Uei : 20/07/2018

#CulturaVivaBCO — Lo Cirdòc lança una campanha de partatge cultural

A un mes del segond Forum Cultural Euroregional, lo CIRDÒC lança « Cultura Viva BCO ». Es una campanha de mobilizacion collectiva sus las rets socialas destinada a promòure la diversitat culturala qu’existís dins l’Euroregion. Dempuèi 2014, lo Centre Interregional de Desvolopament de l’Occitan (CIRDÒC) e sos partenaris coopèran per balhar una visibilitat a la creacion culturala especifica a l’espaci occitano-catalan de l’Euroregion. Aital, actors culturals d’Occitània, de Catalonha e de las Illas Balearas collabòran per menar d’accions complementàrias amb d’escambis professionals e artistics. An ja començadas las collaboracions dins l’Euroregion amb l’emergéncia d’un mercat de la creacion com o poguèrem veire al moment del primièr Forum Cultural euroregional en 2016.

Quand lo primièr rendètz-vos èra dedicat al « Patrimòni e Creacion » a Castèlnòu d’Arri dins Aude, lo segond se debanarà los 18 e 19 de mai 2018 al Pont-del-Gard. Serà consacrat a las « Culturas popularas en dialòg ». Lo CIRDÒC, la Fira Mediterranià de Manresa e Sa Xerxa – Fira de Teatre Infantil e Juvenil (FIET) metràn a l’onor los actors del dialòg cultural entre Pirenèus e Mediterranèa. Sus doas jornadas de rencontres entre professionals amb de temps a l’entorn de conferéncias mas tanben de taulas redondas e de talhièrs professionals. Tres talhièrs seràn prepausats : « Naraccion del territòri, desvolopament economic e social per una politica del patrimòni cultural immaterial », « Arts vius : las tradicions oralas, motor de la creacion actuala » e « Cooperar, bolegar : lo mòde d’emplec d’una cultura mobila ». Una conferéncia sus las « Musicas, dansas tradicionalas e PCI, una evidéncia ? » se debanarà lo 18 de mai. Serà animada per David de Abreu (vice-president de la FAMDT), Francesc M. Rotger (Institut de la Llengua i la Cultura de les Illes Balears), François Gasnault (etnològ, conservator general del patrimòni, cercaire IIACLahuc), Guy Bertrand (director del departament de musicas tradicionalas al CRR de Lion) e Hervé Parent (KaruProd, Projet Rumba catalana). Lo 19 de mai, una taula redonda serà animada pel capredactor del Jornalet, Ferriòl Macip e lo director de VilaWeb, Vicent Partal pertocant als mèdias participatius « Novèla forma d’investiment ciutadan ». Lo Forum es un moment de dialògue entre los actors culturals (artistas, tecnicians, etc.), las culturas e las disciplinas (musica, teatre, cinema, gastronomia, fèstas, tradicions). Lo grop occitan Aital Aital (poesia occitana e turbinas pop) serà en concèrt lo 19 de mai. Lo 19 de mai, es Antoine « Tato » Garcia que pujarà sus scèna. Enrodat per José Garcia a la guitarra, Guillaume Bouthié a la contrabassa, Fanfan Miniconi e Thierry Poubill a las percussions, Tato interprèta sas pròprias composicions que passan successivament de las mai intimistas a las mai festivas.

Un trabalh tot al long de l’annada

Tot al long de la sason 2017-2018, los organizadors del Forum an prepausat nombrós rendètz-vos culturales com de conferéncias e d’espectacles per arribar amb d’iniciativas e de subjèctes de debats concrèts al moment del Forum de mai. Los objectius del CIRDÒC son clars : installar una collaboracion perenna entre los actors de l’Euroregion Pirenèus-Mediterranèa e far conéisser e promòure la riquesa de las culturas popularas de l’espaci occitano-catalan. Aital, a decidit d’ajudar a l’obertura del dialòg amb e entre los abitants de l’Euroregion. Ven de lançar l’operacion « Cultura Viva BCO ». Es una campanha de mobilizacion collectiva sus las rets socialas per promòure lo Patrimòni Cultural Immaterial. Las associacions, las confrariás atal com las personas individualas son invitadas a redigir un textòt de presentacion de l’accion que menan en favor de las culturas popularas del territòri. Pòdon mandar de fotografias e de videòs siá per corric a l’adreça Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!, siá pels malhums socials com Facebook, Twitter amb lo tag @CulturaVivaBCO. « Nosautres aprèp, montam aquí dins un primièr temps sul blòg culturavivabco.tumblr.com lo repertòri dels actors del Patrimòni Cultural Immaterial sus las tres regions, nos expliquèt Hugo Cros Alranq, membre del CIRDÒC, per los metre en relacion e per mostrar tanben que se son tres culturas diferentas, son de tot biais ligadas ». Una persona pòt mandar o publicar en linha una cançon qu’a eiretat de sons grans o una recèpta familiala e poirà integrar aquel repertòri. « Es vertadièrament una campanha que se delimita pas a un mond professional, insistís sénher Cros Alranq. Pertòca tot lo mond e totes los tèmas com los espòrts tradicionals, la cosina, lo patrimòni dels animals totemics. Es vertadièrament quicòm de larg qu’avèm volgut impulsar ». Un còp inscrivut dins aquela ret dels actors del PCI, devendretz « ambaissador » de vòstra cultura e recebretz un « kit ambaissador ». Aquel es constituit de libres, de CD e DVD per descobrir la riquesa culturala del territòri. Lo grop Mar e Montanha a ja participat a l’operacion. Es una formacion que marida l’autbòi lengadocian a la bodega de la Montanha negra. Lo grop amassa de musicaires professionals e amators de l’Escòla de Bodega de Vilardonnel e los escolans de l’autbòi lengadocian del Conservatòri de Seta e de l’Escòla de musica de Pesenàs. L’associacion Arc Nòrd Mediterranèa es egalament devienuda ambaissadora de Cultura Viva BCO. Aquel projècte es nascut en 2016 aprèp una enveja comuna dels grops de Mar e Montanha (Occitània), de Xeremiers de Sóller (Illas Balearas), Sons de la Cossetània (Catalonha) e Totarella (Calabra) de metre en plaça un projècte musical al torn dels instruments especifics als quatre territòris. Arc Nòrd Mediterranèa prepausa de concèrts, de deambulacions, quatre bals diferents mas tanben de conferéncias e projeccions al torn de las quatre culturas. 

La lista se perlonga amb novèls ambaissadors : La Rampe Tio (teatre) e l'Institut des Arts du Masque (Limós). Se volètz devenir ambaissador de vòstra cultura, al vòstre clavièr !

Inf. : Programa sul site fabrica.occitanica.eu/ euroregion www.cirdoc.fr — Fb : CulturaVivaBCO/

Capture decran 2018 04 18 a 16.02.34

  • Publicat dens Culture

Papagai n° 187

Papagai qu’ei lo petit hrair de Plumalhon (taus 8 – 12 ans), que s’adreça meilèu aus pichons de 4 a 8 ans. Lo vòste pichon que poderà legir istòrias, contes, bendas d’imatges, har jòcs, e tot aquò en gascon e en lengadocian. Que podetz tornar trobar las istòrias deu Papagai n° 187 en version audio en gascon e en lengadocian.

[Reservat aus abonats, tà v'abonar qu'ei aquiu]

Jornalet a sièis ans !

Lo Jornalet festeja son seisen aniversari ongan. La gaseta d'informacions en linha que coneis una capitada creissenta, prepausa dempuèi 2012 de bracas e d'articles sus l'actualitat occitana e internacionala cada jorn. « Pendent aqueles sièis ans son passats per las paginas de Jornalet mai d'un milion e mièg de vesitaires qu'an dobèrt gaireben quatre milions de paginas. Dins la darrièra annada son arribats a las paginas de Jornalet mai de 75 000 legeires nòus en mantenent la mejana del milièr de legeires per jorn. Aquò es pas marrit per un mèdia en lenga minorizada ! », se regaudís la còla del Jornalet. Sus l'ensemble dels legidors, 49 % venon de França e 37 % d'Espanha. Tres personas sus quatre que vesitan lo sit internet i tornan, aquò es una donada fòrça importanta pels creators.

Papagai n° 184

Papagai qu’ei lo petit hrair de Plumalhon (taus 8 – 12 ans), que s’adreça meilèu aus pichons de 4 a 8 ans. Lo vòste pichon que poderà legir istòrias, contes, bendas d’imatges, har jòcs, e tot aquò en gascon e en lengadocian. Que podetz tornar trobar las istòrias de Papagai en version audio en lengadocian e en gascon. 

Dens aqueth numèro, que perpausam aus vòstes mainatges de dessenhar ua vopa/renard. N'esitatz pas a ns'enviar los lors dessenhs per ua publicacion suu site de lasetmana.fr a l'adreça Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein! !!

 

 rainal

loup Timeorevu

[Reservats als abonats, per s'abonar es ací]

Papagai n° 182

Papagai qu’ei lo petit hrair de Plumalhon (taus 8 – 12 ans), que s’adreça meilèu aus pichons de 4 a 8 ans. Lo vòste pichon que poderà legir istòrias, contes, bendas d’imatges, har jòcs, e tot aquò en gascon e en lengadocian. Que podetz tornar trobar las istòrias de Papagai en version audio en lengadocian e en gascon. 

[Sons reservats als abonats, per vos abonar es aicí]

Occitan e numeric, tèma a viéner deu D'Òc Show

Dijaus lo 14 de deceme que serà filmat en dirècte lo D'Òc Show au Castèth d'Este de Vilhèra (64). Lo tèma causit tad aquera navèra emission qu'ei « Occitan e numeric : quinas perspectivas ? ».

Divèrsas estructuras qui tribalhan a la valorizacion de la lenga e de la cultura nostas que seràn convidadas a har conéisher los utís numerics que desvolopan entad ac har. Projèctes de gran endom que serén a emergir tà 2018.

L'animator Silvan Carrère que receberà actors deu mitan com Benjamin Assié e Patric Roux, respectivament gavidaire e president deu CIRDÒC, Jean-Jacques Casteret de l'Institut Occitan de Vilhèra, Benaset Dazéas e Aure Seguier deu Congrès Permament de la Lenga Occitana, atau com artistas occitans com Matéu Baudoin (Artús, HartBrut) qui testimoniaràn de l'utilizacion qu'an deu numeric. Los collegians deu Collègi Calandreta de Gasconha que coanimaràn l'emission dab Silvan Carrère. Au programa : entervistas, reportatges, cronicas e grops de musica suu platèu.

L'emission que's hè en aliança dab l'InÒc Aquitania e lo Collègi Calandreta de Gasconha.

Inf. : Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein! — Site : www.octele.com — Tel. : 05 47 05 50 10 — Emission de seguir en dirècte sus https://www.facebook.com/octele/

Òctele que cèrca un montaire. Que seratz en CDI de 35 òras dens los estúdios de Pau (64). Entresenhas mei ací.

Lenga occitana e numeric

« Comunicar » qu’ei un besonh fondamentau de l’Òmi. Ne podem pas non pas comunicar. Qu’ac hèm de manièra verbau o non-verbau d’aulhors. Tà çò qui ei de la manièra verbau, despuish la preïstòria dinc a la nosta èra, los supòrts de comunicacion que’s son multiplicats entà neurir l’interactivitat. Com tot, que mian dab eths, bons e maishants costats.

Los supòrts e mòdes de comunicacion qu’an evolucionat au briu de l’istòria. Abans internet, l’Òmi que comunicava de manièra orau, puish via las pintruras com en testimonian las qui estón trobadas dens lo periòde de la preistòria. Las purmèras escrituras que datan de 6 000 ans. L’escritura que s’ei desvolopada en divèrs supòrts com l’afica, l’estamperia (sègle XVau), la premsa (sègle XVIIau), lo telegrafe (sègle XVIIIau), lo telefòne (en França a comptar de 1879), lo cinèma (fin deu sègle XIXau), la ràdio (evolucion a partir de 1841 e l’arribada deu telegrafe electric e lo còdi dit Mòrse), e la television (retransmission publica de television en dirècte en 1926). Aviada d’internet Lo 2 de seteme de 1969, lo professor Len Kleinrock de l’University of California Los Angeles, e la soa equipa d’estudiants que s’escadón a escambiar dadas enter dus ordenadors ligats per un cable de 4,5 mètres. Aquesta experiéncia qu’estó considerada com l’aveniment fondator d’Arpanet (Advanced Research Projects Agency NETwork), hialat a l’origina de l’Internet arribat oficiaument en 1983. L’aviada de l’internet en França que’s debanè a partir de las annadas 2000.

En deceme de 2014, l’exagòne que comptava 26 milions d’abonaments internet haut debit e 80,7 % deus larèrs qu’an accès a l’internet. Los supòrts de comunicacion mei utilizats uei lo dia en matièra de comunicacion que son las discutidas oraus, los SMS, lo telefonet e çò qui pòts miar internet com los mèls, los hialats sociaus (Facebook e Twitter) e los messatges instantanèus (los « Chats »). Generacion « poçeta » Dens lo son ensai « Petite poucette » (Ed. Le Pommier, 2012), lo filosòfe e istoria de sciéncias Michel Serres que parla de « l’aveniment de Petita poçeta », « Que l’èi subernomada quan las navèras tecnologias son vadudas comunas (1985-1990). Qu’ei la mainatja d’Internet e deu telefònet. Per era, l’ordenador n’ei pas qu’un utís, que hè partida integranta de la soa vita. [...] Ne s’ahida pas mei a las ancianas apartenéncias : la parròpia, la comuna e quitament la nacion. Que crea apartenéncias navèras, ligams sociaus navèths, que honha lo rapòrt au saber e lo rapòrt a l’autoritat. Que basteish un navèth monde ». E lo filosòfe d’ajustar que Petita Poçeta e tien d’ara enlà en man los lòcs mercés au GPS, totas las informacions mercés a Wikipédia e d’autes motors de recèrca e totas las personas que pòt aperar drin pertot dens lo monde.

Capture decran 2017 11 08 a 16.24.37

 

Infobesitat e videos

La video qu’ei un supòrt mei anar mei presat per la comunicacion sus la tela e que correspon a l’evolucion de la societat. Qu’escrivem mei anar mensh e qu’espiam e que postam tostemps mei d’imatges e de videos en linha. Los joens e los mensh joens que vòlen consumir tostemps mei e viste. Que’s parla d’aulhors « d’infobesitat ». Que sia publicitat o com mejan de difusion d’informacion, nombrós son los qui passan drin a drin a la video. L’un deus hialats sociaus mei importants, Facebook, qu’estó lo lòc numeric qui arcuelhó las purmèras videos « Brut ». Lançat i a mensh d’un an, qu’ei ua navèra auhèrta d’informacion dab videos bracas e eficaças, quan seré d’estar un drin basicas. Qu’estó creat per Guillaume Lacroix (Studio Bagel) e lo productor Renaud Le Van Kim. Lo lor avantatge ? La lor reactivitat. A quauquas òras d’un eveniment, lo joen mèdia qu’averà desgatjat divèrs angles e hèit un resumit d’ua minuta qu’aurà hicat en linha de hiu. En quauques mes, Brut qu’averà vist lo nombre deus sons abonats sus Facebook passar de 2 800 a 150 000, e mei que mei 60 milions de vistas.

Capture decran 2017 11 08 a 16.26.17

Cultura Viva, la tele en occitan niçard

Las lengas « ditas » regionaus n’an pas mancat de profieitar de la frinèsta obèrta per sites de videos en linha com Youtube, entà har la promocion de la lenga e la difusar au mei gran nombre.

Internet qu’ei un mejan deus bons de difusion de las lengas ditas regionaus, qu’ac sabem. E la video que hè partida deus utís emplegats entà difusar-las. Eveniments culturaus com lo Carnaval Biarnés qui’s debana cada annada a Pau, que veden dens la video un apèr deus interessants. Includidas dens la campanha de comunicacion deu Carnaval, que permeten d’atisar la curiositat deu public suu sens de l’eveniment en tornar préner l’istòria deu personatge principau, Sent Pançard. L’an passat, un còp hicadas en linha, las videos vadudas popularas qu’avón ua mejana de 1000 vistas suu site web d’aubèrgament de videos Youtube. Youtube qu’ei lo dusau site mei visitat peus internautas francés, arron lo motor de recèrca american Google. Nombrós son los qui profieitan d’aquesta frinèsta obèrta suu monde entà difusar videos e crear cadenas, com lo Carnaval Biarnés. Cultura Viva qu’ei ua navèra cadena Youtube, creada peu duo d’amics David Assas-Silveri, infografista e estampaire, e Patrici Arnaudo, professor de lenga occitana au licèu deu Parc Imperiau de Niça, i a drin mensh d’un an. Un trentenat de videos que son de visionar suu site uei lo dia. Sostitoladas, las videos que permeten au monde de familiarizà’s dab la lenga e la cultura nostas. La Setmana que voló en saber mei au près d’un deus creators, David Assas-Silveri (Fòto DR).

Capture decran 2017 11 08 a 16.33.26

 

La Setmana — D’on ei vienuda aquesta enveja de crear ua cadena TV en lenga nissarda ?
David Assas-Silveri — Aquesta envuèia de créa un media en lenga nissarda es venguda de la voulountà de faire sourtì la lengà e la cultura nissardas dei clichet de la dansa e dau cousta « folklore » tròu souventifes assouciada malurouamen a la cultura d’aquí. Aven la voulenta mé Patrici Arnaudo de faire un media que tràta de la vida d’ancuèi e soubretout ben en lou siéu tems. Aven chausit Youtube per una rasoun simpla, si sian rendut cunte que li vista de facebook soun cuntadi de maniera un pòu a la basta que sigue. Dounca aven fach la chausida d’anà sus Youtube per desfouloupà la cadena en toucant un pùblicou interessat. Aven ben segur gardat la pagina sus Facebook per coumunicà alentour de la cadena. Es mot à dire la reclama, li band’anounça etc... Lou « Tutos coiffure » d’Eva Fumaroli qu’es la tersa persouna a participà da Cultura Viva es per iéu un bòn isemple de l’aproupriacioun de la siéu lengà. Sian a moustrà justamen qu’es poussible de parlà de la vida de cada jou en Nissart o ben en Oc. Quant de gens ai audit dire « je le comprends le Niçois mais je le parle pas et puis ça sert à rien mais je me sens Niçois hein... », es daumage. Bessai que de rendre mai de visibilita gauch ai outils d’ancuèi pòu ajudà da faire caminà la lenga e de noun aspera un an la festa dei Mai per si sentì Nissart e d’utilisà mai lou Nissart per coumunicà. Dounca efetivamen sian a prouvà de nourmalisà lou Nissart.

LS — Quaus son los programas dejà hicats en linha ? Voletz partatjar programas de tot tipe, que sia de musica, filmes e emissions/ reportatges ?
DAS — Aven fach de « playlist » sus la cadena doun li gens poudon trouvà de retrat sus li persounage d’aqui que fan boulegà li cauva au travès de li siéu activita. Dei repourtage sus dei quartié, dei luec de souciabilita, dei repourtage sus la mùsica finda. Li a tamben li regina que soun de jouveneta pròpi moutivadi per faire descurbi de festa, la traversado. Dei vidèo sus de receta de couhina. Pis aven fach una « playlist » dau festenal audiovisual Nissart d’en Daluis per presentà touti li vidèo que soun estat mounstrà a l’oucasioun d’aquèu festenal. Sensa denembrà Eva Fumaroli que va faire pulèu de « tuto » sus dei tèma ben prechis.

LS — Que podem véder filmòts gessits deu Festenal audiovisual d’En Daluis. Çò qu’ei ?
DAS — L’idea d’aquèu festenal es vengut mé un amic que si souòna Thomas Barthelemy e aquèu jouve es ouriginari dau vilage d’en Daluis en la valada dau Var après lou Puget e Entrevaus. La tècoula èra de faire una journada damount dedicada a la cultura Nissarda e Gavouòt. Es coum’acò qu’es vengut l’idea de faire un festenal per durbì la journada e per una proumiera tout acò a ben caminà estent qu’aven augut dès vidèo da presentà. Pis la journada s’es debanada mé lu juec de la countéa mes a l’ounour, la mourra e lou vitou, iniciacioun ai dansa per lou baléti e aven finit mé un councert de Nux Vomica. Ma la nouvita pròpi èra de faire un festenal audiovisual en lengà estent qu’a la miéu couinoussença li a jamai augut un evenimen coum’acò per li vidèo aqui en la countéa.

LS — Tot lo monde e pòden enviar videos tà Cultura Viva per ua mesa en linha après verificacion deu contiengut ? Ei participatiu ?
DAS — Toui lou mounde poudìon mandà de vidèo a partì dau moumen que respoundìon ai criteri qu’aven mes en plaça mé Patrici Arnaudo. Aven counstituat una jurada per l’oucasioun e es la vidèo d’Eva Fumaroli, qu’es fin finala un ver « court metrage », qu’a gagnat.

LS — Avetz retorns, avís de monde qui an espiat Cultura Viva ?
DAS — Ai touplen de retour sus Facebook o per mail. En general es toujou pousitiéu. Ai de gens que soun toucat d’audi parlà Nissart o ben de li siéu quartié. Li a finda de gens que m’an dich qu’avion emparat doun venia lou noum « baia dei ange » mé lou pichin repourtage qu’aviavan fach sus l’ouriginari d’aquela noumenàia per isemple.

LS — Quin definiretz la preséncia de la lenga occitana dens l’audiovisuau e suu web ?
DAS — Mi pensi justamen que li a pas proun de presença de lengà sus lou oueb e parli mancou de media en general doun li a ren dau tout que representa la lengà d’Oc, fouòra Vaqui sus France 3.

LS — Avetz enternut a parlar de la manifestacion deu 8 de noveme a Tolosa tà aver mei d’occitan a la television ? Si quiò, çò que’n pensatz ?
DAS — Noun, ai mancou audit parlà d’aquela manifestacioun sus Tolosa. N’en pensi basta dau ben, es una bouòna cauva e ahura que lou sabi, prouveren mé la chorma de Cultura Viva de vénì.

Inf. : https://www.youtube.com/channel/UC0_0jRVaCqrD2EYNHsDu4pQ

Eva Fumaroli, autora d'un tuto cohadura en occitan !

Capture decran 2017 11 08 a 16.35.37

Eva Fumaroli, l’autora deu « Tuto cohadura » de Cultura Viva, qu’a creat ua auta cadena Youtube sus la cultura niçarda aperada « Li Regina ! » : « M’occupii ieu de la cadena youtube “ Li Regina ! ”, doun la Regina dei Mai e li siou Misé d’onour fahioun de tuto, de vlogs e de sketch. Es au mes de jun qu’aven mesclat Cultura Viva et Li Regina. Fin finala, din Cultura Viva ahura, li a doui demarcha diferente : aquela de David [Assas-Silveri] e Patrici [Arnaudo] que voulioun faire de video en nissart e qu’an chausit YouTube per develoupà aqueu proujet, e aquela de la Regina 2016 e de ieu que vouliavan metre un pòu de cultura nissarda sus YouTube, perqué sien jà abituadi d’aqueu média en francés, s’en sierven, e la lengua es venguda apré. Per esemple, a la debuta lou mieu tuto touorsa devìa estre en francés, ma cour’ai vist que David e Patrici fan tout en nissart, mi siou dich que seria pa mau de mi metre finda, dounera un “ plus ”… Apré, devi dire que senti una volountà de faire de caua en nissart, finda per poudé pratiquà la lengua. Per poudé m’ameliourà, e, acò es segur, per la metre mai en la mieu vida de cada jou, e en aquela de tout aqulu que lou vouoloun. Counouissi una frema, una jouva, lou sieu paire li a soulamen parlà en oussitan en la sieu vida, en un parlà que li a escasi plu degun que l’emplegua. Ela n’en garda una grana fiertà. Ma ahura s’es maridada, a de pichoui e emplega plu la lengua. Lu sieu pichoui capissoun lou dialete ma lou parloun pa. Ieu, es pa cenque vouoli, a partì dòu moumen qu’aven fach la chausida d’emparà una lengua loucala, es per poudé l’utilisà, mai amic, en familha, m’un travai, o me d’outil diferent couma YouTube, perqué es pa coum’una lengua fourestiera, aquela se l’utilisen pa nautre, se li dounen pa un utilità, li a pa de pais doun si parla mai e doun pouden anà per l’emplegà coura voulen ».

Las videos Youtube com supòrt educatiu

Capture decran 2017 11 08 a 16.36.59

Tà d’autes, Youtube que serveish de mejan de comunicacion « segondari ». Qu’an dejà ua platafòrma en linha e que hican las lors creacions suu site de videos entà tocar mei d’internautas. Qu’ei lo cas de Tè Vé Òc, l’associacion de produccions audiovisuaus qui a un site internet a l’adreça www.teveoc. com e tanben ua cadena Youtube on se pòt arretrobar tots los reportatges e entervistas filmadas per l’equipa de Nimes. La societat de doblatge de filmes, dessenhs animats e documentaris en lenga nosta, Conta’m, que’n profieita tanben tà har conéisher las òbras sus quaus e tribalhan. Darrèrament, qu’a hicat en linha un extrèit de « Heidi » (realizat per Alain Gsponer) e de « Sénher Ram » (realizat per Daniel Snaddon e Jeroen Jaspaert). La web tele Òctele qu’a un site internet suu quau se pòt espiar plan segur la webtele en dirècte. Totun, qu’utiliza Youtube com platafòrma a podcast, en har accessiblas dessús totas las videos difusadas sus la cadena. Au briu de las nostas recèrcas, qu’avem descobèrt que lo Collègi Calandreta de Gasconha (basat a Pau, 64) avèva creat ua cadena Youtube l’an passat. Peu moment, un quinzenat de videos, realizadas peus collegians, que son linha. Julian Bayssac, professor d’occitan dens l’establiment que’ns digó mei sus l’utís qu’ei Youtube.

La Setmana — E pensatz qu’aqueth tipe de platafòrma en linha ei un bon utís tà la promocion de la lenga nosta en çò deus joens ?
Julian Bayssac — De segur qu’ei un utís deus bons per la promocion de la lenga, e sustot entaus joens. Youtube, que’n coneishi hèra qui son tots los dias dessús entà cercar a videos, tutos o autes.

LS — Avetz utilizat aqueth mejan per un tribalh dab los collegians ? Quau ei lo lor sentit ? E se’n trufan o se son amusats a jogar lo jòc ?
JB — Òc, que l’èi utilizat l’an passat per difusar las duas videos de familha de lengas quan tribalhèm las similaritats enter las lengas romanicas e germanicas. Los joens que son hèra ubèrts sus aquò. Qu’amuishan estrambòrd. Que pensi que Youtube e pòt ajudar, com tots los autes mejans modèrnes e numerics, a sociabilizar la lenga e la cultura nostas. E vertat qu’ei, entaus joens, que fonciona de plan.

Inf. : Cadena Youtube, cercar a « Lo collègi Calandreta de Gasconha »

Eròïs de papier

« Son leis eròis de deman, lei libraires e lei bibliotecaires » me disiá una amiga professora de castilhan mentre que marchaviam ambe leis escolans nòstres dins Barcelona sus lei piadas dau Borèu de Gaudí, lo roman policier d’Aro Sainz de la Maza. M’explicava la dificultat de faire legir dins una societat de l’informacion d’outrança. Dangier culturau e politic d’una societat sensa libres : siam a la darnièra etapa de la subrevida dei militants de la lectura. « Lei librariás independentas son a morir una-a-chauna. Nos fau encoratjar aquelei que fan de talhiers dins lei ciutats, que barrulan per vendre, que tòrnan lo libre a la vida videnta ».

Mai qué ven lo rituau de la lectura ? Coma i pensar ? Sollicitats per lo tot numeric, nos manca lo temps per se prene un obratge, per lo pausar, per lo recaptar, lo temps de lo careçar, de lo sentir, de lo respectar ò de lo descantonar, de passejar per eu, cercar l’ombra, lo liech, lo burèu, la cadiera, lo lum, la lutz, lo bòsc, la platja, lo laus que li conven. Nos manca tota una environa desliurada deis imperatius modèrnes, nos manca un espaci dubèrt au temps de la lectura.

Nos fau desliurar l’esperit literari de sa gàbia. Lei vacanças d’estiu fan bofar un vent novèu sus lei platjas nòstras. Ai vist de caravanas polidas carrejar d’obratges de totei menas sus lei camins dei vacanças. Se calan dins la sabla per vendre sei colleccions de pòcha, pròche de la veitureta dei glacets e dei chichis. Lei grands editors jògan lo jòc mai tanben de libraires ò lectors independents. Es vengut lo temps urós dei bibliotècas barrulairas ! Es a la mar que se pesca lo lector ! Esperem, coma la cigala, que siágue pas sasonier. Es tras qu’urgent de trobar lei mejans novèus per anticipar lei metamorfòsis de l’arma encoratjadas per una societat d’ecrans.

Matthieu poitavin

  • Publicat dens Éditos
Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+