Uei : 14/12/2017

A l'encontre deus Occitans de París

Lo Club Occitan de Noisy-le-Grand a París, qu’estó creat en 1977. Après està’s adromit pendent las annadas 80, que’s desvelhè en 90. Hasent partida de las associacions mei vielhas de la capitala, qu’estó creada a l’origina per pairs d’escolans mercés au Patrici Roques.

Article sancèr 

A l'encontre deus occitans de París

Lo Club Occitan de Noisy-le-Grand a París, qu’estó creat en 1977. Après està’s adromit pendent las annadas 80, que’s desvelhè en 90. Hasent partida de las associacions mei vielhas de la capitala, qu’estó creada a l’origina per pairs d’escolans mercés au Patrici Roques.

Patrici Roques qu’estó professor d’occitan au licèu public Flora Tristan de Noisy-le-Grand, pendent 35 ans. Que balhava cors tà l’opcion facultativa deu bachelierat. L’opcion que s’arrestè en 2012, quan lo sénher Roques partí a la retirada. Qu’èra lo darrèr cors balhat dens lo segondari dens la region. Lo Club occitan que s’installè dens la MPT (maison tà tots) deu Champy, au còr d’un barri « sensible ». Uei lo dia, lo Club qu’a evolucionat, n’a pas sonque pairs d’escolans com membres. Que son un vintenat, monde fidèus qui vienen d’Occitània sancèra : de Gasconha, d’Avairon atau com de Provença. Cada 3 mes, lo Club que publica lo bulletin « La Beluga ». Que son ueit paginas dab un agenda mensuau sus las activitats deu Club, articles sus l’actualitat en Occitània e sus las nautats deu costat de las associacions amigas deu Club. Lo Bulletin que s’acaba per drin de literatura, dens lo darrèr numèro, « Ont ès, Tanta Alinda ? », un conde de Liliane Zand (Aper’Òc). Patrici Roques qu’ei president despuish 1990. Que vien de la region tolosana. Pendent la soa enfança qu’entenó la lenga per las arruas de la vila ròsa e dens los mercats on lo miava lo pairbon, originari deu Lauragués. Aqueste li aprenó lo lengadocian « centrau ». Patrici que demorè dens un banh lingüistic multiple, que tornè trobar dab la descobèrta de l’occitanisme… a Lion en 1968 ! Puish qu’arribè tà París. L’òmi que ns’a presentat l’associacion atau com lo hialat d’entitats occitanas dens la capitala francesa.

Capture decran 2017 11 30 a 16.47.34

La Setmana — Qui son los membres deu Club Occitan de Noisy-le-Grand ?
Patrici Roques — Nosautres sèm « panoccitans », venèm d’en pertot. Son de monde que venon d’Occitània tota. A mai, avèm la particularitat de reçaupre de personas que venon pas unicament de la nòstra comuna mas tanben de l’èst parisenc e de París intra muros. I a de monde conegut coma Claudi Simiat que sortirà lèu un novèl libre o encara Guy Matthieu, poèta provençal que viu sus París e que nos ven veire de temps en quora. I a doas personas que son perfèitament bilingüas. Las autras an la lenga dins l’aurelha e l’aprenon amb nosautres. Nos basam sus l’occitan dit « estandard » per que cadun se comprenga. Nos cal trobar un tipe de lenga mejana, e es un debat pr’amor i a los que parlan l’occitan de lor canton e los parisencs qu’aprenon un autre occitan. Al Club, cadun parla son parlar d’origina e nos comprenèm totes fòrça plan. Los corses se fan en lengadocian « estandard », coma lo bulletin mas publicam tanben de tèxtes en provençal, en gascon, etc.

LS — Quaus son las activitats perpausadas peu Club ?
PR — Cada 15 jorns, fasèm çò qu’apelam un cors d’occitan. En fait, es un cors ont escambiam. Trabalham puslèu sul tèma de la musica e sus de tèxtes, solide. Nòstre interès es la convivéncia. I a de monde que vòlon venir pr’amor vòlon tornar un pauc al país. Es venguda una necessitat de portar la pròva de l’emplec de la lenga dins la region, dins la mira de restablir benlèu un cors (dins un licèu per exemple) dins l’èst parisenc. Volèm portar la pròva de la preséncia activa de la lenga e de la cultura occitanas dins la « talvera » de l’Isla-de-França ont es lenga d’usatge, amb los drets correspondents, coma per exemple l’ensenhament de la lenga. I a totjorn de problèmas amb la convencion amb los rectorats. Dins los tèxtes es escrit que [la lenga] serà ensenhada dins las regions ont la lei es en usatge [es la lei Fillon, NDR]. Nos cal provar que dins las tres acadèmias de la region parisenca, la lenga es una lenga d’usatge. Per nosautres, es important de provar que la lenga occitana es una lenga de França e pas unicament d’una region. I a una autra rason per la quala contunham d’existir amb lo Club. Una enquèsta a mostrat que la majoritat dels jovents dins la region parisenca vòlon anar en Occitània (en Provença o en Lengadòc) o en Bretanha dins las annadas que venon. Se parla d’un exòdi urban. Es una realitat dont degun ne parla. Cal preparar lo monde e los cal informar. Coma disiá un amic : « Cal aprendre al monde que i d’autras lengas en França, d’autras culturas ». Aicí, son pas assabentats que quand arriban a Tolosa, Pau o Bordèu i a una autra cultura que non pas la que veson sus TF1. Recentament, un jove Portugués nos a rejonch al Club. S’interèssa a la lenga per cuorisitat. Es una de las rasons per las qualas cal contunhar d’èsser presents dins la region parisenca.

LS — Avetz relacions dab d’autas associacions occitanas dens la capitala ?
PR — Lo Club occitan de Noisy-le-Grand a de relacions coralas amb las autras associacions de la region d’Isla-de-França. Entre autres l’Aper’òc de París-ciutat, los Amics de la Lenga d’òc (la seccion parisenca del Felibrige), atal coma los Miègjornals de Sceaux (Hauts-de-Seine) e lo CREO-La Talvera. Cada an, las associacions occitanas de la capitala s’amassan per la dictada occitana al mes de genièr e per d’autras accions comunas. Avèm de bonas relacions amb los Bretons de Noisy-le-Grand, tanben !

Inf. : Club Occitan Noisy-le-Grand, 30 arrua Du Clos, 93160 Noisy-le-Grand Tel. : 08 92 97 63 74 Mèl : This email address is being protected from spambots. You need JavaScript enabled to view it.

Festejan los ans de l'IEO de París e l'Aper'òc Paname

L'Institut d'Estudis Occitans de París en aliança amb l'associacion Aper'òc de Paname Occitània Studio festejan lor aniversari lo 14 d'octòbre, respectivament 70 ans e 10 ans. Lo rendetz-vos es balhat a l'albèrga avaironesa, París XII a partir de miègjorn fins a 6 oras 30 del ser. acuèlh e aperitiu. 

Doas intervencions son previstas : Philippe Martel que parlarà de l'Occitanisme a París. L'istorian e universitari es especialista de l'istòria de l'espaci occitan. Laurent Alibert analisarà l'Occitan a l'universitat.

Animacions divèrsas en occitan son al programa dins l'aprèp-miègjorn, amb notadament musicas, danças e cantas amb La Bourrée Montagnarde.

Inf. : Reservacion obligatòria per corrièr a l'adreça, Martine Andrieu, 5 carrièra Godefroy — 93400 Saint-Ouen — Mèl : This email address is being protected from spambots. You need JavaScript enabled to view it. / This email address is being protected from spambots. You need JavaScript enabled to view it. — tel. : 01 43 66 68 63 — Luòc de la fèsta : 40 carrièra Gabriel Lamee — Prètz : 30 euros.

  • Publicat dens Culture
Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 
Capture decran 2017 11 28 a 11.48.12

Papagai

Papagai es la revista occitana dels pichonèls. Prepausa cada mes doas istòrias, de jòcs, una pagina de vocabulari e un dorsièr en rapòrt amb un dels dos 

+