Uei : 19/02/2018

Malgrat l'ajuda de la Region Occitània, los salariats del CFPO Tolosa totjorn en cauma 4 meses aprèp

Fa quate meses que los salariats del Centre de Formacion Professionala d'Occitània Miègjorn-Pirenèus de Tolosa son en cauma.

Un acamp se debanèt lo 30 d'octòbre a l'Ostal d'Occitània entre membres del burèu e salariats. A malgrat dels esfòrces dels dos costats per discutir, lo rencontre s'es acabat sens cap d'avançada.

Lo burèu aviá mandat un comunicat de premsa apuèi. Los salariats publiquèron ièr un pòst sus lor compte Facebook « CFPO en luta » per remembrar qu'èran totjorn en cauma, aprèp un vintenat de jorns sens novèlas sus FB. Denóncian lo « patetic » de la situacion : « Comble du pathétique, nous savoir que tout a été anticipé par nos administrateurs, […] jusqu'à la liquidation, le dépeçage et le blocage d'une éventuelle reprise de la structure par les salariés ».

Aprèp aver ensajat de desblocar la situacion amb l'ajuda de la Region Occitània/Pirenèus-Mediterranèa, sens cap de capitada, e sens cap de salari dempuèi 17 setmanas, los salariats dison téner còp gràcia als sostens que recebon. Una canhòta es en linha per o ajudar. 

 

 

CFPÒ MP — La situacion totjorn blocada entre los salariats en cauma e lo burèu

Dempuèi tres meses, los salariats del Centre de Formacion Professionala d'Occitània Miègjorn-Pirenèus son en cauma. Diluns 30 d'octòbre, un acamp se debanèt a l'Ostal d'Occitània de Tolosa entre membres del burèu e salariats. Una representanta de la CGT e un ancian salariat èran tanben presents. Lo burèu publiquèt un comunicat de premsa fa qualques jorns per presentar la situacion de lor costat. Declaran que quand los salariats demandèron als associatius un retorn de lors reivindicacions, aqueles prepausèron que las reivindicacions foguèsson explicitadas.

Los salariats aurián demandat se lo burèu comptava far quicòm per los reivindicacions. Los associatius aurián exprimit lor estonament fàcia al biais de comunicar dels salariats en cauma e lor incomprension sus las motivacions vertadièras d'aquela cauma. Totjorn dins lo comunicat, lo burèu explica que la representanta CGT se seriá engatjada a far una explicacion escricha de las demandas dels salariats. « Ath dià de ue, un mes après er'amassada, n'avem pas arrecebut arren », precisèt lo burèu.

Lo burèu demanda la represa del trabalh als salariats, sens que, fragila financièrament a causa d'un plan de redreçament judiciari (dempuèi 01/2017), l' « estructura serà mesa en dangèr ».

 

Comunicat de premsa del CFPÒ Miègjorn-Pirenèus Capture decran 2017 12 22 a 11.25.29

Crida vira e pica l'aso ! (LS n° 1089)

Despuish mei d’un mes alavetz, los salariats deu CFPÒ Mieidia-Pirenèus que son en cauma. Un ahar seriós e grèu. Un simbèu benlèu, deu besonh pregond de tornar pensar l’anar de las nostas estructuras. E quiò, tanplan com los autes, que podem parlar de ‘crisi’ e de ‘ besonh de refòrma’. Mes atencion, ne vòu pas díser de qui cau arronçà’s cap baishat sus la bèstia, lo maishant patron, que non ! N’ei pas jamèi ni tot blanc ni tot negre. E sostiéner uelhs clucats los salariats contra los emplegaires, çò qui hèm tà la màger part, qu’ei un esquèma d’un simplèr de non pas créder ! A la lectura deus articles pareishuts en la premsa, que sembla totun evident qu’ei pelut, l’ahar. Au bèth miei deus elements qui s’ameritan un estanc, que ns’avisam per exemple lo burèu en plaça qu’estó elegit en junh passat, quan l’estructura èra dejà en plan de redreçament judiciari despuish mei d’un un an. Com ac dísen : « I a quicòm qui truca ! », non ? E d’exemples, que n’i a d’autes. Benlèu los gavidaires ne serén pas lo becut qui’s vòu minjar tot... mes que son shens nat dobte los copables ideaus. D’arcasts que n’i aurà, segur, mes per tot lo monde, com sovent a noste. Puntar quauquas personas, estossen copables de quauquas mancas, n’adobarà pas la bastissa tremolanta. N’avem pas tots los elements entà avalorar la situacion : ua rason mei entà guardà’s de jutjar a la pressada. Un punt positiu totun, dab aquera hèita, qui segueish de près l’ahar deus CAE (qui truquè hòrt Calandreta) e qui davança de chic la crida a donacion de l’IEO : un començar de reflexion comuna entà har cap a la fragilitat permanenta de las nostas estructuras. Que hasè hrèita.

  • Publicat dens Éditos

Los salariats del CFPO Miègjorn-Pirenèus en cauma

Dempuèi diluns passat, los salariats del Centre de Formacion Miègjorn-Pirenèus son en cauma.

La situacion a començat a mal virar al mes de junh passat quand la màger part del burèu demissionèt aprèp una AG que's debanè « d'una faiçon allucinanta » segon un emplegat. Dempuèi, los novèls membres del burèu aurén impausat un fonccionament qualificat pels grevistas « d'iperdirectiu ». Al mes d'agost, los emplegats del CFPO foguèron convidats a participar a un enterten aperat que se ditz « Rescontre d'escambi e d'informacion », quicòm d'inedit cap al dret del trabalh e a la convencion collectiva d'aprèp Arvèi Pouvillon, salariat al Centre dempuèi 2010.
La novèla còla auriá mes en plaça de practicas « arcaïcas » quand fa annadas que los salariats se baton per aver la professionalizacion per exemple de la comptabilitat de lor estructura per una visibilitat mai bona.
Çò que possèt los salariats a reagir foguèt la convocacion que recebèron la setmana passada per un entreten prealable a sanccions disciplinàrias « que pòt anar fins al licenciament ».

Arvèi Pouvillon foguèt entrevistat per Silvan Carrèra de Ràdio País fa qualques minutas : « L'ensemble dels salariats del CFPO MP es en cauma illimitada. Demandam que s'arrèstan las perseguidas de cap a totis les salariats e la levada de las sanccions. Demandam tanben la revalorizacion dels salaris a la nautor de las grasilhas en vigor dins la convencion collectiva dels organismes de formacion professionala. Çò que demandam tanben perque es una generalizacion dins lo mitan occitan, demandam la perennizacion dels contractes precaris. Quand entendèm la ret Calandreta bramar per dire que los CUI-CAE son a s'arrestar, se pausan la question d'aquò mas se pausan pas la question de la precaritat que i a dins l'emplec occitan, la precaritat que i a dins la ret Calandreta de que fasèm partida nosautres, donc demandam qu'aquesta precaritat siá presa en compte, i a licenciaments, i a licenciaments abusius. An agut capacitats de trobar d'argent per pagar les licenciaments abusius e an pas capacitat de trobar d'argent per pagar les salariats correctament ».

Los grevistas del CFPO MP demandan que los salariats sián integrats estatutariament al processús de presa de decision. Demòra dubèrts a la negociacion. Lo novèl burèu a pas pel moment mostrat una volontat de trabalhar amb los grevistas.

Arvèi Pouvillon sotalinhèt lo taus de sindicalizacion gaireben inexistent dins lo mitant occitanista, « malurosament, perque i a causas de dire ! ».

Divendres, CFPO En Luta fa un aperet a la mobilizacion e convida totes los militants occitanistas concernits per la situacion a venir los ajudar e los menar de refòrt, « al mai i aurà de rambalh, al mai nos sentirem sostenguts ! », ce diguèt Arvèi Pouvillon.

Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls. Prepausa cada mes doas istòrias, de jòcs, una pagina de vocabulari e un dorsièr en rapòrt amb un dels dos 

+