Uei : 18/11/2018

Mobilizacion deus agricultors tà la reconeishença de las Susfàcias Pastoraus Linhosas sus tot lo territòri

Ua setantena d'agricultors, acompanhats d'ua detzena d'aulhas, que manifestèn ger dens los locaus deu ministèri de l'Agricultura entà demandar au govèrn que reconega las Susfàcias Pastoraus Linhosas (SPL) sus tot lo territòri. Las SPL que son susfàcias erbacèas utilizadas tau neurissatge, qui beneficiavan dinc a uei lo dia d'ua ajuda europèa.

Lo govèrn que perpausa de pas sonque reconéisher las SPL dab mensh de 50 % d'èrba sus quauques departaments, quan lo reglament europèu auheriva dinc aquiu l'oportunitat de reconéisher totas las SPL suu territòri francés.

Davant los locaus de la Direccion Generau de la Performança Economica e Environamentau de las Enterpresas (DGPE), qu'estenón ua bandaròla dab escriut « Susfàcias pastoraus deishadas, bòrdas en perilh » (Fòtografia ©Confederacion paisana Occitania).

La Confederacion paisana Occitania qu'a publicat un comunicat uei dens lo quau rapèra lo compte au revèrs dinc au 31 de març, data a la quau lo govèrn e pòt agir via lo reglament europèu « Omnibus », tà que nombrosas paisanas e paisans installats dens las regions pertocadas non vejan pas las lors activitats desaparéisher.

« Las practicas pastoraus que representan ua agricultura modèrna qui permet de produsir ua alimentacion de qualitat e de guarantir ua activitat dens las zònas ruraus de lanas e de branas qui serén deishadas. La desapareishuda d'aquestas susfàcias pastoraus dont la foncion environamentau ei primordiau, que va contra politicas territoriaus miadas despuish annadas. Quan los huecs de seuva començaràn sus terrenhs embroishagats pr'amor d'aquera decision, lo govèrn enviarà tanben CRS tà'us estupar ? »

La Confederacion paisana qu'anóncia que perseguirà las soas accions dens los dias a viéner.

Demanda d'asile : los migrants de Gelòs (64), tostemps a la demora

Despuish l’estiu passat, un vintenat de migrants, originaris de Sodan e d’Afganistan, que son aubergats au Centre d’Arcuelh e d’Orientacion (CAO) de Gelòs en Bearn, a la demora incèrts deu lor aviéner.

La prefectura deus Pirenèus-Atlantics (64) qu’ordonè la barradura deu CAO en data deu 31 de deceme (possada tau 1èr d’abriu). Los refugiats presents que deven estar transferits au Programa d’Arcuelh e d’Aubèrgament deus Demandaires d’Asile (PRAHDA), installat dens l’ancian Formule 1 de Pau. Totun, la màger part deus refugiats que refusan d’anar-i. La rason ? La cranhença d’estar renviat tà Italia. Que son en procedura Dublin III e qu’ei donc lo país peu quau son arribats en Euròpa qui deu estatuir sus la lor demanda d’asile. D’Italia, que n’an guardat un maishant sovier e que parlan quitament de maishants tractaments qu’aurén patit acerà. Lo 14 de deceme passat que’s debanè ua amassada dab los membres d’Isard Cos (associacion gestionària deu centre d’arcuelh, qui’us assabentèn de la decision deu prefècte, lo sénher Gilbert PAYET de deishar los lòcs. « Cadua d’aqueras personas qui n’an pas signat lo document de transferiment tau PRAHDA, qu’ei considerada com avent refusat de signar e com estant dens l’illegalitat. Que’us ei demandat de deishar los lòcs. Non receberàn pas mei nat sostien materiau de las parts de l’Estat. Que’us ei demandat de s’ac virar solets », çò explica lo Collectiu « Des Hommes avant tout », butats per la rapiditat de la sanccion. De mei, los migrants n’an pas avut lo dret a ua traduccion deu tèxte de signar. França que pòt préner en carga la lor demanda d’asile. Que’n son convençuts e que’s baten dab l’ajuda deu Collectiu, tà que’s hàcia.

La vita que contunha

Isard Cos qu’a hèit barrar las crambas deu centre qui n’èran pas mei utilizadas e recuperat lo lor materiau. « Qu’an volut barrar las salas comunas, çò’nse hidè Miquèu Campgran, membre deu Collectiu de sostien, mes i a monde qui son demorats dehens tà’us empachar de har ». Los problèmas d’aiga e d’electricitat que son a estar resoluts, en aténer, la 20ena de migrants que viven dab los màntols e mercés a l’ajuda preciosa deus nombrós benevòles. « Benevòles qu’an hornit cauhatge, gas e d’autas causas atau. La vita que continua. I a en permanéncia benevòles sus plaça qui vienen tot dia. Qu’an portat de qué minjar, i a sacas de patatas. I a tot çò qui cau tà contunhar de víver, pas ua vita normau mes en aténer l’avançada de las reïvindicacions », çò’nse digó. Lo Collectiu e los abitants de Gelòs que’us perpausan de participar a activitats locaus com anar descobrir l’amontanhatge o participar a concèrts com lo de Nadau tant per tant. Ua faiçon d’integrà’s drin a drin a la vita vitanta.

Tots los mejans que son bons

Los refugiats qu’an enviat cadun ua letra a la Prefectura tà indicar perqué èran demorats au centre de Gelòs e perqué e vòlen contunhar de víver en França, en explicar qu’en Italia èran estats mau arcuelhuts. « Que’us an mautractat e que’us avèn forçat a balhar emprentas. Avossen volut demorar en Italia, qu’i serén demorats. Que demandan a França qui’us arcuelhen, d’acceptar la demanda d’asile », çò nse digó Miquèu Campgran. Lo Collectiu qu’a contactat politics e qu’adrecè ua letra au ministre de l’Interior, Gérard Collomb a la fin deu mes de deceme. Qu’i rapèran las condicions d’arribada deus migrants tà Gelòs, mandats per l’Ofici de las Migracions Internacionaus (OFII) de Cergy-Pontoise e de Porte de la Chapelle : « Que viscón situacions extrèmament dolorosas dens lo lor país e pendent los lors periples, mei que mei en Italia. Qu’avem entenut las vòstas paraulas a la fin de l’annada de 2017, reportadas dens la premsa, pertocant a l’importància de l’arcuelh deus demandaires d’asile e qu’avem l’espèr que’vs poderatz encuentar de la situacion d’aquestes exiliats, vienuts de país dont la situacion politica ei instabla ». La letra qu’ei au dia de uei demorada shens nada responsa. Maires, conselhèrs municipaus, departamentaus e regionaus que signèn un tèxte de solidaritat dab los migrants arcuelhuts dens los CAO de Gelòs e de Baiona. Que son 43 elegits a denonciar las circularas signadas peu ministre de l’Interior qui demandan d’accelerar lo ritme de las expulsions deus debotats deu dret d’asili e de’us recensar dinc aus lòcs d’aubèrgament d’urgéncia. Que hèn aperet au respècte deus drets de l’òmi e de las valors de França tà « la presa en compte de las demandas deus migrants de Gelòs e de Baiona d’un arcuelh definitiu e duradís dens lo departament deus Pirenèus- Atlantics ». Un acòrd « orau » qu’estó passat enter los benevòles deu CAO de Baiona e los deu centre de Gelòs tà que sian recebuts los refugiats demandaires d’asile tà Baiona e los « Dublinats » tà Gelòs. Que s’engatjan a assegurar lo lor seguit administratiu d’un costat com de l’aute.

Clam per maishants tractaments en Italia

Arron aver refusat de donar las lors emprentas, 38 migrants qu’estón « mautractats e torturats », quitament « victimas de chantatge », qu’ei çò que declarèn los avocats deus pensionaris deu CAO de Gelòs lo 11 de genèr. Que portèn lo clam au près deu procuraire de Pau per « actes de tortura e tractaments umans desgradans » qu’aurén patit au lor arribada en Italia. Los clams que visan « las personas fisicas qui cometón aqueras torturas, tractaments crudèus, inumans e desgradants, atau com los lors gavidaires administratius e politics italians ». Ahar de seguir.

Dialòg barrat enter lo Senat e l'executiu nacionalista còrse

Lo president deu Conselh executiu de Corsega, Gilles Simeoni e lo president de l'Assemblada de Corsega, Jean-Guy Talamoni qu'estón recebuts ger e delagèr peu Purmèr ministre Edouard Philippe e peu president deu Senat, Gérard Larcher. Decebuts deus escambis, qu'apèran a ua grana manifestacion populara. Los gavidaires nacionalistas de la collectivitat unica de Corsega qu'aurén abracat lo lor darrèr encontre a París. « Arron los nostes entertiens de ger [dab lo Purmèr ministre, Edouard Philippe] e de uei [dimars 23/01], la nosta conviccion qu'ei hèita : l'Estat qu'arrefusa de reconéisher e de préner en compte la dimension politica de la question còrsa, çò expliquè G. Simeoni suu son compte Twitter. Dens aquestas condicions, qu'aperam dens los dias a viéner a la tienguda d'ua grana manifestacion populara ».

Dens un comunicat, lo president deu Senat qu'assegurè que s'avisaré deus lors tribalhs arron la creacion d'ua collectivitat territoriau unica. « Totun, si l'especificitat insulara de Corsega e la soa identitat deven estar presas en consideracion, la Republica qu'ei ua e indivisibla. Lo Senat que serà a l'encòp garant de l'unitat nacionau e iniciator de libertats navèras acordadas aus nostes territòris ». Gérard Larcher que's ditz totun a favor d'ua revision de la lei de 2002 respècte a Corsega entà'u perméter de har proposicions d'adaptacion de las leis e deus reglaments via la Collectivitat territoriau. Que mantien la soa oposicion a ua cooficialitat de la lenga còrsa e a l'estatut de resident. L'estatut de resident votat per l'Assemblada de Corsega, qu'ei obèrt a tots arron 5 ans de residéncia principau sus l'isla. Qu'interessaré d'autes territòris com Savòia e País-Basco, confrontats a hauças astronomicas deu fonsièr.

La visita deu President Macron en Corsega qu'ei prevista tà la commemoracion deus 20 ans de l'assassinat deu prefècte Erignac, lo 6 de heurèr qui arriba.

Uèi, Calandreta tornarà manifestar

A l'ocasion de la Jornada Internacionala dels Dreches de l'Enfant, las escòlas occitanofònas exigiràn de responsas sus la supression dels contractes ajudats. Uèi, a l’ocasion de la Jornada dels Dreches de l’Enfant, las Calandretas tornaràn manifestar per carrièras, per tal d’obténer de responsas sus las ajudas de l’estat francés, actualament jos forma de contractes ajudats, que las nòvas politicas del president Macron son a suprimir. 


A Tolosa, lo rassemblament se farà diluns 20 de novembre a partir de 12 h davant la prefectura, per exigir un tractament egal a l’ensems dels actors de l’ensenhament de las autras lengas. E mai las inegalitats amb lo francés sián desproporcionadas, tanben i a de diferéncias amb d’autras lengas minorizadas, coma es lo cas del breton, e quitament de l’occitan en d’autras regions administrativas.

Lo departament de la Nauta Garona a degut suprimir 12 pòstes dempuèi setembre, en obligant los parents de prene la relèva dels personals mancants. « S’aquesta setmana, la prefectura de Nauta Garona a anonciat lo desblocatge de 5 contractes, avèm pas cap de visibilitat del sòrt que serà reservat als autres 20 pòstes qu’arriban a escasença en 2018 ».


Jornada dels Dreches de l’Enfant

En mai d’aquò, a l’ocasion de la Jornada dels Dreches de l’Enfant, Calandreta denóncia lo refús del drech a la diversitat lingüistica pels mainats de l’estat francés. « França: país dels dreches de l’enfant, manca un ! », çò ditz la Federacion de las escòlas immersivas en occitan. Dins aquel sens, Calandreta vòl recordar uèi que l’estat francés es dins una situacion particulara. Ratifiquèt la Convencion dels Dreches de l’Enfant amb una resèrva sus l’article 30, que tòca los dreches lingüistics.


L’article 30 d’aquela convencion ditz :

« Dins los estats ont existisson de minoritats etnicas, religiosas o lingüisticas o de personas d’origina autoctòna, un enfant autoctòn o qu’aperten a una d’aquestas minoritats pòt pas èsser privat del drech d’aver sa vida culturala pròpria, de professar e de practicar sa quita religion o d’emplegar sa lenga pròpria en comun amb los autres membres de son grop.»

Mas al moment de la ratificacion d’aquela convencion, lo govèrn de la Republica Francesa faguèt una resèrva sus aquel article :

« Lo Govèrn de la Republica declara, compte tengut de l’article 2 de la Constitucion de la Republica Francesa, que l’article 30 a pas de s’aplicar per çò que concernís la Republica ».

Calandreta demanda la fin del refús del article 30 de la convencion “per donar als dròlles de nòstre país lo drech de viure lor lenga e lor cultura”. En mai d’aquò, Calandreta demanda a las escòlas e federacions de far de delegacions al près dels representants locals del Defensor dels dreches e de se mobilizar per far conéisser “aquela situacion unica ont se trapan los enfants de França a respècte de la diversitat lingüistica e culturala”.

Adoptada per l’ÒNU lo 20 de novembre de 1989

La Convencion suls Dreches de l’Enfant es un instrument internacional qu’establís los dreches civils, politics, economics, socials e culturals dels enfants. Foguèt adoptada per l’Assemblada Generala de las Nacions Unidas lo 20 de novembre del 1989 e intrèt en vigor lo 2 de setembre de 1990 après que l’aguèron ratificada 78 estats membres. La Convencion compta 54 articles e dos protocòls addicionals, un sus la participacion dels mainats a de conflictes armats e un autre sus la venda e la prostitucion d’enfants e sus la pornografia infantila.

Aquela iniciativa constituís una de las reüssidas mai importantas dins la reconeissença e l’afirmacion dels dreches umans. La Convencion suls Dreches de l’Enfant es un dels tractats mai ratificats del Mond; segon l’UNICÈF, es estat ratificat per 193 estats e per gaireben totes los membres de las Nacions Unidas. La Convencion se centra sus l’enfança, fa referéncia als besonhs e dreches especifics dels mainats e obliga los estats d’obrar per lors melhors interèsses.

Jornalet

Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+