Uei : 22/05/2018

7n collòqui de l'ISLRF

L'Institut superior de las lengas de la Republica Francesa e Kelenn, Institut de formacion de Diwan organizaràn uèi e dissabte 24 de març un collòqui internacional a l'UBO Quimper. Lo tèma causit pòrta sus las experiéncias d'ensenhament de las lengas en immersion.
Lo collòqui se farà en dus temps, amb de conferéncias lo matin, de talhièrs al torn de las comunicacions lo vrèspe abans una taula ronda en fin de jornada. 

Patrici Baccou, director de l'establiment APRENE, Myriam Bras professora de Sciéncias del Lengatge a l'Universitat Jean Jaurès de Tolosa, e Emilie Chorin que fa una tèsa sus « la comparason de las lengas en contèxte immersiu, analisi de practicas ensenhantas en escòlas e collègi dins las Calandretas, establiments bilingües francés-occitan », intervendràn al collòqui.

Legir la seguida aicí

XVIIIau Collòqui d'onomastica a Tolosa

Despuish dimèrcs e dinc au ser, que's debana lo 18au collòqui d'onomastica a Tolosa. Qu'ei organizat cada dus ans e qu'a per tèma augan la circulacion lingüistica e l'onomastica occitana.

Lo collòqui que comencè suu tèma de las circulacions lingüisticas, las categorias denominativas e las lors relacions en onomastica en preséncia de Jean-Louis Vaxelaire, professor a l'Universtat de Namur en Belgica qui parlè de las tipologias onomaticas, e de Daniela Butnaru de l'Institut de filologia romana qui s'interessè a las relacions enter uns noms de lòcs rebatuts dens un diccionari toponimic.

L'endedia, las discutidas que pertocavan las relacions enter categorias dens lo domèni de la toponimia. La cercaira Marcienne Martin, de l'Universitat de La Réunion que hasó ua presentacion suu subjècte « Deu totemisme a la toponimia : l'exemple deus grops amerindians ».
Jean-Claude Bouvier, professor emerit d'Ais-Marselha Universitat que presentè « Deus “toponimoïdes” aus toponimes. Quauquas reflexions sus l'emergéncia deus toponimes dens l'escriut e dens l'orau ».

Uei, lo tèma tractat qu'ei l'onomastica occitana dab convidats especialistas com Hervé Lieutard de l'Universitat Paul-Valéry, Aitor Carrera de la Cadièra d'Estudis Occitans de l'Universitat de Lhèida, Paul Burgan, SFO, o enqüèra Patrick Sauzet, professor a l'Universitat Jean Jaurès de Tolosa. Pierre Bréchet, president de l'IEO qu'explicarà cap a 16 òras 30, quin restituir la soa toponimia tà ua lenga minorizada e quin estructura ua dinamica associativa en hialat.

Lo collòqui qu'ei organizat per la Societat francesa d'onomastica (SFO), lo laboratòri CLLE-ERSS (CNRS - Universitat Tolosa Joan Jaurès) e Lo Congrès permanent de la lenga, dab lo sostien de la DGLFLF, de la Region Occitania/Pirenèus-Mediterranèa per l'OPLO, e de l'Universitat Joan Jaurès de Tolosa.

Programa deu Collòqui

3en collòqui de País Nòstre a Narbona (11)

Lo 3en collòqui de País Nòstre se debanarà deman a Narbona. Lo tèma causit ongan es « Region Occitània, per una fòrça culturala occitana ! ». Aprèp la ceremonia d'obertura, a 10 oras, Benjamin Assié, director del CIRDÒC escambiarà amb Ricart Cathala sul sicut « Uèi, una cultura viva ». Gisela Naconaski questionarà l'especialista de l'Istòria occitana Alem Surre-Garcia sus l'espendiment de la cultura occitana. Lo capredactor del Jornalet animarà la taula arredonda amb d'artistas occitans coma Frank Bardou, Aurelia Lassaque, Claudi Marti o encara Gerard Zuchetto, per aver lor testimoniatge sus cossí vivon de lor passion.

L'aprèp-miègjorn, se questionaràn sus l'estrategia d'adoptar amb nombrós invitats : Annetta Clement, Joan Hebrard, Eric Fraj, Joan-Loís Blenet, Jean-Michel Lubhac, Guy Clergue (adjunt a l'ostal de la comuna de Narbona), Patric Roux (conselhièr Region Occitània-Pirenèus-Mediterranèa) e Alain Perea (Deputat d'Aude). Los escambis seràn animats per Michel Cano e Bruno Cecillon.

Un moment de discutidas e d'escambis amb lo public es previst cap a 16 o. País Nòstre prepausarà per acabar una sintèsi del jorn.

A 17 o 30, remesa dels prèmis, « la Palma d'òc e la Cogorda ».

A 18 oras, ven l'ora de la fèsta amb tres concèrts : Sandra Hurtado-Ròs, Mans de Breish, Franc Bardou, Lhubac / Banda Sagana, Eric Fraj e Joanda.


Inf. : Dintrada gratuita, dubèrt al public — Tel. : 06 72 55 04 36 / Mèl : This email address is being protected from spambots. You need JavaScript enabled to view it.

Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+