Uei : 23/06/2018

Michel Maffrand, grand laureat del Felibritge 2018

« La Santo Estello », lo Congrès del Felibritge se tenguèt del 17 fins al 22 de mai, a Bergerac en Dordonha. Pendent sièis jorns, nombrós eveniments culturals èran organizats. Rencontres literaris amb Michel Chapduelh, Mèstre en Gai Saber, inauguracions de diferentas mòstras (« Le chanvre » al Musèu de las Arts e de las Tradicions popularas, « Frédéric Mistral et le Félibrige » e « Parfum de Bal » a la Mediatèca), visitas, conferéncias, salon del libre, espectacle de la Calandreta locala, projeccion de film de Michèl Chapduelh « Una pensada sauvatja », realisat per Patric La Vau, èran presentats al public. Un omenatge faguèt rendut al Bernat Lesfargues, poèta occitan qui's moriguèt lo 23 de febrièr a l'atge de 93 ans.

Mai de 700 personas assistiguèron a la proclamacion del palmarès dels Grands Jòcs florals septenaris del Felibritge.

Capoulie Mouttet et Michel Maffrand P1070019

Lo grand laureat 2018 es Michel Maffrand, ditz Joan de Nadau (Fòto ©Felibritge). « l'aplaudiment amb fòrça, lo public espontanèament entonèt lo “ Se canto ”, escriu André Gabriel, secretari general del Felibritge dins son compte-rendut, un bèl moment ! Michel Maffrand fòrça esmogut prononcièt una parladissa ont se mesclava jòia e sensibilitat e cantèt “ L'immortela ”, pel plaser de totes ».
La ceremonia se perseguiguèt per la « passacion del ram d'olivièr » de la novèla reina del Felibritge, entre la niçarda Angélique Marçais e la bigordana Adeline Bascaules-Bedin (Fòto ©Felibritge) de la Valada de Campan, deven la XXIna reina.

Adeline Bascaules Bedin


Jacques Mouttet foguèt tornat elegir « Capouliè » del Felibritge pel quatren mandat.

Lo Felibritge foguèt creat en 1854 per Frédéric Mistral e sièis de sos amics poètas, e es una organizacion de renovacion, de promocion de la lenga d'òc e de reivindicacion regionalista.

Inf. : Felibrige, Parc Jourdan, 8 bis avienguda Jules Ferry — 13100 Ais — Tel. : 04 42 27 16 48 — Corric : This email address is being protected from spambots. You need JavaScript enabled to view it. — Site : www.felibrige.org

Dordonha : Bergerac Bio, au mei pròche deus consumidors

Bergerac Bio qu’ei ua SCOP deu hialat Biocoop, qui estó tornada préner per salariats en 2014, a la partença deu son gavidaire. Qu’estó lo parat peus emplegats, d’ara enlà « associats », de gerir l’enterpresa com ac entenen tot en combàter las navèras tecnicas de venta (desapareishuda deus caishèrs, pas nat arcuelh client e magazins mei anar mei grans).

Biocoop qu’ei ua societat anonima cooperativa a capitau cambiadís. Qu’ei especializada dens la distribucion de produits alimentaris biologics o enqüèra gessits deu comèrci equitable. Qu’ei un hialat nacionau compausat de 431 magazins dens la França tota. L’ensenha qu’a mei de 30 ans e qu’ei vaduda de la volontat de consumidors e de productors de sostiéner ua agricultura biologica e de qualitat. Que la vòu desvolopar dens un esperit d’equitat e de cooperacion. Entad ac har, que s’avisa deu transpòrt deus produits referenciats e de la lor origina (privilegia França). Valérie Bernard Herard de Bergerac Bio, magazin membre deu hialat Biocoop, qu’ei estat sensibla ad aqueth chepic deu « consumir locau », car a la cooperativa nacionau : « N’i avèva pas sonque lo hèit de véner produits bio mes tanben tot un sistèma de societat darrèr, de consumir autament. La societat cooperativa qu’ei atentiva a la gestion de las dèishas, au tribalh dab las cordèras, dab los sons partenariats com dab Terre de Liens [movement de defensa deu fonsièr agricòla e solidaritat paisana] e dab los labèls. Biocoop qu’ei en efèit partenari de Bio Cohérence [marca de certificacion privada au quasèrn de las cargas estricte, en reaccion a ua diminucion de las exigéncias deu quasèrn de las cargas deu labèl francés AB]». La societat cooperativa nacionau non chicoteja pas suus mejans entà verificar lo bon foncionar deus sons divèrs magazins e qu’organiza dab un organisme independent, contròles regulars autant sus l’afichatge suus lòcs de venta com suus produits e certificats qui i son presentats.

Ua SCOP independenta

Cada Biocoop que demora independenta e que pòt causir la soa formula d’enterpresa. Cada gavidaire qu’a la soa manièra de gerir la Biocoop, tant au nivèu sociau com politic. Bergerac Bio qu’a causit de vàder ua SCOP, Societat Cooperativa e Participativa. Aqueth tipe d’enterpresa qu’ei sosmetuda a l’imperatiu de profitabilitat e beneficia d’ua governança democratica. Creada en 2006, la SARL Bergerac Bio qu’ei vaduda ua SCOP en 2014. Lo son gavidaire, a l’epòca proprietari deu magazin, qu’ei partit sus d’autes projèctes mes que perpausè aus salariats de har ua transmission e represa d’enterpresa. Atau, suus 11 salariats que compta lo magazin, 6 que son vaduts « associats ». Lo principi qu’ei simple : un salariat que representa ua votz, qué que sia lo montant de las soas parts sociaus dens la SCOP. L’arregahada en collectiu qu’ei estat drin complicada, los emplegats qu’an alavetz decidit de crear la lor pròpia carta intèrna. Un reglament interior qui’us serveish d’ara enlà de guida. « Que volèvam tribalhar autament, en collectiu, dab per exemple ua geréncia mandatada peus associats per 4 ans. Los 6 associats que s’amassan regularament e pensan amassa a la presa de decisions tà l’estructura. Dens aquera carta intèrna, que presentam las nostas atentas com salariats e salariats-associats e çò que metem en plaça concrètament, com los plannings, los tribalhs, la polivalença. L’estatut de SCOP que permet de véder que los salariats se sentescan plan dens lo magazin, valorizats, qu’ajan la paraula, mei de responsabilitats », çò nse digó Valérie. Dens lo magazin Bergerac Bio, produits leitèrs, frutas e legumes, carn, mes tanben produits cosmetics e de netejatge que son en venta (Fòto BBio). Com membra de Biocoop, la SCOP que s’ei engatjada a horní’s en grana partida dens ua de las platafòrmas deu hialat nacionau. La rèsta deus produits (12 a 14 % de la totalitat) que vien d’espleitacions locaus : « ua causida que lo hialat non penaliza pas e encoratja au contra », çò nse hida Héloïse Arphi, salariada-associada de la SCOP. Los projèctes de desvolopament de la SCOP de Dordonha non mancaràn pas augan : « l’un deus nostes projèctes tà 2018 qu’ei estar un magazin mei axat sus un lòc de vita. Que ns’agradaré tribalhar dab las associacions, los actors locaus, pas sonque los productors mes a l’entorn de tot çò qu’ei associatiu e culturau. Que volem un magazin qui sia autan un lòc dens lo quau se debanan causas a Bergerac », çò ditz Valérie. Bergerac Bio qu’organiza dejà eveniments au demiei deu son magazin entà méter en valor lo tribalh d’un navèth productor o un partenariat dab ua societat per exemple. Au mes de deceme passat, ua degustacion de vin a la ròsa que’s debanè e jòcs concors dab produits (tistèths bio e locau) que son a ganhar regularament. « Qu’avem dias evenamenciaus, aniversaris e que participam au “ Biotonome ”, qui ei un eveniment nacionau pendent lo quau aprenem au consumidor a estar mei autonòme. Çò que volem a l’aviéner, qu’ei desvolopar aquò e diversificar la nosta faiçon de ns’implicar », çò concludeish Valérie. Bergerac Bio que s’installarà au mes de junh dens l’ancian garatge Feu Vert (avienguda Paul Doumer). Dens lo locau de 400 m2, ua sala d’associacion, d’amassada e conferéncia que poderà estar reservada. Puish, dens lo magazin, un espaci « talhèr de cosina e plan-estar » que permeterà a intervienents de perpausar animacions.

Inf. : Bergerac Bio, rota de Marmanda — 24680 Bergerac Tel. : 05 53 27 22 22 — Site : www.bergeracbio.com FB : www.facebook.com/SCOP-Bergerac-Bio-Biocoop

L'espectacle « Òmes e femnas dau Landés » a Bordèu (33)

La companhia Nordack que presentarà un espectacle bilingüe « Òmes e femnas dau Landés » au musèu d'etnografia de l'Universitat de Bordèu, lo 7 de març a 17 ò 45 (pendent 1 ò). Que haràn descobrir la vita deu monde de la region emboscada situada au sud-oèst deu departament de Dordonha. Lo comedian Michel Feynie que contarà l'istòria deus òmis e de las hemnas d'aqueth parçan arbohit dens la memòria collectiva deu Peiregòrd.

En s'ajudar de tradicions musicaus, de contes tradicionaus e de momentòts de vita, l'espectacle que hè un ligam subtiu enter ger e uèi.

Encontre dab l'actor a la fin de l'espectacle.

Inf. : Musèu d'Etnologia de Bordèu, 3 ter, Plaça de la Victòria a Bordèu — Entrada a gratis sus reservacion au près deu MEB : 05 57 57 31 61 — Mèl : This email address is being protected from spambots. You need JavaScript enabled to view it.

4au edicion d'Òc en Vesera (24) aquesta dimenjada

Deu 2 au 4 de març, la vila de Condat de Vesera en Dordonha qu'arcuelherà la 4au edicion d'Òc en Vesera. Pendent 3 dias, animacions e concèrts a l'entorn de la cultura e de la lenga occitanas que seràn perpausats aus abitants. Atau, lo 2 de març a 20 òras 30, lo grop tolosan Cocanha que harà un concèrt a la sala de las hèstas (entrada : 12 €), l'endedia, a partir de 10 òras deu matin, Patric Chouzenoux qu'animarà un debat a l'entorn de las arts culinàrias dab nombrós invitats com Marie-Françoise Oudard, l'autora Monica Sarrasin, l'escrivan e cançonaire peiregordin Micheu Chapduelh, Joan-Claudi Dugros, autor agenés e membre de Novelum-I.E.O 24, seccion peiregordina de l'Institut d'Estudis Occitans e l'escrivan agenés Joan Ganhaire, l'autor e fotografe Joan-Peire Lacomba, o enqüèra lo jornalista Dàvid Grosclaude.

Ensenhaire cercaire sociològue, Jean-Yves Agard que perpausarà ua conferéncia sus l'economia, la cultura e l'identitat deus territòris, e qu'amuisharà que las especificitats culturaus e lingüisticas de las Regions que pòden miar a la lor escaduda economica e toristica.  Lo vrèspe, plaça a las danças tradicionaus deu Piemont italian dab ua iniciacion animada peu grop Catafolk e Dario Anghilante. Pasqualina Pasero que perpausarà un talhèr de cosina.

Lo darrèr dia, lo hestenau Òc de Vesera que'vs convidarà a ua passejada musicau italiana per las arruas deu Condat de Vesera.

Inf. : Reservacions repaish e talhèrs au 07 81 11 02 88 / 06 08 46 74 59 — Site : www.condat-sur-vezere.fr — FB : Village de Condat sur Vézère.

  • Publicat dens Culture

La Tireta Duberta que canta Nadau

Lo grop La Tireta Duberta, devath la direccion de Michel Pertuis, que presentarà au public lo son navèth repertòri de cantas de Nadau lemosinas, gasconas, provençaus mes tanben de cantas mei contemporanèas. Lo grop que s'acompanharà d'un musicaire dab la soa harpa celtica. Nadau qu'ei la celebracion d'ua hèsta mes tanben lo periòde qui permet de har víver tradicions qui conjugan las valors solidaritat e convivialitat.

La Tireta Duberta que serà en concèrt divés 8 de deceme a la sala deu Tribunau de Nontron (Dordonha) a 20 ò 30 dab cantas de Nadau e « istòrias de país » dab Patrick Ratineaud. Lo grop que serà a Bussièra Badiu (Dordonha) lo 10 de deceme a la glèisa romana a 15 òras dab en purmèra partida la corala Carillon de Nontron qui cantarà cançons de Nadau deu monde sancèr. Lo 15 e lo 16 de deceme, que's produsiràn a Escuras (Charenta), puish lo 17 de deceme a Sent Marçau de Valeta au Domeni de Montagenet a 15 òras dab en purmèra partida la corala Lyra Libra de Marval. Darrèra data a quauques dias de Nadau, lo 22 de deceme a la glèisa romana de Saint Pardoux de Mareuil a 21 òras.

Inf. : L'Union occitana « Camille Chabaneau », tel. : 05 53 56 61 89 — Véder videos deu grop

  • Publicat dens Culture

Crida d'Òc-Bi tà trobar ensenhaires bilingües

Òc-Bi que lança un aperet. « Lo desvolopament de classa bilingua francés-occitan, arron un vam, que comença a's tumar a dificultats d'estructuracion dens lo temps », atau debuta lo comunicat de premsa de l'associacion tau bilingüisme dens l'ensenhament public.

Lo concors qui permet d'aver professionaus qui ensenhan en francés e en occitan dens l'Educacion nacionau que s'obrí en 2002 dens la Region Navèra-Aquitania. A maugrat deus milèrs de mainatges pertocats per aqueth ensenhament, los ensenhaires embauchats e la comunicacion realizada dab l'ajuda de la Region e l'OPLO (borsa ENSENHAR de 4 000 € hicada en plaça taus estudiants interessats), la situacion qu'ei mauaisida dens lo sector. Los departaments d'Òlt e Garona e de Dordonha que coneishen dificultats dab l'abséncia d'ensenhaire en cicle 3 « e en las Lanas tanben dab ua quita estagiària qui deu ensenhar en partida en francés entà poder validar la soa annada de CRPE (concors especiau de recrutament deus professors de las escòlas) ». 

Cafè Òc a l'entorn deu mestièr de molièr

L'Atelier Sarladais de Culture Occitane (ASCO) que torna préner las soas activitats 2017/2018. Lo purmèr Cafè Òc de l'auton que's debanarà dijaus 19 d'octobre a 20 òras 30 au Cafè La Lune Poivre a Sarlat.

Elie Coustaty que serà lo pumèr convidat d'aquera sason culturau. Que tornè crompar lo molin de l'avesque de Beinac (87) en 1993 dab la soa hemna, Pierrette. Tot lo materiau deu molièr i èra demorat en l'estat. L'associacion francesa deus Molins qu'ajudè lo coble a restaurar a l'identica lo lòc deu sègle XIVau. Pendent vint ans, que recebón l'ajuda de las parts de molièrs de mestièr e de benevòles deu parçan.

Qu'averatz donc la possibilitat d'enténer l'istòria deus Coustaty e d'escambiar dab Elie lo 19 d'octobre a Sarlat, en lenga occitana.

Inf. : Cafè La Lune Poivre, 5 arrua J. J. Rousseau — 24200 Sarlat — Tel. : 06 81 58 88 30 — Site : http://asco-sarlat.org/ — Fòto : http://www.domainedelarhonie.com/

  • Publicat dens Culture
Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+