Uei : 26/04/2018

Luta contra lo comèrci de l'evòri : Euròpa e Asia qu'avançan, l'America deu Nòrd que hè arrèpèr

La luta contra lo comèrci illegau d’evòri qu’ei au son apogèu. Au nivèu internacionau, los govèrns que hèn mei anar mei de sasidas a las termièras e qu’utilizan metòdes scientifics entà identificar l’origina de l’evòri. La Comission europèa qu’encontrè a ONGs a la fin de l’annada entà melhorar las soas accions contra lo trafic e China que vien d’interdíser lo comèrci.

La Comission europèa qu’organizè au mes de deceme passat ua consulta publica pertocant au comèrci de l’evòri dens l’Union europèa. La consulta que devèva ajudar la Comission a guidar la soa accion en matièra de comèrci de l’evòri e de luta contra lo son trafic. Aqueste comèrci qu’ei sosmetut a règlas estrictas dens l’UE. La consulta qu’avè per tòca d’amassar informacions e avís sus la portada, l’estructura e las caracteristicas màgers deu comèrci legau e illegau a l’interior e en provenença de l’UE. Tots los ciutadans e organizacions qu’èran convidadas a participar au questionari. Après quauquas questions sus la persona qui respon au questionari, com lo país on demora, l’organizacion per la quau e tribalha e las soas activitats, l’enquèsta qu’entra au còr deu subjècte. Un tablèu qu’ei presentat e que perpausa divèrs tipes d’objèctes en evòri susceptibles d’estar comercializats per l’organizacion, jòias, esculturas, instruments de musica atau com bens d’equipament maisonèr. Que segueishen questions a l’entorn de la valor deus objèctes d’evòri utilizats, puish lo nivèu de coneishença deus reglaments suu comèrci de l’evòri d’elefants dens l’UE. La darrèra partida deu questionari qu’ei entitolada « Prioritats de l’UE pertocant au comèrci de l’evòri ». Atau, que son perpausadas mantuas mesuras que lo participant estima primordiaus tà la luta contra lo comèrci illegau d’evòri despuish/cap/au demiei de l’UE, com per exemple « miar ua accion educativa au près de las enterpresas qui comercializan l’evòri e deus clients e de’us sensibilizar a las linhas directoras e aus reglaments existents de l’UE entà promòver lo comèrci legau », o enqüèra « deféner l’ensemble deu comèrci d’evòri cap, despuish e au demiei de l’UE » e « deféner l’exportacion d’evòri despuish l’UE, dab derogacions justificadas ». Lo darrèr dia de la consulta, lo 8 de deceme, la Comission europèa qu’organizè ua amassada dab diferentas ONG qui òbran a la proteccion animau e vegetau. Aquestas qu’expliquèn a l’Union los domaus que provòca involontàriament l’actitud d’Euròpa com « region privilegiada de transit, de consum e d’exportacion » au trafic internacionau d’evòri. Lo hons internacionau tà la proteccion deus animaus (IFAW) que hasèva partida de las ONG presentas, e que’n ditz mei suu son site internet (www.ifaw.org) : « las exportacions d’evòri de l’UE qu’estimulan la demanda mondiau, mei que mei en Asia on se concentran los mercats d’ivòri illegaus màgers ; en rason de la soa legalitat, lo mercat domestic d’evòri de l’UE que confereish legitimitat a l’evòri, qui vad un produit desirable e que serveish de cobèrta au blanquiment de l’evòri illegau ; lo comèrci internacionau de l’evòri qu’implica hialats criminaus transnacionaus, que còsta la vita a nombrós ecoguardas cargats de protegir la fauna sauvatja e pòrta tòrt a las comunautats atau com a l’economia deus país en desvolopament ».

L’interdiccion deu comèrci internacionau d’evòri qu’estó entrada en aplicacion en 1989. Nombrós país qu’an sasit tonas e tonas d’ivòri gessidas deu comèrci illicit. Los govèrns qu’an decidit de brutlar o de trissar publicament los estòcs d’evori qu’avèvan recuperat. « La destruccion de las defensas en evòri e deus bibelòts confiscats qu’a ua hòrta portada simbolica : que permet de har conéisher publicament la tuadera annau de detzena de milèrs d’elefants dens lo but d’emparà’s de son ivòri », çò declara l’IFAW. L’ONG que pensa que las ventas legaus d’evòri gessit d’estòcs existents que facilitarén l’entrada de l’evòri illegau suu mercat. Que s’opausa donc ad aqueras ventas.

Un actor màger deu comèrci que l’interditz

La luta mondiau contra aqueth trafic que hasó un gran pas a la fin de l’annada 2017 : tot comèrci a l’entorn de l’evòri qu’ei d’ara enlà defenut en China. Lo país qu’èra en efèit considerat com l’ua de las placas viradissas deu trafic. Qu’avè anonciat la soa volontat d’interdíser lo son comèrci un an a, qu’ei oficiau despuish lo 31 de deceme. China qu’ei l’un deus consumidors d’evòri mei importants au monde, tant au nivèu legau com illegau. Aquera demanda qu’ei responsabla de la tuèra de 20 000 elefants d’Africa per braconaires cada annada. L’utilizacion de l’evòri qu’ei ua tradicion millenària en China. Que decòran los salons deus apartaments de las granas familhas, que fabrican de bròcas chinesas, etc. Lo quilograma que’s pagava dinc a 1000 euros. Arron l’interdiccion, cap a 150 magazins capvath lo país que deven barrar las lors pòrtas. Que s’aplica peu moment qu’a la China continentau. A Hong-Kong, la fin deu comèrci non serà aplicada qu’a partir de 2021. Com Donald Trump non pas arren com tot lo monde, quan la luta contra lo trafic d’evòri e n’ei au mei haut, aus Estats-Units, lo govèrn que hè arrèrpè. Las autoritats americanas qu’an decidit de tornar autorizar los caçaires americans a importar trofèus d’elefants tuats au Zimbabwe e en Zambia. Lo govèrn de Barack Obama qu’avè hèit votar l’interdiccion d’importar las defensas d’evòri deu paquidèrma miaçat en Africa. L’U.S. Fish & Wildlife Service (USFWS) qu’emeterà permís qui autorizan l’importacion. La decision qu’a provocat nombrosas contestacions com au demiei de The Elephant Project, ua associacion qui luta a la sauvaguarda d’aquel animau de cap a desaparéisher : « Comportament reprensible de las parts de l’administracion Trump. 100 elefants que son dejà tuats cada dia. Aquò miarà a mei anar mei de braconatge », çò denoncièt suu son compte Twitter.

Mobilizacion deus agricultors tà la reconeishença de las Susfàcias Pastoraus Linhosas sus tot lo territòri

Ua setantena d'agricultors, acompanhats d'ua detzena d'aulhas, que manifestèn ger dens los locaus deu ministèri de l'Agricultura entà demandar au govèrn que reconega las Susfàcias Pastoraus Linhosas (SPL) sus tot lo territòri. Las SPL que son susfàcias erbacèas utilizadas tau neurissatge, qui beneficiavan dinc a uei lo dia d'ua ajuda europèa.

Lo govèrn que perpausa de pas sonque reconéisher las SPL dab mensh de 50 % d'èrba sus quauques departaments, quan lo reglament europèu auheriva dinc aquiu l'oportunitat de reconéisher totas las SPL suu territòri francés.

Davant los locaus de la Direccion Generau de la Performança Economica e Environamentau de las Enterpresas (DGPE), qu'estenón ua bandaròla dab escriut « Susfàcias pastoraus deishadas, bòrdas en perilh » (Fòtografia ©Confederacion paisana Occitania).

La Confederacion paisana Occitania qu'a publicat un comunicat uei dens lo quau rapèra lo compte au revèrs dinc au 31 de març, data a la quau lo govèrn e pòt agir via lo reglament europèu « Omnibus », tà que nombrosas paisanas e paisans installats dens las regions pertocadas non vejan pas las lors activitats desaparéisher.

« Las practicas pastoraus que representan ua agricultura modèrna qui permet de produsir ua alimentacion de qualitat e de guarantir ua activitat dens las zònas ruraus de lanas e de branas qui serén deishadas. La desapareishuda d'aquestas susfàcias pastoraus dont la foncion environamentau ei primordiau, que va contra politicas territoriaus miadas despuish annadas. Quan los huecs de seuva començaràn sus terrenhs embroishagats pr'amor d'aquera decision, lo govèrn enviarà tanben CRS tà'us estupar ? »

La Confederacion paisana qu'anóncia que perseguirà las soas accions dens los dias a viéner.

L'anciana deputada catalana Anna Gabriel exiliada en Soïssa

L’anciana deputada de la Candidatura d’Unitat Populara (CUP), Mireia Boya, que compareishó davant la justícia espanhòla pertocant a la soa participacion dens l’organizacion deu referéndum d’autodeterminacion de Catalonha deu 1èr d’octobre. Que devèva presentà's davant la justícia aus costats d'Anna Gabriel, anciana deputada e pòrtavotz de la CUP, convocada per aver « apartienut a un comitat estrategic cargat de miar Catalonha cap a l'independéncia ». La militanta qu'avèva obtienut lo repòrt de comparucion au 21 de heurèr.

Fin finau, qu'avem aprés qu'Anna Gabriel a deishat Catalonha entà escapar a la soa incarceracion eventuau. Que s'ei installada en Soïssa e qu'evòca l'abséncia de procès equitable dens lo son país. Questionada peu quotidian soïsse Le Temps, Gabriel que declarè :  « Com n'aurèi pas un procès equitable a casa, qu'èi cercat un país qui posca protegir los mens drets ». La causida de Soïssa n'estó pas un azard. La CUP que precisa que l'idea ei d'internacionalizar la causa catalana en perméter a Anna Gabriel d'apressà's d'organizacions internacionaus e mei que mei deu Conselh deus drets de l'Òmi de las Nacions unidas a Genèva.

Anna Gabriel qu'ei la sheisau gavidaira independentista de Catalonha a deishar lo país arron lo president catalan destituit Carles Puigdemont e quate ancians ministres regionaus en Belgica.

Fòto : Anna Gabriel ©ÍdemTV

Navèras manifestacions deus agricultors uei

Las manifestacions deus agricultors que contunhan uei pertot en França. Los espleitadors agricòlas que blocan axes rotèrs dens mantuns departaments entà denónciar lo desclassament deus territòris plaçats dinc a uei lo dia en zònas desaforizadas. Aqueth estatut que'us permetèva de recéber ajudas au nivèu europèu. Aqueth classament qu'ei considerat com « vitau » dens uns parçans pr'amor que permet de mantiéner ua dinamica e d'ajudar los joens a installà's.

A Aush en Gèrs, lo mot d'òrdi qu'ei « Toca pas a la mea ZAD (Zòna Agricòla Desfavorizada) ». Los accès au còr de vila que son blocats peus manifestants. A Tarba (65), au matin, cap a 200 agricultors que manifestan tot au long de l'A64 entà limitar las entradas e sortidas sus l'autorota.

A Pau, 150 tractors que's desplaçan actuaument rota de Tarba entà denonciar lo desclassament de 49 comunas (sus la 121 classadas) de las zònas desfavorizadas. Au nivèu de la sortida de l'autorota a Artics, la circulacion que vad mauaisida.

Uei lo dia, d'autas manifestacions que's debanan a Niòrt, Vierzon e Orleans. Arron los acamps que s'èran debanats quauques dias a, mei que mei a Tolosa e Carcassona, los sindicats que s'èran escaduts a obtiéner la revision de la carta de las ZAD. Totun, lo ministre de l'Agricultura, Stéphane Travert qu'avè presentat modificacions qui n'a pas satisfèit la FNSEA.

Representants agricòlas que seràn recebuts peu Ministèri de l'Agricultura uei.

Fòto : Captura d'ecran Twitter Prefècte de las Hautas-Pirenèas

L'istòria del C-Star, lo vaissèl ultradrechista que voliá « defendre Euròpa » d'una invasion de migrants

Los ultradrechistas aurián abandonat l’esquipatge a lor sòrt. Ara son davant la Còsta Brava sens combustible, ni viures ni mai la permission d’acostar.

Lo 17 de setembre passat, las autoritats de la Generalitat de Catalonha refusavan l’intrada als pòrts del país al vaissèl C-Star, logat pel grop ultradrechista Defend Europe. L’esquipatge demandèt ajuda a las autoritats del pòrt de Palamós car avián pas pus d’aiga, de manjar ni de combustible. En mai d’aquò, expliquèron que i aviá pas pus d’ultradrechistas a bòrd puèi qu’avián desembarcat totes a Malta vint jorns abans e qu’alara solament i viatjavan nòu marins en provenença d’Sri Lanka. En mai d’aquò, avián pintat la còca de la nau en negre en tot escafar los messatges racistas que teniá. Lo vaissèl se tròba ara dins en una situacion plan complicada. Las organizacions umanitàrias e antiracistas de Catalonha protèstan contra sa preséncia davant las còstas catalanas, la nau es ancorada davant lo pòrt de Palamós sens la permission d’acostar e los nòu marins ensajan de pescar, de reculhir d’aiga de pluèja e de subreviure mentre qu’un vaissèl de salvament lor pòrta de temps en temps de manjar e d’aiga. Lo proprietari del batèu es del País de Galas e se n’es desinteressat. Es el que deuriá pagar lo combustible.

La jornada europenca de las lengas celebrada en lengas ditas regionalas

Lo 26 de setembre, la jornada europenca de las lengas celebrèt la diversitat lingüistica en Euròpa amb 200 lengas sul continent, 24 lengas oficialas dins l'Union europenca e un seissantenat de lengas regionalas e/o minoritàrias. Lo Conselh de l'Euròpa sosten lo plurilingüisme a travèrs l'Euròpa tota, o fa dempuèi 2001 perqué la diversitat lingüistica es una via cap a una melhora comunicacion interculturala e l'un dels elements clau del ric patrimòni cultural del continent.

Calandreta participèt a aquela manifestacion en exprimir sa solidaritat amb las personas en contractes ajudats que's perdèron lor emplec. En particular la Calandreta de Pau sostenguèt las autras escòlas Calandretas que son uèi en granda dificultat, e demanda qu'un estatut d'escòla associativa, gratuita e laïca per totes siá reconegut. Accions similaras foguèron organisadas sus tote lo territòri per la confederacion Calandreta.

A Amiens dins la Sòma, dempuèi 2011 l'associacion Centre Europe Direct que milita per raprochar los joves Europencs, organisa cada annada una dictada en lengas estrangièras. Aital, dimars, 1500 collegians e liceans de la region se retrobèron a l'ESIEE d'Amiens, d'unes avián fach 3 oras de bus. Los estudiants deguèron escriure en espanhòl, italian, alemand e anglés. L'aventura comencèt amb una cinquantena de participants, en 2016, foguèron 1200.

La Collectivitat territoriala de Corsega s'es associada a aquela fèsta europenca e organisa « Linguimondi » dempuèi 2001. Ongan, lo tèma foguèt la politica lingüistica e lo sosten al sector privat amb de convidats coma Estibaliz Alkorta Barragan, directora de la Promocion de l'euskara al govèrn basco, Vincent Climent Ferrando de la Direccion generala de politica lingüistica del govèrn de Catalonha o encara Henri Louarn, president del malhum europenc per l'egalitat de las lengas.

  • Publicat dens Culture

Un protocòl per la defensa dels drets lingüistics

Lo 12 de setembre, los iniciators d'un protocòl per la defensa del dret lingüistic son venguts presentar lo document a Ajaccio. La demarcha arriba del País-Basco. Haizpea Abrisqueta e Paul Bilbao Sarria an anonciat los enjòcs del document.

Lo protocòl regropa 185 mesuras que concernís divèrs domenis coma l'ensenhament, la cultura, l'economia, las novèlas tecnologias o encara l'administracion ont es possible d'assegurar concretament la defensa de nòstras lengas ditas regionalas.

Jean-Guy Talamoni, President de l'Assemblada de Corsega soslinhèt que lo tèxte èra estat realisat en seguida de rescontres e debats entre expèrts de las lengas e dels drets de l'òme, e qu'èra estat validat per una centena d'organizacions « dont mai de 30 minoritats lingüisticas en Euròpa » e per mai d'una ONG.

Lo protocòl per la defensa del dret lingüistic es actualament presentat davant diferentas institucions europencas.

L'interès d'aquel otís ven de la « volontat d'aplicar totes los mejans per ralentir lo declin de la lenga, dins la mesura ont es scientificament provat qu'aqueles ne sufiràn pas per assegurar sa subrevivéncia », d'après Jean-Guy Talamoni, prepaus recaptats per Corse Matin.

Lo President de l'Assemblada de Corsega vòl metre la França fàcia a son denegacion de democracia en s'apiejant sus una demarcha internacionala per establir un « rapòrt de fòrça politica ».

 

Fòto Jean-Guy Talamoni ©captura Youtube TV5Monde 

Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+