Uei : 14/11/2018

Objectiu gahat tà La Passem

Dimenge passat a 14 òras que s'acabè a Pau, barri dens un barri deu Hedàs tot nau, la purmèra edicion de la corruda tà la transmission de la lenga, La Passem.

Que's podó aisidament seguir las diversas estapas suus hialats sociaus. A cada estanc e relais, videos e fòtografias qu'èran postadas peus internautas. Ua escaduda vertadèra puish a que l'associacion organizatora Ligams e venó mei deus 400 quilomètres qu'an perpausat. Causa qui non s'èra quitament pas debanada en çò deus nostes amics bascos e bretons dens las purmèras edicions de las lors corrudas respectivas tà la lenga. Mei de 40 000 euros qu'estón collectats tad aquera purmèra edicion. Aquera soma que servirà a la realizacion de projèctes tà la lenga occitana.

passem2

Milerats de personas qu'assistín a l'arribada per sarròts deus corredors. Julien B. que participè a La Passem peu plaser : entervista

Au demiei deus corredors, monde deu País-Basco e de Bretanha qu'an l'acostuma de córrer en sostien a la lor lenga, que vienón en solidaritat participar a La Passem. Qu'ei lo cas de Fabienne Lavigne, acostumada de la Renadeg en Bretanha : entervista

Taulèrs de la maison d'edicion Per Noste, de la maison de las associacions bearnesas l'Ostau Bearnés, atau com taulèrs dab de qué minjar, qu'èran sus plaça.

Qu'estó lo Jan de Nadau, lo convidat especiau qui recebó lo testimòni dens lo quau s'estujava lo messatge purmèr de La Passem. Lo cantaire que'u lejó davant milierat de personas qui l'escotèn en badant : « Qu'avem las cartas en man, a nosautes de ns'i har. […] n'i a pas que los capborruders qui se sauveràn ».

jandenadau passem

Jean-Jacques Lasserre, president deu Conselh departamentau deus Pirenèus-Atlantics que partatgè lo son bonaür de véder aqueth estrambòrd a l'entorn de la soa lenga mairau (originari de Bidaishe). François Bayrou, maire de Pau que's regaudí tanben de l'eveniment e qu'ensagè de motivar los benevòles de l'associacion Ligams a tornar har la corruda cada annada.

François Bayrou entervista, per Ràdio País François Bayrou entervista, per Ràdio País

passem5

IMG 4186

La presidenta de l'Ofici Public de la Lenga Occitana, Charline Claveau-Abbadie, que felicitè los organizators de la corruda qui's debanè « shens nat trebuc » : « Qu'estó ua escaduda au delà d'aquesta corruda, un cèrt nombre d'acamps que's debanèn dens totas las comunas. Qu'amuishè aus abitants e aus elegits l'importància de la lenga occitana. Que permeterà au monde de's questionar sus la lor relacion a la lenga e a la cultura, e a la manièra de se l'arrecaptar ».

Que podetz tornar escotar/véder los discors a l'arribada ací.

La dusau edicion de La Passem qu'ei programada tà 2020 en Bearn e Baish-Ador.

Inf.: http://lapassem.com/fr/accueil/
Fòto : 1èra, los corredors de La Passem a Lis lo 26 de mai ©RP, la tres autas a l'arribada de La Passem au barri deu Hedàs ©LS

Que podetz crompar quilomètres tà La Passem !

La purmèra corruda tà la lenga e la cultura occitanas, La Passem !, que’s debanarà deu 25 au 27 de mai de 2018. Los participants que poderàn córrer de 1 a 400 km capvath un centenat de comunas deu departament deus Pirenèus-Atlantics, e aquò pendent 3 dias e 2 nueits a contunhar. Pendent La Passem !, un testimòni que passarà de man en man, simbolizant l’urgéncia e la necessitat de la transmission de l’occitan.

Que contienerà un messatge qui serà lejut publicament a la soa arribada a Pau. La corruda que partirà de Bidaishe, puish que passarà per Ortès, Monenh, Auloron, Laruns, Somolon, Arsac-Arrasiguet abans d’arribar tà Pau. Qu’ei l’associacion Ligams qui ei a l’iniciativa deu projècte. Despuish lo 18 de heurèr, qu’avetz la possibilitat de crompar quilomètres a l’associacion Ligams. La valor d’1 km ei de 100 euros (2 km, 200 euros, etc.). Que podetz enviar lo vòste chèc a la sedença de Ligams, 46 baloard Alsace-Lorraine a Pau.

Los membres de l'associacion occitana que contunhan d'organizar acamps d'informacions drin pertot capvath Bearn. Que serà lo cas au ser dab ua amassada publica qui's debanarà a 20 òras 30 a l'Ostau deus servicis de Nai (64). 

 

Inf. : L’associacion Ligams, 46 baloard Alsace- Lorraine — 64000 Pau — Site : www.lapassem.com — Corric — Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

  • Publicat dens Culture

La Passem ! Córrer tà l'occitan

La purmèra corruda tà la lenga e la cultura occitanas qu’ei totun creada ! Deu 25 au 27 de mai de 2018, los participants que poderàn córrer de 1 a 400 km capvath un centenat de comunas deus Pirenèus-Atlantics entà sostiéner la transmission. Qu’ei l’associacion Ligams qui ei a l’iniciativa deu projècte en tèrra occitana.

En lòc de’s demandar on lo monde an aprés la lenga o per quina rason la van parlar, « que çò qué portatz, vos, tà la lenga ? », qu’ei la question qui s’ei pausada l’associacion LIGAMS. La soa tòca qu’ei de crear ligams, en har còrda enter los divèrs actors qui òbran a la transmission de l’occitan e de sensibilizar la populacion. La soa tòca qu’ei de collectar hons entà sostiéner projèctes qui participan au desvolopament e a la transmission de la lenga. Hélène Ithurritz, Daniel Barneix, Yan Larradet, Serge Fouraa, Bénédicte Lacaze-Labadie, Anne Larquier, Bialana Larrey Lassalle, Fabienne Gessler, Clément Masseillou, Sylvain Masseillou, David Bordes e Veronica Dordeins, tots que s’èran lançats dens lo desfís d’apitar un eveniment esportiu deu medish endom com la Korrika au País-Basco. Lo lor projècte de qui pòrta lo nom de La Passem !, que’s concretizarà fin finau au mes de mai qui arriba. Deu divés 25 de mai a 14 òras au dimenge 27, medisha òra, los participants que correràn de 1 a 400 km capvath lo departament deus Pirenèus-Atlantics dens la soa partida gascona e bearnesa. Un testimòni que passarà de man en man, simbolizant l’urgéncia e la necessitat de la transmission de la lenga. Que contienerà un messatge qui serà dit publicament a la soa arribada a Pau. Pendent tres dias e duas nueits, a contunhar. La vila de partença que serà Bidaishe, la corruda que contunharà en passar per Ortès, Monenh, Auloron, Laruns, Somolon, Arsac-Arrasiguet tà acabar a Pau. Ligams que hè aperet aus elegits locaus, a las associacions esportivas e culturaus, aus musicaires entà organizar un rendetz-ve culturau o ua hèsta enter e dens cada vila o vilatge estapa.

Quin sostiéner ?

Que podetz ajudar Ligams en perpausar manifestacions suus divèrs lòcs de passatge donc, mes tanben en rejónher l’equipa dens l’associacion. Que podetz participar financèrament en har un don a l’associacion e en crompar quilomètres suu camin de La Passem !. Un quilomètre que còsta au minímum 100 euros. A títol de comparèr, lo quilomètre qu’ei a 200 euros tà la Korrika e 250 tà l’Ar Redadeg en Bretanha. Enterpresas (esponsòr), institucions, associacions e particulars qu’an dinc a ua setmana abans la manifestacion entà crompar un o mantuns quilomètres. Totun, l’associacion que precisa qu’ei possible de córrer shens crompar nat quilomètre, « tota persona que pòt participar librament a la corruda ». L’idea qu’ei d’estar actor d’un biais o d’un aute, çò qu’a previst de har lo Rémy Berdou, 29 ans : « pensi qu’aquera iniciativa ei ginhèca. En crear ligams enter las associacions deu territòri, que cream ligams dab monde deu parçan qui poirén estar tocats per aquera problematica de la lenga nosta shens estar implicats dehens dens la vita vitanta. […] Que participarèi a La Passem ! mentaument (arríders), non pensi que haram quauquarren en Vath d’Aussau dab amics. Quan i a iniciativas com aquera, ne podem pas demorar shens har arren ». Que serà possible de córrer en familha, enter amics o collègas. « L’important qu’ei de participar, qu’ei esportiu mes n’ei pas tà la competicion ! Que podetz córrer 400 km se volhitz !», çò digó Véronique Dordeins pendent l’amassada de presentacion de la corruda lo 13 d’octobre passat a Pau. A la faiçon de çò qui’s debanà en çò deus nostes vesins bascos e deus bretons, La Passem ! que serà organizada cada dus ans tostemps dens lo medish periòde dens l’annada. Ua sola diferéncia de notar : las vilas de partença e d’arribada que cambiaràn a cada edicion.

Cambiament d’itinerari

Un an a, l’equipa organizatora que volèva partir deu Baish-Ador abans de har arribar la corruda tau Bearn, mes que i avó un cambiament de programa : « Dens un purmèr temps qu’avem volut començar La Passem ! de Baiona o d’Anglet enlà, pr’amor qu’avem vist associacions occitanas, çò nse digó Serge Fouraa membre de Ligams. Mes après reflexion, que ns’èm dits qu’enter Baiona e Bidaishe, lo camin qu’èra tròp long e n’i avèva pas hèra de monde enter las duas vilas. De tot biais, per ua purmèra edicion, que ns’estimàvam mei de har mei brac. Au debut, que volèvam har tres dias de corruda e fin finau qu’èm partits sus dus ». Peu moment, los elegits que s’amuishan timidament interessats a la corruda. Qu’espèran lhèu que la purmèra edicion e’s debana. En véder las divèrsas generacions interessadas per l’eveniment esportiu, non i a pas dobte que n’i averà pas nat chepic a’s har tà la participacion a La Passem ! 

Entervista de Serge Fouraa de Ligams reservada taus abonats

 

Inf. : Lo site de La Passem ! Que serà lèu-lèu en linha per mei d’informacions, en aténer l'associacion qu'a un compte Facebook ací — La Setmana que s’èra interessada a la creacion de l’associacion un an a (La Setmana n° 1067) 

  • Publicat dens Culture
Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+