Uei : 24/11/2017

CFPÒ-MP en cauma — lo ret dels CFPÒs reagís

Dempuèi 22 jorns, los salariats del Centre de Formacion Miègjorn-Pirenèus son en cauma. La situacion a començat a mal virar al mes de junh passat quand la màger part del burèu demissionèt aprèp una AG que's debanè « d'una faiçon allucinanta » segon un emplegat. Dempuèi, los novèls membres del burèu aurén impausat un fonccionament qualificat pels grevistas « d'iperdirectiu ». Al mes d'agost, los emplegats del CFPO foguèron convidats a participar a un enterten aperat que se ditz « Rescontre d'escambi e d'informacion », quicòm d'inedit cap al dret del trabalh e a la convencion collectiva d'aprèp Arvèi Pouvillon, salariat al Centre dempuèi 2010.
La novèla còla auriá mes en plaça de practicas « arcaïcas » quand fa annadas que los salariats se baton per aver la professionalizacion per exemple de la comptabilitat de lor estructura per una visibilitat mai bona.
Çò que possèt los salariats a reagir foguèt la convocacion que recebèron la setmana passada per un entreten prealable a sanccions disciplinàrias « que pòt anar fins al licenciament ».

Crida d'Òc-Bi tà trobar ensenhaires bilingües

Òc-Bi que lança un aperet. « Lo desvolopament de classa bilingua francés-occitan, arron un vam, que comença a's tumar a dificultats d'estructuracion dens lo temps », atau debuta lo comunicat de premsa de l'associacion tau bilingüisme dens l'ensenhament public.

Lo concors qui permet d'aver professionaus qui ensenhan en francés e en occitan dens l'Educacion nacionau que s'obrí en 2002 dens la Region Navèra-Aquitania. A maugrat deus milèrs de mainatges pertocats per aqueth ensenhament, los ensenhaires embauchats e la comunicacion realizada dab l'ajuda de la Region e l'OPLO (borsa ENSENHAR de 4 000 € hicada en plaça taus estudiants interessats), la situacion qu'ei mauaisida dens lo sector. Los departaments d'Òlt e Garona e de Dordonha que coneishen dificultats dab l'abséncia d'ensenhaire en cicle 3 « e en las Lanas tanben dab ua quita estagiària qui deu ensenhar en partida en francés entà poder validar la soa annada de CRPE (concors especiau de recrutament deus professors de las escòlas) ». 

Formacion : lèu-lèu serà temps de passar lo DCL

La sesilha venenta del Diplòma de Competéncia en Lenga per l'occitan es prevista pel 31 de mai de 2017.

Se volètz conéisser lo nòstre nivèl en lenga occitana, l'Educacion nacionala vos prepausa lo DCL. Dins aquel encastre, los candidats passan una espròva escrita puèi una espròva orala en situacion professionala. Se pòdon atal far una idèa del lor nivèl de lenga dins aquel cas de figura. L'espròva se pòt adreçar als apreneires o alavetz als locutors natius, adultes o en formacion continua.

Obrís l'accès a d'emplecs ont una competéncia en lenga occitana es demandada (formators, actors culturals, personals dels establiments de santat o de retirada, comunicaires, etc.) Las capacitats del candidat van del nivèl un (mai flac) al nivèl cinc (mai naut) a l'escrit coma a l'oral dins d'activitats de comprension e d'expression.

Avètz duscas al 6 d'abril per vos poder marcar. O podètz far aquí. L'examèn se debanarà dins las acadèmias de Bordèu, Tolosa, Montpelhièr e Niça.

Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Papagai

Papagai es la revista occitana dels pichonèls. Prepausa cada mes doas istòrias, de jòcs, una pagina de vocabulari e un dorsièr en rapòrt amb un dels dos 

+