Uei : 14/12/2017

Lo govèrn espanhòl vòl prene lo contraròtle dels govèrns de Catalonha e d'Aran

Mariano Rajoy prepausa de destituir Carles Puigdemont e totes los membres de son govèrn e de contrarotlar las decisions del Parlament catalan. Las institucions de la Val d’Aran serián tanplan tocadas.

Lo president del govern espanyol, Mariano Rajoy, vòl destituir lo president de la Generalitat de Catalonha, Carles Puigdemont, e totes los conselhièrs (ministres regionals) de son govèrn, e prene lo contraròtle del Parlament de Catalonha. Son intencion es de convocar d’eleccions regionalas « tan lèu coma se recobrarà la normalitat institucionala », çò anoncièr lo dissabte 22 d’octòbre passat. Segon Rajoy, aquelas foncions las assumiràn las « autoritats » que lo govèrn espanhòl designarà. Tanben las decisions del Parlament de Catalonha seràn contrarotladas pel govèrn de Madrid. « Aquò es pas una suspension de l’autonomia o de l’autogovèrn, —çò diguèt— son destituidas las personas qu’an plaçat la Generalitat fòra de la lei ». En mai d’aquò, Rajoy confirmèt que lo govèrn espanhòl prendriá lo contraròtle dels mèdias publics de Catalonha, çò es TV3 e Catalunya Ràdio. Los professionals d’aqueles mèdias an mostrat lor indignacion. Rajoy a prepausat aquelas mesuras al Senat espanhòl que las deu aprovar lo divendres 27 d’octòbre. De soslinhar que lo Partit Popular (PP) a la majoritat absoluda al Senat, mas que lo Partit Socialista (PSÒE) e Ciutadans sostenon la decision de Rajoy. Es atal que lo govèrn espanhòl a interpretat l’aplicacion de l’article 155 de la Constitucion espanhòla ; segon lo president espanhòl, sa tòca es de « tornar a la legalitat » e tanben de « recobrar la normalitat e la convivéncia que se son plan deterioradas ». E mai ajustèt que o fasiá amb la volontat de « contunhar la recuperacion economica que, uèi, es en perilh evident » e de « far d’eleccions en situacion de normalitat ». A prepaus de la crida al dialòg qu’aviá facha plusors còps Carles Puigdemont, Rajoy diguèt que « la Generalitat a pas prepausat cap de dialòg mas una imposicion ». Puigdemont convòca lo parlament per que responda en consequéncia « Es la pièger ataca que l’aja patida Catalonha après Franco », çò diguèt lo president de la Generalitat de Catalonha, Carles Puigdemont. Après participar a la manifestacion per la liberacion dels presidents de las doas associacions independentistas acusats de « sedicion », Jordi Sánchez e Jordi Cuixart, Puigdemont faguèt una compareissença institucionala ont refusèt « aquela ataca » que qualifiquèt d’« umiliacion incompatibla amb una actitud democratica ». Ansin diguèt que « d’impausar un govèrn non elegit pels ciutadans es aquò, es coma exercir la violéncia contra los ciutadans, perseguir los mèdias, incarcerar las gents... ». Dins son discors prononciat al Palais de la Generalitat, Puigdemont anoncièt que demandariá al Parlament de Catalonha que convoquèsse una sesilha extraordinària per analisar las consequéncias de l’article 155 e prene « las decisions pertinentas ». Aquela sesilha se tendrà tanben divendres 27 d’octòbre, en parallèl a la sesilha del Senat espanhòl a Madrid.

Refús del Sindic d’Aran Quant al sindic d’Aran, Carlos Barrera, refusèt e condemnèt aquela « interpretacion dera democracia en aguesti tèrmes totalitaris » en tot sosténer las institucions catalanas. Dins aquel sens publiquèt sus son perfil de Facebook lo comunicat de Convergéncia Aranesa. La situacion politica en Aran se presenta amb una granda tension. Lo secretari general d’Unitat d’Aran, Paco Boya, fa partida del conselh directiu del PSÒE qu’a sostengut la decision de Mariano Rajoy.

Convergéncia aranesa avertís se paralisarà de facto l'autogovèrn aranés

En seguida de l’anóncia del govèrn espanhòl de prene lo contraròtle del govèrn de Catalonha, Convergéncia Democratica Aranesa (CDA) publiquèt un comunicat qu’avertís dels prejudicis qu’aquel mesura pòt representar contra las institucions de govèrn de la Val d’Aran. Segon aquel comunicat, los efièches de la proposicion de l’executiu del Partit Popular (PP) « enes tèrmes plantejadi e se s’apròven peth Senat, en Conselh Generau d’Aran suposarà patir de facto ua paralisi en toti es encastres des competéncies enes qu’en aguesti moments èm a trebalhar, e sonque i aurà era activitat deth dia a dia ». Dins son comunicat, lo Comitat Executiu de CDA assolida « qu’ath deuant dera imposicion deth govèrn der estat espanhòu, entram en ua setmana trascendenta entà Catalonha, Espanha e Aran. Era intencion de «suspéner» era autonomia catalana non hè sonque agreujar era situacion. Ara mès que jamès era negociacion e eth dialòg son er unic camin ». Lo partit nacionalista aranés remembra que la Lei d’Aran « emane deth Parlament de Catalonha e ei sonque aqueth Parlament que l’a arreconeishuda, en an 1990 e recentament en an 2015, en tot escotar e dar a Aran era possibilitat d’arténher ues còtes importantissimes d’autogovèrn ». E conclutz net e clar que « non i a mès enlà dera Lei d’Aran, aprovada en hereuèr de 2015, cap auta lei qu’arreconeishe era realitat aranesa ».

Ferriòl Macip

Catalonha que's proclama Estat independent

Partits independentistas que depausèn ua resolucion entà proclamar Catalonha com un Estat independent davant lo Parlament catalan.

La resolucion qu'estó presentada e sosmetuda au vòte en tenguda plenaria uei. Despuish quauquas minutas, Catalonha qu'ei un Estat independent qui pren la forma d'ua Republica.

A Madrid, los deputats, puish lo Senat que devèvan votar entà aviar l'article 155 de la Constitucion espanhòla de 1978 qui deu hicar la mesa devath tutèla de Catalonha. « si ua comunautat autonòma non respècte pas las obligacions qui'u son impausadas per la Constitucion o per d'autas leis, o ageish d'ua manièra qui hè domau a l'interès generau d'Espanha, lo govèrn que poderà adoptar las mesuras necessàrias entà l'obligar a respectar las ditas obliacions, o tà la proteccion de l'interès generau ». Aqueth acte que destituirà Carles Puigdemont, president de l'executiu catalan.

Catalonha que's proclama Estat independent

Partits separatistas que depausèn ua resolucion entà proclamar Catalonha com un Estat independent davant lo Parlament catalan.

La resolucion qu'estó presentada e sosmetuda au vòte en tenguda plenaria uei. Despuish quauquas minutas, Catalonha qu'ei un Estat independent qui pren la forma d'ua Republica.

A Madrid, los deputats, puish lo Senat que devèvan votar entà aviar l'article 155 de la Constitucion espanhòla de 1978 qui deu hicar la mesa devath tutèla de Catalonha. « si ua comunautat autonòma non respècte pas las obligacions qui'u son impausadas per la Constitucion o per d'autas leis, o ageish d'ua manièra qui hè domau a l'interès generau d'Espanha, lo govèrn que poderà adoptar las mesuras necessàrias entà l'obligar a respectar las ditas obliacions, o tà la proteccion de l'interès generau ». Aqueth acte que destituirà Carles Puigdemont, president de l'executiu catalan.

Regions e sindicalisme

Ne’s reconeishent pas dens los sindicats nacionaus, mei anar mei de salariats que decideishen d’entrar dens organizacions sindicaus au nivèu locau. Dens quin contèxte se son creats los sindicats regionaus mei importants e quau ei lo lor pes dens la societat uei lo dia ?

Despuish lo vòte de la lei qui legalizè los sindicats professionaus obrèrs e patronaus en març de 1884 a l’iniciativa de l’òmi d’Estat francés, Pierre Waldeck-Rousseau, lo sindicalisme que hasó lo son camin en França. Los Republicans qu’esperavan controlar los sindicats dens ua França on lo capitalisme neishèva. Los estatuts que devèvan per exemple estar depausats en mairia dab los noms e las adreças deus gavidaires e lo maire que’n devèva referir au Prefècte e a quauquas ocasions au patronat dirèctament. Las organizacions sindicaus que’s multipliquèn totun. Quan los sindicats de la CGT e deu CGTU e permetón d’obtiéner la signatura en 1936 deus acòrds de Matignon pertocant aus congèts pagats, a las 40 òras, a la reconeishença deus delegats deu personau e a las convencions collectivas, los tribalhaires que semblan aver deishat de comptar sus aqueras organizacions tà melhorar las lors condicions de tribalh. En efèit, uei lo dia, França qu’ei lo país de l’OCDE on lo taus de sindicalizacion deus salariats ei lo mei baish, 8 % tà l’ensemble e 5 % dens lo sector privat, e on lo dialògue sociau sembla lo mensh desvolopat. A títol de comparason, en Alemanha, 18 % deus salariats que son sindicats, au Reiaume-Unit, 25 % e en Islàndia dinc a 82 %. Pertant, los sindicats que son plan presents sus l’empont politic e sociau e son frequentament convidats a expausar las lors reïvindicacions dens los ministèris deu govèrn entà « parlar au nom deus salariats ». Cada annada, que participan a negociacions qui permeten la signatura de 35 000 acòrds d’enterpresa e mei de 1000 acòrds de branca. Segon ua enquèsta deu Centre de recèrcas politicas de sciéncias po (Cevipof), 28 % deus Francés que s’ahidan aus sindicats entà deféner los lors drets.

  • Publicat dens Dossiers

Catalonha : revolucion democratica après un còp d'Estat contra la Generalitat

Lo 20 de setembre passat, de matin, la Gàrdia Civila espanhòla intrava dins plusors sètis del govèrn de la Generalitat de Catalonha, dont lo de las finanças, lo dels afars socias e lo de las relacions institucionalas. Los agents faguèron mai d’una quarantena de perquisicions, detenguèron catorze nauts foncionaris e metèron en examen una vintena de personas. Los ciutadans prenguèron per milièrs las carrièras en Catalonha tota per protestar contra aquela accion. Dempuèi alara, las mobilizacions son nombrosas e permanentas e lo pòble s’organiza en una sòrta de revolucion democratica que supèra la capacitat de repression de las autoritats espanhòlas.

L’operacion de la Gàrdia Civila, que li disián Anubis en onor del dieu egipcian de la mòrt, aviá la tòca de cercar de documents restacats amb lo referendum d’independéncia de Catalonha e Aran previst pel 1r d’octòbre venent, que lo govèrn espanhòl a declarat illegal. Un jutge ordenèt aquela operacion en acusant los detenguts de desobesissença, prevaricacion e malversacion de fonzes publics. En mai d’aquò, la Gàrdia Civila faguèt de perquisicions dins divèrsas entrepresas privadas de Catalonha en arrestant qualques dirigents, dins las societats e dins lors abitacions. Los detenguts son restacats amb los sits web e los bulletins de vòte del referendum. La Gàrdia Civila auriá confiscat dètz milions de bulletins de vòte. Puigdemont : « L’estat a aplicat de facto l’estat d’excepcion » Pauc après miègjorn, lo president de la Generalitat de Catalonha, Carles Puigdemont, parlèt als mèdias acompanhat de tot son govèrn. « L’estat espanhòl a mes en suspension de facto l’autogovèrn de Catalonha e a aplicat de facto l’estat d’excepcion. [...] Aquela agression es fòra de tot aparament legal. S’es atacat l’estat de drech e totas las garentidas constitucionalas en tot violar la carta dels dreches fondamentals de l’Union Europèa. […] Lo govèrn espanhòl a despassat la linha roja que los separava dels regims autoritaris e repressius e es vengut una vergonha democratica ».

En mai d’aquò, lo president declarèt son engatjament pel referendum e afirmèt que lo primièr d’octòbre totòm poiriá votar. « Nos caldrà una actitud de serenitat davant las actituds menaçantas e las illegalitats que comet lo govèrn espanhòl », çò diguèt.

Rajoy : « An temps d’evitar un sòrt pièger »

De ser, après 21 h, parlèt als mèdias lo president del govèrn espanhòl, Mariano Rajoy. Aqueste afirmèt que « lo referendum se [fariá] pas » en disent qu’èra « una quimèra impossibla » e menacèt tornarmai lo govèrn de la Generalitat : « An temps d’evitar un sòrt pièger ». Rajoy justifiquèt lo còp d’estat contra lo govèrn catalan en assolidant que « degun pòt èsser subre la lei » e apondèt que « la desobesissença a la lei de part d’un poder public es quicòm de contrari a la democracia ».

Revolucion democratica

A partir de 8 h, quand se comencèt d’aprene l’intrada de la Gàrdia Civila dins mai d’un sèti de la Generalitat, d’acamps espontanèus sorgiguèron en Catalonha tota, quitament Perpinhan. De centenats de milièrs de personas prenguèron las carrièras de las principalas vilas catalanas, ont de volontaris lor portavan d’aiga e quicòm per manjar. Fòrça escòlas decidiguèron de clavar per que se poguèsse manifestar, e quitament plusors entrepresas daissèron partir los salariats en priorizant la defensa de la democracia. Las protèstas se seguisson cada jorn, fins al primièr d’octòbre, e los estudiants an pres l’Universitat de Barcelona. Pasmens la revolucion se ten d’un biais pacific e reclama las democracia del temps que desobesís als mandats judiciaris contra lo referendum.

Sètge de la CUP

Aquel meteis dimècres, mentre que la Gàrdia Civila preniá los sits de la Generalitat, d’agents de la polícia espanhòla, apelada Polícia Nacionala, encerclavan lo local de la CUP a Barcelona. Durant uèch oras los agents esperavan un òrdre del jutge per escorcolhar los locals, mas l’òrdre arribèt pas e partiguèron. Mentretant, los acampats voidèron lo local e emportèron lo material dins un autre endrech. La CUP se regaudís de la resisténcia pacifica. D’autras associacions an tanplan amagadas las afichas e los tractes sul referendum.

Blocatge dels comptes

Lo blocatge dels comptes de la Generalitat de Catalonha arribèt l’endeman. Dempuèi lo 21 de setembre passat, lo govèrn de la Generalitat de Catalonha pòt pas far servir liurament sos comptes e solament se pòt far de pagaments qu’èran ja engatjats prèviament, en certificant que se finança pas lo referendum. Aquò concernís tanben las cartas de crèdit corporativas dels nauts responsables e d’autres salariats, e las entrepresas publicas. Aquel blocatge daissa sense sòus una tièra de linhas de finançament del Conselh General d’Aran.

L’Estat espanhòl prendrà en carga qualques pagaments urgents, mas degun pagarà pas ara tot lo budget destinat a la cultura, a la lenga, a l’abitatge, a la coneissença, a las telecomunicacions, a la recèrca, a l’agricultura, a l’indústria, al torisme, a las comunas, etc. Lo blocatge seguís l’òrdre del ministre de las finanças espanhòl, Cristóbal Montoro, qu’anoncièt que lo tendriá indefinidament, per garentir lo compliment de la lei. Montoro decidiguèt de blocar los comptes de la Generalitat per evitar que se paguèsse lo referendum amb de fonzes publics, e mai se l’estat despensèsse mai d’argent amb sa repression per l’empedir.

Maraton per la democracia

Lo dimenge seguent, 24 de setembre, aguèt luòc en Catalonha e Aran tota una afichada massissa en defensa del referendum d’independéncia. La convocacion èra davant las comunas e se i faguèt d’obradors de creacion d’afichas, de murals e de bandeiròlas. Puèi i aguèt una afichada generala. A Barcelona, l’eveniment comportava una suspresa : lo president d’Òmnium, Jordi Cuixart, anoncièt qu’avián estampats fòrça bulletins de vòte, e los faguèt virar per los distribuir per tot lo territòri. Dins la sola Universitat de Barcelona, ont los estudiants i son acampats fins al 1r d’octòbre, se distribuiguèt 100 000 bulletins. A Barcelona se’n compartiguèt un milion. Mentretant, en Aran, la plaça de la glèisa de Vielha èra comola de mond que s’acampavan en seguissent l’apèl dels signataris del Manifèst de Les. Al crit de « Votaram », los protestataris manifestèron per la democracia e la libertat d’expression, e mostrèron lor refús de las politicas de repression del govèrn espanhòl.

L'occitanisme se solidariza

Qualques desenats de personas manifestèron lo 22 de setembre passat a Pau lor solidaritat amb lo pòble catalan (Fòto DR). L’acamp se tenguèt davant lo consolat espanhòl e seguissiá la crida de l’esquèrra revolucionària occitana de la Tor deu Borrèu. Los manifestants mostrèron lor supòrt « al pòble de Catalonha après lo còp d’estat contra las institucions catalanas e los refuses envèrs la populacion de se poder exprimir sul desir d’independéncia a travèrs d’un referendum ». Participèron a la manifestacion de representants del Partit Occitan, dels verds franceses, de La França Insomesa, del movement Ensemble, de simpatizants de la Republica Espanhòla, del movement de sosten a Palestina, e una bona representacion d’artistas e musicians occitans. Los manifestants critiquèron « los metòdes emplegats pel govèrn de Madrid dignes de son passat franquista » e « las politicas d’intervenir pas en l’afar espanhòl de part d’Euròpa e França ». D’autre caire, felicitèron lo pòble catalan per « la lor determinacion unida e pacifica d’acarà’s a Madrid e a un desplegament policièr jamei vist despuish ua bèra pausa ». Dins aquel sens, afirmèron quitament que Catalonha es « un pòble hrair que’ns mòstra lo camin de la dignitat e la libertat ». Après las presas de paraula, l’acte finiguèt coma aviá començat, amb una vibranta cantada revolucionària ont sonèt, demest d’autres, L’Estaca dins sa version en occitan de Bearn.

A Tolosa

Lo 20 de setembre, al meteis moment que l’Estat espanhòl deteniá de nauts foncionaris de la Generalitat de Catalonha, se creèt a Tolosa un collectiu nomenat Occitània per la Democracia en Catalonha e manifestèron davant lo consolat espanhòl de la Ciutat Mondina. « Sèm aicí per la democracia », çò declarava un pòrtavotz del collectiu a La Dépêche en precisant que « las institucions de Catalonha son estadas atacadas per la polícia espanhòla ».

Peticion a Juncker

De son costat, Iniciativa per Occitània a lançat una campanha de signaturas en linha « per la libertat e l’estat de drech en Catalonha ». La peticion es adreiçada al president de la Comission Europèa, Jean-Claude Juncker, e li demanda que demòre pas silenciós. Los signataris, qu’a l’ora d’ara son mai de 62 000, dison a Juncker que « se lo mot “ Euròpa ” a encara un sens, podètz pas restar mut e inactiu fàcia a aquesta negacion dels principis mai fondamentals de l’estat de drech e de la libertat civila ». Per quant a ela, l’Assemblada Nacionala Occitana (ANÒC) a publicat un comunicat que condemna las operacions actualas de l’Estat espanhòl, defend lo drech dels catalans de votar se vòlon un estat independent, e revendican que l’Estat que ne sortisca siá binacional e se nomene « Catalonha e Aran ». D’autres movements occitanistas coma País Nòstre se son mobilizats per sosténer lo referendum en Catalonha e Aran.

De son costat, l’Institut d’Estudis Araneses-Acadèmia Aranesa de la Lenga Occitana, a publicat un comunicat que sosten lo « Dret de decidir deth pòble catalan e aranés, e refuse es eveniments que viu actuaument Catalonha, a on fòrça catalans e es institucions catalanes an estat caushigadi enes sòns drets e libertats ».

Ferriòl Macip

  • Publicat dens Dossiers

Catalonha e Aran an votat l'independéncia

Catalonha e Aran an votat l'independéncia. La brutalitat de la polícia espanhòla a causat 844 nafrats demest lo mond qui volián votar. Lo Parlament de Catalonha deu declarar l'independéncia dins qualques jorns. Lo resultat es net e clar, malgrat l’enebicion de l’estat, sas menaças e la repression. Dels mai de cinc milions de catalans cridats al vòte, un 47% a participat amb un resultat del 90% favorable a l’independéncia. Aperaquí 800 000 vòtes son estats raubats per las fòrças d'òrdre espanhòlas. Lo president de la Generalitat de Catalonha, Carles Puigdemont, a declarat que remanda aquel resultat al Parlament per que declare l’independéncia dins qualques jorns.


Terror d’estat

Mas la jornada es estada marcada per las agressions brutalas e indiscriminadas contra lo mond que volián votar, victimas de las mans e de las armas dels mai de 12 000 policièrs mandats per l’estat espanhòl per empachar lo referendum. Un bilanç de 844 nafrats es lo resultat d’aquela violéncia de las fòrças de seguretat espanhòlas que son anadas dins divèrses burèus de vòte de tot lo país en agressant gratuitament lo mond, amb de matracas, de projectils e de balas de goma, una arma enebida en Catalonha. Demest los ferits se tròba una jornalista que li an embrigat los dets un a un, un òme que foguèt qualques oras dins lo còma e un autre que perdrà l’uèlh a causa d’una bala de goma. Pasmens, lo nombre d’urnas confiscadas es estat fòrça bas gràcias a la resisténcia pacifica de las gents.

Aquela resisténcia del pòble a recebut lo sosten de qualques païsans qu’an blocat de camins amb los tractors, de menaires d’autobús qu’an blocat qualques carrièras, los pompièrs qu’an protegit de personas de las agressions dels policièrs espanhòls, e quitament dels Mòssos d’Esquadra, qu’an pas collaborat amb aquela repression desproporcionada.

Sèt tribunals espanhòls an denonciat los Mòssos d’Esquadra per aver pas empedit lo referendum.

Determinacion ciutadana

Après qualques jorns de persecucions e detencions de las fòrças de l’estat que cercavan d’urnas e de bulletins de vòte, lo referendum s’es pogut menar a bon tèrme gràcias una organizacion impecabla qu’a comptat amb lo sosten popular e la determinacion dels ciutadans. Las urnas e los bulletins de vòte, qu’èran amagats dins un endrech secret e segur, arribèron als burèus de vòte devèrs cinc oras del matin amb d’autos de particulars. Foguèron aculhidas pel mond que se trobavan ja dins los burèus de vòte dempuèi divendres, en empedir que las fòrças d’òrdre los sagelèsson.

Davant lo barrament dels burèus de vòte, lo govèrn de la Generalitat anoncièt de matin que i aviá una lista electorala universala: gràcias a Internet, se podiá votar dins que burèu de vòte que foguèsse. L’estat a copat l’accès a Internet a divèrses locals, mas òm a reüssit, un pauc mai d’aise, gràcias a la tecnologia 3G.

Aran

Los resultats en Aran son estats tanben estonants. An participat 1705 personas d’un recensament d’aperaquí 6900. L’òc s’es impausat amb 1380 vòtes e lo non a agut 227 voses. 46 personas a votat blanc e 52 vòtes son estats declarats nuls.

En Aran la jornada s’es desvolopada sens violéncias. D’occitanistas de tot lo país i son anats per assegurar la preséncia de mond als burèus de vòte e an seguit la jornada. Davant lo barrament de qualques burèus de vòte, Mirèia Boya e son fraire Jusèp Boya an mes a la disposicion del referendum la Bòrda Guilhamuc on an pogut votar los ciutadans de Bausen, Bossòst, Canejan e Les. Lo mond de Naut Aran an pogut votar a l’aubèrga de Salardú del temps que lo burèu de vòte de Vielha a foncionat amb normalitat.

Puigdemont: “Avèm ganhat lo drech d'aver un estat independent”

A la fin de la jornada compareguèt lo president de la Generalitat, Carles Puigdemont, acompanhat de totes los conselhièrs de son govèrn. “Avèm ganhat lo drech d'aver un estat independent”, çò assolidèt. “Avèm ganhat lo drech d’èsser respectats e reconeguts”, çò apondèt.

Puigdemont diguèt de mots de sosten als nafrats e a mercejat lo mond qu’an fach venir possibla la victòria subre la violéncia. En mai d’aquò Puigdemont faguèt un apèl a Euròpa: “Sèm de ciutadans europèus que patissèm de violacion de la Carta Europèa dels Dreches Umans, es necite qu’Euròpa agisca amb rapiditat”.

Lo president assegurèt que lo resultat del vòte seriá portat aqueste diluns al parlament per qu’apliquèsse la Lei del Referendum, que prevei la proclamacion de l’independéncia abans 48 oras.

Rajoy: “Lo referendum a pas jamai existit”

De son costat, lo president del govèrn espanhòl, Mariano Rajoy, justifiquèt l’accion de la polícia e diguèt que los responsables d’aqueles faches èran solament los qu’avián organizat lo referendum. Per contra, anoncièt que uèi donariá d’explicacions al Congrès dels Deputats espanhòls e que s’amassariá amb totas sas fòrças politicas per cercar una solucion”.

Rajoy insistiguèt per assegurar que “lo referendum es pas jamai existit” pr’amor que lo govèrn [espanhòl] a complida sa promessa, o avertissiam dempuèi qualques meses”. Dins aquel sens, lo cap del govèrn espanhòl se felicitèt d’aver “evitat” lo vòte gràcias “al fondament de la lei, amb la determinacion dels tribunals e amb l'accion de las fòrças e còrses de seguretat de l'estat”.

Cauma generala

Deman es convocada una cauma generala, e se prevei que la participacion serà màger.


Observadors internacionals

Demest los observadors internacionals, i a lo vicepresident de la region qu’a pres lo nom d’Occitània, Gérard Onesta, qu’a validat lo referendun e a condemnat l’accion de l’estat espanhòl.

Ferriòl Macip Bonet, capredactor del Jornalet

 

 

Mesa au dia

Lo jornalista occitan Dàvid Grosclaude qu'èra sus plaça aquera dimenjada. Que hasèva partida de la centena de « visitaires internacionaus » dont lo ròtle èra de testimoniar deu referéndum. Un grop d'un trentenat de personas d'« observators internacionaus » qu'èra tanben convidat a seguir las operacions deu vòte. Aquestes qu'èran parlamentaris, ancians ministres e eurodeputats de divèrs Estats dens l'obligacion de redigir un compte-rendut. Los dus grops qu'avèvan pòrtas obèrtas dens los burèus de vòte e mei que mei ua acreditacion oficiau entà poder rentrar.

Arribat dissabte, lo sénher Grosclaude n'a pas sentit ua tension de las granas a quauquas òras deu referéndum. La màger part deus burèus de vòte qu'èran dens escòlas, « los parents que s'i èran installats entà empachar la polícia d'acaparrà's deus locaus. Las familhas qu'organizèn  dijaus e divés, animacions periescolaras çò qui'us permetèvan d'aver lo dret de demorar dens los locaus. Qu'i dromín ».

Aquiu lo son testimoniatge 

Inf. : https://david-grosclaude.com/

Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 
Capture decran 2017 11 28 a 11.48.12

Papagai

Papagai es la revista occitana dels pichonèls. Prepausa cada mes doas istòrias, de jòcs, una pagina de vocabulari e un dorsièr en rapòrt amb un dels dos 

+