Uei : 19/11/2017

Solinhac-sus-Leire — Tensions a l'entorn d'ua demanda de prolongacion de l'activitat de la peirèra

La peirèra de basalt que hè partida deu paisatge de la comuna de Solinhac sus Leire (43), despuish las annadas 70. La soa autorizacion d'espleitacion qu'ei arribada a tèrmi e l'espleitador que hasó ua demanda de renovelament de 15 ans. Lo site actuau de la peirèra que cobreish drin mei de 13 ectaras. La societat Jalicot que voleré 4,5 ectaras mei, mes shens nada aumentacion deu tonatge annau maximau de 150 000 tonas cada annada. L'extension que seré possible mercés a un agricultor de Mussic, proprietari de parcèlas au ras deu site actuau. La societat qui gereish la peirèra que depausè un dossièr en prefectura e l'enquèsta publica que comencè lo 14 de heurèr e que s'acabarà lo 17 de març.

L'associacion SOS Loire Vivante qu'arcasta a la societat Jalicot de non pas arrespectar los sons engatjaments e que la peirèra ei ua « ploja de nosenças taus abitants ». Lo gavidaire de l'associacion, Roberto Epple, que declarè au jornau L'Eveil : « que demandam lo retrèit deu projècte e que sostienem los paisans qui's baten tà conservar las lors tèrras ». Ua peticion contra l'extension de la peirèra qu'obtienó 3 300 signaturas sus divèrsas comunas. Alain Feydel, gavidaire de las peirèras, eth, que's defen en díser que lo dialògue èra tostemps mantienut e qu'ua Comission Locau de Concertacion e de Seguit (CLCS) èra estada hicada en plaça lo 29 de noveme entad aquò.

Tà çò qui ei de las nosenças dont parlan l'associacion SOS Loire Vivante, lo sénher Feydel que respon que tribalhs tà ua paret vegetau anti-brut e son dejà estats budgetats. « Que serà un ecran acostic tà redusir lo brut deus concassaders e deu crible », çò digó Alain Feydel. Après l'enquèsta, lo prefècte qu'averà tres mes a comptar la recepcion deu rapòrt de comissari enquestaire tà préner ua decision.

La societat Jalicot qui a ua autorizacion d'espleitacion dinc ad aqueth mes, que demandè ua prolongacion de sheis mes deu precedent arrestat prefectorau obtienut en mars de 2012 tà 5 ans.

Fòto : Captura d'ecran France 3

Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Papagai

Papagai es la revista occitana dels pichonèls. Prepausa cada mes doas istòrias, de jòcs, una pagina de vocabulari e un dorsièr en rapòrt amb un dels dos 

+