Uei : 15/11/2018

ÒCtele lança una crida a projèctes de documentaris

Dins l'encastre d'un Contracte d'Objectius e de Mejans (COM) signat amb la Region Novèla-Aquitània pel periòde de 2018 a 2020, ÒCtele s'engatja a sostenir la valorizacion de la produccion audiovisuala en lenga occitana.

ÒCtele lança una crida a projèctes de documentaris als autors, realizators e productors interessats. Auretz fins al 25 de març per prepausar vòstras creacions a la webtele. Un comitat de lectura s'amassarà lo 4 d'abril, per estudiar los dorsièrs mandats pels candidats. Analisarà la qualitat editoriala, lingüistica, artistica e la viabilitat economica dels projèctes, qui plan segur respèctan la linha editoriala d'OCtele. Los filmes seràn en lenga occitana.

Podètz mandar vòstras proposicions sus de tematicas socialas del temps actual, sus la plaça de l'occitan dins la Region Novèla-Aquitània e dins lo mond e tanben de retraches de personalitats occitanofònas màgers. OCtele acceptarà pas los reportatges d'actualitat, los magazins de flus e de telerealitat, los filmes institucionals e los documentaris que son bastits sus de collectatges etnografics pertocant a la lenga occitana, ni los filmes qu'an una vocacion etnografica, patrimoniala o lingüistica.

Inf. : Mandar vòstres dorsièrs amb una nòta d'intencion de realizacion, una nòta del productor, un sinòpsi, un scenari, un prètzfach de tipe CNC, lo plan de finançament previsional qu'indicarà los acòrds ja obtenguts, lo CV de l'autor, lo CV del realizator e las referéncias de la societat de produccion. 

De mandar en 2 exemplars sus papièr e un exemplar en numeric a Stéphane Valentin, OC PROD, 77 avienguda dels Lilas — 64000 Pau — Mèl : Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein! — Site : www.octele.com

Crida de l'Escòla Occitana d'Estiu

Arron ua baisha de las soas subvencions, l’Escòla Occitana d’Estiu (EOE-IEO 47) que hè ua crida au don. Qu’estó dens l’obligacion de har un empront entà aunorar las darrèras despensas. « En esperar las avanças sus las subvencions venentas - que riscan encara de se demesir o per d’unas benlèu de desaparéisser completament, - sens un apòrt novèl d’argent, nos caldrà botar la clau jos la pòrta : la situacion nos permet pas de tenir dincas als estagis 2018 », çò escriu Bernat Bergé, vice-president de l’E.O.E. -IEO 47 dens un comunicat.

Que seré la fin d’ua aventura de 45 ans. Dejà en 2008 e en 2014, l’E.O.E-IEO 47 n’èra pas passada luenh de la barradura. Que podetz vàder membre de l’associacion (cotisa de 4,50 € taus estudiants dinc a 38 €), vàder membre plan·heitor de l’associacion (60 €) o enqüèra har un don de 30 dinc a 250 € e mei. L’EOE-IEO 47 que perpausa l’espectacle de condes « Lo Bernat Contaire » au profieit de l’associacion.

Inf. : www.eoe-oc.org — Mèl : Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein! Tel. : 05 53 41 32 43.

L'IEO lança una crida a donacion

L'Institut d'Estudis Occitans lança una crida a donacion. Foguèt assabentat al mes d'octòbre que tocariá la mitat solament de sa subvencion per 2017, balhada per l'Ofici Public de la Lenga Occitana. En mai d'aquela baissa, s'ajusta las incertituds dels engatjaments de la Region Auvèrnhe-Ròse Aups. « Estent aquela situacion, l'IEO pòt pas faire autrament que de chamar en totei de sostenir, un còp de mai, l'associacion e sei tòcas, permetre son foncionament e organizar sa preséncia e seis accions per l'annada 2018 », ce escrivon dins lo comunicat signat pel President de l'Institut, Pèire Brechet.

Se volètz ajudar l'IEO, podètz mandar vòstre don a l'associacion per chèc al sèti Institut d'Estudis Occitans, 11, carrièra Malcosinat — 31000 Tolosa. O telecargar lo bulletin de don aicí.

Inf. : Site www.ieo-oc.org

Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+