liga nacionau contra lo càncer. La soa tòca qu'ei de sensibilzar au despistatge e que hica en davant los factors de risques e los tractaments possibles. Si lo càncer ei detectat de dòra, que i a 9 escadença sus 10 de guarir. Segon l'Institut nacionau deu càncer, la mortalitat per càncer de la popa qu'a globaument diminuit de 1,5 % per an enter 2005 e 2012 en França.

Atau, capvath l'exagòne, projeccions de filme, conferéncias, musica e talhèrs que son organizats per la causa. Marselha qu'ei ua vila hèra engatjada dens la luta contra aqueth càncer dab servicis de medecina a la punta, en matièra de recèrca, de tractaments navèths e dens l'ajuda associativa de las malautas.

Curiós de santat — Quin consumir frutas com cau ?

Las frutas que contienen sucres simples naturaus, qui ne hèn pas pujar la glicemia tròp viste e que passan aisidament dens la sang.

Com l'avèm vist dens la cronica passada, lo consum de sucre deverà baishar lo mei possible en tot deishant los produits de l'industria agroalimentari. Que'vs perpausi de remplaçar chic a chic los aliments rafinats per los aliments sancèrs. Totun que'ns cau trobar 10 deu cent deu sucre de la nosta alimentacion dens lo glucides simples. Lo sucre integrau o raspadura qu'ei interessant. Que contien las vitaminas e los mineraus qui ajudan a la lor digestion. Mes dab la fruta avisatz-ve ! Que s'i hasèvan sovent las meas duas mairbonas a díser : « Non mercès, nat fruta, n'ac digerí pas ! » Ne comprenèvi pas aquò. Dempuish, quauquas lecturas que m'an balhat responsas.

La fruta aquosa que son poma, pera, cerisa, ahraga, persec (lo qui m'agrada lo mei), melon, arrasim, tomata, pompelmós, irange, ananàs... Aquera fruta aquosa ne son pas digeridas dens l'estomac, mes dens l'intestin. La preséncia de fruta fresca au repaish, dab carn, hariós, legumes, atau estancats pendent mantuns òras que provòca ua gèna mecanica, e fermentacions. La fruta fresca pendent un repaish que son responsables de flatuléncia e apielada de sang dens l'estomac qui perturba lo transit. Lo mei bon moment entà minjar fruta fresca qu'ei a 17 h, 17 h 30, quan sia l'estomac vueit. Atau la fruta que passa hèra viste dens l'intestin on ei aisidament digerida.


Consum rasonable
La fruta aquosa que'ns balhan 75 a 85 per cent de l'aiga, vitamina C, quauques vitaminas deu grop B, ua quantitat infime d'acides aminats e gras, 5 a 18 per cent deu noste sucre (fructòsa) e hèra d'acides citric, tartric, malic, entà parlar sonque deus principaus. Los nutricionistas que recomandan particularament lo consum de fruta entà la vitamina C, reputada tà re-tardar l'envielhida de las cellulas. Qu'ei shens comptar dab aqueths acides citric, malic, tartric que subeishen diferentas accions de la part de l'organisme. Dab tots aqueths acides qu'èm au bèth miei deus problèmas de la fruta. L'usatge excessiu de fruta que pòt desmineralizar, fatigar e har vàder hredolic l'organisme.

Quan sian plan oxidats, qu'ei a díser plan transformats en gas carbonic e aiga, alavetz la fruta que desgaha los bons nutriments shens estar vector de nosença. Que's passa de lis entaus individus actius e resistents au hred, de temperament sanguin.
 
Tà ua bona oxidacion
Quan los acides de la fruta e sian pas oxidats de com cau, l'organisme que desliura la soa sau minerau. Atau lo càlcium, lo magnesium, lo potàssium que serveishen a neutralizar los acides e que crean d'auta sau eliminada per via urinaris o per las mucosas oraus e pulmonaras. Lo terrenh que pòt vàder propici a las infeccions. Las personas qui n'oxidan pas plan los acides de la fruta que son tostemps hredolics e fatigables. Que'us caleré pas consumir mei de 100 gramas de fruta fresca pendent l'ivèrn e 200 gramas pendent l'estiu, cada dia. Dens lo cas contrari, la persona pòt vàder nerviosa, desmineralizada, los unglas que's poden desdoblar, las dents que's carian. Los òs vaden mei copadís. Las mucosas que vaden ipersecretejantas. Que pòt i aver ua caduda deu sistèma immunitari.

Tà un explic mei precís aquiu çò qui's passa dens la sang : Lo PH de la sang qu'ei de 7,34 e 7,4. Entà estar en bona santat, lo PH de la sang que deu demorar invariable. Ne parli pas ací deu PH de l'estomac. Si lo PH de la sang que puja de cap a 7,7 qu'ei la crisi de tetania. En devath de 7 qu'ei grèu tanben. Lo PH de la sang qu'ei quauquarren de hèra protegit dens lo noste còs. Entà evitar las variacions deu PH de la sang, l'organisme que balha saus mineraus. Atau los acides de la fruta que son neutralizats, totun, en medish temps, que perdem totas las nostas vitaminas. Ne cau pas jamei balhar un beveron de shuc de fruta aus nins. 100ml de shuc d'irange entà un mainat de 5 kg que representa en proporcion un litre e mieja de shuc d'irange bevut d'un còp entà un òmi de 75 kg.

Pendent la sason hreda, o en climat hred, l'organisme qu'oxida mau, que brutla hèra mau aqueths acides de la fruta aquosa. Aquò que'ns dicta l'instint, las envejas espontanèas : qu'avem la hami d'ua fruta per un bon vrèspe d'estiu. Aquera fruta que'ns refresqueish e balha la sensacion de mei suportar la calor. Si lo climat ei hred, d'instint ne volem pas nada fruta.


Tres sòrtas de frutas
Qu'avem parlat de la fruta aquosa. Mes que i a tres autes sòrtas principaus de frutas.

1-La fruta oleaginosa : las amètlas, averans, esquilhòts, pistachas, nòga de cajó, sesame  que son rics en mineraus e acides gras essenciaus. Los esquilhòts qu'aucupan ua plaça a despart, pr'amor qu'an un equilibre parfait dens los apòrts en omegas 9, 6 e 3. Que podem minjar la fruta oleaginosa lo matin dab pan entà esdejuar. Que las podem mesclar dab las cruditats deu repaish a mieidia. A vrèspe dab fruta fresca que's digerín hèra plan.

2-La fruta amilacèu que son las bananas e las castanhas. Que sembla a las cerealas pr'amor deus 40 deu cent d'amidon. Aquera fruta que pòden constituir un repaish deu matin dab ua bevuda cauda o un vresperòt. Pendent lo repaish, bananas o castanhas hèn vàder la digestion mauaisida e riscs de flatuléncia.

3- La darrèra sòrta de fruta que son la fruta seca : Arrasims secs, higas, dàtils, pruas secas, abricòts. N'an pas los trebucs de la fruta aquosa. Qu'an perdut las lors acides. Totun que son mei digèstes quan sian consomat soletas. Atau com la fruta aquosa, la fruta seca no deu pas minja's dab autas causas. En ivèrn quan agitz ua petita hami, consumitz fruta seca entà completa la petita porcion de fruta fresca o per exemple au matin abricòts secs dab ua bevuda cauda.

Cecília Mesple

Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 
Capture decran 2017 11 28 a 11.48.12

Papagai

Papagai es la revista occitana dels pichonèls. Prepausa cada mes doas istòrias, de jòcs, una pagina de vocabulari e un dorsièr en rapòrt amb un dels dos 

+