Uei : 14/12/2017

3en collòqui de País Nòstre a Narbona (11)

Lo 3en collòqui de País Nòstre se debanarà deman a Narbona. Lo tèma causit ongan es « Region Occitània, per una fòrça culturala occitana ! ». Aprèp la ceremonia d'obertura, a 10 oras, Benjamin Assié, director del CIRDÒC escambiarà amb Ricart Cathala sul sicut « Uèi, una cultura viva ». Gisela Naconaski questionarà l'especialista de l'Istòria occitana Alem Surre-Garcia sus l'espendiment de la cultura occitana. Lo capredactor del Jornalet animarà la taula arredonda amb d'artistas occitans coma Frank Bardou, Aurelia Lassaque, Claudi Marti o encara Gerard Zuchetto, per aver lor testimoniatge sus cossí vivon de lor passion.

L'aprèp-miègjorn, se questionaràn sus l'estrategia d'adoptar amb nombrós invitats : Annetta Clement, Joan Hebrard, Eric Fraj, Joan-Loís Blenet, Jean-Michel Lubhac, Guy Clergue (adjunt a l'ostal de la comuna de Narbona), Patric Roux (conselhièr Region Occitània-Pirenèus-Mediterranèa) e Alain Perea (Deputat d'Aude). Los escambis seràn animats per Michel Cano e Bruno Cecillon.

Un moment de discutidas e d'escambis amb lo public es previst cap a 16 o. País Nòstre prepausarà per acabar una sintèsi del jorn.

A 17 o 30, remesa dels prèmis, « la Palma d'òc e la Cogorda ».

A 18 oras, ven l'ora de la fèsta amb tres concèrts : Sandra Hurtado-Ròs, Mans de Breish, Franc Bardou, Lhubac / Banda Sagana, Eric Fraj e Joanda.


Inf. : Dintrada gratuita, dubèrt al public — Tel. : 06 72 55 04 36 / Mèl : This email address is being protected from spambots. You need JavaScript enabled to view it.

Los 40 ans del Cercle Occitan de Narbona

Divendres 10 de novembre, lo Cercle Occitan de Narbona festejava sos 40 ans d'existéncia a la sala des Foudres del Castèl de Montplaisir.

A 14 oras, los primièrs arribats prenián coneissença de l'interessanta mòstra « Occitan Occitanie », prestada pels archius departamentals e fasián lors crompas al taulièr del Cercle e lo d'Estevan, tornejaire sus fust.

Lo contaire Pèire Thouy (Fòto) comentèt amb passion sa video « Castanhièr mon amic » davant un public atencionat, quand Annia e Lucian « bolegavan las castanhas ».

Capture decran 2017 11 13 a 15.13.42

Alain Carbonnel (Fòto) mercegèt calorosament los presidents del Cercle Occitan de Narbona que se succediguèron abans el, dempuèi 1977, per far evoluir l'associacion atal com los nombrós benevòles qu'an consacrat fòrça temps e portat lor saber per ensenhar la lenga e la cultura occitanas. Transmission, aprendissatge, mas tanben difusion d'òbras d'escrivans, d'artistas…

Capture decran 2017 11 13 a 15.15.06

Ua « saqueta » foguèt animada per Richard Cathala de Ràdio Lengad'Òc, constituida de plats saborós e variats.

Lo cantaire occitan Philippe Vialard acompanhat de sos musicaires, interpretèt de cançons tradiconalas occitanas e composicions dels sos darrièrs albums e de son album a venir al mes de decembre, « Camin ».

Capture decran 2017 11 13 a 15.15.42

Inf. : www.cercle-occitan-narbona.fr — Fòtos ©Cercle Occitan de Narbona

  • Publicat dens Culture

Bilanç deu Fòrum Ciutadan Occitan « La Dintrada » de seteme 2017

 

Lo 16 de seteme que’s debanè l’edicion 2017 de la Dintrada, l’universitat de rentrada de l’occitanisme politic a Narbona. Tà la tresau annada de reng, aqueth rendetz-ve ciutdan qu’estó lo parat peus responsables politics, associatius, militants de la lenga e de la cultura nostas d’encontrà’s entà discutir de las problematicas qui tòcan lo monde occitan. Cap a 80 personas qu'assistín a las taulas arredonas e aus debats.

A l’origina, la Dintrada qu’èra l’universitat de rentrada deu Partit Occitan e de l’Aliança Libra Europèa. Augan, que’s voló un « fòrum ciutadan », l’occitanisme estant, segon los organizators, arribat « a la crosada dels camins ». L’idea qu’èra d’amuishar au monde qu’èra un moment d’escambis obèrt a tots, dab debats sus questions d’actualitat qui pertòcan a Occitània e a la soa lenga e cultura atau com a la politica au nivèu de l’exagòne e d’Euròpa. De dus dias, l’encontre qu’estó abracat a un dia e que mudè de Pòrt-Leucate tà Narbona, au Palais deu Tribalh. 

Article pagant, abonatz-ve a partir de 6 € per mes

La dintrada al Cercle Occitan de Narbona

Lo 14 de setembre, lo Cercle Occitan de Narbona faguèt sa dintrada annadièra dins sa sala de l’Ostal de las Associacions, 10 carrièra Ancien Port des Catalans, amb un cinquantenat de personas interessadas a la lenga e a la cultura occitanas e a lor promocion. 

(A l’Acampada Generala del 7 de setembre, s’èra fait coma cada annada lo renovèlament del Conselh d’Administracion, e lo novèl èra estat elegit a l’unanimitat.)

Lo President Alan Carbonnel donèt qualques indicas sus las activitats venentas :
Ongan, lo Cercle Occitan de Narbona organizarà pas Total Festum, e la Calandreta prendriá la seguida per lo faire
Lo quaranten anniversari del Cercle Occitan de Narbona se festejarà al Castel de Montplaisir (divendres 10 de novembre)
Dictada Occitana, a l’Ostal de Vila, Sala dels Cònsols (dissabte 22 de genièr)
Los Reis, a Perinhan (Fleury d’Aude), Sala de las Fèstas
La Serada, al Palais del Trabalh (dissabte 7 d’abril).

Annia Maffre presentèt lo taulhièr dont es responsabla. Tengut pels benevòls del Cercle, expausa e vend, dins mantuns lòcs de Narbona e del Narbonés, pendent fèstas, concèrts, animacions divèrsas, d’articles de las colors occitanas (bandièras, camisetas, jòias, casquetas, pòrtaclaus… mas tanben una causida bèla de libres d’autors modèrnes, de CD e DVD d’artistas occitans).

Lo clavaire principal, Alan Sauzel, enregistrèt las adesions del moment (l’escotisson annadièr es de 20 € per persona, 35 € per coble, 10 € pels demandaires d’emplec sus justificacion, tarifa votada a l’unanimitat per l’AG).

L’adesion dona dreit a totes los corses gratuitament, al prèst dels libres de la bibliotèca e a la participacion a las saquetas mesadièras.

Los ensenhants, totes benevòls, presentèron los corses e talhièrs : conversacion, lectura, escritura, vocabulari, gramatica, estudi de tèxtes de grands autors occitans, projeccions… mas tanben cant e cosina.

Los corses se debanan de 18 h 30 a 20 30, en periòde escolar :
pels començants, lo dijòus
pels confirmats, lo dimars.
Calendièr dels corses e mai de detalhs sul site : www.cercle-occitan-narbona.fr 

La dintrada s’acabèt per una saqueta, moment de partatge ont cadun pòrta un plat aprestat per el o pas, amb qualque botelha de nòstre terrador.
La Sause e son fidèl acompanhaire, Alan Carbonnel, donèron una tòca festiva a la serada.

  • Publicat dens Culture

Occitània multiculturala ?

Lo multiculturalisme es pas una nocion tan simpla que çò que pareis. La rason n’es qu’existisson diferents biaisses de comprendre aquel mot, mai que mai en França, país « uniculturalista » dempuèi de sègles !
Lo multiculturalisme es al minimum la coexisténcia de mantunas culturas (etnicas, linguisticas, religiosas…) dins una meteissa societat, dins un sol país. D’aquel punt de vista, França es un país multicultural dempuèi mai de mila ans, e los occitans ne pòdon testimoniar sens problèma !

Mas lo multiculturalisme es tanben un moviment politic que milita per préner consciénça de la diversitat culturala o etnica, o religiosa, per metre en plaça de mesuras favorablas a la conservacion d’aquela diversitat culturala. Segon aqueste moviment, afortir lo multiculturalisme melhora la vida de las personas, e a l’encòp, demesís los risques de conflictes. Los adversaris del multiculturalisme, afortisson al contrari qu’una tala politica es portaira de division, e embarra los ciutadans dins de gropes, los privant de libertat.

En Occitània un autre paramètre es de préner en compte : d’unas populacions son arribadas recentament sul territòri, alara que d’autras i son dempuèi longtemps. Se pòt dificilament imaginar de tractar de la meteissa manièra de comunautats a l’istòria tan desparièra ! En Occitània la situacion es tanben complèxa : una populacion occitana d’origina qu’es en tren de pèrdre sa cultura, una preséncia dominanta de populacion de cultura francesa, e de monde qu’arriban de la planeta tota ! Cossí gerir aquesta diversitat, sens embarrar dins de guetòs ?

Uc Jourde serà lo primièr testimòni d’aquel debat. Contarà cossí se debanèt una ceremonia de naturalizacion francesa a laquala poguèt assistir. Aquela mena de ceremonia se debana dins las prefecturas e ven cloturar de manièra solemna l’aquisicion de la nacionalitat francesa. D’evidéncia l’Estat francés vòl pas del multiculturalisme ! Una question se pausa : de qué fasèm per marcar l’aquisicion de la lenga occitana ? I auriá pas quicòm d’inventar per marcar l’apertenéncia a la comunautat occitana, una mena de ciutadanetat dobla : francesa e occitana ?

Lo multiculturalisme fa pas paur dins las escòlas calandretas qu’aculhisson un public fòrça diversificat. En assegurant l’apprendissage de l’occitan, Calandreta sosten l’apprendissage de las autras lengas, desvolòpa un bilinguisme per anar cap al multilinguisme. Maria-Pèire Vernhièiras regenta e formatritz a Calandreta explicarà aquel caminament que pausa la question del rappòrt a la Lenga, a las Lengas. En dintrant dins una lenga segonda, una alteritat se dubrís : se fa alara una plaça per la lenga e la cultura de la familha, ne pensar e n’organisar l’acuèlh es una de las missions de l’escòla. Maria-Pèire Vernhièiras farà lo raconte d’una experiéncia que foguèt menada a Castras, e una experiéncia que se viu a-z Albi, ont l’occitan es la clau de l’educacion a l’intercultura.

D'origina brasilenca, a 37 ans la journalista Gisèla Naconaski èra a la recerca d'un sens novèl per sa vida professionnala. Sa rencontre ambe la lenga e la cultura occitanas, foguèt mai qu’un desembocat professionnal : una descobèrta per una femna desrasigada. Primièr l’identitat, puèi las palancas entre sa lenga mairala lo portugués e la lenga occitana. E las descobèrtas s’arestan pas aquí : reira filha d'una italiana e d'un espanhòl del costat mairal, se maina que fin finala l'occitan es pas una lenga « estrangièra » !
Enfin ausirem un expausat de Sabine Choquet, cercaira, e especialista de la cohabitacion de diferentas communautats, linguisticas, culturalas o religiosas. Trabalha dins una perspectiva comparativa entre mantunes paises. Estudia l’impacte de las politicas publicas de gestion de la diversitat sus las relacions entre los gropes. S’interèssa mai que mai a la Soissa, al Canadà, al Liban e a la Malaisia.
Aprèp las intervencions, un escambi serà prepausat a la sala. Totas las questions seràn possiblas, sens tabó, sus aqueste subjècte sensible. Enfin lo debat serà seguit per una activitat en pichon grope de tres personas : marcar sus un post-it çò que cal melhorar, çò que cal arrestar, çò que cal inventar !

Rampelam que la participacion a La Dintrada es gratuita, mas cal reservar sa plaça sus : http://ladintrada.eu/

 

L'equipa de la Dintrada

Narbona — Lo Forum ciutadan s'apròcha

Lo 16 de seteme se debanarà la novèla edicion de la Dintrada, jos forma de forum ciutadan a Narbona. L'eveniment es organisat per una equipa de jornalistas de lenga nòstra. L'idea es de cambiar de formula e de luòc en prene la seguida de La Dintrada (organisada per lo Partit Occitan). Los organizators insistisson, lo forum es una debuta, si lo monde an d'autras proposicions de rencontres, ne cal pas esitar a far conéisser lor projècte. Tres tematicas foguèron validadas per lo comitat de pilotatge : l'acuèlh e l'integracion de las personas que arriban en Occitània amb « Una Occitània multiculturala ? », una reflexion sus la revolucion numerica amb o sense la lenga occitana e la causida del novèl nom de la Region Occitània/Pirenèus-Mediterranèa. Talhièrs creatius son prevists pels grops al torn dels tèmas causits. Los participants escriuràn de proposicions e d'ideas sus papièrs que seràn legits pendent la jornada.

Uc Jourde fa partida dels organizators :

La Setmana — Dens lo bilanç de la darrèra Dintrada qu'estó soslinhat la necessitat d'aver un lòc d'escambi e de tribalh comun a l'occitanisme, ei çò qu'ei lo Fòrum ?

Uc Jourde — Caliá trapar un luòc per escambiar tot azimut e fa tombar un pauc las barrièras, mon sentit es que i a fòrça clivatges que se son installats amb lo temps. Avem besonh ara de los despassar e d'aver al mens a un moment donat un luòc per escambiar, entre los que son en calandreta per exemple, los que son dins l'ensenhament public, entre los que se senton puslèu d'esquèr e los autres de dreita, los que son a fum sus los malhums socials e los autres que fonccionan sonque amb lo papièr. I a tròp de clivatges e avèm besonh pensi d'escambiar entre nosautres perque i a enjòcs importants que arriban.

LS — En qué lo Fòrum serà diferent de la Dintrada ?

UJ — La Dintrada l'an passat e fa dos ans èra plan mai politica. Politica al sens plen e complèt es a dire que i aviá fòrça de convidats politics de l'Union Democratica Bretona, de partits d'Euròpa. L'an passat, i aviá Christian Trouadec en preparacion de sa temptativa de se presentar a l'eleccion presidenciala. Donc i aviá d'escambis fòrça virats a l'entorn del politic, çò qu'es del tot interessant e respectacle mas del còp i aviá tota una partida de l'occitanisme que n'èra pas representada. Lo cambiament es qu'aicí serà mens politic, es per aquò que serà un forum ciutadan, amb tematicas que concernisson la vida sociala e ciutadana, mas benlèu pas d'un biais partisan pas per aprestar una eleccion. Es puslèu per anar al fons de las causas. Podèm dire qu'es politic al sens lo pus pur del tèrme, sens pensada de calcul, lo politic dins lo sens lo viure ensemble.

LS — Que parlatz d'anar mei luenh e de projectà's au nivèu europèu e lhèu mondiau ?

UJ — Es pas se projectar al nivèl mondial mas de dire que sèm pas solets sus la planeta, que i a un fum de causas que's passan a l'entorn de nosautres. Ja fa venir de monde d'autres païses europencs, aurem una Basca que participarà al debat sus la Region Occitània/Pirenèus-Mediterranèa, aurem un Catalan que parlarà de cossí es organisat l'acuèlh de personas estrangièras qu'arriban en Catalonha per transmetre justament tot çò que concernís la lenga e la cultura catalanas, cossí se passa l'integracion. Sèm dins un monde ont i a de mai en mai de movements e pas sonque sus internet, plan concretament amb popuacions que's desplaçan. En una jornada ne podèm pas aprigondir tot, es aparegut coma una tematica importanta. Fa 15 ans, quand èri a Castras, a l'IEO, aviá prepausat de far una jornada de descobèrta de la cultura occitana per los qu'arriban, amb qualques elements d'istòria d'Occitània, qualques elements de lenga, de gastronomia, de dança, e foguèt una capitada.

LS — Quaus estón los intervienents causits entà participar au Fòrum ?

UJ — Maria Peira Vernhieras, regenta e formatritz Calandreta. Calandreta a fòrça d'experiéncia dins çò qu'es l'interculturalitat, i a fòrça de monde que venon de pertot que meton los enfants en calandreta. Gisèle Naconaski, jornalista d'origina brasilièra e l'interèssa de contar un pauc son experiéncia. Parlarai d'una ceremonia qu'ai viscut coma convidat en prefectura de monde que prenon la nacionalitat francesa. I a tota una ceremonia que se fa en prefectura qu'ai trobat aquò fòrça curiós, i aviá fòrça d'emocions e me soi dit mas nosautres ne fasèm pas res en Occitània. I a una manca enòrma de causas que cal far. Sabine Choquet, universitària, cercaira, trabalhèt sus l'exemple de la Soïssa, del Canadà, de la Malesia, sus cossí pòdon coabitar mantunas culturas e lengas dins un païs. Serà qualqu'un que va portar un nivèl de reflexion important. Tot aquò serà lo matin. I aurà las presentacions del Congrès Permanent de la Lenga e de l'InÒc Aquitània amb Melanie Larche, Stéphane Valentin per Òctele, Benjamin Assié pel CIRDOC e Gaël Tabarly per la campanha « Mespresat » que se faguèt al moment de l'afar de la cauma de la fam de Dàvid Grosclaude e véser çò que marcha e los limits tanben dels malhums socials per far passar un messatge. A 4 oras i aurà Thierry Delporte, geografe de l'Universitat Champollion d'Albi, Jean-Francés Laffont de Convergéncia occitan de Tolosa, Martial Peyrouny, professor en Aquitània, Gustave Alirol per Auvèrnha e Lorena De Lacalle, elegida au Bascoat.

Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 
Capture decran 2017 11 28 a 11.48.12

Papagai

Papagai es la revista occitana dels pichonèls. Prepausa cada mes doas istòrias, de jòcs, una pagina de vocabulari e un dorsièr en rapòrt amb un dels dos 

+