Uei : 19/02/2018

Garona Nauta — Lo PòC contra lo projècte d'expleitacion d'una peirièra

En Nebosan, a Mont Maurin (Garona Nauta), un projècte d’expleitacion d’una peirièra es contestat per fòrça estatjants pr’amor que d’una part aqueste es situit al ras de las Gorgas de Sava, un siti ric en vestigis preistorics (Venus de L’Espuga), gallò-romans e medievaus e d’autra part, es teoricament protegit per l’interès de la sia fauna e de la sia flòra. Dimècres 29 de noveme de 2017, lo Musèu de Mont Maurin principalament dedicat a la Villà gallò-romana e a la preistòria e tengut per la familha Miro, foguèt liurat del seu contengut per un catorzenat de gendarmas acompanhats d’ussièrs de justícia en seguida d’una decision del Centre dels Monuments Nacionals (CNM) amb lo fòc verd de la jos-prefècta de Sant Gaudenç. Cossí èsser pas trebolat per l’empreissament e l’eficacitat de l’administracion francesa per far aplicar la decision del CMN de liurar un Musèu gerit precisament per una familha que fa partida del collectiu ostil a la decision administrativa autorizant la represa de l’expleitacion de la peirièra ? Lo Partit de la Nacion Occitana denóncia un còp de mai la politica mespresanta de l’Estat francés que preferís en « província prigonda », en Occitània, privilegiar una societat privada (SARL Dragages Garonnais) al prejudici del nòstre environament, del nòstre patrimòni !

Lo Partit de la Nacion Occitana estima que lo siti de las Gorgas de Sava deu èsser preservat per encausa de son interès environamental, patrimonial e istoric. Aqueste santuari es lo nòstre ben comun : deu pas de cap de biais èsser sacrificat per d’interesses privats. Lo Partit de la Nacion Occitana exigís que los objèctes confiscats pel CMN e l’Estat francés tòrnen lèu-lèu al Musèu arqueologic de Mont Maurin. Dun biais general, lo Partit de la Nacion Occitana considèra que las descobèrtas de las furgas arqueologicas practicadas en Occitània devon demorar al país. Per exemple l’original de l’estatueta de la Venus de l’Espuga qu’es ara per ara al Musèu de l’Òme a París, deuriá logicament èsser expausada dins un musèu occitan.

Partit de la Nacion Occitana (PNO)

Senatoriaus 2017 — L'esquèrra, lo centre e la dreta deu 64 au palais deu Luxemborg

Au Senat, los Pirenèus-Atlantics que seràn representats per l'esquèrra, lo centre e la dreta dab Frédérique Espagnac (PS), Denise Saint-Pée (MoDem/Udi) e Max Brisson (LR). F. Espagnac qu'arriba en cap dab 34,04 % deus 1789 sufragis exprimits.

George Labazée dont la candidatura qu'avè hèit reagir a la senatora, n'arriba pas qu'a 11,91 % deus sufragis (213 votz). Denise Saint-Pée qu'obtien 22,86 % deus sufragis (409 votz). Jean-Jacques Lasserre, senator MoDem qu'avè decidit de non pas representà's tà las eleccions senatoriaus en junh passat. L'eleccion de Max Brisson que marca lo tornar de la dreta au palais deu Luxemborg. Lo darrèr senator de dreta deu departament qu'èra estat elegit a las eleccions de 2008.

La lista « Elgar-Amassa » deu PBN e deu Partit Occitan qu'arriba a 3,30 % (59 votz). Thérèse de Boissezon, membre deu Partit Occitan e dusau de la lista, que reagí a las resultas : « Aqueth resultat qu'ei un drin decebent e qu'ei lhèu devut a mantuns factors : la guèrra enter las duas listas PS, lo vòte utile que joguè dens la nosta desfavor. La nosta lista qu'èra compausada de 4 bascos e ua bearnesa, quan los electors vienèvan aus dus tèrç de comunas bearnesas e un tèrç deu País-Basco. De mei, lo Partit Occitan que compta quauques elegits mes mei que mei elegits de vilatjòts dont sonque un maire ei gran elector. La nosta volontat de respectar la paritat òmi-hemna que ns'empachè de presentar mei de personas entà presentar lo Bearn ». Totun, Thérèse De Boissezon qu'arremercia los electors e electoras qui votèn tà la lista e que reconeish aver hèit escambis e encontres deus interessants e encoratjants : « lo combat que contunha per las arruas, las associacions e pertot on lo monde lutan tà las lengas, los territòris ruraus e l'environament ».

Darrèr la lista « Elgar-Amassa », la lista comunista miada per Isabelle Larrouy (2,74 %) e la deu Front National, representada per François Verrière (1,12 %).

Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls. Prepausa cada mes doas istòrias, de jòcs, una pagina de vocabulari e un dorsièr en rapòrt amb un dels dos 

+