Uei : 24/09/2017

Refòrma deu Còdi deu Tribalh — Enter 223 000 e 400 000 manifestants per las arruas

Las manifestacions contra la refòrma deu còdi deu tribalh qu'amassèn enter 223 000, segon la polícia e 400 000 manifestants segon lo secretari generau de la CGT, Philippe Martinez, ger. Aqueth movement de protèst qu'amassè donc autant de monde com lo purmèr acamp contra la lei Tribalh de Myriam El Khomri lo 9 de març de 2016.

Los manifestants que portavan bandaròlas en tornar préner frasas de politics de manièra ironica. Mots qualificats de « provocators » escandats peu President de la Republica la setmana passada a Atenas, qu'estón repres per la hora « Fenhants de tots los país, amassatz-vs ! »

Jean-Luc Mélenchon, de la France Insoumise, que participè a la mobilizacion a Marselha aus costats deus 7 500 manifestants segon la prefectura (60 000 segon los organizators). A Tolosa, qu'èran enter 8 000 e 16 000 a baishar per las arruas entà sostiéner tots los sectors tocats per la crisi.

Totun, lo govèrn que demora silenciós dab un President qui a hèit lo viatge tà Sent Martin e las ilas Sent Bartelemi e un cap deu govèrn, Edouard Philippe, tròp aucupat entà chepicà's de la mobilizacion, aqueth darrèr que's tienó totun assabentat deus eveniments de la jornada. Lo pòrtavotz deu govèrn, Christophe Castaner que declarè : « Créder que lo rapòrt de fòrça sociau e's jòga enqüèra uei lo dia per las arruas, qu'ei ua error, qu'ei un mite ».

Duas autas mobilizacions que son previstas los 21 e 23 de seteme a l'aperet de la CGT e de Jean-Luc Mélenchon. Lo 22 de seteme, lo President Macron que presentarà oficiaument las soas 5 ordenanças per reformar lo Còdi deu Tribalh au moment deu Conselh deus ministres.

Fòto : Captura Twitter Jean-Luc Mélenchon

Gèl dels contractes ajudats, Calandreta s'amalís

L'anóncia de la supression de quasi 150 000 emplecs ajudats a partir de la dintrada provòca la colèra dels cònses e de nombrosas associacions avent ressorça ad aquel genre de contracte dempuèi lors creacions dins las annadas 80.

Aquel còp dur portat al sector associatiu seriá degut a la « non-eficacitat d'aqueles contractes contra lo caumatge » e al fach que non sián pas lo trempolin esperat dels tribalhaires cap al mercat de l'emplec. « Fals » respond lo partit Régions et Peuples Solidaires dont avèm entrevistat l'un dels membres, Pèire Costa ger : « Los emplecs ajudats an ben una utilitat socialas, entraïnan lo creis dels taus d'activitat de las personas cibladas e permeton de sortir del caumatge ». Lo jove militant parla d'agravacion de la fractura territoriala e denóncia la baissa del nombre de contractes ajudats qu'equival a la mòrt de las escòlas immersivas.

Del costat occitan, la Calandreta del Lis en Bearn foguèt la primièra a reagir a la supression dels CUI-CAE per un comunicat de premsa mandat a la redaccion. I fa estat de la situacion dels emplegats de son escòla : doas personas son emplegadas mercè als contractes ajudats.

Cronica ESPIAR — Macron ena continuitat…

Macron qu’ei presentat com portaire de nautat, de modernitat, de diferéncia en mestior de poder. Qu’ei er’imatge dat peths cargats de propaganda dab er’ajuda deths mèdias. Tot aquerò que serveish tàd estujar era continuitat ena defensa deths interés der’imperialisme francés. Que la voi notar ací, que’s manifèsta de tira en çò d’aperat luta contra terrorisme.

Per luta contra terrorisme que i a de véger per extension era politica estrangèra, engatjada de tira, viste hèit, shens desbat, en ua espècia d’evidéncia, que mes arrecebuda en’unanimitat de quasi tots. Er’integracion deth Estat d’urgéncia en Dret comun que’n constitueish un aute aspècte. Athèu que’s pòt esperar encara ua cèrta arresisténcia democratica dijà engatjada drin.

 

« França que serà ath reng prumèr ena luta contra terrorisme »

 

Autanlèu un deths discors prumèrs, E. Macron que parlè dera miaça terrorista. D’arremercar aquera question qu’aucupa ua plaça importenta ena politica francesa. Darrèr que i a tota era « filosofia » d’un nacionalisme francés aras pretensions « universalistas », en hèit tà sosméter pòples e ua politica estrangèra tostemps per natura neocolonialista e imperialista. Aquerò qu’ei explicit hèra ena aquesta frasa : « Que defenerèi França, eths interés vitaus, eth messatge, er’imatge. (…) França que serà ath reng prumèr ena luta contra terrorisme. »

Eths « interès vitaus », expression qui torna sovent, que son « interès » en dehòra deras fronteras deth Estat francés, tà’s gahar riquessas e servir era situacion de poderosas entrepresas plan segur. Que justifica totas eras entrepresas neocolonialistas e imperialistas. Presentadas ena ua envelòpa ideologica : « eth messatge, er’imatge », qu’ei a díser, Revolucion de 1789, « patria dera democracia » e deths « drets deth òmi ». Tot qu’i ei, tot qu’ei tornat afirmar tà contunhar eras intervencions militàrias, eras basas militàrias, er’armada d’intervencion, eras allianças reaccionàrias (Estats-Units, Israèl, Egipta, Arabia Saudita, …) Mensh d’ua setmana après er’installacion, Macron qu’anè entà Mali tà confirmar aquera politica e notadament era dera « França-Africa ».  Uei mes de 4 000 sordats que son engatjats en Africa, d’« especialistas » que son en Libia e en Irac, directament engatjats ens combats. Eth comèrci deras armas que contunha. Era nominacion de Le Drian, ancian cap deras armadas, com ministre deths ahèrs estrangèrs, qu’ei un signe deths maishants entà pòples, tàra diplomacia e tàra patz futura.

Macron qu’a causit ua luta dab fòrça, intervencions militàrias, bombardaments, tot çò qui entraina tensions e sentiments de mesprètz, frustracions, malícia… N’ei pas guèrra qui serà era solucion. Aquesta n’a pas amuishat guaire d’eficacitat grana per Afganistan, Libía, Irac,… Aqueth terrorisme que putsa en intervencionisme imperialista com en vueit ideologic e politic deishat peths nacionalismes e socialismes arabes, arrasons e arguments d’arresisténcia e d’ofensiva de cap aths Estats imperialistas.

Lavetz, Macron que’s presenta vertaderament ena seguida de Hollande com cap de guèrra. Qu’envita a un engatjament mes importent deths Estats europèus, en arrecercar atau ua generalisacion der’intervencionisme. En díser er’esfòrç militari qu’ei eth mielhor antidòt ath desvelopament deth terrorisme islamista, qu’engatja per longtemps eth Estat francés ena guèrra non declarada, que’u hica ath costat der’imperialisme american e’ras suas aventuras. Que rebat ua analisi faussa deth terrorisme e deth djihadisme.

Çò d’inquietant e qui n’estó pas guaire soslinhat qu’ei era plaça auhèrta aras fòrças armadas francesas ena societat. Quan Macron e ditz : « Peras “ fòrças vivas ” dera nacion, qu’èi volgut dar eth reng prumèr aras fòrças armadas ». Qu’ei ua promocion estranha der’armada e inabitau. Tot d’un còp qu’aucuparé ua plaça navèra ena politica interiora com exteriora ? Quina influéncia ens decís e causidas politics? Mes de poder deishat ar’armada tostemps mes presenta peras carrèras en tota escadença, perlongament dinc ara fin d’annada deth Estat d’urgéncia, tot aquerò qu’anóncia un ambient particular e permanent com ua miaça vertadèra tà democracia. Mes n’i avó pas supression deth Estat d’urgéncia enas promessas electoraus ?

Banalizacion deth Estat d’urgéncia

Hèr deth Estat d’urgéncia ua lei permanenta de Dret comun que seré era solucion ath perlongament deth Estat d’urgéncia. Er’arresisténcia que s’organisa contra aqueth torn de passa passa. Denonciat peth hialat  Etat d’urgence/antiterrorisme, compausat d’organisacions com Amnesty International, Collectif contre l’Islamophobie en France, Greenpeace France, Human Rights Watch, La Quadrature du Net, Ligue des Droits de l’Homme, Observatoire international des Prisons, Syndicat des Avocats de France et Syndicat de la Magistrature, …. e d’universitaris e de cabinets d’avocats.

Qu’acusan aqueth projècte de tèxte de deishar ua plaça importenta ath sospieit, e que mes de non pas simplament perlongar eth Estat d’urgéncia mes de’u perennizar en hèr ua lei de Dret comun. Perquisicions e assignacions administrativas que poderàn estar d’ara enlà de practicas abituaus.

Eth mes grèu dangèr d’aqueras mesuras  que serà er’emplec d’interdiccions de sejorn e donc de’s desplaçar, que poderàn èster emplegadas contra tot militant de quina causa que sia. Atau eras manifesatcions occitanistas que poderàn èster pertocadas ad aquera futura lei, en efèit que poderàn èster consideradas com hèr domau ara seguretat interiora. Aquera lei futura non serà pas solament contra terrorisme mes que serà un domau aras libertats de circulacion, de manifestar, e que permeterà totas eras estigmatizacions.

Com l’escrivó er’avocat Emmanuel DAOUD, avocat ath collègi deths avocats de Paris, « qu’èm de cap a un Estat policièr ». (12 de junh de 2017 – Médiapart) E d’ajustar que i averà era creacion d’ua policia especiau deth terrorisme, ua policia administrativa, que serà un domau vertadèr ara desseparacion deths poders e ara proteccion deras libertats publicas e endividuaus. Que poderà i aver domau ara circulacion libra de daubuns pr’amor de comportaments considerats com sosten o adesion a de tèsis terroristas. Que senhorejarà eth sospieit. Eth Ministre der’Interior com eths Prefèctes que seràn libres d’assignacion a residéncia shens eth jutge judiciari. Eth poder executiu qu’averà tota era plaça. Eth article 66 dera Constitucion enonciant eth jutge judiciari com « gardian dera libertat endividuau » qu’ei estremat.

 

Finaument çò d’arregetat deth quinquenat de Valls e Hollande que l’am dab Macron. E que’ns parla de cambiament, de nautat, de modernitat, d’ubèrtura. En prumèr, que podem constatar era continuitat en un Estat tostemps mes arrepresiu e’ra seguida deras aventuras imperialistas.

 

Alan Sibé

 

Inf. : « Occitanisme politic, Rompeduras » d'Alan Sibé, 7 carrèra deth Pic de Mieidia — 65200 Banhèra-de-Bigòrra — Tarifa : 20 € (+còstas d'enviada).

#2017OC — Emmanuel Macron que sorteish de respóner au questionari

La FELCO n'èra pas mei la soleta a voler questionar los candidats a la presidenciala e a las legislativas sus çò que comptan har per las lengas (La Setmana n° 1073). Dètz autas estructuras, dont l'InÒc Aquitania, la FIMOC, l'IEO, Calandreta e lo CIRDOC, que's son amassadas dab la federacion d'ensenhaires entà hicar en linha un questionari sus internet. Disponible a l'adreça 2017oc.fr. Qu'ei obèrt aus candidats (o aus lors collaborators) qui dospausan d'un espaci consacrat e poden respóner a las questions en linha.

Compte tiengut deu perilh de desapareishuda de la lenga nosta, los signataris de la platafòrma que considèran que « i a hèra de causas qui demoran a har » a maugrat de las avançadas obtienudas mercés a la signergia enter Estat e Collectivitats. Que pensan qu'ei mei que mei a l'Estat d'assumir las soas « responsabilitats e devers » entà assegurar la transmission d'aquera « ressorça miaçada de la cultura nacionau ». A l'òra d'escríver aqueras linhas, 7 candidats que responón a las questions suu site : Jean Lassalle, Jacques Cheminade, Nicolas Dupont-Aignan, Benoît Hamon, Philippe Poutou, Jean-Luc Mélenchon e... Emmanuel Macron uei lo dia.

Programa d'Emmanuel Macron : pas un mot sus las lengas !

Lo candidat del movement En Marche ! presentava son programa lo 2 de març.

Enfin, Emmanuel Macron a un programa. Dempuèi dijaus passat, se pòt telecargar sul site del movement En Marche. Per l'ancian ministre e conselhièr, l'objectiu es clar : « far dintrar França dins lo sègle XXI » en refusant de pensar que vivèm dins « un país que se pòt pas reformar ». Ne fa un contracte amb los Franceses.

Pendent son discors, concentrèt sas atacas sus son rival de la dreta e del centre en foetejant son « espectacle permanent del pessismisme ». Pel sénher Macron, reformar lo país passa pas per de « reformas britanicas de las annadas 80 ». Dins sa vision de la « societat del trabalh » prepausa una reforma de l'assegurança-caumatge per la far universala en l'acompanhant tanben de contrapartidas per sos beneficiaris (l'abséncia d'esfòrces de recèrca d'emplec o alara lo refús d'ofèrtas rasonablas poiràn menar a la suspension de las allocacions). 

Pro evasiu sul plan de l'educacion e de la cultura, Macron questiona pas grand-causa. Questiona pas l'autonomia de las universitats mes en plaça per Valérie Pécresse. Vòl l'accessibilitat a l'excelléncia per totes. Sul plan de l'identitat, son programa es luènh d'èsser revolucionari. Per « tornar fondar lo ligam amb la nacion », la mestresa de la lenga francesa serà una exigibla per l'obtencion de la nacionalitat francesa. Per çò qu'es dels territòris, contunha dins la meteissa dinamica que François Hollande puèi que vòl poder suprimir un quart dels departaments del moment que poiràn èsser aprochats amb una de las metropòlis existentas. Pasmens, lo sénher Hollande escriguèt al mens una linha tocant a las lengas amb la promessa de ratificacion de la Carta. Amb Emmanuel Macron, aquò desapareis del païsatge. En soma, malgrat sos esfòrces per se desmarcar de sos concurrents, Emmanuel Macron demòra un candidat a la presidenciala dels classics.

Clamenç Pech

Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Papagai

Papagai es la revista occitana dels pichonèls. Prepausa cada mes doas istòrias, de jòcs, una pagina de vocabulari e un dorsièr en rapòrt amb un dels dos 

+