Uei : 14/12/2017

Lo Hip-Hop, pòrtavotz mondiau — L. Landra

Lo movement hip-hop qu’ei vadut a Nòva-York dens las annadas setanta. Influenciat per las culturas afro-americana e latino-americana deu South Bronx, qu’ei a l’origina un movement musicau emergent de la cultura disco. Los Djs que començan a crear « loops » (boclas), ua tecnica que vien era-medisha de la musica dub de Jamaïca e deu Caribe... Lo hip-hop que vien viste un movement culturau e artistic dens lo quau joens deus quartièrs desfavorizats e tròban la via e la votz tà denonciar las discriminacions dont son victimas. Lo rap qu’ei un deus mòdas d’expression d’aquera cultura. Se remontam dens lo temps, que podem considerar qu’ei un descendent deu cant deus griòts africans. Las insultas rituaus, la poesia, los cants sacadats, las règlas regint los ritmes de la paraula que son dirèctament ligats aus cants tradicionaus africans.

« Peace, love, unity and having fun » qu’ei lo messatge originau deu hip-hop au quau s’ajustan valors universaus com lo respècte de l’aute, lo trespassament de se-medish e l’unitat deus pòbles. Qu’ei dirèctament ligat aus precèptes d’« Afrika Bambaataa » e de la « Zulu Nation ». Lo 16 de mai de 2001, 300 militants deu hip-hop que presentèn a l’ONU la « Declaracion de Patz deu Hip-Hop » dont lo prumèr principi descriu aqueth movement com « ua consciéncia collectiva independenta ». La cultura hip-hop qu’arriba en França pendent las annadas 80. Qu’ei popularizada per l’emission H.I.P. H.O.P. Difusada pendent l’annada 1984 sus TF1, aquera emission qu’ei remarcabla sus dus punts : qu’estó la prumèra emission au monde sancerament consacrada a la cultura hip-hop e lo son presentator Sidney (DJ e musician) qu’estó lo prumèr animator negre a aparéisher a la television francesa.

Lo hip-hop desvelhader de consciéncia
Com lo ròck, lo hip-hop n’ei pas unicament ligat a la cultura de massa occidentau ni un produit natre d’America. Lo movement hip-hop que demora uei encara un movement d’avant-guarda, anonciator de presas de consciéncia populara. Que demorarà associat aus movements sociaus e que servirà tostemps de veïcule d’expression de las minoritats. Que v’a dilhèu escapat mes hòrt eslogans représ pendent las manifestacions d’abriu de 2016 contra la Lei-Tribalh qu’èran paraulas tiradas de títols rap de Booba, SCH (lo famós « levà’s tà 1 200 euros qu’ei insultant ») o enqüèra de PNL (« lo monde o arren »).
Lo rap qu’a sovent afichat un engatjament politic deus hòrts (au sens prumèr deu tèrmi). Lo movement internationau anti-guèrra « not in our name » (pas en lo noste nom) qu’apareishó en 2002 aus Estats-Units en seguida de la politica mesa en plaça per George W. Bush. Aqueth nom que vien d’un titol de Saul Williams (campion deu monde de slam) qui s’ei clarament engatjat contra la politica governamentau de l'epòca.

Autes rapaires americans que son plan luenh deus clichats deus gangs e deu trafic de dròga, a l’exemple de KRS-One qui milita tà l’educacion sociau. Qu’ei regularament invitat tà har conferéncias dens las universitats d’Harvard o de Yale. Qu’ei lo depositari de la « Declaracion de Patz deu Hip-Hop ».
Dens cada país, lo rap que permet d’obrir vias navèras, de Tòquio a... Bagdad dab ua pensada tà Adel Euro, joen rapaire mort pendent ua ataca-suicidi lo 3 de julhet passat qui costè 200 vitas acerà. A Olan Batòr, lo nacionalista Gee, vadut dens las barraquèras de la capitala, que milita violentament tà que la societat mongòla arretròbe la soa fiertat d’abans, e’s libère deu jun deus vesins chinés e rus.

Lo movement en Occitania
Ja que lo territòri occitan e sia pleat d’artistas e cantaires hip-hop reconeishuts, hestaus de notorietat mondiau, aqueth movement musicau qu’ei chic investit dens la lenga occitana. Au miei deus qui son de compte har, lo grop marselhés IAM que’s hè conéisher en 1989. Aqueth grop qu’ei considerat d’ara enlà com un deus pilars fondators deu rap francés. Çò qui chic de personas e saben ei qu’an podut començar mercés a ua invitacion deu Massilia Sound System sus scèna. Lo quite nom « IAM » qu’ei shens qu’ua simpla traduccion de « que soi » en anglés. Que hè tanben referéncia aus movements de luta taus drets civics aus Estats-Units dab las pancartas « I AM A MAN » (que soi un òmi). En arabe, aqueth tèrme que hè referéncia a l’istòria e au temps... Que pòt tanben voler díser « Independentistas Autonòmes Marselhés » per’mor, coma ac diseràn tots los marselhés : Marselha qu’ei la vila mei beròja deu monde ! O alavetz ua referéncia a las lors originas : « Italian, Algerian, Malgach ». Que’s son investits dens ua politica sociau hòrta suu lor territòri tà lutar contra la discriminacion raciau, sociau e economica.

Se cercam un grop ligat au hip-hop en lenga occitana, que i a Mauresca, un grop de Montpelhièr creat en 1998. Eth tanben qu’a seguit la via obèrta per Massilia Sound System o enqüèra los Fabulous Trobadors, de Tolosa. Aquestes qu’èran los grops mei pròches de la movença reggae-raggà. Mauresca qu’a seguit la soa dralha dab influéncias mei modèrnas deu hip-hop. Cantant en occitan, en pleitejar tà ua « musica locau donc obèrta au monde » en tot denonciar las injustícias sociaus suu lor territòri.

Recentament, lo duo l’Envoûtante, originari deu Bearn, que comença a har parlar d’eth. Qu’abòrdan a còps la nocion d’identitat e d’arradics. Totun, la cultura occitana ne dispausa pas uei d’un movement hip-hop vertadèr presents. Perqué ? La politica lingüistica occitana emergiva a penas quan lo hip-hop ei arribat. En 1997, lo prumèr collègi occitan qu’obrí a Montpelhièr alara que lo de Gasconha n’obrí pas qu’en 2005. Las futuras generacions de calandrons que s’escaderàn segurament a apoderà’s la lor lenga entà exprimí’s au lor torn peu biais d’aquera cultura musicau, pacificament revoltada. Que sufeish de donar temps. Eths tanben que’s trobaràn las votz e las vias.

Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 
Capture decran 2017 11 28 a 11.48.12

Papagai

Papagai es la revista occitana dels pichonèls. Prepausa cada mes doas istòrias, de jòcs, una pagina de vocabulari e un dorsièr en rapòrt amb un dels dos 

+