Uei : 20/01/2018

XVIIIau Collòqui d'onomastica a Tolosa

Despuish dimèrcs e dinc au ser, que's debana lo 18au collòqui d'onomastica a Tolosa. Qu'ei organizat cada dus ans e qu'a per tèma augan la circulacion lingüistica e l'onomastica occitana.

Lo collòqui que comencè suu tèma de las circulacions lingüisticas, las categorias denominativas e las lors relacions en onomastica en preséncia de Jean-Louis Vaxelaire, professor a l'Universtat de Namur en Belgica qui parlè de las tipologias onomaticas, e de Daniela Butnaru de l'Institut de filologia romana qui s'interessè a las relacions enter uns noms de lòcs rebatuts dens un diccionari toponimic.

L'endedia, las discutidas que pertocavan las relacions enter categorias dens lo domèni de la toponimia. La cercaira Marcienne Martin, de l'Universitat de La Réunion que hasó ua presentacion suu subjècte « Deu totemisme a la toponimia : l'exemple deus grops amerindians ».
Jean-Claude Bouvier, professor emerit d'Ais-Marselha Universitat que presentè « Deus “toponimoïdes” aus toponimes. Quauquas reflexions sus l'emergéncia deus toponimes dens l'escriut e dens l'orau ».

Uei, lo tèma tractat qu'ei l'onomastica occitana dab convidats especialistas com Hervé Lieutard de l'Universitat Paul-Valéry, Aitor Carrera de la Cadièra d'Estudis Occitans de l'Universitat de Lhèida, Paul Burgan, SFO, o enqüèra Patrick Sauzet, professor a l'Universitat Jean Jaurès de Tolosa. Pierre Bréchet, president de l'IEO qu'explicarà cap a 16 òras 30, quin restituir la soa toponimia tà ua lenga minorizada e quin estructura ua dinamica associativa en hialat.

Lo collòqui qu'ei organizat per la Societat francesa d'onomastica (SFO), lo laboratòri CLLE-ERSS (CNRS - Universitat Tolosa Joan Jaurès) e Lo Congrès permanent de la lenga, dab lo sostien de la DGLFLF, de la Region Occitania/Pirenèus-Mediterranèa per l'OPLO, e de l'Universitat Joan Jaurès de Tolosa.

Programa deu Collòqui

Occitan — Auhèrta d'estagi au Parc Naturau Regionau de Miuvaches en Lemosin

Lo Parc Naturau Regionau de Miuvachas en Lemosin que cèrca un estagiari tà desvolopar lo son programa de formacion a la cultura e a la lenga occitanas.

Dens lo projècte de Carta 2018-2033, lo PNR que desira har víver l'occitan entà mantiéner lo patrimòni deus rics, car au son territòri. Dens l'encastre deu « Contrat de Parc », lo plan d'accions 2018-2020 deu parc, que programan mantuas accions dont un plan de formacions e de sensibilizacion a la cultura e a la lenga en foncion deus publics ciblats e deus besonhs.

L'estagiari qu'averà per mission la mesa en plaça d'aqueth programa de formacion. Qu'organizaratz purmèr ua formacion generau taus elegits e agents deu Parc qui servirà d'experimentacion abans lo començar deu programa de formacion globau sus 2 ans.

La « Lenga de nosta » que s'aficha en tèrra bigordana

Compausada de 15 panèus, qu’a per tòca de vulgarizar los aspèctes lingüistics, istorics e economics de la cultura occitana gascona suu territòri de Bigòrra-Quate Vaths.

Aqueth dimars 12 de deceme que's debanè l'aviada de la mòstra « Lenga de nosta », au licèu Lautreamont de Tarba (65).

Aquera mòstra itineranta compausada de 15 panèus qu’a per tòca de vulgarizar los aspèctes lingüistics, istorics e economics de la cultura occitana gascona suu territòri de Bigòrra-Quate Vaths. Finançada peu conselh departamentau dels Hauts Pirenèus a hautor de 2 000 euros, aquera mòstra qu’ei a l’iniciativa de la MCO (Maison de la cultura occitana), federacion d’associacions basada en periferia tarbesa. Los 15 panèus de la mòstra « Lenga de nosta » que seràn hicats a disposicion a gratis a las estructuras interessadas (associacions, hestenaus, etc.) a comptar de herevèr de 2018. Ua clau de mes, doncas, entà balhar visibilitat a la cultura nosta sus aqueth parçan de Gasconha.

Silvan Carrère

  • Publicat dens Culture

Ua aplicacion entà apréner lo bassa

Ua franco-cameronesa que lança ua aplicacion entà reprénger la soa lenga e la soa memòria d'Africa.

Au mes de junh passat, Stéphie-Rose Nyot Nyot qu'a aviat « Je parle le bassa 2.0 ». L'aplicacion qu'ei en bona posicion au demiei de las autas creadas tà l'aprenedissatge de las lengas africanas.

L'aplicacion que s'adreça aus bassafònes mes tanben aus non-bassafònes. Un 50nat de cors de lenga dab exercicis d'aplicacion en anglés e en francés que son a disposicion. Un vintenat de tèmas qu'existeishen (conjugason, gramatica, vocabulari, vita vitanta, etc.) e a la fin de l'exercici, l'utilizator qu'a ua nòta entà conéisher lo son nivèu.

Questionada peu jornau afrique.lepoint.fr, Stéphie-Rose Nyot Nyot que's hidè sus çò qui la possè a crear aquesta aplicacion : « après estar estada demorada cinc ans luenh de la familha, enter autes au Ganà, en Anglatèrra puish au Canadà, qu'ei en 2013 que soi tornada tà París per un estagi au près de l'UNESCO au demiei deu programa Mémoire du monde e deu département Education Pour Tous. Pendent aqueth periòde, que'm soi tornada installar en çò de la familha on parlan en bassa. Dab ua cèrta destressa, qu'èi realizat que m'èri perdut ua partida de la mea compreneson de la lenga bassa per manca d'escota. Fin finau, n'avi pas jamei sabut m'exprimir corrèctament en bassa, mes qu'avi tostemps comprés mots e frasas… […] Que soi tostemps estada interessada per la diversitat culturau, las lengas deu monde e la comunicacion digitau, qu'èi decidit, après mantuas recèrcas sus la lenga, d'aviar la pagina Facebook en 2013 dab l'ajuda deus pairs e de perpausar un metòde ludic, colorat, modèrne e creatiu ».

« Je parle le bassa 2.0 » qu'estó creat arron ua campanha de finançament participatiu en mai de 2016. Puish, tot que s'ei encadenat, l'aplicacion e la creacion deu site web (www.jeparlelebassa2point0.com). L'aplicacion pas qu'accessibla sus Androïd peu moment, que recebó lo prèmi deu projècte d'aprenedissatge digitau lo mei bon en Cameron.

Formacions a l'entorn de l'escritura en lenga nosta

Tot au briu de l'annada de 2018, l'associacion AIDO qu'organizarà formacions a l'entorn de l'escritura occitana. Dab aquestas formacions, que desira auherir l'oportunitat de desvolopar las competéncias en lenga e cultura nostas dens ua optica professionau. Las formacions que pertocaràn los domènis de la literatura plan segur, l'institucionau, lo patrimòni, la cultura e l'economia.

Los 24, 25 e 26 de mai, la toponimia occitana que serà analizada dab los principis e los metòdes de tribalh. Los 14, 15 e 16 de junh, zoom suus condes occitans, la lor classificacion, l'istòria e las diferéncias orau-escriut.
Los 11, 12 e 13 d'octobre, l'associacion que perpausa un estudi de las practicas e deus metòdes de l'arrevirada en lenga nosta. Los 29 e 30 de noveme e lo 1èr de deceme, los participants que seràn iniciats a las tecnicas d'escritura en occitan contemporanèu.

Las sessions de tres dias que's compausaràn de 4 serias de modules : los apèrs (metodologia de tribalh, ressorças e exercicis), « Dens lo talhèr deu professionau » (cas practic presentats per professionaus), « Questions de principi » (estudi d'uns punts demandats o la mesa en òbra de las coneishenças) e l'aplicacion deus sabuts de la formacion.

Avisatz-ve, pas que 12 estagiaris maxímum per session.

Inf. : This email address is being protected from spambots. You need JavaScript enabled to view it. — Tel. : 06 81 30 57 67 — Organizacion : AIDO, Maison Coulou — 64490 Òussa

Fòto ©Negative Space

  • Publicat dens Culture

Nadau biarnés en Est-Biarn : escambi Artigalotan-Espoei

Lo dimars 19 de deceme, en fin de vrèspe, los aprenents deu cors deu Cfpòc d’Artigalotan qu’auherín ua petita animacion nadalenca aus petitons de la navèra Calandreta d’Espoei : que podón seguir un conte de la Terèsa Pambrun, « Hòu ! Dejà ! » lejut e interpretat dab monaquetas, e escotar un nadau cantat e interpretat a l’ukelele « A nueit hèsta de Nadau ».

Fin finala, e après ua visita de la lor classa en lenga, que podom partatjar un vresperòt tots amassa, los qui ensenhan atau com los qui aprenen, petits o grans. Au plaser de’ns tornar véder, e bonas hèstas a tots !

CFPÒC Novèla-Aquitània

cfpoartig

  • Publicat dens Culture

CAPES e Agred d'occitan — Lo cap de gabinet del President de la Republica respondèt a la FELCO

Lo cap de gabinet del President de la Republica respondèt a la letra de la Federacion dels Ensenhaires de lenga e cultura d'òc (FELCO) ièr.

La Federacion reagiguèt aprèp l'anóncia d'un sol pòst devolut a l'AGREG occitan per 2018 la setmana passada. De fach, un pòst es previst per 50 candidats e lo nombre de pòstes al CAPES 2018 es de 4 : « l'espaci occitan compta 32 despartaments, qu’una bona part an pas cap de professor del segond gra titulari (Ardècha, Droma, Crueisa, Corrèza, Nauta-Viniana, Puèg Domat, Aups de Provença Nauta, Autas Aups), e mesuram l'ample del mesprètz de cap a una lenga pr’aquò inscricha dins lo patrimòni nacional », escriguèt la FELCO dins un comunicat.

Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls. Prepausa cada mes doas istòrias, de jòcs, una pagina de vocabulari e un dorsièr en rapòrt amb un dels dos 

+