Uei : 18/06/2018

Participacion doblada au concors literari deus Calams Bearnés 2018

La 23au edicion deu concors deus Calams Bearnés que's debanè ger ser au Parlament de Navarra, ancian Palais de justícia de Pau (64). Qu'a per tòca de convéncer lo monde qui coneishen o qui aprenen la lenga occitana de participar a la soa renavida.

Lo concors literari que perpausava dètz categorias taus adultes, collegians e liceans, escolans en classa bilingua o en immersion e la joena categoria video braca. Los participants qu'avèvan la causida enter las produccions literàrias (condes, poesias, cantas, istòrias, etc.) e arreviradas. Los escolans, collegians e liceans que podèvan presentar ua video de duas minutas maxímum realizada dab un telefonet, un aparelh fòto o un camescòpi shens nat montatge.

Los vint membres de la jurada qu'an recebut 143 tèxtes de corregir tad aquera navèra edicion. Un nombre que creish despuish 2016, 66 produccions recebudas a l'epòca.

Jean Lacoste, en carga de la cultura e de la vita associativa a Pau, que hasó lo son tradicionau devís sus l'importància qu'a la lenga tad eth, qui revesteish un aspècte tant intime que non la parla pas qu'a casa.
Monique Semavoine, maira de Masèras-Leson, conselhèra departamentau deus Pirenèus-Atlantics delegada a la lenga bearnesa, gascona, occitana, que participè a la soa purmèra ceremonia de remesa deus prèmis deus Calams. Un plaser tad aquera ahuecada de cultura que compren perfèitament la lenga mes non la mestreja pas enqüèra.

Lou Sanchette, 8 ans, qu'ei a la Calandreta aussalesa e que s'emportè lo dusau prèmi de produccion individuau : entervista Lou S.

Régine Marques, anciana gavidaira deu Collègi Calandreta de Gasconha de Pau que participè peu purmèr còp au concors literari e que s'emportè un prèmi deus excepcionaus : entervista R. Marques

Ancian jogaire de rugbi, autor e creator de las edicions La Biscouette, Jean-Paul Basly qu'ajudè l'equipa de la Civada e de l'Ostau Bearnés au moment de la preparacion deus Calams cinc ans a suu tèma deu rugbi. Que contunha l'aventura despuish : entervista JP Basly

calams adultes3

L'associacion Ligams qu'intervienó brèument abans la remesa deus prèmis entà mobilizar las personas presentas sus la purmèra corruda tà la transmission de la lenga occitana, La Passem, dont la purmèra edicion e's debanarà aquesta dimenjada, deu 25 au 27 de mai. 

Lo concors deus Calams Bearnés qu'estó creat en 1990, a l'iniciativa de La Civada, associacion qui tribalha a la promocion e a la popularizacion deu patrimòni culturau regionau, e deu jornau La République des Pyrénées, a l'entorn de la cronica « Vent de Castanha » escriuta per Jean-Paul Latrubesse. La maison de las associacions l'Ostau Bearnés que s'ei lèu implicat, çò qui a permés a l'eveniment de préner un gran endom.

Inf. : https://www.ostaubearnes.com/ — Fòtos ©LS

calams public2

26au concors bigordan d'expression gascona

Lo Departament de las Hautas Pirenèas qu’organiza la 26au edicion deu Concors bigordan d’expression gascona. Arron « A taule ! », lo tèma causit tad aquera navèra edicion qu’ei « E doman… ». Lo concors qu’ei obèrt a tots. Qu’avetz la possibilitat de contar eveniments reiaus o imaginaris en rapòrt dab l’aviéner e çò qui poderé estar doman. « Aquera auhèrta que vòu encoratjar a escríver en occitan, en tot crear òbras ineditas o transcríver contes, hèitas o legendas transmetuts de costuma pera tradicion orau », çò escriu lo Departament dens la presentacion deu concors.

Los organizators qu’espèran ua hòrta participacion de grops escolars. Lo tèxte que serà d’ua longor de ua a cinc paginas dactilografiadas. Que podetz mandar los vòstes tèxtes a l’adreça Département des Hautes-Pyrénées, Vinta-sheisau Concors Bigordan d’Expression Gascona, 6 arrua Gaston-Manent, CS71324, 65013 Tarba, Cedex 9 o per mèl (ací-junt). D’enviar las vòstas produccions abans lo 23 de heurèr de 2018.

Inf. : www.hautespyrenees.fr Corric : This email address is being protected from spambots. You need JavaScript enabled to view it. Tel. : 05 62 56 71 37.

  • Publicat dens Culture

4n concors de preseps de Jornalet

Se sarran Calendas, lo temps de fèsta a l’entorn de Nadal e del solstici d’ivèrn. La cultura occitana s’i manifèsta plan, amb los repaisses en familha, de recèptas tradicionalas, los tretze dessèrts, lo cachafuòc o la soca de Nadal, las pastoralas, los nadalets, la decoracion de l’ostal e los tradicionals preseps tanben nomenats presepis, betlèms o grépias. Per tant, Jornalet vòl organizar un còp de mai son concors de grépias, que son ganhant recebrà de polits presents. Pendent aqueste mes de decembre, e fins al 6 de genièr, mandatz-nos las fotografias de vòstre presep o presepi o betlèm o grépia. Publicarem vòstres imatges regularament e aital totes poirem veire cossí los autres legeires vivon las fèstas.

Dins las annadas precedentas faguèrem de concorses similars, que nos permetèron de descobrir la riquesa de las tradicions ivernalas d’Occitània tota, e de conéisser cossí se passan Calendas en cò dels legeires de Jornalet. Lo concors de 2012 lo ganhèt Quentin Willaume pel presep qu’el meteis faguèt en representant un vilatge dels Alps de Provença, lo de 2015 lo ganhèt Beneset Thauvin del país de las Mauras, amb un presep tipicament provençal, e lo de 2016 lo ganhèt Josette Moll de Narbona Plaja per sa subrebèla grépia que representa un vilatge de la còsta de Lengadòc. 

Ferriòl Macip

Inf. : jornalet.com 

Fòto : Lo concors de 2016 lo ganhèt Josette Moll de Narbona Plaja per sa subrebèla grépia que representa un vilatge de la còsta de Lengadòc.

  • Publicat dens Culture

Provença — Lo prèmi literari dels joves es lançat

L'Associacion per l'Ensenhament de la Lenga d'ÒC (AELOC) e l'associacion culturala provençala lançan lo prèmi dels joves 2017-2018 per la promocion de la lenga d'òc en Provença. Una persona sola o un grop de classas d'un establiment escolar (escòla, licèu, collègi) ont es ensenhat lo provençal, pòdon participar al concors literari.

Vos calrà realisar un projècte collectivament, que siá lingüistic, literari, istoric, scientific o encara artistic, amb per objectiu de desvolopar la coneissença e la practica de la lenga d'òc.

Enviaretz una ficha que presenta lo projècte amb vòstra realizacion, que trobaretz aicí. Avètz fins al 9 de decembre. Tres prèmis de 500 € son a la clau. La ceremonia dels prèmis se farà en setembre de 2018 al Grand Prèmi Literari de Provença a Ventabren.

Inf. : www.acp-ventabren.org — Mandar vòstre dorsièr a l'Associacion Culturala Provençala de Ventabren, BP 12. 13122 Ventabren o per mèl a l'adreça : This email address is being protected from spambots. You need JavaScript enabled to view it. — Site : www.aeloc.fr — Associacion per l'ensenhament de la lenga d'òc, AELOC, 8 bis av. Jules Ferry — 13100 Ais de Provença.

  • Publicat dens Culture

Lo 26au concors literari d'Ací Gasconha lançat !

Com cada annada, l'associacion Ací Gasconha qu'organiza lo son 26au concors literari. Qu'ei obèrt a tots, autors de poesias, de racontes e de novèlas en occitan-gascon. Cada òbra non deverà pas passar las 3 paginas dactilografiadas (polissa 12).

Cinc categorias a las quaus e podetz participar : categoria conde o novèla en pròsa suu tèma « Mar e pinhadar » (au sens larg). 4 paginas dactilografiadas maxímum (polissa 14). Lo ganhant que receberà lo prèmi de la vila d'Anglet.
La dusau categoria (prèmi poesia de la vila de Baiona) qu'ei la deus tèxtes jos tota fòrma poetica, limitats a 40 vèrs.
La tresau categoria (prèmi Pierre Rectoran de l'Academia Gascona Baiona-Ador) tà las òbras en vèrs o en pròsa indiferentament.
La quatau categoria (prèmi de l'Institut Occitan) qu'ei reservada aus tèxtes on serà lo mei plan exprimit l'estacament a la lenga e a la cultura gasconas, en vèrs o en pròsa.
La darrèra categoria qu'ei reservada aus mensh de 15 ans, qu'ei lo prèmi de l'espèr de la vila de Tarnòs.

Las òbras que seràn reprodusidas en quate exemplars dactilografiats au format A4, shens nat nom, signatura e marca particulara de reconeishença. Un fiquèr informatic au format Word que deverà estar hornit en pèça junta per mèl a l'adreça ça-i junta.

Qu'avetz dinc au 9 de mai de 2017 entà enviar las vòstas òbras a l'adreça ça-i junta. La ceremonia de remesa deus prèmis que's debanarà lo dissabte 24 de junh a 15 h 30 a la mairia de Tarnòs (40).

Inf. : Participacion de 8 euros e a gratis taus estudiants e demandaires d'emplec — Ací Gasconha, Centre Culturau Tivoli, 27 arrua d'Euskadi — 64600 Anglet — Mèl : This email address is being protected from spambots. You need JavaScript enabled to view it.

  • Publicat dens Culture
Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+