Uei : 19/11/2017

Musica : e viva lo moko balèti !

Sortit en decembre de 2016, « Moko Balèti » segond album de Djé Balèti se vòl festiu e sarcastic. Dempuèi son QG del barri tolosan de la Veireriá, Djé espia lo mond. Après un primièr album « d’educacion populara » (son sos mots), aquel segond opus se presenta coma un libre de pregàrias paganas. Los mots se fan mai mistics, engatjats, sarcastics quitament se l’apèl a la fèsta demòra. L’essencial per aquel trio novèl (dos musicians de tres foguèron remplaçats) es de prepausar una solucion a cada problèma evocat dins cada títol. Se poguèron assegurar los servicis de las cantairas Carolina Dufaur (Cocanha Triò) e Laeticia Dutech (La Mal Coiffée) per far los còrs sus l’ensemble de l’album.

Djé Balèti a conservada aquela mescla de ritmes caribencs (especialament la soca, version accelerada de la calypso), de còrs africans amb una salpicada de ròck. A subretot servadas doas especificitats que donan sa particularitat al son del Djé balèti : la lenga nòstra e l’espina. Aquela guitarra de quatre còrdas, instrument tradicional de la musica carnavalenca niçarda, es justament « l’espina dorsala » d’aquel grop dempuèi la debuta. Es de las linhas que Djé crèa amb aquel instrument que partisson totas las composicions del trio. E l’occitan de Niça dins tot aquò ? Fa son aparicion de faiçon pro consequenta dins los tèxtes poëtics, enflamats e prigondament animistas del Djé. Es lo ligam amb Niça, sa vila de còr (quitament se ara demòra a Tolosa) que li permet de la pantaissar de luènh. Lo tròç « Deux vieux » es una òda tendra a la capitala de la Comtèa. Pichòt punt de lenga : lo quite tèrme « Moko » pòt semblar exotic mas son origina es occitana. Èra lo chafre que donavan los parisencs als Occitans montats a la capitala. Vendriá de la contraccion dels mots « ambe aquò » prononciats « ‘mò ‘quò » per de parisencs d’origina tolonenca.

  • Publicat dens Culture
Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Papagai

Papagai es la revista occitana dels pichonèls. Prepausa cada mes doas istòrias, de jòcs, una pagina de vocabulari e un dorsièr en rapòrt amb un dels dos 

+