Uei : 26/04/2018

#CulturaVivaBCO — Lo Cirdòc lança una campanha de partatge cultural

A un mes del segond Forum Cultural Euroregional, lo CIRDÒC lança « Cultura Viva BCO ». Es una campanha de mobilizacion collectiva sus las rets socialas destinada a promòure la diversitat culturala qu’existís dins l’Euroregion. Dempuèi 2014, lo Centre Interregional de Desvolopament de l’Occitan (CIRDÒC) e sos partenaris coopèran per balhar una visibilitat a la creacion culturala especifica a l’espaci occitano-catalan de l’Euroregion. Aital, actors culturals d’Occitània, de Catalonha e de las Illas Balearas collabòran per menar d’accions complementàrias amb d’escambis professionals e artistics. An ja començadas las collaboracions dins l’Euroregion amb l’emergéncia d’un mercat de la creacion com o poguèrem veire al moment del primièr Forum Cultural euroregional en 2016.

Quand lo primièr rendètz-vos èra dedicat al « Patrimòni e Creacion » a Castèlnòu d’Arri dins Aude, lo segond se debanarà los 18 e 19 de mai 2018 al Pont-del-Gard. Serà consacrat a las « Culturas popularas en dialòg ». Lo CIRDÒC, la Fira Mediterranià de Manresa e Sa Xerxa – Fira de Teatre Infantil e Juvenil (FIET) metràn a l’onor los actors del dialòg cultural entre Pirenèus e Mediterranèa. Sus doas jornadas de rencontres entre professionals amb de temps a l’entorn de conferéncias mas tanben de taulas redondas e de talhièrs professionals. Tres talhièrs seràn prepausats : « Naraccion del territòri, desvolopament economic e social per una politica del patrimòni cultural immaterial », « Arts vius : las tradicions oralas, motor de la creacion actuala » e « Cooperar, bolegar : lo mòde d’emplec d’una cultura mobila ». Una conferéncia sus las « Musicas, dansas tradicionalas e PCI, una evidéncia ? » se debanarà lo 18 de mai. Serà animada per David de Abreu (vice-president de la FAMDT), Francesc M. Rotger (Institut de la Llengua i la Cultura de les Illes Balears), François Gasnault (etnològ, conservator general del patrimòni, cercaire IIACLahuc), Guy Bertrand (director del departament de musicas tradicionalas al CRR de Lion) e Hervé Parent (KaruProd, Projet Rumba catalana). Lo 19 de mai, una taula redonda serà animada pel capredactor del Jornalet, Ferriòl Macip e lo director de VilaWeb, Vicent Partal pertocant als mèdias participatius « Novèla forma d’investiment ciutadan ». Lo Forum es un moment de dialògue entre los actors culturals (artistas, tecnicians, etc.), las culturas e las disciplinas (musica, teatre, cinema, gastronomia, fèstas, tradicions). Lo grop occitan Aital Aital (poesia occitana e turbinas pop) serà en concèrt lo 19 de mai. Lo 19 de mai, es Antoine « Tato » Garcia que pujarà sus scèna. Enrodat per José Garcia a la guitarra, Guillaume Bouthié a la contrabassa, Fanfan Miniconi e Thierry Poubill a las percussions, Tato interprèta sas pròprias composicions que passan successivament de las mai intimistas a las mai festivas.

Un trabalh tot al long de l’annada

Tot al long de la sason 2017-2018, los organizadors del Forum an prepausat nombrós rendètz-vos culturales com de conferéncias e d’espectacles per arribar amb d’iniciativas e de subjèctes de debats concrèts al moment del Forum de mai. Los objectius del CIRDÒC son clars : installar una collaboracion perenna entre los actors de l’Euroregion Pirenèus-Mediterranèa e far conéisser e promòure la riquesa de las culturas popularas de l’espaci occitano-catalan. Aital, a decidit d’ajudar a l’obertura del dialòg amb e entre los abitants de l’Euroregion. Ven de lançar l’operacion « Cultura Viva BCO ». Es una campanha de mobilizacion collectiva sus las rets socialas per promòure lo Patrimòni Cultural Immaterial. Las associacions, las confrariás atal com las personas individualas son invitadas a redigir un textòt de presentacion de l’accion que menan en favor de las culturas popularas del territòri. Pòdon mandar de fotografias e de videòs siá per corric a l’adreça This email address is being protected from spambots. You need JavaScript enabled to view it., siá pels malhums socials com Facebook, Twitter amb lo tag @CulturaVivaBCO. « Nosautres aprèp, montam aquí dins un primièr temps sul blòg culturavivabco.tumblr.com lo repertòri dels actors del Patrimòni Cultural Immaterial sus las tres regions, nos expliquèt Hugo Cros Alranq, membre del CIRDÒC, per los metre en relacion e per mostrar tanben que se son tres culturas diferentas, son de tot biais ligadas ». Una persona pòt mandar o publicar en linha una cançon qu’a eiretat de sons grans o una recèpta familiala e poirà integrar aquel repertòri. « Es vertadièrament una campanha que se delimita pas a un mond professional, insistís sénher Cros Alranq. Pertòca tot lo mond e totes los tèmas com los espòrts tradicionals, la cosina, lo patrimòni dels animals totemics. Es vertadièrament quicòm de larg qu’avèm volgut impulsar ». Un còp inscrivut dins aquela ret dels actors del PCI, devendretz « ambaissador » de vòstra cultura e recebretz un « kit ambaissador ». Aquel es constituit de libres, de CD e DVD per descobrir la riquesa culturala del territòri. Lo grop Mar e Montanha a ja participat a l’operacion. Es una formacion que marida l’autbòi lengadocian a la bodega de la Montanha negra. Lo grop amassa de musicaires professionals e amators de l’Escòla de Bodega de Vilardonnel e los escolans de l’autbòi lengadocian del Conservatòri de Seta e de l’Escòla de musica de Pesenàs. L’associacion Arc Nòrd Mediterranèa es egalament devienuda ambaissadora de Cultura Viva BCO. Aquel projècte es nascut en 2016 aprèp una enveja comuna dels grops de Mar e Montanha (Occitània), de Xeremiers de Sóller (Illas Balearas), Sons de la Cossetània (Catalonha) e Totarella (Calabra) de metre en plaça un projècte musical al torn dels instruments especifics als quatre territòris. Arc Nòrd Mediterranèa prepausa de concèrts, de deambulacions, quatre bals diferents mas tanben de conferéncias e projeccions al torn de las quatre culturas. 

La lista se perlonga amb novèls ambaissadors : La Rampe Tio (teatre) e l'Institut des Arts du Masque (Limós). Se volètz devenir ambaissador de vòstra cultura, al vòstre clavièr !

Inf. : Programa sul site fabrica.occitanica.eu/ euroregion www.cirdoc.fr — Fb : CulturaVivaBCO/

Capture decran 2018 04 18 a 16.02.34

  • Publicat dens Culture

Carnaval sus la mediatèca numerica Occitanica

Carnaval arriba sus la mediatèca numerica Occitanica. Trobaretz de documents e ressorças al torn de l'eveniment festiu. Qué son fecas e godilhs, nombrosas cançons de Carnaval en occitan, de tèxtes dels jutjaments de Carnaval e mai d'informacions sus los autres Carnavals en Occitània.

La mediatèca numerica collectiva Occitanica, foguèt creada en 2011 pel CIRDÒC de Besièrs. Dona accès al patrimòni cultural e a la documentacion en lenga occitana. Es un projècte participatiu qui repausa sus la participacion d'una quarantena de partenaris com universitats, collectivitats, associacions, centres de documentacions o encara de bibliotècas.

Inf. : http://occitanica.eu/ www.locirdoc.fr — CIRDÒC, 1 bis, baloard Du Guesclin — 34500 Besièrs.

  • Publicat dens Culture

Amassada dels Amics del CIRDOC e serada « Los Nadals de Nicolas Saboly »

Aquel dissabte 16 de decembre, la novèla associacion dels Amics del CIRDÒC farà son assemblada generala dins l'establiment cultural interregional. Serà obèrta a totes.

Lo rendètz-vos es donat a 14 oras, l'assemblada començarà a 14 o 30.

D'universitaris, de cercaires, linguistas e istorians, ensenhaires, escriveires, artistas, se recampèron al mes de junh de 2016 per la creacion d'aquela associacion. Vòlon acompanhar lo CIRDOC dins « sa volontat d'enriquesir e d'avalorar sas colleccions e dins totas sas activitats ».

Lo rencontre se clavarà amb « Les Noëls de Nicolas Saboly », la conferéncia musicala de Jean-Bernard e Thibaut Plantevin. Nicolas Saboly èra conegut per èsser l'actor màger dins l'escritura de la tradicion provençala al torn de Nadal al sègle XVIIn. Forma un dels monuments de la poësia en lenga d'òc amb sos tèxtes « Lei Noé de San Pierre », « Noés nouveous de l'an M.DC. LXXII », etc.

Seràn acompanhats d'una tropa de musicaires-cantaires. Vos faràn una version musicala del trabalh de Nicolas Saboly.

Inf. : CIRDÒC, 1 bis baloard Du Guesclin, Place du 14 juillet, 34500 Besièrs — Sites : www.locirdoc.fr — www.amicsdelcirdoc.com — FB : https://www.facebook.com/amicsdelCIRDOC/ — Tel. : 04 67 11 85 10 — Mèl : This email address is being protected from spambots. You need JavaScript enabled to view it.

Occitan e numeric, tèma a viéner deu D'Òc Show

Dijaus lo 14 de deceme que serà filmat en dirècte lo D'Òc Show au Castèth d'Este de Vilhèra (64). Lo tèma causit tad aquera navèra emission qu'ei « Occitan e numeric : quinas perspectivas ? ».

Divèrsas estructuras qui tribalhan a la valorizacion de la lenga e de la cultura nostas que seràn convidadas a har conéisher los utís numerics que desvolopan entad ac har. Projèctes de gran endom que serén a emergir tà 2018.

L'animator Silvan Carrère que receberà actors deu mitan com Benjamin Assié e Patric Roux, respectivament gavidaire e president deu CIRDÒC, Jean-Jacques Casteret de l'Institut Occitan de Vilhèra, Benaset Dazéas e Aure Seguier deu Congrès Permament de la Lenga Occitana, atau com artistas occitans com Matéu Baudoin (Artús, HartBrut) qui testimoniaràn de l'utilizacion qu'an deu numeric. Los collegians deu Collègi Calandreta de Gasconha que coanimaràn l'emission dab Silvan Carrère. Au programa : entervistas, reportatges, cronicas e grops de musica suu platèu.

L'emission que's hè en aliança dab l'InÒc Aquitania e lo Collègi Calandreta de Gasconha.

Inf. : This email address is being protected from spambots. You need JavaScript enabled to view it. — Site : www.octele.com — Tel. : 05 47 05 50 10 — Emission de seguir en dirècte sus https://www.facebook.com/octele/

Òctele que cèrca un montaire. Que seratz en CDI de 35 òras dens los estúdios de Pau (64). Entresenhas mei ací.

10en Rencontre Internacional del Patrimòni Istoric, las femnas a l'onor

Del 13 d'octòbre al dimenge 15 d'octòbre se debanarà lo 10en Rencontre Internacional del Patrimòni Istoric a Besièrs (34), Nebian (34) e Salses (66). Lo comitat d'organization prepausa d'anar a l'encontre de femnas que foguèron actoras de l'Istòria dels sègles V al XV.

Lo 13 d'octòbre a comptar de 14 o al Cirdòc de Besièrs, conferéncia, mòstra e moment musical son al programa. La vida d'Aliénor d'Aquitània, reina de las letras occitanas serà presentada al public. Lo 14 d'octòbre, a comptar de 9 o a Nebian (Grop escolar Nelson Mandela), un collòqui tractarà de « Jòcs de dònas, jòcs de poder ». Laurent Deguara, president de la societat arqueologic de Montpelhièr e del Musèu Lengadocian obrirà la jornada per un discors. A 10 oras, Christine Delaplace, professora d'Istòria romana a l'Universitat Caen Normandia, farà una conferéncia sus « Galla Placidia, los vicissituds politics d'una femna de la dinastia valentino-teodosiana, al debut del sègle V ». A 11 oras, la mèstra de conferéncia d'occitan, Katy Bernard (Universitat Bordèu-Montaigne) farà una conferéncia sus « Aliénor d'Aquitània, una vida a la reconquista del poder ».

Felip Hammel, ancian director del Cirdòc, director de l'Institut superior de las lengas de la Republica, presentarà las conferéncias de la vrespada e daissarà la plaça a Monique-Luche, agregada d'Istòria, per parlar de « Blanche de Castille, una maire omnipresenta ». Sophie Coussemacker, mèstra de conferéncias de l'Universitat Bordèu-Montaigne, s'interessarà a la vida d'Isabelle la Catolica, « una reina en movement ». Philippe Huppé, istorian medievista e escrivan, acabarà la jornada amb Isabelle de Clermont, reina de Naples, mecena dins son reialme. Tarifa : 20 €, repais : 25 €.

Lo 15 d'octòbre, a comptar de 10 o a Salses, conferéncia e visita de la fortalesa de Salses sul tèma « Castèls fòrts, sentinèlas dels Pirenèus ». Tarifa : 35 €, dinnar enclús.

Inf. : Istòria e Culturas en Lengadòc, This email address is being protected from spambots. You need JavaScript enabled to view it. — Tel. : 06 61 18 01 87 — Site : www.coeur-herault.fr — 6 avienguda Ronzier-Joly, 34800 Nebian — Inscripcions abans lo 8 d'octòbre.

  • Publicat dens Culture

L'occitan : una lenga virada cap al futur

Lo dissabte 16 de setembre de 2017 donèron los diplòmas en lenga occitana al CIRDÒC–Centre Inter-Regional de Desvolopament de l'Occitan a Besièrs. Es la capitada d'un trabalh començat en 1994 pel Centre de Formacion Professionala Occitan. Per l'annada escolara de 2016/2017, son 237 personas qu'an recebut lo diplòma d'occitan pel territòri d'accion del CFPO Lengadòc. Mas aquò vòl pas dire que lo trabalh amb aqueles diplomats siá acabat. La lenga contunha de se desvolopar per cada laurejat, dins sa vida, dins cada novèla possibilitat d'estudis o de trabalh. Lo calandron d'uèi pòt èsser lo regent, lo jornalista, l'animator, lo formator, lo politic o lo militant cultural de deman.

La Presidenta del CFPO Lengadòc, Dalfina Krajewski, empleguèt la metafòra de la vinha per illustrar la transmission de la lenga, coma un engatjament cap al futur : « la ret dels CFPO forma part del terrador ont espelís la lenga nòstra. Coma la vinha, li cal de rasigas plan prigondas, a mai aquí ont l'aiga raja pas gaire. Saupre d'ont venèm nos vira pas solament cap al passat, mas nos engatja plan cap al futur. »

L'eveniment se debanèt al CIRDÒC, amb lo sosten de la Region Occitania, de la comuna de Montpelhièr e de l'OPLO - Ofici Public de la Lenga Occitana. Sul territòri cultural occitan, la riquesa de la lenga s’arrèsta pas de viure e de s'espandir. Pel conselhièr regional e president del CIRDÒC, Patric Roux, la causida de la lenga occitana se fa siá per de rasons personalas d'engatjament, siá per la riquesa culturala, e balha de responsabilitats. Es per aquò que P. Roux a fach una demanda especiala al public : « vos demandi de devenir d'ambassadors individualament e collectivament per l'avenidor de la lenga nòstra. » Lo president del CIRDÒC a felicitat personalament cadun e caduna pel trabalh menat per la promocion del patrimòni cultural e immaterial occitan e demanda « qu'aquel trabalh siá pas per se, mas per l'ensemble collectiu d'aquel país, qu'a una lenga que se merita de se poder parlar al sègle qu'arriba. »

Los calandrons èran sens cap de dobte la majoritat dels diplomats pendent aquela fèsta mai que mai occitana, es a dire que 178 pichons an recebut lo diplòma Escapolaire, de nivèl A2. Per Lisa Baccou, tota novèla coordinatritz de las formacions al CFPO, « las Calandretas contunhan la lucha, la lucha es dura mas las causas avançan fòrça ». Lo public èra vengut nombrós, que dintrava a pro pena dins la sala bèla del CIRDÒC. Se parlèt tanben de doas victòrias recentas : la dobertura dempuèi la dintrada del collègi occitan a Maraussan e la dobertura a Montpelhièr del primièr licèu occitan de l'istòria.

Se lo nivèl A2 èra lo mai premiat, los presents an capitat los autres : B1 (15 collegians e 11 adultes), B2 (16 adultes) e C1 (3 adultes). L'animacion pendent la ceremonia foguèt plan gaujosa gràcia al saupre-far de la tropa del teatre de La Rampe TIO e lor adaptacion de la pèça « Quesaquò e Mascomprès ». A la seguida, apuèi lo vespralhon ofèrt pel CFPO lo grop femenin Farfantèlas cantèt e la musicaira Laureen Tillier faguèt dançar lo monde present.

  • Publicat dens Culture
Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+