Uei : 17/01/2018

Copa del mond del XIII, los Cangorós per un portanèl

D’en primièr, se tenguèt la finala femenina entre vesinas : australianas e neozelandesas. Las negras Falguièras metèron plan de vam a l’obratge, mas capitèron pas a concretizar lors tempses de dominacion. A la pausa, las jaunas Jillaroos (aprendissas) menavan 12-10. Confortavan lor avantage per dos novèls ensages. Las Falguièras replicavan per un ensag, mas un tombat confirmava la victòria australiana (23- 16), al tèrme d’una partida ont l’esperit ofensiu senhoregèt. Eroïca Anglatèrra, mas… Mai de 40 000 espectators seguigèron puèi la finala dels òmes entre australians e angleses. Los primièrs placatges indiquèron que la partida seriá rufa… Al cap d’un quart d’ora, lo segonda-linha cangoró Boyd Cordner prenguèt l’interval que lo menèt darrièr la linha. Lo capitani talonaire Cameron Smith transformava: 6-0. Fins a la pausa, los angleses tenguèron còp. A la represa, la partida contunhèt sul meteis ritme. Los Angleses prenguèron de mai en mai d’iniciativas. Caliá un culhièr del cap dels dets per empachar l’alièr Mac Gillvary de filar cap a l’ensag. Fàcia al vam europèu, los australians optèron per la gestion de la partida e per remandar al mai que se pòt los Blancs dins los 20 mètres, a trapar de tòcas per aver de mesclanhas e ralentir lo ritme… Los angleses passèron las darrièras minutas dins lo camp australian, mas de badas… Lo trofèu demòra astralian. Revenge dins quatre ans en Anglatèrra, mas las doas formacions seràn forçadament renoveladas e rejovenidas. Aquò promet… E d’aquel temps… Aqueste dissabte 2 de decembre marcava tanben la represa del campionat d’Elèit 1. A Avinhon, la primièra partida vegèt, dins un freg glacial e ivernal plan luènh de las doçors printanièras de Brisbane, la victòria dels locals fàcia a Carcassona : 28-20.

ALAN ROCH de Brisbane estant, pel Jornalet

  • Publicat dens Sport

Copa del Mond del XIII : australians aisits, angleses de gaire

Logicament, la finala de la Copa del Mond del XIII opausarà los dos païses al rugbi lo mai professionalizat : l’NRL australiana e la Superliga anglesa. Mas se'n calguèt de gaire per que l'aficha foguèsse diferenta.

La fòrça cangoró

Divendres al ser, a Brisbane, dins un estadi a mitat garnit, Fiji desfisava los Cangorós e dobrissiá la marca amb una penalitat. Mas un placatge mancat e una marrida recepcion d'un còp de pè a seguir faguèron dos ensages pels Verd e Jaune, que marcavan encara dos còps abans la pausa : 22-2.

Los australians tuavan la partida amb dos novèls ensages tre la represa. Las iniciativas fijianas se trucavan als contras e a dos ensages de 100 mètres. Los australians contunhèron lor festenal ofensiu per ganhar 54-6. Dètz ensages de marcats amb, sul nombre, sièis per l'alièr Holmes.

Los fijians foguèron valents,mas los Cangorós son tròp fòrts amb una circulacion plan aviada de la palma e un sosten permanent al portaire del balon.


Lo revelh tardièr dels tongans

Dissabte, l'estadi Mount Star d'Auckland restontissiá dels cants e crits d'un brave public tongan (totas las plaças vendudas, siá 30003, recòrd de l'estadi).

Al cap de dètz minutas, los angleses dobriguèron la marca per l'alièr Mac Gillvary sus sortida de mesclanha. Puèi, l'arrièr Witrop se vesiá acordar un ensag per l'arbitre vidèo. 12-0 pels angleses a la pausa. Los tongans pagavan lor indisciplina e de fautas de man.

Aquò contunhèt a la represa e los angleses ajustèron una penalitat. A la 67a, l'ensag de Bateman transformat fasiá una brava diferéncia : 20-0.

Partida plegada ? Non, que cal jogar fins a la còrna. Los tongans faguèron virar canturla als angleses e marcavan tres còps en 5 minutas per tornar a 18-20. Sus la darrièra pauma, lo tongan Fifita cabussèt dins l'en-but anglés, mas l'arbitre refusava l'ensag sens faire apèl al vidèo qu'auriá pogut cambiar lo sòrt de la partida e atudar una polemica.

Aquesta decision permet als angleses de defugir la malediccion de 2013 (desfaita a la darrièra minuta en mièja finala). Aniràn doncas disputar la corona mondiala als austalians dissabte a Brisbane. Se vòlon ganhar, deuràn enauçar bravament lor nivèl de jòc e téner còp 80 minutas.
En dobertura del rescontre, se tendrà la finala de la Copa del Mond de las femnas !


La represa del campionat d'Elèit 1

Al país, serà la represa del campionat d'Elèit 1. Lo campion Limós jogarà a Sent Gaudenç. Lo venceire del torneg d'Avinhon de rugbi de IX, Vilanòva, reçauprà los catalans. Palau reçauprà Albi, Carcassona se desplaçarà a Avinhon e Lesinhan jogarà a Tolosa.


Precision finala femenina

Una partida se jogarà entre las australianas, qu'an eliminat las canadianas 58-6 en mièja finala, e las neozelandesas, victoriosas de las anglesas: 52-4.


Alan Roch
de Brisbane estant, pel Jornalet en linha

  • Publicat dens Sport

Opinion de la sociologia dau malhòt

De mai en mai de joines marselhés pòrtan lo malhòt dau P.S.G. per carrieras, sensa crenta. Aquela « revolucion » vestimentària a un rèire-fons sociologic.

Un jorn qu’èri au collègi a Marselha, un collèga nos venguèt veire, tot desvariat : un de sei amics veniá de crosar un òme pròche una estacion de mètro ambe lo malhòt dau P.S.G. « Non… es pas possible ! », que li responderiam, partetjats entre nòstre escòr unanime per lei colors parisencas e una mena d’admiracion per lo tipe qu’ausèt portar aqueu malhòt au beu mitan de Marselha. Es una anecdòta qu’oblidèri jamai e qu’es ara ben marcada dins son temps (leis annadas nonanta).

O sabètz segur, lei marselhés son afogats de malhòts. Aqueu de l’O.M. naturalament, mai tanben de fotbòl en generau. Aquelei que vènon visitar la ciutat foceana son soventei fes sosprés per lo nombre de joves marselhés que pòrtan lo vèstit dei clubs de fotbòl pus famós d’Euròpa. Mai despuei quauqueis annadas, es pas rare de veire de gents portar lei colors dau P.S.G. E mai, dins quauqueis quartiers populars marselhés, es vengut ordinari. En defòra de quauqueis luecs estrategics coma lo Velodròm o lei quartiers Nòrd, siguem clar : se risca plus sa vida en portant lo malhòt parisenc en public. Aquela tendéncia es confirmada per lei botigas d’espòrt. Fa quinze ans, èra mission impossible per crompar de malhòts parisencs a Marselha. Ara, si vend a pauc près un malhòt dau P.S.G. per dos malhòts de l’O.M., un nombre important que creis cada an. En mai d’aquò, si pòt tanben veire aisat lei partidas dau P.S.G. dins leis cafetons dau còr de vila, e mai sautar de jòia coma marcan !

Un « classico » artificiau

Lei saberuts dau fotbòl sabon que de tot biais, París es pas un enemic ereditari de Marselha contràriament a Bordèu o Sant-Estève. Verai qu’aquela rivalitat foguèt creada de ren au començament deis annadas nonanta per lo president de l’O.M., Bernard Tapie, que voliá trobar un adversari a l’auçada de sa chorma per preparar mielhs la competicion europenca. Dins aquela entrepresa, foguèt ben ajudat per Canal +, difusaire exclusiu dau campionat a l’epòca, que decidiguèt d’investir dins lo capitau dau club parisenc per donar mai d’interèst a aquela competicion e coma aquò aumentar lo nombre de seis abonats. Ja en 1989, Tapie joguèt sus l’antagonisme Marselha-París en acusant lei bailes de la Liga d’èstre centralistas e de servir beu promier leis interèst dau P.S.G. Quauqueis annadas de temps, aquela acarament porrirà d’alhors l’ambient dins la seleccion nacionala ambe dos camps diferents e irreconciliables, e de resultats pron pietadós. Se la rivalitat OM-P.S.G. es una engana, s’impausèt pasmens dins la tèsta dei suportaires dei dos partits, un fenomèn de detestacion accelerat per l’oposicion pus globala e creissenta entre la capitala e la ciutat rebèla. D’unei nos diràn que tot aquò es ren que de fotbòl e que l’a de causas pus seriosas dins la vida. Siam d’acòrdi, es pas un afaire existenciau per l’umanitat, qu’a de que s’ocupar d’aquesta passa ! Amb aquò pasmens, per tornar ai novèlei costumas vestimentàrias, sembla que ne’n dison pron sus l’evolucion sociologica de Marselha. Alora, cu son aquelei maufatans que pòrtan fier lei colors de París au còr de la ciutat foceana ? D’en promier, son sovent joves e... marselhés, es a dire que son de gents que son generalament nascuts o qu’an creissut a Marselha, e non pas de neò-arribants (aquò si pòt ausir a l’accent !). Tanben si pòt constatar que son sovent de gents d’origina magrebina. Partent d’aquí, es pron aisit d’imaginar que lo P.S.G., ambe son proprietari qatari e son esponsòr Fly Emirates, es un marcaire d’identitat fòrt que pòt recampar d’un biais o d’un autre de membres de la comunautat arabo-musulmana.

« Son lei pus fòrts ! »

Aquò dich, la rason principala d’aquela revolucion vestimentària, la fau pas anar cercar ben luench. Un jove a l’accent marselhés prononçat nos l’expliquèt coma aquò : « Escota fraire, son lei pus fòrts ! » (en parlant de París, segur). Lo Qatar-Saint-Germain, coma lo sonam entre amics per galejar, fa pantaiar la joinessa de uei ambe de jogaires coneguts dins lo monde entier. E siam forçats de constatar qu’es pas lo cas per l’O.M., qu’es per ara dins una passa complicada. Lo fenomèn « Marcelo Bielsa », l’ancian entraïnador argentin de l’Olimpic, limitèt aquela tendéncia pendent un an, pas mai. L’anóncia de la venda dau club a un òme d’afaire estasunidenc es luench d’aguer rassegurat leis abonats de l’estadi Velodròm. En esperant, leis afogats de l’Olimpic an pas la chausida : si devon acostumar a crosar lo camin de quauqueis suportaires per cu lo sosten a un club miliardari que ganha tot a davançat l’amor dau malhòt blau e blanc, la fiertat de far partida dau pòple marselhés. Si consòlan en pensant que l’O.M. es totjorn lo solet club francés d’aguer ganhat la Liga dei Campions. Si consòlan tanben en vesent que l’argent fa pas lo tot e pòt pas crompar la fervor. Basta de comparar l’ambient de catedrala dau Parc des Princes e aqueu dau Velodròm qu’au còntra, urós o malurós, a totjorn quauqua-ren de dire e demòra lo luech pus representatiu de la populacion marselhesa.

Matieu Casanova 
(article dins La Setmana n° 1059)

  • Publicat dens Sport

Rugbi de XIII : una comunion planetària rugbistica

La dimenjada passada, lo segond torn de la Copa del Mond de XIII permet de saupre ja las formacions que contunharàn la competicion. Mas, abans, cal quichar vertadièrament sus l’estat d’esperit dobèrt de la competicion : dobèrt dins lo jòc prepausat, mas tanben dins las relacions entre jogaires, lo comportament dels espectators.

Abans la partida Samoa-Tònga, las doas formacions se recampèron al mitan de la pelena per pregar ensemble, per un moment compartit. Puèi, en plaça de faire caduna son haka, los faguèron a la ten-tu ten-ieu, coma dins una tenson entre trobadors. Sus las faissas, dins lo public, las tacas rojas (Tònga) e blavas (Samoa) èran mescladas. E degun escanèt pas lo vesin ! Mai que probable que totes se trapèron puèi a l’estanquet per tornar faire la partida per se tornar requinquilhar la votz aprèp aver cantat e cridat lo sosten a lor formacion. A la fin dels rescontres, los jogaires que s’escàmbian los malhòts ! Sèm plan luènh dels biaisses que vesèm, per exemple, al fotbòl : entre l’antisemitisme del costat de Roma, lo public sus la pelena cò dels Verds o los còps de pè de qun-capbord (qun-fadat en marselhés o kung-fu en francés). Pol al menut dels Cangorós Pels Blaus, se sabiá que l’obstacle que se presentava a eles sus la pelena èra mai naut que lo mont Everest (Chomolungma) : los campions del Mond australians. E los Cangorós marquèron dos còps en debuta de partida per lo segonda-linha Graham. Mas l’arrièr francés, (l’australian de Tolosa) Mark Keirallah, recuperava un còp de pè a seguir dels Verds dins sos dètz mètres, vesiá un trauc de mirga, se lançava e aprèp 90 mètres de corsa puntava entre los pals. A 6-10, los Blaus s’installèron un moment dins lo camp advèrse mas dos novèls contras australians portavan la marca a 20-6 a la pausa. Dins lo segond temps, los Pols se mostrèron valents en defensa, capitèron a prene quauquas iniciativas, mas prenián dos novèls ensages d’entrada e los Cangorós ne tornavan metre un còp a l’ora de jòc. Marca finala : 52-6. Paradoxalament, los Blaus an jogat d’un biais melhor, amb mai de volontat e de solidaritat, que contra Liban. De qué balhar de regrets ! Dissabte, los angleses se mostrèron pas sobeirans contra Liban e presentèron un jòc estequit. Ganhèron 29-10. Los Blaus jogaràn contra Anglatèrra dimenge. Que siaguen animats del meteis estat d’esperit que contra los australians e perqué pas !

Supèrb afrontament Tònga-Samoa Tònga, Samoa e Fiji an capitat a faire jogar jos lors colors de jogaires que podián portar o que portèron lo malhòt de las formacions australianas e neozelandeses. Aprèp las partidas Tònga-Samoa e Fiji-Galas, se vei qu’aquela opcion es plan interessanta pel debanament de la competicion. Dins la partida Tònga-Samoa, las doas formacions joguèron d’a fons, faguèron circular la palma, se mostrèron seriosas en defensa. A la pausa, Tònga menava, preniá un brave avantage a 26-6, los samoans tornavan a 26-18, mas un darrièr ensag permetiá als tongans de ganhar 32-18 e d’anar disputar la primièra plaça de la pola B a la Nòva Zelanda dissbate que ven. Los europèus a la pena Dissabte tanben, los escoceses èran plan luènh de lor comportament de la Copa del Mond de 2013 o de las Quatre nacions de 2016. Existiguèron pas fàcia a la Nòva Zelanda : 74-6. Meteissa punicion, dimenge a Townsville, pels galeses qu’encaissèron un 72-6 fàcia a de fijians que faguèron una vertadièra demostracion de jòc ofensiu. Mai equilibrada foguèt la confrontacion a Pòrt Moresby entre papós e irlandeses. Los irlandeses marquèron tre la debuta, los locals repliquèron per dos ensages : 8-6 a la pausa. Dins lo segond temps, la partida demorèt equilibrada. Cada formacion agèt l’escasença de prene l’avantatge. Calguèt esperar la darrièra minuta e una pauma perduda pels Verds per veire los papós marcar (14-6) dins un estadi en deliri e prene lo camin dels quarts de finala. Los italians an ganhat contra los Estats Units 46-0 mas lor demòra a rescontrar Fiji. Lo programa del tresen torn Las darrièras partidas del primièr torn (que se pòdon seguir sus BeInSport) seguiràn aqueste programa : — dissabte 11 : Nòva Zelanda-Tònga (Hamilton), Escòcia-Samoa (Cairns), Austràlia-Liban (Sydney) — dimenge 12 : Papoa-Estats Units (Pòrt Moresby) e dos rescontres a Perth : Irlanda-Galas e França-Anglatèrra.

Alan Roch

  • Publicat dens Sport

França-Navèra Zelanda sus Ràdio País dissabte !

Lo XV de França qu'afrontarà l'equipa de Navèra Zelanda aqueth dissabte 11 de noveme peu son purmèr tèst-match d'auton. Un tust que poderatz seguir sus las ondas de Ràdio País. Silvan Carrère e Pierrick Bordenave que comentaràn la serada rugbistica a comptar de 8 òras deu ser.
Guy Novès, seleccionaire deu XV de França que devó har cap a nombrós abandons despuish aquestas darrèras setmanas. Qu'ei simple, non demora pas que 7 deus 23 jogaires seleccionats ad aqueth parat. Que serà totun l'ocasion tau tolosan de realizar tèsts dab navèths jogaires e poder imaginar d'autes jogaires tau Mondiau de 2019.

Los Blaus n'an pas batut los All Blacks despuish lo 13 de junh de 2009 a Dunedin (en tèrra neozelandesa) dab ua mèrca de 22-27.

Partida en dirècte sus las ondas de Ràdio País e sus radiopais.fr a comptar de 8 òras deu ser.

  • Publicat dens Sport

L'activitat esportiva e facilita l'aprenedissatge d'ua lenga ?

Recentament, cercaires chinés e italians que realizèn un estudi pertocant a l'aprenedissatge d'ua lenga.
Lo lor estudi que pareishó dens la revista Plos One e que soslinha que mudar lo son còs en apréner ua lenga navèra e facilitaré la compreneson e la memorizacion deu vocabulari.

Que prenón dus grops d'adultes chinés (2x20) dab pauc de nocions d'anglés. Lo purmèr grop que seguí l'aprenedissatge de manièra classica dab leçons qui'us estón balhadas en classa, tot lo monde assetats. L'aute grop qu'èra equipat de bicicletas d'apartament.

Los estudiants deu grop que pedalèn pendent un trentenat de minutas e ua lista de mots en anglés que'us èra estada enumerada pendent l'activitat esportiva.

Article sancèr

L'activitat esportiva e facilita l'aprenedissatge d'ua lenga ?

Recentament, cercaires chinés e italians que realizèn un estudi pertocant a l'aprenedissatge d'ua lenga. Lo lor estudi que pareishó dens la revista Plos One e que soslinha que mudar lo son còs en apréner ua lenga navèra e facilitaré la compreneson e la memorizacion deu vocabulari.

Que prenón dus grops d'adultes chinés (2x20) dab pauc de nocions d'anglés. Lo purmèr grop que seguí l'aprenedissatge de manièra classica dab leçons qui'us estón balhadas en classa, tot lo monde assetats. L'aute grop qu'èra equipat de bicicletas d'apartament. Los estudiants deu grop que pedalèn pendent un trentenat de minutas e ua lista de mots en anglés que'us èra estada enumerada pendent l'activitat esportiva.

A la fin de las sessions, las duas equipas qu'estón sosmetudas a un medish tèst, legendar ua seria d'imatges, respóner a questions e díser si las frasas perpausadas an un sens. Lo dusau grop qu'avè miélher memorizat lo lexic anglés e comprés lo vocabulari qu'apliquè mei aisidament dens las frasas que non pas lo purmèr grop. Simone Sulpizio, cercaira en psicologia e lingüistica a l'Universitat Vita-Salute San Raffaele a Milan que declarè que l'estudi amuishava qu'ua activitat fisica, perseguida pendent sessions d'aprenedissatge e melhora « sensiblament » la memorizacion : « Çò que cau retiéner ei que la faiçon d'apréner mei bona n'ei pas de demorar assetat pendent òras shens mudar… ».

  • Publicat dens Sport

Lo Quidditch : espòrt e inclusion sociala

Lo quidditch es un espòrt qu’espelís dempuèi qualques annadas dins lo mond entièr, e mai en Occitània. Inspirat dels romans Harry Potter, aquel espòrt se presenta coma un nòu modèl d’integracion sociala e de convivialitat.

Al començament de setembre passat, aguèt luòc la quatrena edicion del Barcelona Moustaches Time, un campionat de quidditch ont participavan d’esquipas d’almens sèt païses, dont Alemanha, França, Turquia, Norvègia o Anglatèrra. L’esquipa de Tolosa, Quidditch Toulouse, aviá pas pro de jogaires e s’amassèt amb la de Lion, Crookshanks Lyon Quidditch, en tot bastir una « esquipa mercenària » apelada « Crooklouse ». « Una esquipa mercenària es una mescla que permet de s’amassar per jogar », çò nos diguèt Bad Wolf, un jogaire de l’esquipa de Tolosa que nos contava que la situacion del quidditch en Occitània a força ligams amb Catalonha. « En Occitània pòdi parlar del costat francés, perque coneissi pas lo costat espanhòl... Del costat francés en Occitània se comencèt a Tolosa fa sièis ans, e a aquel moment, amassa amb Barcelona, èran las solas esquipas que i aguèsse e ansin bastiguèron de ligams lèu-lèu ». En mai d’aquò, Bad Wolf explica qu’es dempuèi dos ans qu’aquel espòrt comença de reüssir amb la creacion d’una esquipa a Montpelhièr, tanben amb de ligams catalans amb Perpinhan, e puèi a Aush e a Agen, que « malgrat que siá pas una vila de la region de Tolosa, aperten a Occitània... »

Lo jòc

Lo jòc fa s’afrontar doas esquipas de sèt jogaires caduna qu’ensajan de far lo maxim de ponches en introduire un balon dins un dels tres anèls situats a cada extrèm del terrenh. De mai, i a un jogaire imparcial nomenat « snitch », que las autras esquipas devon ensajar d’interceptar. En mai d’aquò, los jogaires pòrtan un pal entre las cambas coma las escobas volantas dels romans Harry Potter.

  • Publicat dens Sport
Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls. Prepausa cada mes doas istòrias, de jòcs, una pagina de vocabulari e un dorsièr en rapòrt amb un dels dos 

+