Uei : 14/12/2017

France 3 que guarda las soas edicions locaus… dinc a 2021

Lo deputat deus Pirenèus-Atlantics, Vincent Bru, que publiquè suu son compte Facebook diluns passat, un corrièr de la gavidaira regionau de France 3 Navèra-Aquitania. En aqueth, Laurence Mayerfeld qu'avisa los professionaus de la cadena publica de la soa volontat de sosméter au vòte un contracte d'Objectius e de Mejans enter France 3 e lo Conselh regionau lo 23 d'octobre qui arriba. « Aqueth COM que miarà la creacion d'ua cadena regionau en Navèra-Aquitania, qui serà difusada suu hialat cablat e sus las box. Aquera navèra auhèrta televisuau, completada per la difusion TNT hertziana actuau, que permeterà lo manteniment de las 5 edicions locaus (Pau, Baiona, Peireguers, Briva e La Rochela) de Navèra-Aquitania per las tres annadas a viéner », çò anóncia la gavidaira regionau.

Lo deputat deu departament 64 que's regaudí de la reaccion rapida de France 3. Aquestas darrèras annadas, los professionaus de la cadena que s'èran mobilizats dens mantuas regions entà denonciar la barrada de las 16 edicions locaus (de 19 òras 15), qui devèvan estar integradas en partida dens las edicions regionaus.

Fòto : mobilizacion a Baiona tau manteniment de l'edicion locau. (Captura youtube Jacques Pons)

Supression de 16 jornaus locaus France 3 : mobilizacion deus salariats e sostien ciutadan

Que n'avèvam parlat sus lasetmana.fr, quauques dias a, los collaborators de France 3 recebón la novèla pertocant a la supression de las soas edicions locaus, per la direccion generau. La decision qu'estó presa per la sedença parisiana de France Télévisions, a la quau l'Estat a demandat de har cap a 50 milions d'euros d'economias abans la fin de l'annada 2017. Atau, los reportatges realizats peus jornalistas dens las edicions locaus, que seràn integrats dens las emissions 19/20 regionaus. « L'idea qu'ei de balhar mei de visibilitat aus subjèctes locaus en integrà'us dens los nostes JT regionaus. La nosta preséncia suu terrenh ne cambiarà pas. Tots los nostes burèus que demoran obèrts e los nostes jornalistas que demoran en pòste », çò declarè lo gavidaire de France 3 Region Occitania, Carlos Bélinchon.

« Un telespectator sus dus non recep pas l'edicion locau qui li èra destinada, pr'amor n'èra pas que difusada sus la TNT mes pas via l'ADSL », s'explica la direccion de France 3. En tot guardar los emplecs e los volumes d'informacions produsidas, France 3 que declara voler har evolucionar lo perimètre de difusion.

Los sindicats de France Télévisions que protèstan contra lo projècte de reorganizacion de las edicions locaus d'informacion, e que miè a ua cauma dens las locaus de la cadena e mei que mei en Region Navèra-Aquitania e en PACA. Los grevistas qu'argumentan que la direccion pren com pretèxte ad aquera refòrma lo hèit que mensh de 50 % deus telespectators an accès a las locaus, « quan aquera quita direccion arrefusè d'envisatjar solucions tecnicas mei tà ua grana partida de las locaus » (espacis sus las Box e lo satellit). En mei de las economias demandadas per l'Estat, aqueth qu'auré tanben exigit la supression de 500 emplecs a temps plen d'ací 2020.

Nombrós salariats de France 3 a Lemòtges e Briva, que manifestèn lo lor maucontentament ger. Los personaus de France 3 País catalan que hasón cauma davant la mairia de Perpinhan dens lo vrèspe. « Qu'èm ua edicion qui estó creada 23 ans a, qui a creat ligams dab los abitants deu territòri. Que'ns disem que n'i averà pas nat licenciament mes qu'èm dens l'incertitud. Qu'investeishem suu plan nacionau, a París, com France Info TV e que tiram mejans au locau. Qu'èm dens ua societat qui evolua cap a apressadas e circuits bracs a aquiu que hèm lo contrari. Qu'ei entad aquò que hèm signar ua peticion au monde », çò digó Corinne Morel, assistenta dens l'edicion locau.

L'antena de France 3 País catalan qu'emplega 19 personas a Perpinhan en mei d'intervienents en lenga catalana. Dens lo vrèspe, arron lo Comitat centrau d'enterpresa qui's debanè dens la capitala, Delphie Ernotte, presidenta de France Télévisions, que tornè sus la decision de barrada de las locaus, atau los gavidaires regionaus de France 3 que deveràn decidir de l'aviéner de las lors edicions locaus... Ger, davant la Cramba de comèrci e d'industria a Baiona, cap a 300 personas que's mobilizèn contra la desapareishuda deu jornau locau deu País-Basco.

Lo President de la Comunautat d'Aglomeracion País-Basco, Jean-René Etchegaray, que vienó portar lo son sostien a l'equipa de France 3 Euskal Herri : « Aqueth projècte, pr'amor ne poish pas créder qu'i aja ua decision definitiva, qu'ei ua frinèsta de la França qui's barra suu País-Basco. N'acceptam pas aquò », çò declarè pendent la manifestacion.

Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 
Capture decran 2017 11 28 a 11.48.12

Papagai

Papagai es la revista occitana dels pichonèls. Prepausa cada mes doas istòrias, de jòcs, una pagina de vocabulari e un dorsièr en rapòrt amb un dels dos 

+