Uei : 22/09/2017

Escòcia : se farà un segond referéndum ?

L’intransigéncia de Londres pòt èsser un atot pels nacionalistas del SNP. Problèma : lo pòble escocés seguís pas tròp. 

 

Se tira pas d’aquí. La primièra ministra d’Escòcia, Nicola Sturgeon (tanben capolièra del Partit Nacionalista Escocés, lo SNP) vòl organizar un segond referéndum sus l’independéncia escocesa e aquò, a tot còst. Lo 13 de mars, anoncièt qu’o prevesiá per la fin de 2018 o per la debuta de 2019. Sa motivacion màger es totjorn la meteissa : lo Brexit ! Dins sa declaracion, faguèt valer que la sortida del Reialme-Unit de l’Union europèa se faguèt contra la volontat dels Escoceses e que riscava de menar a la supression de desenas de milièrs d’emplecs. La dòna Sturgeon faguèt tanben valer las temptativas nombrosas de compromeses que foguèron regetadas pel govèrn de Londres. Citèt en particular sa demanda de transferiment de poders suplementaris a Edimborg e la possibilitat per Escòcia de demorar dins lo mercat unic europèu. 

 

« Es pas lo bon moment »

La primièra ministra britanica Theresa May respondèt ela qu’èra pas « lo bon moment » per organizar aquela consulta mentre que lo Reialme-Unit deu entamenar las negociacions de sortida de l’Union. Subretot, coma o rapelèt a un deputat SNP que l’interpelèt a la Cambra de las comunas, Granda-Bretanha fasiá partida de l’UE dempuèi una quarantena d’annadas mentre qu’Escòcia forma una nacion unida amb Anglatèrra, Galas e Irlanda del nòrd dempuèi 300 ans. Subretot : la dòna May a causida l’opcion d’un Brexit a la dura amb la sortida de l’estructura de l’Union mas tanben del mercat unic. Alavetz, las reïnvindicacions de la petita Escòcia semblan pas gaire pesar fàcia a l’intransigéncia del govèrn conservator al poder. La causa es que la dòna May foguèt tanben interpelada sus d’eventualas discussions amb los govèrns autonomics representant las nacions cèltas. Sus aquela question, la primièra ministra respondèt pas, en prometent « que se fariá  » sens donar de datas. La sola data segura èra la del desencadenament del Brexit pel 29 de mars. 

 

Posicion impossibla

Quitament se Theresa May se distinguiguèt de son predecessor (David Cameron) en refusant de prendre la risca d’una victòria dels independentistas, se metiá dins una posicion impossibla. Primièr èra evasiva sus de discutidas amb los govèrns autonòmas sus la condicions de sortida de l’UE. Segond, dona tot latitud a la dòna Sturgeon en s’alienant lo pòble escocés. Dona l’imatge classic de tot çò que desagrada als Escoceses en cò dels Angleses (entre autras causas), a saber la d’una persona arroganta, conservatora e qu’escota pas. Es de pan benesit per la dòna Sturgeon. A declarat ela que la posicion de son omològa britanica es « democraticament pas defendabla ». Indiquèt sus son compte Twitter a la debuta del mes de mars qu’aquela decision «  cruciala  » deviá pas èsser presa per la dòna May o per ela mas « pel pòble escocés». Son predecessor, Alex Salmond, considèra el coma « ridicul » l’argument segon lo qual Escòcia a pas los mejans d’èsser independenta. L’argument numèro un utilizat dins aquel sens es lo de las resèrvas de petròli de la mar del nòrd que demesisson pauc a pauc. A aquò, l’ancian primièr ministre respond que son país es la « 15ena nacion mai prospèra del monde » en tèrmes de PIB per estatjant. Aquò dit, se la decision aparten als quites Escoceses, los calrà convéncer primièr.

 

Los Escoceses desfavorables

Un sondatge publicat lo 15 de mars pel quotidian The Times estipula que 57 % dels Escoceses vòlon pas partir del Reialme-Unit. Es un brave bacèu que se pren Nicola Sturgeon. Comptava sus l’oposicion a la sortida d’Euròpa (62 % dels Escoceses refusèron lo Brexit) per tornar lançar una consulta sus l’independéncia. Se farà pas sul pic. Segon l’institut de sondatge YouGov Survey, la dòna Sturgeon auriá besonh de far ganhar 14 punts al « Òc » per o emportar. Pièger : l’euroscepticisme creis en Escòcia. Quitament se la granda majoritat dels Escoceses votèron contra la sortida de l’Union europèa, un sondatge de l’institut Scotcen’s desvelèt que 42 % dels ciutadans volián una reduccion dels poders de Brussèlas (sorsa : The Scotsman). Es una eqüacion dificila per Nicola Sturgeon : cossí justificar la consulta sus l’independéncia se son primièr argument es de mens en mens presat pels quites Escoceses ? Se l’eurosepticisme contunha de créisser, serà pas de bon organizar un segond referéndum. Lo 22 de mars, la dòna Sturgeon presentèt una mocion al Parlament d’Edimborg per demandar l’autorizacion d’organizar un referéndum. Malgrat los sondatges desfavorables, contunha de dire qu’Escòcia es sortida de l’UE contra sa volontat. Malgrat una interrupcion dels debats en seguida de l’atemptat que se debanèt lo meteis jorn a Londres, lo Parlament (majoritàriament nacionalista) la deviá seguir. Pasmens, en mai de l’assentiment del Parlament autonòma, aquela demanda d’autorizacion deu tanben aver lo del Parlament central de Westminster. 

 

Un referéndum en Irlanda ?

En fàcia, los republicans nòrd-Irlandeses del Sinn Féin reclaman un referéndum sus l’unitat d’Irlanda. La formula es la meteissa qu’en Escòcia : dins la mesura qu’una majoritat de ciutadans de la província d’Ulster se son prononciats contra lo Brexit, perqué pas rejónher la Republica d’Irlanda ? Michelle O’Neill, capolièra del Sinn Féin al Parlament autonòma de Stormont considèra que lo govèrn britanic « contunha de refusar d’escotar » lo pòble d’Irlanda del nòrd e reclama aquela consulta « tre que possible ». Charles Flanagan, ministre dels afars estrangièrs de la Republica d’Irlanda, considerèt coma prematurada aquela demanda d’organizacion d’un referéndum. Implicat dins las convèrsas a l’entorn del manten del poder partejat entre Republicans e Unionistas a Stormont, considerava que lo bon foncionament de las institucions nòrd-irlandesas èran alara la prioritat. Dempuèi lo mes de genièr, lo sistèma de poder partejat entre Sinn Féin e Democratic Unionist Party (DUP) èra arrestat... dempuèi que lo paure èx vice-primièr ministre Martin McGuinness aviá refusat de sèire còsta Arlene Foster (DUP) en causa d’una marrida gestion d’un programa environamental qu’a costat 480 milions d’euros al contribuable. Après d’eleccions organizadas per la seguida, lo Sinn Féin renfortiguèt sa posicion al dintre del Parlament. Empacha pas que los partits nòrd-irlandeses avián duscas al 27 de mars per trobar un acòrd si que non, Londres tornava prendre los afars en man. A l’ora d’escriure aquelas linhas, pas cap d’acòrd èra estat trobat.

 

CLAMENÇ PECH

 

Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Papagai

Papagai es la revista occitana dels pichonèls. Prepausa cada mes doas istòrias, de jòcs, una pagina de vocabulari e un dorsièr en rapòrt amb un dels dos 

+