Uei : 18/06/2018

Proposicion d'ua « Eurocollectivitat d'Alsàcia »

Los presidents deus dus departaments deu Baish-Rin, Frédéric Bierry, e deu Haut-Rin, Brigitte Klinkert, qu’an remés aquesta setmana au prefècte de la region, Jean- Luc Marx, un projècte d’« Eurocollectivitat ». Que militan tà la creacion d’ua collectivitat territoriau d’Alsàcia a estatut particular. Dens lo lor rapòrt, mantuas proposicions dont la fusion de las assembladas departamentaus deu Haut- Rin e deu Baish-Rin. Los departaments que serén mantienuts administrativament, dab las lors duas prefecturas d’Estrasborg e de Còlmar. Que demandan d’obtiéner la geréncia taus domenis qui segueishen : la formacion e l’emplec, l’accion transfrontalèra e los hons europèus, lo bilingüisme, los transpòrts, lo torisme, la cultura e l’espòrt, lo lotjament e la transicion energetica.

« Lo noste projècte ei que d’ací 2050, l’Alsàcia e posca estar lo purmèr territòri transfrontalèr integrat e europèu mercés au desvolopament de mòdes navèths de cooperacion transfrontalèra, en ligam dab l’Alemanha e la Soïssa », ce expliquèt dens lo projècte. La presidenta deu Conselh departamentau deu Haut-Rin e lo president deu Conselh departamentau deu Baish-Rin qu’avèvan aviat au mes d’abriu ua consulta ciutadana tà que cadun e posca balhar lo son avís suu projècte d’ua collectivitat navèra tà l’Alsàcia. Mei de 13 000 contribucions, sia 92 % deus votants, qu’èran a favor deu projècte de creacion d’ua collectivitat territoriau unica au demiei de la Region Grand Est. Lo prefècte deu Baish-Rin qu’èra estat cargat en heurèr passat per Matignon d’estudiar ua fusion possibla enter los dus departaments alsacians, mes « shens reméter en causa la Region Grand Est ». Que deu remétre lo son rapòrt a Matignon d’ací lo 20 de junh.

Audiovisual public, una reforma esperada per los qui vòlen mai d'occitan a la television

La manifestacion del 3 de febrièr passat aviá recampat mai de 200 personas per aver « mai d'occitan a la television ». Es lo Collectiu Occitan qu'es a l'origina d'aquela reivindicacion. « A l'ora de la reforma de l'audiovisual public, la question de las missions de la television publica en region se pausa. Quand d'antenas localas son menaçadas de disparicion, lo Partit Occitan prepausa al contrari de renfortir l'ancratge territorial de France 3, per èsser una vertadièra fenèstra d'actualitat de nòstras regions e un ligam amb los ciutadans, a costat d'autras iniciativas privadas com ViàOccitanie », aviá escrigut lo PÒc dins un comunicat abans aquela la manifestacion. « Justament, cal pas faire una contradicion, la television sul web e la television classica son compatiblas. Si on obten mai de preséncia de la lenga a la tele, serà totjorn benefic per l'occitan. I a encara de monde qui agachan la television ! », çò nos diguèt Joan-Pèire Laval del Collectiu occitan.

Lo Collectiu Occitan recampa dotze movements qui demandan « una preséncia quotidiana d'emissions en lenga d'òc sus l'antena e la transformacion de France 3-Occitània en una vertadièra cadena regionala a vocacion generalista ». Lo Collectiu organiza una novèla mobilizacion aquel dimècres 6 de junh a 18 oras 30 davant los sites de France 3 Tolosa, Rodés, Carcassona, Nimes e Montpelhièr.

Se ditz en contacte amb de deputats e declara que serà « hòrt present » al moment de las discutidas del projècte de lei audiovisual a l'Assemblada nacionala e al Senat.

Al moment de sos vòts oficials al mes de genièr, lo President de la Republica aviá fach conéisser sa volontat de refondar l'audiovisual public. Declarèt qu'un debat larg amb l'ensemble dels professionals èra necessari. Sas prioritats : donar una informacion de qualitat en desvolopant l'informacion de proximitat, prepausar de programas distinctius justificant los mejans atribuits, mas tanben « prene en compte la dimension europèa de la creacion en favorizant la co-produccion ». Emmanuel Macron s'èra justificat en disent que l'audiovisual public èra « un miralh tendut a la nacion e deu èsser pensat per totes los publics, totas las practicas ».

La ministra de la Cultura, Françoise Nyssen, presentèt aqueste matin las orientacions de la reforma de l'audiovisual public en preséncia dels dirigents de France Télévisions, Radio France, France Médias Monde, l'Institut national de l'Audiovisuel, TV5 Monde e Arte. Preconiza l'aumentacion dels programas regionals de France 3 e la supression de la cadena France 4 de la television hertziana. L'audiovisual public deuriá investir dins lo numeric, 150 milions d'euros mai per an d'aicí 2022. La reforma cerca a respondre als novèls usatges (programas a la demanda, al numeric, etc.) e a crear mai de sinergias entre los grops. Deuriá far d'economias entre 250 e 500 milions d'euros d'aicí 2022, mai que mai a France Télévisions.

Fòto : País Nòstre

Polemica partit Podemos : una crompa als antipòdes del discors de Pablo Iglesias

Aprèp l'escandal que provoquèt la descobèrta de la villà a mai de 600 000 euros a Galapagar (a 40 km de Madrid) del menaire del partit Podemos, ce sembla que los militants o fagan totjorn fisança. 68 % dels aderents consultats entre dimars 22 e dimenge 27 de mai an respondut « òc » a la question « E volètz que Pablo Iglesias e Irene Montero [sa companha e pòrtaparaula del partit] contunhan al cap de Podemos ? ».
L'informacion de la crompa pel coble d'una villà provoquèt comentaris ironics de totes los partits de drecha e d'esquèrra. Segon sos detractors, Pablo Iglesias se reivindicariá d'una casta qu'es pas la sieuna: ditz que demora dins un barri popular de Vallecas a Madrid e crompa de vestits al supermercat mas « pren pas jamai los transpòrts en comun » e « aquesís un penthouse de 600 000 euros ». Lor aquisicion trenca amb lo discors d'esquèrra radicala, de còps anti-sistèma qu'an dempuèi 2014.

En 2017, Pablo Iglesias foguèt tornat elegir amb 89 % de las voses, secretari general de Podemos.

En cò nòstre, Jean-Luc Mélenchon sosten lo líder de Podemos e sa femna dins aquela situacion dificila. Lo candidat de la France Insoumise aviá conegut un moment delicat a la publicacion de son patrimòni amb notadament la crompa d'un apartament parisenc a 800 000 euros en 2014. Mélenchon qui sostenguèt Podemos a sa creacion, demora sus sas posicions en declarant : « Lo partit mediatic espanhòl frapa Iglesias e sa companha Montero, dos dirigents de Podemos ! En causa, lo prètz de lor casa crompada a crèdit ! Metòdes poiridas jà utilizadas contra l'alemand Oskar Lafontaine, ce publiquèt sus Twitter, Insomés espanhòls, tenètz còp a l'entor de vòstres líders ! ».

Fòto : Pablo Iglesias ©PODEMOS

Los gavidaires deu jornau independent Le Ravi davant lo tribunau lo 15 de mai per difamacion

Com La Marseillaise e Marsactu, Le Ravi qu’ei un jornau de premsa independenta. Qu’entra dens la soa tretzau annada. La redaccion que mescla los genres, qu’ei a díser qu’ei a l’encòp un jornau dedicat a l’enquèsta, a l’investigacion, mes tanben a l’enveja de restablir los fondamentaus d’ua profession, la deu jornalisme.

« Lo jornalista qui passa per la frinèsta quan las pòrtas e son barradas », çò nse ditz Michel Gairaud. En començar e tà clavar Le Ravi, que s’i pòt trobar dessenhs de premsa, un reportatge dessenhat. L’irreveréncia, un genre qui torna vàder popular despuish l’ataca a la redaccion de Charlie Hebdo lo 7 de genèr 2015.

Encontre enter l'ambaishador american au Cameron e lo President de la Comission nacionau tà la promocion deu bilingüisme a Yaoundé ger

L'ambaishador deus Estats-Units au Cameron e lo President de la Comission nacionau tà la promocion deu bilingüisme deu multiculturalisme que s'encontrèn ger a Yaoundé, capitala politica deu Cameron.

La question deu partatge d'experiéncias enter los dus país pertocant a la gestion de las dificultats ligadas au multiculturalisme, qu'estó discutida peus dus òmis.

Peter Mafany Musonge, President de la CNPBM que presentè las missions realizadas per la Comission nacionau dens l'encastre de la resolucion de la crisi qui segoteish las duas regions anglofònas deu Cameron.

Despuish octobre de 2016, las regions anglofònas deu Nòrd-Oèst e Sud-Oèst deu país que viven ua crisi sociopolitica de las violentas. Los activistas d'aqueras regions qu'arcastan au govèrn de marginalizar la lor zòna, e d'estar espotits peu sistèma legislatiu e educatiu francofòne. Las protèstas deu començar que's son lèu transformadas en afrontaments murtrèrs enter las fòrças de securitat cameronesas e los partisans d'ua secession de las regions anglofònas.

Lo plan d'accion de la CNPBM que preved un « Tour deu pòble » de las dètz regions deu Cameron. L'ancian Purmèr ministre deu Cameron qu'a contat au Peter Henry Barlerin, ambaishador american, la soa visita a Buea dens lo Sud-Oèst on encontrè a « personas ressorças ».

Los Estats-Units que's disen prèsts a acompanhar la Comission nacionau tau bilinguisme e lo multiculturalisme dens las soas accions sus aqueths punts. Peter Henry Barlerin que declarè : « Los Estats-Units que son un centre màger dab ua grana mescla de multiculturalisme dab monde qui vienen deu monde sancèr. N'ei pas tostemps aisit. Qu'avem ua longa istòria dab lo multiculturalisme ». Aqueth que reconeish que Cameron a au mensh 275 lengas e culturas locaus diferentas, « çò qui ei beròi mes a còps mauaisit tà que lo monde e poscan tribalhar amassa ».

Universitat en cauma - Un apèl a la cauma illimitada « fins al retirament de la lei orientacion e capitada dels estudiants » lançat

Lo movement estudiant contunha dins encara quatre universitats totjorn blocadas, Tolosa Jean Jaurès, Rennes II, Nanterre e París-VIII. Las universitats de Lion-II, Nantes, Ais-Marselha e Sorbòna Universitat, son elas blocadas o ocupadas en partida. Dempuèi lo 20 d'abril, la polícia es mandada dins d'unes establiments per evacuar los blocaires com per exemple a Metz, Nancy e Montpelhièr (Paul Valèry).

Ara, en plen periòde d'examèns, la question del debanament dels examèns es cauda. Dins facultats, las espròvas se debanan jos tension amb la preséncia de policièrs davant las salas. Estudiants causiguèron de rendre fuèlha blanca en signe de protestacion e professors an decidit de non pas far passar d'unes parcials.

La Dintrada s’aprèsta !

Lo forum ciutadan occitan pausarà sas valisas a Tolosa lo 22 de setembre 2018. Mas quinas seràn las tematicas ongan ? Començam d’i véser mai clar ! Lo comitat de pilotage que recampa de jornalistas anóncia una « Dintrada » plan diferenta de l’an passat ambe lo matin un estat dels luòcs d’Occitània, region per region. La tòca es de tornar trapar la dimension « pan-occitana », de metre en evidéncia çò que marcha, e çò qu'avança pas. Per cada region, de personalitats faràn un bilanç que cobrirà totas las tematicas que pertòcan los ciutadans occitanistas : ensenhament de la lenga, mèdias, cultura, democracia. En mai, un convidat europèu pausarà son agach sus la situacion nòstra en comparason ambe çò que se passa dins son país e pertot en Euròpa. Un debat seguirà aquelas presentacions per completar o precisar las causas. Aurem aital en fin de matinada un panoramà pro complet de l’espandi occitan, de sas fòrças e de sas flaquesas.

L’aprèp-dinnada promet d’èsser mai ofensiva ambe dos grands talhièrs que se debanaràn en parallèl. Los participants deuràn causir entre los dos questionaments prepausats : « Una granda manif ? » o « Una novèla organizacion politica ? ». Efectivament, 50 ans aprèp mai de 68, l’ora es venguda de se bolegar ! De personalitats seràn convidadas per s’esprimir sus cada problematica, e d’activitats en pichons grops seràn prepausadas.

Per clavar la jornada, una plenièra permetrà de far un bilanç de cada talhièr, e serà seguida d’un escambi… que se perlongarà de segur a l’aperitiu !

 

Brunò Cecillon, Uc Jourde, Esther Mimart-Rangel, Gisèla Naconaski, pel comitat de pilotage.

 

Fòto presa lo 26/04 per un acamp telefonic del comitat de pilotatge a Ràdio Occitània, Tolosa (31). (DR)

Los contractes ajudats inutiles ?

[Dossièr dens LS n° 1085]

Lo candidat Emmanuel Macron qu’ac avèva anonciat pendent la soa campanha presidenciau, que comptava plan reformar lo Còdi deu tribalh un còp arrivat au poder. E que sembla seguir los sons engatjaments.

La lei tribalh, portada per Myriam El Khomri qu’avèva per mira d’ aumentar la competitivitat de las enterpresas en balhar-us mei de soplessa e amelhorar las condicions de tribalh deus salariats. Lo President Macron que perpausarà 5 ordenanças tà la refòrma deu Còdi deu tribalh qui seràn presentadas oficiaument au moment deu Conselh deus ministres deu 22 de seteme. Si son validadas, las ordenanças qu’entraràn en aplicacion a la fin deu mes de seteme. Lo contiengut d’aqueras modificacions qu’estó presentat peu Purmèr ministre, Edouard Philippe e la ministra deu Tribalh, Muriel Pénicaud, pendent ua conferéncia de premsa lo 31 d’agost. Atau, lo Còdi deu tribalh qu’averà vocacion de simplificar la vita de las enterpresas, la refonta de la formacion professionau e... haro suus emplecs ajudats. Qu’ei aquiu que i a un problèma. Lo govèrn que voleré limitara 110 000 lo nombre de contractes ajudats qui serén finançats au dusau semèstre de 2017. Aquera baisha de 40 % que deveré mei que mei aver contracòps en lo sector nonmercadèr qui n’aurà pas mei dret a nat contracte ajudat. Aqueth tipe de contractes que demoraré reservats prioritàriament a l’Educacion nacionau, l’Otramar e lo sector sanitari e sociau. Lo purmèr dispositiu de luta contra la pujada deu caumatge en çò deus joens « Tribalhs d’Utilitat Collectiva » (TUC) qu’estó creat en 1984. Despuish, qu’estó remplaçat per un ahoalh de contractes diferents dont los « emplecs joens » aviats devath la mandatura de Lionel Jospin. Fin de las annadas 90 e començar de 2000, lo nombre d’emplecs ajudats qu’espeta, puish que diminueish dab la baisha deu caumatge. A partir de la soa arribada au cap deu país, Nicolas Sarkozy que decideish de diminuir lo nombre de contractes ajudats, dab arguments identics aus presentats peu govèrn d’Emmanuel Macron uei lo dia. Totun, dab la hauça deu caumatge e la crisi economica, Nicolas Sarkozy que’s rend a l’evidéncia e que reabilita aqueths contractes. E qu’ei en 2012 que los contractes ajudats e seràn remobilizats dab la creacion deus « emplecs d’aviéner » devath François Hollande.

Son necessàrias los contractes ajudats ?

En periòde de crisi economica, qu’ei estat constatat que los contractes ajudats avèvan un efèit de relança de l’activitat qui engendra poder de crompa en melhorar las condicions de vita deus beneficiaris. Segon las corbas, los contractes ajudats que son un utís deus bons entà diminuir a tèrme brac lo caumatge. D’après un estudi de l’Institut Nacionau de l’estatistica e deus Estudis Economics (INSEE), quan lo nombre de beneficiaris de contractes ajudats baishe, lo nombre de caumaires qu’aumenta. Lo non-renovelament d’aqueths contractes deu dusau semèstre de 2017 qu’averà per consequéncia l’arribada de 62 000 demandaires d’emplecs mei. Suu tèrme long, los contractes ajudats que serén mei utiles dens lo privat que non pas dens lo public. Dens lo privat, un ancian beneficiari qu’averà mei d’escadença d’estar en CDI (31 %) qu’ua persona qui n’ei pas passada per un contracte ajudat, quan dens lo public, los ancians beneficiaris qu’an mensh de 8 % d’escadença d’estar en CDI e enqüèra mensh d’estar en emplec non-ajudat. Entà explicar la baisha deu nombre de contractes ajudats, lo Purmèr ministre qu’avèva declarat que n’èran pas un utís vertadèr d’insercion suu mercat deu tribalh. Mes, la DARES, lo servici d’estudis e d’estatisticas de ministèri deu Tribalh qu’avè publicat en març passat ua analisi sus la situacion professionau deus beneficiaris d’aqueth tipe d’emplecs 6 mes après la fin deu lor contracte : 67 % de las personas sortidas en 2014 d’un CUI-CIE e 41 % de las personas sortidas d’un CUI-CAE avèvan un emplec 6 mes après, « en mei d’aquò, 71 % deus sortents de CUI-CIE qu’estón embauchats en CDI en 2014 ». En 2015, los contractes ajudats que permetón la creacion de 21 000 emplecs.

Fin de l'emplec ajudat, fin de las escòlas immersivas ?

La baisha deus contracts ajudats decidida peu govèrn aqueth fin d’estiu qu’ei luenh de har l’unanimitat. Ua grana partida deus sectors professionaus qu’ei tocada, e l’inquietud que s’espandeish.

Aqueth còp dur portat au sector associatiu que seré devut a « la noneficacitat d’aqueths contractes contra lo caumatge » e deu hèit que non sian pas « lo trempolin esperat peus tribalhaires cap au marcat deu tribalh », segon lo govèrn. « Faus ! » que respon lo partit Régions et Peuples Solidaires dont avem entervistat l’un deus membres, Pèire Costa (Fòto DR) :

p8 peirecosta

 

La Setmana — Qu’afirmatz dens un comunicat de premsa que los emplecs ajudats an ua utilitat sociau au contra de çò que declara lo govèrn ?    
Pèire Costa — Dins lo comunicat m’apiègi sus un rapòrt de l’INSEE publicat en març de 2017. Pensi que lo problèma d’aquel govèrnament es qu’a un posicionament public diferent. Comprenèm que lo govèrn aja besonh de far estalvis e cerque totes los mejans de’n far, mas es una causida politica de diminuir de 5 euros los APL, de suprimir la taxa d’abitacion o de suprimir los emplecs ajudats. Çò que ditz lo govèrn e sos defensors es que l’economia non pòt pas èsser encara ajudada, segurament, lo CICE (Crèdit d’Impòst per la Competitivitat e l’Emplec) es ajudat e es una decision e permet de sosténer l’economia. Los arguments avançats pel govèrn son faus. Lo principi pels emplecs ajudats es que l’Estat dona moneda a l’emplegaire per poder emplegar de monde, que siá a un caumaire o un emplec ajudat, dins un cas com dins l’autre, la moneda es lo produch de l’Estat, mas la diferéncia es que l’emplec ajudat produtz una activitat, un servici mentre qu’un caumaire cauma.

LS — Qué pensatz deu procès hèit au contracte ajudat, de la soa utilitat purmèra qui ei destornada au profièit de las associacions qui l’utiliza ?
PC — Es escandalós ! Dins nòstre comunicat, mencionam la situacion dins las escòlas immersivas, an besonh del sosten public, de l’Estat per pagar los ensenhaires perque l’escòla es contractualisada. An besonh de las collectivitats publicas territorialas per sosténer lo fonccionament de l’escòla, vòl dire las ajudas mairalas, los animators, tot plen de monde que son indispensables. Suprimir los contractes ajudats, Diwan lo diguèt e imagini qu’es parièr per Calandreta, es suprimir 3/4 dels emplecs nonensenhaire e es obligar las escòlas immersivas a far autrament e aquò es tanben una decision politica. Ai començat de trabalhar al Collègi Calandreta de Grabèls en 2002, ai començat amb un contracte emplec joven e totes los animators avián contractes ajudats, pas d’animator, pas de collègi. Ai cercat a compréne çò qu’èran los emplecs considerats com ajudats en França e ai descobèrt que i aviá tanben la formacion en alternància, l’aprendissatge e la professionalizacion. En 2016, 590 000 personas èran en alternància.

LS — Quaus son las consequéncias deu gèl deus contractes ajudats ?
PC — Es tot lo mitan associatiu que risca de desaparéisser. Elegits dison que lo Macron a rason, cal professionalizar l’accion, cal aver de monde competents e disponibles, cal aver moneda e subvencions, mas si ne podem pas mai comptar sus las collectivitats territorialas, serà complicat. Es la mòrt del sector associatiu, cultural, esportiu tanben. L’ancian seleccionaire de la còla de França de fotbòl mandèt un tweet per dire que si los contractes ajudats èran suprimits, aurà un impacte negatiu dins lo mond fotbalistic amator. Espèri que lo monde van reagir, van prene consciéncia de la gravitat de la situacion, l’IEO o Calandreta. Quand anatz sul site del servici de l’emplec, la màger part dels emplecs prepausats son d’emplecs ajudats, com va faire l’IEO per fonccionar ? Com va faire Calandreta per fonccionar ? Imagini que lo malhum de las ràdios associativas, i a de contractes ajudats pels jornalistas e los tecnicians, e al meteis temps, aqueras personas son en activitat, perpausan quicòm. 

Entervista Fanny Lartigot

La maurescaduda deus contractes ajudats

p8 lremdeputat

Jean-Marc Zulesi (Fòto HI13300), deputat LREM de las Bocas de Ròse qu’escrivó un article suu Huffingtonpost suu subjècte. Titolat « Pr’amor que vedem a tèrmi long, que’ns cau aver lo coratge de reformar los contractes ajudats », l’elegit que denóncia « l’amnesia » d’uns gavidaires politics, per la màger part « de dreta ». Que rapèra qu’aqueths gavidaires s’insurgivan contra la mesa en plaça deus contractes de generacion e deus emplecs d’aviéner « au nom de la luta contra lo gaspilhatge deus dinèrs publics » pendent lo quinquenat passat, e que portèn lo programa presidenciau de François Fillon qui preconisava reduccions drasticas de la despensa publica en suprimir enter autes los contractes ajudats. Segon lo deputat LREM, que son los medishs qui defenen lo quite fondament d’aquestes contractes. E lo deputat d’ajustar « pas jamei [los contractes ajudats ] n’an demostrat la lor eficacitat dens proporcions qui poscan justificar l’amplor deus finançaments publics engatjats ».

Rentrada mauaisida en las escòlas immersivas
Las manifestacions que's multiplican despuish l'anóncia

Las escòlas immersivas en lenga bretona, las Diwan, tocadas de front per aquera baisha de contractes ajudats, que reagín lèu a l’anóncia governamentau. Atau, lo 2 de seteme, cap a 1200 personas que’s mobilizèn plaça de la Résistance a Quimper, entà sostiéner las escòlas. Un medish acamp que’s debanè lo quite dia a Nantes. 45 pòstes en contractes ajudats qu’estón refusats e 39 autes que demoravan miaçats. Diwan qu’avèva alertat los elegits locaus : « Que demandam ua solucion en urgéncia tà la rentrada. Diwan qu’exerceish ua mission de servici public dab mejans tròp precaris. Que cau desblocar los contractes », perpaus cuelhuts per France 3 Region. Lo 8 de seteme, las escòlas immersivas bretonas qu’avón confirmacion per la prefectura de Bretanha que tots los contractes ajudats èran estats renovelats. Los 104 contractes qui arribavan a tèrmi enter lo 1èr de seteme e lo 31 de deceme de 2017 que seràn tanben renovelats. Las manifestacions previstas los dias seguents que son estadas mantienudas, lo hialat Diwan que desira « demandar un estatut » e que contunha la soa luta. Diwan qu’ei 46 escòlas, 6 collègis e 1 licèu sus 5 departaments de Bretanha, sia 4 270 escolans. Costat occitan, las escòlas Calandreta n’an pas reagit d’ua sola e medisha votz mes separadament. Com ac hasó la Calandreta deu Lis en Bearn, per un comunicat de premsa enviat a las redaccions. Qu’i hè estat de la situacion deus emplegats de la soa escòla : duas personas que son emplegadas mercés ad aqueths contractes. Malurosament, lo purmèr renovelament qu’estó refusat per Pôle Emploi lo 30 d’agost passat, « sia 4 dias abans la rentrada ». L’escòla qu’estó dens l’obligacion de suprimir la garderia de fin de dia per la mantiéner lo matin e « respóner aus besonhs deus pairs qui tribalhan ». Si la situacion non cambia pas, lo dusau contractes ne serà pas renovelat tanpauc a partir deu mes de genèr, atau la Calandreta deu Lis que serà dens l’impossibilitat de fonccionar. Medisha reaccion de las parts de la Calandreta Jansemineta d’Agen. Arron un aperet de la Federacion Calandreta Bearn, ua manifestacion que’s debanè a la Hèire mustra de Pau lo 9 de seteme, au parat de la visita deu Purmèr ministre, Edouard Philippe. « Escòlas Calandreta en dangèr ! Ua solucion de tira », qu’èran los eslogans escandits peus manifestants. Ua delegacion que s’escadó a deishar un dossièr au Purmèr ministre. Au moment de l’escritura d’aqueth article, nada responsa de las parts deu cap deu govèrn. A l’escòla Calandreta de Limós, la Calandreta Limosenca, un vam de solidaritat que’s debanè au moment de l’anóncia deu govèrn. L’escòla que perd la soa gavidaira e la soa ensenhaira de francés. Los pairs d’escolans qu’an lançat ua canhòta en linha entà « conhir la manca de l’Estat ». L’escòla qu’a besonh 6 000 € entà signar lo contracte de 30 òras de la persona en sostien pedagogic e assegurar lo son salari dinc au mes de junh.

Tè Vé Òc : un emplec ajudat en dangèr

Capture decran 2018 04 25 a 15.29.16

Lisa Gros qu’ei presidenta de Tè Vé Òc, ua associacion de produccions audiovisuaus en lenga nosta, basada a Nimes. Creada en 2007, l’estructura qu’emplega ua salariada en contracte ajudat. « Avem un emplec ajudat que s’acaba fin de decembre, ne serem pas tocat perque s’acaba lèu mas çò que i a es que ne’n poderem pas prene un autre. Aquò nos mena a calcular per revisar l’emplec donc trobar de mejans financièrs per contunhar de pagar l’emplegada », çò nse hidè la presidenta. « N’i a que dison qu’es lo mejan esconut de modificar lo nombre de caumaires, per ieu, l’emplec ajudat es un trempolin per finalament crear un emplec. Après la precaritat d’un emplec CAE es evidenta, que l’avem ben vist en Calandreta e alhors. Un emplec ajudat es pas res, al cap de dos ans es acabat. Pensi qu’es domatge de levar una ajuda qu’èra preciósa per las associacions mas es una illusion de creire qu’a cada còp que i a un emplec ajudat, i a una creacion d’emplec. Es pas possible, i a pas los mejans. […] Pensi que ne serà pas la mòrt de las Calandretas per çò que vam ben trobar de solucions. Vesèm ben que de tot biais, la consideracion de l’Estat per las lengas ditas regionalas es zèro, i a gaire de causas favorablas. Me demandi cossí anam avançar… »

Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+