Uei : 21/04/2018

20au Trad'Envie a Pavia (32)

La navèra edicion deu hestenau Trad’Envie que’s debanarà deu 9 au 12 de mai a Pavia en Gèrs. Au programa, nombrós estagis e talhèrs. Que’vs podetz d’ara enlà inscríver aus cors d’acordeon diatonic dab Cyrille Brotto, de vriolon dab Didier Oliver, de polifonia còrsas dab Alba atau com de dança/sofrologia. Plaças que son de reservar a las iniciacions (a partir de 8 ans) deus bohants dab Erwan Hamon, a las cantas de Bretanha hauta dab Mathieu Hamon o enqüèra d’armonia e musicas d’ensemble dab Ronan Pellen. Cada ser, concèrts que son perpausats. Lo 9 de mai, Joan Francés Tisnèr que jogarà la soa creacion 2018 « E.B.Tè ! ».

Lo 10 de mai, La Base Duo que harà bolegar los dançaires sus la pista dab lo lor repertòri tradicionau de Gasconha, seguit peu joen acordeonista Rémi Geffroy e per « Paisatge #3 », ua coproduccion Companhia Montanaro, COMDT Occitània e Trad’Envie. L’endedia, lo Duo Brotto Milleret que pujarà sus l’empont, puish que serà au torn deu Trio Loubelya. Lo darrèr dia deu hestenau, que poderatz descobrir l’espectacle « Lo Bal del Lop », cantas a dançar deu sud-oèst.

Lo Salon de la Luteria que tornarà au còr de Trad’Envie dab taulèrs d’instruments tradicionaus (tamborins, guitarras, flaütas, sonsainas, vriolons, bohas, etc.)

Inf. : www.tradenvie.fr — Trad’Envie BP9 32550 Pavia — Tel. : 06 81 33 11 52.

  • Publicat dens Culture

« Camina que caminaràs… »

Qualques problèmas de santat mai tard, coma se ditz, e l’atge per capelar lo tot e ne soi arribat que soi pas pus a córrer d’un bòrd a l’autre coma i èri acostumat. Empacha pas que Internet ajuda a se téner al fial dels eveniments e que pòdi seguir poètas, escrivans, cantaires… en anant consultar los malhums, filats e autres rets socials. Los temps son pas tant aisits qu’aquò pels aparaires de nòstra lenga e de nòstra cultura e cal saludar los que luchan sens relambi, amb l’energia del desespèr a còps. Son pas nombroses sul planeta los exemples de seguir que nos permeton de dire o de pensar qu’un pas es mai qu’un pas e qu’es una avançada per melhorar las causas – e daissi de caire la gent politica ! Joan Baez es, per ieu, un d’aqueles. Al moment que va entamenar sa darrièra virada professionala, pòt èsser ufanosa de son percors en sa qualitat de cantaira. Aquela femna es estada pendent mai de cinquanta ans de totas las luchas en favor de l’egalitat raciala en los Estats Units, de l’emancipacion del « sèxe fèble », contra las guèrras triomfantas… e colonialas ! etc.

Per aquela lucha, a pas agut besonh ni de fusilh ni de bombas… Qualques paraulas – mas qualas paraulas ! – amb l’ajuda d’una guitarra, e una votz encantarèla çaquelà, li an permés de joslevar las folas e de las far comuniar dins un meteis espèr per un avenidor melhor. Foguèt amb Martin Luther King al mai fòrt de las luchas contra l’apartheid de fach que subissián los Negres – excusatz : los Afro-Estatsunidencs –, foguèt en Vietnam jos las bombas estatsunidencas e, de segur, las luchas per l’egalitat òme-femna — o femna-òme, causissètz – li son pas jamai estadas estrangièras. Lèu lèu es venguda l’icòna presada pels mèdia mas a pas jamai, que sàpii, donat dins lo people per se far de publicitat. Desempuèi mai de cinquanta ans, de quora en quora, podèm seguir son caminament e l’enténer, totjorn autan resolguda, sens se far d’illusions mas amb una certitud empruntada benlèu al filosòf Lao-zi que diguèt : « Un viatge de mila lègas comença per un primièr pas. »

 

Andriu de Gavaudan

Fòto : ©Nadia Clabassi

  • Publicat dens Éditos

L'espectacle « Òmes e femnas dau Landés » a Bordèu (33)

La companhia Nordack que presentarà un espectacle bilingüe « Òmes e femnas dau Landés » au musèu d'etnografia de l'Universitat de Bordèu, lo 7 de març a 17 ò 45 (pendent 1 ò). Que haràn descobrir la vita deu monde de la region emboscada situada au sud-oèst deu departament de Dordonha. Lo comedian Michel Feynie que contarà l'istòria deus òmis e de las hemnas d'aqueth parçan arbohit dens la memòria collectiva deu Peiregòrd.

En s'ajudar de tradicions musicaus, de contes tradicionaus e de momentòts de vita, l'espectacle que hè un ligam subtiu enter ger e uèi.

Encontre dab l'actor a la fin de l'espectacle.

Inf. : Musèu d'Etnologia de Bordèu, 3 ter, Plaça de la Victòria a Bordèu — Entrada a gratis sus reservacion au près deu MEB : 05 57 57 31 61 — Mèl : This email address is being protected from spambots. You need JavaScript enabled to view it.

Lo grop Nadau qu'èra en Gèrs dissabte passat

Sus l'invitacion deu club de rugbi lo EAB XV (Entente Astarac Bigorre XV), lo grop mitic gascon Nadau qu'èra en concèrt a la sala Beaudran de Miranda (32) dissabte passat. L'animacion d'abans e d'après concèrt qu'estó assegurada per la banda los Boleros Burgais. Dab un public de tot atge, lo concèrt que's joguè a uishets tancats.

Lo parat de discutir dab Joan de Nadau de l'evolucion deu son public per un grop qui ved mei anar mei de joens assistir a las soas representacions. Lo parat tanben de conéisher lo sentit deu cantaire pertocant a l'identitat de Gèrs, lo còr de la Gasconha, territòri qui s'ei virat drin a drin de cap tà la cultura « d'aulhors » : Entervista Joan de Nadau (realizada dab JN Commères de Ràdio País)

 IMG 4769

Lo maire de Miranda e lo president de l'EAB XV qu'auherí a Nadau e a la banda vienuda especiaument, lo capon oficiau deu club.

 

Inf. : http://nadau.com/ — Mèl : This email address is being protected from spambots. You need JavaScript enabled to view it.

Fòtos : La Setmana

  • Publicat dens Culture

Christian Almerge sortís son 1ièr DVD live

Dempuèi las annadas 80, Christian Almerge pren la rota en companhia de son grop TEST per far bolegar lo mond sus sa musica ròck, beròja mescla d’umor e de poesia. Arron doas annadas de trabalh, en mai de 2016 sortís lo CD « De Schubert a Philae ». Un bèl mescladís de cançons umoristicas mas tanben mai personalas coma « Ma Tèrra occitana ». Christian l'a escricha per far un omenatge a la tèrra que o vegèt nàisser e créisser (es originari de Carcassona), e al moment de la fusion debatuda de las Regions Lengadòc-Rosselhon e Miègjorn-Pirenèus. Es totjorn en virada per presentar aquel CD al public capvath Occitània. 

Christian Almerge sortís son primièr DVD live, enregistrat pendent son concèrt a Sarlat en agost passat. Rencontre amb lo musicaire : ETV Christian Almerge

Inf. : www.christian-almerge-et-le-groupe-test.com — https://christian-almerge.jimdo.com — Mèl : This email address is being protected from spambots. You need JavaScript enabled to view it. — Tel. : 06 08 70 02 51 / 04 68 26 88 00 — Legir lo retrach del cantaire dins La Setmana. 

  • Publicat dens Culture

Pavia (32) — Campanha de don per la 20ena edicion de Trad'Envie

Trad'Envie es un festenal dedicat a la musica e a la dança occitanas que se debana cada annada a Pavia en Gèrs (32). Creat en 1991, l'eveniment mescla rencontres musicals eclectics.

Dempuèi 2014, doas novetats, la sala del Dôme a Aush aculhís l'un dels espectacles de Trad'Envie e la creacion del salon de luteria. Artisans venon de totas las regions de França mas tanben de l'estrangièr (Granda Bretanha, Holanda o encara Espanha).

Per l'edicion de 2017, foguèt invitat lo Bal Brotto Lopez e l'Orquèstra d'Armonia de Tornafuèlha per un espectacle especiau aniversari del Bal, los « 15 ans en armonia ».

La novèla e 20ena edicion de Trad'Envie se debanarà del 9 au 12 de mai de 2018. Per la preparacion, los organizadors an lançat una campanha de don aicí. Podètz donar tant coma volètz.

Inf. : http://www.tradenvie.fr/

  • Publicat dens Culture

Somari de La Setmana n° 1094

P2 — Los lectors de La Setmana
P3 — Editorial « La borra e lo fuòc… » d'Andriu de Gavaudan
P4 — La Setmana internacionala « Manuela D'Ávila, l'espèr d'un temps novèl al Brasil »
P5 — La Setmana politica « Lo President de Peró concedís la gràcia a Alberto Fujimori »
P6 — Actualitat en bracas
P7 a 9 — Dorsièr central : « Mòrt Rémi Fraisse : l'enquèsta judiciària finís sus un non-luòc »
P10 — Zoom de La Setmana : « Billy Fumey e l'Institut de lengas franc-comtesas »
P11 — Actualitat en bracas
P12 — Reportatge de La Setmana : « Demanda d'asile, los migrants de Gelòs (64), tostemps a la demora »
P13 — « Contes e correspondéncias de Pau Froment » per Sèrgi Viaule, parucion, Punt de Lenga e Expression occitana
P14 — Cronica Visca la lenga locala « Un govèrn dinamic per la promocion de la lenga gallesa »
P15 — Agenda Cultural
P16 — Pertrèit de La Setmana « Auguste Comte e lo positivisme »

  • Publicat dens Culture

« L'ADN occitan » per Jef Sénégas

Lo 1ièr de decembre, lo rocker narbonés, Jef Sénégas, cantèt sa cançon « L'ADN occitan » acompanhat de musicians e cantaires al Parc dels Espòrts de Narbona (11) abans la partida de rugbi de Pro D2 RCNM-Vannes. 

La cançon (en francés) foguèt anonciada coma lo novèl imne de la Region Occitània/Pirenèus-Mediterranèa e las reaccions foguèron vivas demest los occitanistas. Jef Sénégas acceptèt de respondre a qualques questions al moment de la polemica. Nos expliquèt que la creacion de « L'ADN occitan » datava pas de uèi :

Entrevista audio

Inf. : https://www.facebook.com/jef.senegas https://twitter.com/JefSenegashttp://jefcircus.fr/artiste — Mèl : This email address is being protected from spambots. You need JavaScript enabled to view it.

Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+