Uei : 18/06/2018

Cultura : ua huelha de rota tà la democratizar

Pendent la lor nominacion au govèrn francés, André Malraux (1959-1969) e Jack Lang (1981-1986 e 1988-1993) que hasón de la democratizacion de la cultura l’un deus axes màgers de la politica culturau de l’exagòne. L’accès a la cultura que sembla totun enqüèra mauaisit o mensh interessant a daubuns a maugrat de las politicas publicas lançadas despuish las annadas 60. Lo Conselh Economic, Sociau e Environamentau que s’encuentè de la question e que publiquè quauques dias a, ua seria de preconizacions entà ajudar au procèssus de democratizacion.

Lo Conselh economic, sociau e environamentau (CESE) qu’ei ua assemblada constitucionau consultativa compausada de representants sociaus (de la societat civila) com las associacions, los sindicats e lo patronat. Qu’a per foncion de representar au nivèu nacionau organizacions professionaus e de har la comunicacion enter los diferents actors de l’economia. Qu’ei la tresau assemblada de la Republica après l’Assemblada nacionau e lo Senat. Que conselh lo govèrn e lo Parlament sus l’elaboracion de las leis. Lo CESE qu’a ua representacion au nivèu regionau peu biais deu Conselh Economic, Sociau e Environamentau Regionau (CESER) e europèu dab lo Comitat Economic e Sociau europèu (CESE). Lo 15 de noveme passat, lo CESE que perpausè ua huelha de rota constituida de 32 proposicions entà promòver la cultura entà tots. Un debat qui arriba au moment quan lo sector culturau ei a víver mutacions aus nivèus financèr, numeric, o enqüèra economic. Uas d’aqueras proposicions que son raperets deus objectius qui existeishen dejà d’autas que son opcions navèras qui suscitan lo debat. Purmèra mesura far, la de la proposicion d’ua ajuda financèra dab la tòca de sostiéner la difusion de las culturas e de las practicas artisticas (culturas deu monde e disciplinas artisticas) pas pro representadas dens los eveniments.

Lo CESE que preconiza tanben que lo desvolopament culturau e sia integrat a las negociacions enter Estat e Regions, per exemple au demiei de las convencions e contractes de plan Estat-regions (CPER). Un diagnostic culturau per cordèra e per territòri que portaré suus besonhs. Las Direccions Regionaus deus Ahars Culturaus (DRAC) e las regions que serén implicadas dens aqueth procèssus. Au demiei de las 32 preconizacions, l’accessibilitat de las tarifas dab ua baisha de prètz d’entrada e lo desvolopament deu projècte de Pass Culture. Pass Culture qu’ei un dispositiu qui estó promés peu candidat Emmanuel Macron pendent la soa campanha presidenciau. « Aqueth dispositiu que poderé perméter non pas de consumir cultura mes d’en estar actor.ora : finançar activitats culturaus de practicas en amator, cors, libes en çò de las librerias partenàrias, plaças d’espectacle dens establiments publics », çò escriu lo CESE. E lo Conselh Economic d’ajustar : « la realitat de l’accès que passarà per un tribalh de mediacion. Aquesta que poderé trobar plaça dens los lòcs on los joens van dejà naturaument (licèus, centres de formacion deus aprendís, universitats, associacions) e estar coelaborada e coevaluada dab joens e organizacions de joens. La soa mesa en plaça generau que deveré acompanhà’s d’ua succession de fasas rapidas “ experimentacion-evaluacion-ajustament ” au mensh sus tres territòris-tèsts (vila, periferia e monde rurau) ».

p8 conseleconomic

Lo Departament deus Pirenèus-Atlantics (64) que vòu rénder l'educacion artistica accessibla

Despuish 2012, lo Departament deus Pirenèus-Atlantics qu’a lançat lo dispositiu « Grandir avec la culture ». La mira qu’ei de rénder l’educacion artistica accessibla a tots. Que s’adreça especiaument a collegians, aus pichons, a las personas handicapadas, personas en dificultat e personas atjadas. Cada annada, un aperet a projèctes qu’ei hèit entà ajudar los portaires de projèctes educatius e culturaus a la lor mesa en òbra. Los dossièrs que deven perméter aus collegians per exemple d’accedir a la cultura, peu biais d’ua òbra, au contacte d’un artista, d’un grop o d’ua estructura culturau. Que pren sovent la fòrma d’ua residéncia d’artistas dab classas de collegians. Lo Collectiu Ça-i que perpausè mercés au dispositiu, un tribalh suu conde e la legenda pirenenca de l’ors au collègi de La Seuva (64), quan la Companhia Vents et Marées que participè a l’experiéncia dab un vintenat de joens de la classa de 3au deu collègi de Bidaishe. Los artistas d’Arcad que podón profieitar tanben deu dispositiu aviat peu Departament despuish quauquas annadas. Basada a Anglet (64), Arcad qu’ei l’Associacion d’Encontre tà la Creacion Artistica, e qu’a vocacion, despuish 2003, a estar a l’escota deus artistas professionaus o emergents dens lo lor caminament artistic com dens lo desvolopament de la lor activitat. « Au demiei deus artistas de l’associacion, que n’i a qui son virats cap tà la transmission e la pedagogia, e efectivament que son e que son estats miats a animar talhèrs e har residéncias artistica dens l’encastre de “ Grandir avec la culture ” », çò nse digó Cécile Bidart, cargada de mediacion culturau a Arcad. « Qu’èm tostemps estats engatjats dens la cultura tà tots. Qu’avem tostemps hicats en plaça visitas, mustras, temps de mediacion dab artistas. Dab lo temps, mei anar mei d’artistas que son vienuts a Arcad, en díser “ que hèm talhèrs que volerem desvolopar, anar a l’encontre de joens dens barris, o escolans ”. Qu’apitèm alavetz un gropament d’artistas qui hèn intervencions », çò nse digó. A viéner suu site de www.lasetmana.fr, entervistas d’artistas dens los maines de la video e un plastician qui beneficièn deu dispositiu « Grandir avec la culture ».

Inf. : www.arcad64.frwww.le64.fr/culturesport/culture/

Òlt : Teater de l'Usine, la cultura pertot e tà tots

Capture decran 2018 04 25 a 15.54.22

En Òlt, un espaci culturau renovat que perpausa espectacles e talhèrs de descobèrta de disciplinas culturaus a mendre còst. Segon los gavidaires de l’estructura, la cultura de qualitat, qu’ei un dret tà tot lo monde.

En Òlt, a Sant Seren, ua anciana fabrica de bagatges que tornè obrir las soas pòrtas i a un an, arron mes e mes de renovacion. Lo Theatre de l’Usine (Fòto FB) qu’estó transformat en pòle culturau dab duas granas salas d’espectacles de mei de 400 plaças. Que’s balha per politic d’auherir la cultura tot au long de l’annada, pertot e tà tots. A la soa reobertura en genèr de 2016, lo site qu’avèva hèit proposicions eclecticas entà començar la sason (jazz, teatre, musica classica, joen public, espectacle de circ, etc.). Olivier Desbordes, gavidaire artistic deu Centre nacionau de produccion de teatre e de teatre musicau Figeac/Sant Seren, qu’avèva declarat aus nostes confrairs de La Dépêche : « Que volèvam espectacles qui ne sian pas forçadament los nostes espectacles, pluridisciplinaris. Que son quate estiles qui’s van adreçar e atirar publics hèra diferents. Qu’ei la tòca deu Teatre de l’Usine : la cultura de qualitat qu’ei un dret tà tot lo monde. […] Que volem que sia ua agòra, un lòc obèrt tà tots. Dab l’escòla de dança, que vaderà un lòc de vita e d’abonde culturau dab artistas qui vieneràn dens Òlt a Sant Seren pendent l’ivèrn e espectacles creats per arrajar suu territòri ». Un public larg L’idea deu Teatre de l’Usine qu’ei de har accessible la cultura pertot suu territòri e de tocar un public lo mei larg possible. Véronique Do, gavidaira de l’estructura, que contè qu’un espectacle perpausat peu teatre èra quitament accessible aus… nenets de 12 mes ! « Qu’ei un espectacle destinat a sensibilizar los nenets a las fòrmas, a las colors sus la basa de tablèus de grans mèstes ». L’espectacle que s’apèra « Lune et Soleil » e qu’ei perpausat per la Compagnie Merci Mon Chou (www.mercimonchou.fr). Anna Thibaut e Sébastien Fenner qu’an imaginat l’univèrs deu pintre Joan Miro, « color deu cèu e sauneis a la faiçon d’un libe pop-up ». Los artistas de Perpinhan que balhan un apròchi sensible e viu de l’òbra deu pintre catalan entà desvelhar l’imaginacion deus pichons. La Compagnie que presentè l’espectacle au Teatre de l’Usine arron ua residéncia a Sant Seren. Talhèrs e inicacions En mei d’auherir un espaci de creacion en arcuélher artistas en residéncia e en coprodusir espectacles, lo Teatre qu’ei obèrt a l’educacion artistica. Atau, tot au long de la sason, que perpausan un accès aus espectacles a tarifas privilegiats. En mei d’aquò, un talhèr teatre qu’ei perpausat notadament aus liceans de Jean-Lurçat a Sant Seren tot au briu de l’annada escolara. Los adultes qu’an tanben la possibilitat de seguir iniciacion a disciplinas artisticas com l’art contemporanèu, la musica o lo teatre.

PACA : Hestenaus e copas budgetàrias

Capture decran 2018 04 25 a 15.54.28

Lo 14 de noveme passat, un manifèste hèit per creators de hestenaus en PACA qu’estó publicat suu site de Mediapart. Los professionaus qu’i demandan la mesa en plaça d’Assisas de la Cultura, « pr’amor qu’ei urgent peu noste país de s’apiejar sus la realitat » e un budgèt de la Cultura, guarant de perennitat e d’aviéner taus ciutadans. Uei lo dia, qu’existeish cap a 12 000 hestenaus en Region Provença Aups Còsta Blava, qui repausan suu sòcle de la Cultura. « Lo hestenau qu’ei l’òbra generosa d’artistas dont la sola ambicion ei d’estimular l’esperit e l’imaginacion deus ciutadans adultes e mainatges, de’us esmiraglar e de partatjar dab eths, moments hesteius, experiéncias de libra expression dens un esperit de fraternitat e de descobèrta. Aqueras estructuras que s’esforçan de subervíver mercés aus magres subsidis acordats a la Cultura. Ne viven que de subvencions publicas (Mairia, Departament, Region) e hèra chic de sostiens financèrs privats, pr’amor lo lor objectiu n’ei pas de realizar profieits, mes de perpausar lesers aus contienguts educatius, pedagogics, artistics e culturaus », çò escriven dens lo comunicat. Qu’i rapèran que los hestenaus e contribueishen a revalorizar en tèrme de comunicacion e d’imatge, lo terrador e las tradicions culturaus de la Region. Cada estiu, los hestenaus qu’atiran en mejana 500 000 toristas. Aqueras copas budgetàrias que resultan mei que mei de supressions de subvencions publicas, especiaument municipaus arron l’arribada de navèras equipas au cap de las vilas, après las eleccions de març de 2014. Un centenat de hestenaus capvath França que son estats suprimits o anullats principaument en rason d’aqueras copas. Jean-Paul Roland, gavidaire deu hestenau de ròck de Belfòrt Les Eurockéennes, qu’estima que quitament los hestenaus mei importants son miaçats pr’amor de la baisha de las subvencions publicas e tanben de la reorganizacion de las regions.

Jornada occitana deus tresaus deras Hautas-Pireneas

Per la 7au annada de reng, lo Departament de las Hautas-Pirenèas que perpausaràn aus collegians de 3au qui estudian la lenga occitana, ua jornada consacrada a l'òc lo dimèrcs 29 de març. L'eveniment que's debanarà au Carré Py' de GERDE. Aquera jornada que permet de har conéisher aus joens las possibilitats d'estudis de la lenga occitana au licèu e a l'universitat. Los collegians que poderàn encontrar a professionaus : professor d'occitan, responsable pedagogic, cargat de mission en lenga occitana, etc. Cinc talhèrs que seràn organizats : « Har víver ua lenga regionau », « L'occitan au licèu e après », « Ei possible de víver ua practica artistica enrasigada dens un territòri culturau e lingüistic en 2018 ? », « L'occitan dens la vita professionau » e « Iniciacion au doblatge de filme en lenga occitana ». La jornada que's clavarà peu tradicionau concèrt dab lo grop The Incredible Garuche Band, electro ròck de Bigòrra.

Inf. : Carré Py' GERDE, 3 bis avienguda Maquis de Payolle — 65200 Banheras — tel. : 05 64 25 00 25.

Setmana pòrtas obèrtas dens las Calandretas de Bearn

Ger, la Federacion departamentau deus Pirenèus-Atlantics Calandreta que presentè lo programa de las pòrtas alandadas de las escòlas immersivas deu Bearn, a l'Ostau Bearnés, maison de las associacions de Pau. Deu 26 au 31 de març, que poderatz assistir a classas dens las 11 Calandretas e lo Collègi Calandreta de Gasconha e encontrar a las equipas pedagogicas entà v'informar sus la vita escolara dens los establiments regits per la pedagogia Freinet. Aquesta qu'ei fondada sus l'expression libra deus mainatges e favoriza l'autonomia deu mainat e la vita en grop.

16 au 18/03 : 2au edicion d'Hestiv'Òc de Nèu a las Aigas Bonas e Goreta

Deu 16 au 18 de març, la version ivernau deu celèbre hestenau Hestiv'Òc, Hestiv'Òc de Neu, que se'n torna tà la soa dusau edicion. Que's debanarà en la comuna de las Aigas Bonas e en l'estacion de Goreta. Com l'an passat, nombrosas animacions e concèrts que seràn organizats en aliança dab las comunas de las Aigas Bonas, Asosta e Aas, l'Ofici de Torisme Aigas Bonas-Goreta, l'Establiment Public de las Estacions d'Altitud (EPSA) e l'associacion Accents du Sud. L’obertura oficiau que’s harà en cantas com de costuma a Hestiv’Òc mes dab tròç causits qui hèn aunir a la montanha : La plenta deu pastor, Amor d’Aussau e Aqueras montanhas.

Au programa de la dimenjada :
- Divés lo 16 de març
Obertura deu hestau au Casino de las Aigas Bonas. A comptar de 20H, devís d’obertura, bal trad dab la Companhia Crestian Josuèr e projeccion deu documentari « Des brebis et des femmes » au Cinèma de Goreta en preséncia de la realizatora Laurence Fleury.

- Dissabte lo 17 de març
A partir de 10H e tota la jornada, animacions en l’estacion de Goreta dab las fanfaras Tootoota,
Funky Style Brass e Les Accords’Léon
14H a la Maison de Goreta, mercat deu terrador dab productors de la valea
15H30 a la Maison de Goreta, contes entaus mainatges e los pairs dab David Bordes
De 18H dinc a 22H, concèrts dab lo Funky Style Brass e Boisson Divine
21h, serada au restaurant d’altitud lo Cairn dab Ibiliz.

- Dimenge lo 18 de març
A comptar de 10H e tota la jornada, animacions en l’estacion de Goreta dab las fanfaras Funky Style Brass e Les Accords’Léon.
Lo vrèspe a partir de l’ua òra, passejada au còr de l’estacion en companhia de quate grops bearnés e bascos qui’vs haràn partatjar la lor passion deu cant : Natseipas, Holia, Kriolinak e Esta.
De bon notar augan, que podetz viéner de Pau en bus tà esquiar la jornada (purmèr viatge a comptar de 7 òras e mieja lo matin per 2€) e profieitar de la serada en tornar a gratis dab lo bus a 11 òras e mieja lo ser. Mes avisatz-ve que cau que reservetz en apera l’Ofici de Torisme au 05 59 05 12 17 abans lo divés 16 de març a mieidia.
La manifestacion que sembla atau préner drin d’endom en Vath d’Aussau, de bon auguri tà participar lhèu un dia a ua quatorzau edicion com serà lo cas augan de la version estivenca a Pau !

Adeline Gonzalez de la Maison de las Associacions bearnesas, l'Ostau Bearnés, qu'encontrè au gavidaire deu hestenau, Didier Fois : entervista Didier Fois.

Inf. : www.hestivoc.com

Adeline Gonzalez

  • Publicat dens Culture

73 % deus abitants deus Pirenèus-Occidentaus, favorables a l'alargada d'orsas en Bearn

L'associacion FERUS, qui òbra tà la conservacion de l'ors, deu lop e deu gat-lop, que comuniquè un navèth sondatge qui pròva que pas sonque los Pirenencs mes la populacion francesa espèra l'alargada d'orsas en Bearn.

Lo sondatge realizat per l'IFOP la setmana passada qu'ei « particularament clar » segon l'associacion FERUS e 14 autas associacions environamentaus qui an decidit de publicar aqueras chifras : 84 % deus Francés que sostienen lo manteniment d'ua populacion d'ors en los Pirenèus (sia ua progression de 8 % respècte au sondatge de 2008). Lo sostien qu'ei massiu en los Pirenèus-Occidentaus dab 76 % d'avís favorables (70 % en las Hautas-Pirenèas).

73 % deus abitants deus Pirenèus-Occidentaus que son favorables a l'alargada d'orsas en Bearn

L'associacion FERUS, qui òbra tà la conservacion de l'ors, deu lop e deu gat-lop, que comuniquè un navèth sondatge qui pròva que pas sonque los Pirenencs mes la populacion francesa espèra l'alargada d'orsas en Bearn.

Lo sondatge realizat per l'IFOP la setmana passada qu'ei « particularament clar » segon l'associacion FERUS e 14 autas associacions environamentaus qui an decidit de publicar aqueras chifras : 84 % deus Francés que sostienen lo manteniment d'ua populacion d'ors en los Pirenèus (sia ua progression de 8 % respècte au sondatge de 2008). Lo sostien qu'ei massiu en los Pirenèus-Occidentaus dab 76 % d'avís favorables (70 % en las Hautas-Pirenèas).
73 % deus abitants deus Pirenèus-Orientaus que son favorables a l'alargada d'orsas en Bearn. « La proteccion de l'ors qu'ei l'un deus subjèctes mei consensuaus en França com dens los Pirenèus », çò explica l'associacion FERUS. Que podetz tornar trobar las resultas de l'enquèsta IFOP ací.

Qu'alarma dens lo comunicat sus l'urgéncia d'aquera accion « capitau » entà huéger la desapareishuda imminenta de l'espècia a l'oèst deus Pirenèus. Lo collectiu d'associacions qu'a enviat las resultas d'aqueth navèth sondatge au President de la Republica, Emmanuel Macron e au ministre de la Transicion ecologica e solidària Nicolas Hulot, qui an tot dus sostienut lo projècte au moment de la campanha presidenciau, « qu'esperam la lor responsa dens los jorns a viéner, dab impaciéncia e atencion », çò concludeish dens lo comunicat.

En 2016, sus l'ensemble deus Pirenèus, l'efectiu minímum detectat qu'èra de 39 ors : 2 en los Pirenèus-Orientaus (Bearn, Navarra, Aragon) e 37 en los Pirenèus Centraus (Comenge, Coserans, Val d'Aran, Catalonha e Andòrra).

Inf. : www.ferus.fr — Fòto ©Jean-noël Lafargue

Mèdias occitans — Dus servicis civics tà desvolopar l'auhèrta de produccions en òc

La Federacion Interregionau deus Mèdias Occitans (FIMOC) dont hè partida Vistedit/La Setmana, que perpausa dus servicis civics. Las lors missions que començarén a partir deu 24 de genèr per ua durada de 8 mes, 24 òras per setmana. La Federacion que vòu atau desvolopar accions qui favorizan l'accès a tots a l'auhèrta de las produccions audiovisuaus, radiofonicas e editoriaus en lenga nosta.

Qu'a per tòca de realizar un estat deus lòcs a l'atencion deus sons membres e deus sons partenaris publics/privats e deus lectors, auditors e telespectators. Que miarà ua enquèsta sociolingüistica dab los volontaris tau monde sensibilizats a la problematica de la sauvaguarda, de la promocion e de la difusion de la lenga occitana.

La plaça e la representacion deus mèdias occitans dens la societat qu'ei l'un deus enjòcs màgers de l'enquèsta. Atau, que's poderà avalorar las acostumas de consum de la produccion accessibla uei lo dia e las atentas deus divèrs publics.

Aquiu las missions qui seràn enter autas hidadas au volontari : prospectar las estructuras e las associacions relais, anar a l'encontre deus publics visats au parat d'eveniments culturaus occitans suu departament deus Pirenèus-Atlantics, realizar sondatges o enqüèra anar encontrar aus mèdias membres entà amassar informacions sus las lors produccions.

La FIMOC qu’a per tòca d’arrecaptar l’ensemble deus mèdias de l’economia sociau e solidària qui causeishen, estatutariament, dens lors supòrts respectius, de promòver e de difusar la lenga e la cultura occitanas. Qu'a per mira d'estar un organ que permet la representacion, lo sostien, la concertacion, la mutualizacion deus mejans tecnics e umans deus mèdias sòcis. Que participa activament a la reflexion suu desvolopament deu sector, dab la creacion d’apèrs de tribalh e de projèctes collectius.

Inf. : Consultar l'anóncia ací www.fimoc.com

Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+