Uei : 23/02/2018

La borra e lo fuòc...

Que volètz ? Ieu, mas referéncias son las d’autres còps, las d’avant la telaranha planetària e los malhums socials e tiri mas informacions màgerment dels mèdia tradicionals, exagonals o estrangièrs ; pel demai, ensagi de far trabalhar mas neurònas e m’arriba sovent de convocar un rencontre al som amb mon doble per pas córrer coma las fedas a la sal. Coma a l’acostumada, la tempèsta nos arriba dels Estats Units ; non pas los incendis e los delavacis de la còsta oèst mas si ben l’afar de las femnas agarridas…

En 2011, i aguèt un òme politic francés qu’escapèt a las galèras gràcia al drech estatsunidenc e a un compte en banca consequent ; las reaccions, la suspresa passada, s’atudèron e los mèdia parlèron de quicòm mai… Aqueste còp, la borra s’enflamèt del costat de Hollywood dins lo mitan del cinèma e los malhums socials faguèron la rèsta ! Una, puèi doas, puèi tres actritz… faguèron de declaracions a la premsa per dire qu’èran estadas agarridas per un meteire en scèna, un productor o qualqu’un mai de las personalitats qu’avián lo poder de far o de roïnar una carrièra. Un còp la borra alucada, d’autras venguèron lèu lèu alimentar lo fuòc que sautèt en França coma una beluga sauta los pins dins lo pinhadar…

Mas, se sap que lo fuòc crama tot sens far la tria… Aital n’es d’aquela denóncia, salutària de segur, mas que poiriá pausar qualques problèmas. Ja, o vesèm amb las letras mandadas a la premsa per de « people » que s’autoproclaman los « defenseires de la fe vertadièra » d’una faiçon coma sols los Franceses o sabon far ! Ja, ne i a que demandan la retirada de tal o tal tablèu dins un musèu, una exposicion… Deman, perqué pas un libre, un film… ? Perqué pas lo reviscòl d’una « mesa a l’indèx », apanatge de la Glèisa catolica, un còp èra ?

Lo fuòc es totjorn fòl e pas jamai aisit a atudar…

Andriu de Gavaudan

  • Publicat dens Éditos

Mèdias occitans — 2 servicis civics tà desvolopar l'auhèrta de produccion en òc

La Federacion Interregionau deus Mèdias Occitans (FIMOC) dont hè partida Vistedit/La Setmana, que perpausa dus servicis civics. Las lors missions que començarén a partir deu 24 de genèr per ua durada de 8 mes, 24 òras per setmana. La Federacion que vòu atau desvolopar accions qui favorizan l'accès a tots a l'auhèrta de las produccions audiovisuaus, radiofonicas e editoriaus en lenga nosta.

Article sancèr

Mèdias occitans — Dus servicis civics tà desvolopar l'auhèrta de produccions en òc

La Federacion Interregionau deus Mèdias Occitans (FIMOC) dont hè partida Vistedit/La Setmana, que perpausa dus servicis civics. Las lors missions que començarén a partir deu 24 de genèr per ua durada de 8 mes, 24 òras per setmana. La Federacion que vòu atau desvolopar accions qui favorizan l'accès a tots a l'auhèrta de las produccions audiovisuaus, radiofonicas e editoriaus en lenga nosta.

Qu'a per tòca de realizar un estat deus lòcs a l'atencion deus sons membres e deus sons partenaris publics/privats e deus lectors, auditors e telespectators. Que miarà ua enquèsta sociolingüistica dab los volontaris tau monde sensibilizats a la problematica de la sauvaguarda, de la promocion e de la difusion de la lenga occitana.

La plaça e la representacion deus mèdias occitans dens la societat qu'ei l'un deus enjòcs màgers de l'enquèsta. Atau, que's poderà avalorar las acostumas de consum de la produccion accessibla uei lo dia e las atentas deus divèrs publics.

Aquiu las missions qui seràn enter autas hidadas au volontari : prospectar las estructuras e las associacions relais, anar a l'encontre deus publics visats au parat d'eveniments culturaus occitans suu departament deus Pirenèus-Atlantics, realizar sondatges o enqüèra anar encontrar aus mèdias membres entà amassar informacions sus las lors produccions.

La FIMOC qu’a per tòca d’arrecaptar l’ensemble deus mèdias de l’economia sociau e solidària qui causeishen, estatutariament, dens lors supòrts respectius, de promòver e de difusar la lenga e la cultura occitanas. Qu'a per mira d'estar un organ que permet la representacion, lo sostien, la concertacion, la mutualizacion deus mejans tecnics e umans deus mèdias sòcis. Que participa activament a la reflexion suu desvolopament deu sector, dab la creacion d’apèrs de tribalh e de projèctes collectius.

Inf. : Consultar l'anóncia ací www.fimoc.com

Poder « vertical »

Quitament s’es pas my cup of tea, soi pas d’aqueles que son a l’aise amb los malhums socials e que mandan cada jorn fòtos, vidèos, etc. ; i vau veire çaquelà que se i pòdon trobar, a còps, causas interessantas ignoradas pels mèdia tradicionals. Per aqueles, l’espectacle de « la comèdia umana » contunha e son passats a quicòm mai. Catalonha, pel moment, es passada de mòda e, de tota faiçon, la causa es entenduda : los Catalans an tòrt perqué son minoritaris en Espanha e en Euròpa. Los mèdia se son virats cap a Alemanha per seguir la destinada de la Merkel, minoritària pel primièr còp desempuèi un dotzenat d’ans e tornan periodicament sul Brexit e los Angleses que o fan tot per aver lo burre, la moneda per lo crompar e lo sorrire de la cremièra ! Pensatz se lo sòrt de Catalonha es de comptar ! Qual que siá lo president exagonal, qual que siá lo partit o lo « movement », la causida es facha en favor d’una Euròpa de las nacions – a la francesa pr’aquò ! – e cal pas jamai doblidar que França existissiá ja del temps del rei Cezet !

Quitament los estabosits an degut notar que lo ministre de l’Educacion nacionala o rapelèt la setmana passada fàcia a la representacion nacionala. « I a pas qu’una sola lenga francesa, una sola gramatica, una sola republica », çò diguèt a propaus de quicòm mai e en botant sul devant l’Acadèmia francesa que n’aviá perdut l’abitud. Aquestes prepausses restontisson d’una faiçon curiosa a las aurelhas dels promotors de las lengas istoricas de França. França es encara e totjorn francofrancesa e, levat l’anglosaxon, las autras lengas son pels somiaires… e encara… Aparentament, las annadas que passèt en America latina o centrala li faguèron pas comprene la possibilitat per un país d’aver mai d’una lenga oficiala. La regionalizacion ven de mai en mai estequida cap a un bonapartisme trionfant que lo president e son govèrn ne son los eralds…

Andriu de Gavaudan

  • Publicat dens Éditos

Lo cese de Bertrand (Emission Lenga d'òc)

Isabèla François e Joan Hébrard, de la companhiá Gargamèla jògan una pèça d'Anne Clément. A destinacion dei mai joines, Lo cese de Bertrand mescla comedians e mariòtas, occitan e francés. D'entrevistas e sequéncias de l'espectacle vos menaràn dins l'intimitat dau teatre jovença, onte leis actors fan plaça granda a l'occitan, lenga d'art e lenga d'escambis. Un reportatge d'Amada Cròs. 

Cadena Youtube de Tè Vé Òc aicí

Acampada lo 8 de novembre sul tèma « Volèm l'occitan cada jorn a la television »

L'aviam anonciat a la fin de la setmana passada sul site de lasetmana.fr, una acampada amassant d'associacions e de movements occitanistas se debanèt diluns 9 d'octòbre a l'Ostal d'Occitània de Tolosa, a l'apèl de País Nòstre. L'objectiu èra de discutir d'una campanha reivendicativa occitanista sus dos tematicas : los mèdias e l'ensenhament en lenga occitana.

Una trentena de personas assistiguèron a l'acampada dont Convergéncia Occitana, representada per Joan-Francés Laffont, la Confederacion Calandreta per son president Joan-Loís Blenet, mas tanben lo Partit Occitan, lo Partit de la Nacion Occitana, Bastir Occitània, País Nòstre, un representant d'Europe Ecologie Occitània, Danís Cantournet de l'associacion Macarel, l'Esquèrra Revolucionària occitana e Ràdio Occitània.

Una primièra mobilizacion es prevista lo 8 de novembre, plaça del Capitòli a Tolosa a 11 oras 30 sul tèma « Volèm l'occitan cada jorn a la television ». Una segonda se debanarà al mes de decembre.

Joan-Pèire Laval de País Nòstre nos en ditz mai sus las reivindicacions d'aquel collectiu d'associatius : ETV audio

País Nòstre vòl lançar una campanha d'accion suls mèdias e los emplecs de Calandreta

País Nòstre convida totas las associacions e movements occitanistas a un acamp qu'organiza diluns lo 9 d'octòbre a 18 oras a l'Ostal d'Occitània a Tolosa per prepausar lo lançament d'una campanha reivindicativa occitanista segon l'associacion. « L'objectiu es lo lançament d'una campanha d'accion portant sus dos tèmas. Primièra reivindicacion, la de la preséncia d'emissions occitanas quotidianas sus la television publica regionala e sus las antenas de televisions privadas. Segond dorsièr, al còr de l'actualitat, lo manteniment dels emplecs ajudats per las escòlas Calandretas », escriguèt l'associacion dins un comunicat.

Seràn presents la Confederacion de las Calandretas, lo Partit Occitan, lo Partit de la Nacion Occitana, o encara Bastir Occitània.

Las conclusions d'aquel rencontre seràn de retrobar sul site de lasetmana.fr la setmana qu'arriba.

Inf. : http://paisnostre.midiblogs.com/

 

Mèdias : Lo Jornalet a cinc ans !

Los cinc ans del Jornalet se festegèron coma se deu. Pendent tot lo mes d’abril, de las quatre informacions publicadas cada jorn, una pertoquèt a d’eveniments de fa quatre ans, al temps de la fondacion de Jornalet. Se debanaràn tanben d’acampadas per rencontrar los lectors. Ferriol Macip, capredactor del jornal en linha, passèt per Carcassona al mes de febrièr e per Marselha lo 24 de mars. A Barcelona lo 27 d’abril, presentèt un libre dels cinc ans e lancèt una vidèo d’aniversari en linha. Tornarà puèi en Occitània amb un rencontre a Narbona, lo 18 de mai.

Lo punt culminant serà una jornada tota organizada dins una sala d’espectacles de Barcelona, lo primièr de julhet. S’i farà un cors d’occitan, un sopar occitan e tanben una serada animada per un grop de musica tradicionala atal coma los Goulamas’K. Una operacion de finançament participatiu serà lançada per poder pagar los musicians. Ferriol farà puèi sa virada estivenca costumièra en passant per l’EOE de Vilanòva d’Òlt (47), pel congrès de l’AIEO (10-15 de julhet a Albi) e enfin al festenal Hestiv’òc, a Pau, jos resèrva.

 

  • Publicat dens Culture
Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls. Prepausa cada mes doas istòrias, de jòcs, una pagina de vocabulari e un dorsièr en rapòrt amb un dels dos 

+