Uei : 23/06/2018

Audiovisual public, una reforma esperada per los qui vòlen mai d'occitan a la television

La manifestacion del 3 de febrièr passat aviá recampat mai de 200 personas per aver « mai d'occitan a la television ». Es lo Collectiu Occitan qu'es a l'origina d'aquela reivindicacion. « A l'ora de la reforma de l'audiovisual public, la question de las missions de la television publica en region se pausa. Quand d'antenas localas son menaçadas de disparicion, lo Partit Occitan prepausa al contrari de renfortir l'ancratge territorial de France 3, per èsser una vertadièra fenèstra d'actualitat de nòstras regions e un ligam amb los ciutadans, a costat d'autras iniciativas privadas com ViàOccitanie », aviá escrigut lo PÒc dins un comunicat abans aquela la manifestacion. « Justament, cal pas faire una contradicion, la television sul web e la television classica son compatiblas. Si on obten mai de preséncia de la lenga a la tele, serà totjorn benefic per l'occitan. I a encara de monde qui agachan la television ! », çò nos diguèt Joan-Pèire Laval del Collectiu occitan.

Lo Collectiu Occitan recampa dotze movements qui demandan « una preséncia quotidiana d'emissions en lenga d'òc sus l'antena e la transformacion de France 3-Occitània en una vertadièra cadena regionala a vocacion generalista ». Lo Collectiu organiza una novèla mobilizacion aquel dimècres 6 de junh a 18 oras 30 davant los sites de France 3 Tolosa, Rodés, Carcassona, Nimes e Montpelhièr.

Se ditz en contacte amb de deputats e declara que serà « hòrt present » al moment de las discutidas del projècte de lei audiovisual a l'Assemblada nacionala e al Senat.

Al moment de sos vòts oficials al mes de genièr, lo President de la Republica aviá fach conéisser sa volontat de refondar l'audiovisual public. Declarèt qu'un debat larg amb l'ensemble dels professionals èra necessari. Sas prioritats : donar una informacion de qualitat en desvolopant l'informacion de proximitat, prepausar de programas distinctius justificant los mejans atribuits, mas tanben « prene en compte la dimension europèa de la creacion en favorizant la co-produccion ». Emmanuel Macron s'èra justificat en disent que l'audiovisual public èra « un miralh tendut a la nacion e deu èsser pensat per totes los publics, totas las practicas ».

La ministra de la Cultura, Françoise Nyssen, presentèt aqueste matin las orientacions de la reforma de l'audiovisual public en preséncia dels dirigents de France Télévisions, Radio France, France Médias Monde, l'Institut national de l'Audiovisuel, TV5 Monde e Arte. Preconiza l'aumentacion dels programas regionals de France 3 e la supression de la cadena France 4 de la television hertziana. L'audiovisual public deuriá investir dins lo numeric, 150 milions d'euros mai per an d'aicí 2022. La reforma cerca a respondre als novèls usatges (programas a la demanda, al numeric, etc.) e a crear mai de sinergias entre los grops. Deuriá far d'economias entre 250 e 500 milions d'euros d'aicí 2022, mai que mai a France Télévisions.

Fòto : País Nòstre

Mireia Boya a Narbona (11) lo 12 d'abril

L'anciana deputada de Catalonha Mireia Boya es l'invitada de País Nòstre a l'Ostal occitan de Narbona lo 12 d'abril. « La Republica catalana » serà lo tèma de l'amassada publica a partir de 18 o 30. Boya es originària de la Val d'Aran e èra Deputada al Parlament de Catalonha dins la darrièra legislatura. Es militanta e secretària nacionala de la CUP. Es una votz fòrta de l'occitanisme : « A representat al Parlament Catalan de 2015 a 2017, amb dignitat istorica, la votz d'Occitània, en rendent possible que la lenga occitana ganhèsse una visibilitat publica e politica dins lo quadre del processús pel bastiment de la Republica Catalana.
Un debat serà organizat e animat per la jornalista Gisèla Naconaski de Ràdio Lengadòc Montpelhièr e Joan-Pèire Laval, president de País Nòstre.

Inf. : Ostal occitan de Narbona, 31 carrièra Jean Jaurès — 11100 Narbona — Mèl : This email address is being protected from spambots. You need JavaScript enabled to view it. — Tel. : 06 72 55 04 36.

Collectiu Occitan — Novèla manifestacion per l'occitan a la television lo 3 de febrièr

Lo Collectiu Occitan organisa una novèla manifestacion a Tolosa lo 3 de febrièr. Vòlen l'occitan cada jorn a la television : « L'occitan cada jorn a la TV es a dire a França 3, volèm nòstre occitan cada jorn e la mobilizacion es d'autant mai necita que i a una ventòla de reduccions de crèdits a la television publica », çò escriu lo Collectiu dins son comunicat. E lo movement occitanista d'anar mai luènh en demandar una vertadièra « TV de país », amb de redaccions localas.

Atal, prepausa l'organizacion d'accions lo 3 de febrièr, al meteis moment, davant las redaccions de France 3 Tolosa, Montpelhièr, Rodés, Albi e Tarbas.

Un acamp de preparacion de la jornada del 3 de febrièr se debanarà lo dijòus 11 de genièr a 18 oras, a la sala Nelli a l'Ostal d'Occitània de Tolosa (11 carrièra Malcosinat).

Una primièra manifestacion s'èra debanada lo 8 de novembre a Tolosa recampant una cinquantena de participants.

Lo Collectiu Occitan es : Convergéncia Occitana, l'IEO, lo CREO, la Confederacion Calandreta, lo Partit Occitan, EELV Occitània, País Nòstre, Partit de la Nacion Occitana, Esquèrra Revolucionària Occitana, Bastir, Macarèl e l'Associacion Zou.

3en collòqui de País Nòstre a Narbona (11)

Lo 3en collòqui de País Nòstre se debanarà deman a Narbona. Lo tèma causit ongan es « Region Occitània, per una fòrça culturala occitana ! ». Aprèp la ceremonia d'obertura, a 10 oras, Benjamin Assié, director del CIRDÒC escambiarà amb Ricart Cathala sul sicut « Uèi, una cultura viva ». Gisela Naconaski questionarà l'especialista de l'Istòria occitana Alem Surre-Garcia sus l'espendiment de la cultura occitana. Lo capredactor del Jornalet animarà la taula arredonda amb d'artistas occitans coma Frank Bardou, Aurelia Lassaque, Claudi Marti o encara Gerard Zuchetto, per aver lor testimoniatge sus cossí vivon de lor passion.

L'aprèp-miègjorn, se questionaràn sus l'estrategia d'adoptar amb nombrós invitats : Annetta Clement, Joan Hebrard, Eric Fraj, Joan-Loís Blenet, Jean-Michel Lubhac, Guy Clergue (adjunt a l'ostal de la comuna de Narbona), Patric Roux (conselhièr Region Occitània-Pirenèus-Mediterranèa) e Alain Perea (Deputat d'Aude). Los escambis seràn animats per Michel Cano e Bruno Cecillon.

Un moment de discutidas e d'escambis amb lo public es previst cap a 16 o. País Nòstre prepausarà per acabar una sintèsi del jorn.

A 17 o 30, remesa dels prèmis, « la Palma d'òc e la Cogorda ».

A 18 oras, ven l'ora de la fèsta amb tres concèrts : Sandra Hurtado-Ròs, Mans de Breish, Franc Bardou, Lhubac / Banda Sagana, Eric Fraj e Joanda.


Inf. : Dintrada gratuita, dubèrt al public — Tel. : 06 72 55 04 36 / Mèl : This email address is being protected from spambots. You need JavaScript enabled to view it.

Tolosa : una prumiera manifestacion « Volèm l'occitan cada jorn a la television »

Ier matin, una centenada de personas participeron a la manifestacion del Collectiu Occitan a Tolosa per « L'occitan cada jorn a la television », puei una quarantena davant lo CSA. Anne-Pierre Darrées foguèt presenta per sostener la causa. Escrivèt un compte-rendut pel Jornalet ier :

La luta serà mauaisida mes d'autas mobilizacions que son previstas a Carcassona, Tolosa e Pau.

Dètz movements occitans s’amassèn a Tolosa los dias passats entà decidir ua accion comuna, entà sauvar la lenga. Prumèr subjècte de colèra, la despareishuda deus contractes ajudats decidida per lo govèrn francés. Passaràn de 459 000 en 2016 a mensh de 200 000 en 2018. Shens eths, mei de 60 calandretas — escòlas bilinguas la màger part deu temps privadas — que denóncian las malas miaças qui pesan sus l’aviéner de la lors estructuras. Dusau subjècte de colèra, drin a drin, la lenga occitana qu’ei a desaparéisher de los mèdias. Lo collectiu que lancè ua campanha « Volèm l’occitan cada jorn a la television ».

La prumèra manifestacion lo 8 de noveme que’s tengó a Tolosa, Plaça deu Capitòli, en preséncia de Jean-Michel Lattes, prumèr adjunt deu maire de Tolosa, delegat a la cultura e a la lenga occitana. « France 3 non perpausa pas sonque ua edicion occitana e catalana per setmana, los dissabtes, un jornal de 12 minutas ! », ce disó un manifestant.

La luta serà mauaisida mes d’autas mobilizacions que son previstas a Carcassona, Tolosa e Pau. A Tolosa, lo 20 de noveme entà protestar contra la desapareishuda deus emplecs ajudats, e lo 9 de deceme davant los jardins entà continuar la luta. La crida a manifestar la han un desenat de movements occitanistas dont Calandreta, Convergéncia Occitana, País Nòstre, Bastir, lo Partit Occitan, Esquèrra Revolucionària Occitana, lo PNO, Macarèl, EELV.


Anne-Pierre Darrées

Carcassona : los vinhairons demandan a l'Estat que lor pague çò que lor deu

Après una annada catastrofica amb de culhidas de mens del 25 %, los vinhairons lengadocians manifèstan contra lor contèxt economicament mornarós.

Los vinhairons del Lengadòc Bas manifestèron lo 18 d’octòbre passat a Carcassona. Revendican la contractualizacion e lo pagament d’acomptes a la compra al près del negòci e dels corratièrs, mai que mai en avent patida ongan una marrida annada istorica amb la culhida pus febla, lo gèl e la secaresa... tot aquò dins un contèxt economicament mornarós. La manifestacion la sostenguèron los vinhairons de Catalonha Nòrd e de País Nòstre. Ongan manifestèron ja en març passat a Narbona per protestar contra las importacions massissas de vin del sud dels Pirenèus del temps que lors tinas son plenas. E mai los vinhairons del Bas Lengadòc foguèsson a l’origina de la protèsta, fòrça productors d’autres endreches d’Occitània jonguèron la manifestacion.

Acampada lo 8 de novembre sul tèma « Volèm l'occitan cada jorn a la television »

L'aviam anonciat a la fin de la setmana passada sul site de lasetmana.fr, una acampada amassant d'associacions e de movements occitanistas se debanèt diluns 9 d'octòbre a l'Ostal d'Occitània de Tolosa, a l'apèl de País Nòstre. L'objectiu èra de discutir d'una campanha reivendicativa occitanista sus dos tematicas : los mèdias e l'ensenhament en lenga occitana.

Una trentena de personas assistiguèron a l'acampada dont Convergéncia Occitana, representada per Joan-Francés Laffont, la Confederacion Calandreta per son president Joan-Loís Blenet, mas tanben lo Partit Occitan, lo Partit de la Nacion Occitana, Bastir Occitània, País Nòstre, un representant d'Europe Ecologie Occitània, Danís Cantournet de l'associacion Macarel, l'Esquèrra Revolucionària occitana e Ràdio Occitània.

Una primièra mobilizacion es prevista lo 8 de novembre, plaça del Capitòli a Tolosa a 11 oras 30 sul tèma « Volèm l'occitan cada jorn a la television ». Una segonda se debanarà al mes de decembre.

Joan-Pèire Laval de País Nòstre nos en ditz mai sus las reivindicacions d'aquel collectiu d'associatius : ETV audio

Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+