Uei : 23/06/2018

La dintrada de 2018 a la Calandreta Jòrgi Gròs de Nimes compromesa

L'escòla Calandreta de Nimes Jòrgi Gròs es dins una marrida passa. Aprèp de baissas importantas de sas ajudas financièras, se vei dins l'obligacion de lançar un finançament participatiu per poder ubrir sas pòrtas a la dintrada de 2018.
Suls 5 000 € esperats, 2 620 € (amb l'ajuda de 44 personas) son estats collectats a l'ora d'ara.

Jérôme Bocacio es paire de calandron e nos en ditz mai sus la situacion actuala de l'establiment : entrevista audio.

La Calandreta Jòrgi Gròs de Nimes obriguèt sas pòrtas en 2007 gràcias al trabalh de cinc familhas. Foguèron sostengudas per la Federacion Calandreta de Gard. Obtenguèron un acòrdi de l'Educacion nacionala per crear una annèxa a la primièra escòla e un pòste d'ensenhaire.

Inf. : Ligam cap al siti de finançament participatiu per ajuda la Calandreta

Letra obèrta a l'OPLO, reaccion de David Bordes

Abonat, pas mei abonat e si tornar... Que’m tornèi a la lenga a 20 ans. La Setmana que hè partit deus elements qui m’ajudèn, e non pas sonque jo, a ahortir l’estatut de l’occitan com lenga sociala de tot dia. Non podem pas har shens. E uei lo dia la premsa, non pòt pas har shens ua ajuda publica. L’OPLO non ei pas cadut deu cèu. Qu’a calut lo combat militant deu David Grosclaude. Pas sonque mes qu’estó l’element màger. Aqueste utís collectiu qu’a de guardar aquò en cap. La vita de la lenga nosta, lo son aviéner que son ligats a un combat de tot dia. Las institucions qu’an de’u saber. E si non vòlen pas escotar de tròp, e dens aqueras tempsada d’arrecul de l’esperit « servici public » qu’ei sovent, a nosautes, dab l’OPLO de l’afirmir. Alavetz : Mejans mei tà Vistedit, tà Calandreta e si cau mei de mejans a l’OPLO tad açò... Los reïvindicam amassas.

David Bordes

Formacion per ensenhar a Calandreta

Avètz fins al 31 de mai per vos marcar a la jurada d’intrada a APRENE
APRENE es l’establiment d’ensenhament superior occitan qu’assegura dempuèi 1994 la formacion de las regentas e dels regents de las escòlas Calandreta. Son cursus cooperatiu, intensiu e exigent, es de mai en mai reconegut per sa capacitat a formar lo mond al mestièr d'ensenhaire en immersion, de transmeteire de la lenga occitana, e de pratician de la pedagogia Freinet / Pedagogia Institucionala .

Si volètz vos tanben ensenhar l’occitan en immersion, ne saupretz mai sul sit https://aprene.org/oc/la-jurada-2/

Que siaguètz interessats pel primièr o pel 2nd gra Calandreta, marcatz-vos a la jurada d’intrada a APRENE en telecargar la ficha d’inscripcion sul sit. La mandaretz amb un CV e una letra de motivacion a This email address is being protected from spambots. You need JavaScript enabled to view it..

La Federacion Calandreta Lengadòc organiza lo 22n acamp annadièr dels establiments Calandreta

Lo 24 de mai, la Federacion Calandreta Lengadòc organiza lo 22n acamp annadièr dels establiments Calandreta del Lengaòc a la basa departamentala de Bessilles, al ras de Montanhac dins Erau.

De 9 oras a 15 oras, los dròlles escambiaràn en occitan sul tèma qu'an trabalhat tot al long de l'annada : « Totems e Gigants ». Participaràn a de talhièrs, de jòcs e d'espectacles creats e jogats pels calandrons de la Calandreta dels Polinets (Pesenas).

Ongan, la Federacion Calandreta Lengadòc faguèt una dintrada 2017 istorica amb la creacion d'un licèu a Montpelhièr e d'un dosau collègi dins Erau a Maraussan. Ara, la Federacion compta 27 establiments occitans Calandreta qui escolarisan 1968 calandrons de la petita seccion fins a la Primièra. Participan al recampament de Bessilles.

Inf. : 7, carrièra Franklin — 34500 Besièrs — Tel. : 04 67 28 67 18 — Mèl : This email address is being protected from spambots. You need JavaScript enabled to view it.

Jacme Serbat, defensor de l'occitan e de la laïcitat

Lo berret tostemps suu cap, Jacme Serbat qu’èra un regent passionat de pedagogia e d’istòria. Ahuecat de lenga e de cultura nostas, qu’èra tostemps present a l’Escòla Occitana d’Estiu de Vilanuèva d’Olt.

La redaccion de La Setmana ne coneishèva pas personaument lo Jacme Serbat mes que tienó a har aumenatge a l’òmi, devath los conselhs d’un amic son, Alan Rainal. Subernomat « Titus » en referéncia a l’istorian de la Roma antica Titus Livius, Jacme que’s morí a l’atge de 93 ans au mes de junh passat. Amorós de la lenga dab un gran L, qu’aprenó lo latin, lo grèc e l’anglés a l’escòla. Mei tard, que hasó de la soa passion un mestièr e que vadó regent en 1956 dens lo Loiret. Que tornarà tau son Tarn e Garona natiu au començar de las annadas 70 entà ensenhar a Braçac e Borg Devisà. Qu’aprenó la lenga occitana dens las annadas 70 e que l’ensenhè dens divèrsas academias.

Los contractes ajudats inutiles ?

[Dossièr dens LS n° 1085]

Lo candidat Emmanuel Macron qu’ac avèva anonciat pendent la soa campanha presidenciau, que comptava plan reformar lo Còdi deu tribalh un còp arrivat au poder. E que sembla seguir los sons engatjaments.

La lei tribalh, portada per Myriam El Khomri qu’avèva per mira d’ aumentar la competitivitat de las enterpresas en balhar-us mei de soplessa e amelhorar las condicions de tribalh deus salariats. Lo President Macron que perpausarà 5 ordenanças tà la refòrma deu Còdi deu tribalh qui seràn presentadas oficiaument au moment deu Conselh deus ministres deu 22 de seteme. Si son validadas, las ordenanças qu’entraràn en aplicacion a la fin deu mes de seteme. Lo contiengut d’aqueras modificacions qu’estó presentat peu Purmèr ministre, Edouard Philippe e la ministra deu Tribalh, Muriel Pénicaud, pendent ua conferéncia de premsa lo 31 d’agost. Atau, lo Còdi deu tribalh qu’averà vocacion de simplificar la vita de las enterpresas, la refonta de la formacion professionau e... haro suus emplecs ajudats. Qu’ei aquiu que i a un problèma. Lo govèrn que voleré limitara 110 000 lo nombre de contractes ajudats qui serén finançats au dusau semèstre de 2017. Aquera baisha de 40 % que deveré mei que mei aver contracòps en lo sector nonmercadèr qui n’aurà pas mei dret a nat contracte ajudat. Aqueth tipe de contractes que demoraré reservats prioritàriament a l’Educacion nacionau, l’Otramar e lo sector sanitari e sociau. Lo purmèr dispositiu de luta contra la pujada deu caumatge en çò deus joens « Tribalhs d’Utilitat Collectiva » (TUC) qu’estó creat en 1984. Despuish, qu’estó remplaçat per un ahoalh de contractes diferents dont los « emplecs joens » aviats devath la mandatura de Lionel Jospin. Fin de las annadas 90 e començar de 2000, lo nombre d’emplecs ajudats qu’espeta, puish que diminueish dab la baisha deu caumatge. A partir de la soa arribada au cap deu país, Nicolas Sarkozy que decideish de diminuir lo nombre de contractes ajudats, dab arguments identics aus presentats peu govèrn d’Emmanuel Macron uei lo dia. Totun, dab la hauça deu caumatge e la crisi economica, Nicolas Sarkozy que’s rend a l’evidéncia e que reabilita aqueths contractes. E qu’ei en 2012 que los contractes ajudats e seràn remobilizats dab la creacion deus « emplecs d’aviéner » devath François Hollande.

Son necessàrias los contractes ajudats ?

En periòde de crisi economica, qu’ei estat constatat que los contractes ajudats avèvan un efèit de relança de l’activitat qui engendra poder de crompa en melhorar las condicions de vita deus beneficiaris. Segon las corbas, los contractes ajudats que son un utís deus bons entà diminuir a tèrme brac lo caumatge. D’après un estudi de l’Institut Nacionau de l’estatistica e deus Estudis Economics (INSEE), quan lo nombre de beneficiaris de contractes ajudats baishe, lo nombre de caumaires qu’aumenta. Lo non-renovelament d’aqueths contractes deu dusau semèstre de 2017 qu’averà per consequéncia l’arribada de 62 000 demandaires d’emplecs mei. Suu tèrme long, los contractes ajudats que serén mei utiles dens lo privat que non pas dens lo public. Dens lo privat, un ancian beneficiari qu’averà mei d’escadença d’estar en CDI (31 %) qu’ua persona qui n’ei pas passada per un contracte ajudat, quan dens lo public, los ancians beneficiaris qu’an mensh de 8 % d’escadença d’estar en CDI e enqüèra mensh d’estar en emplec non-ajudat. Entà explicar la baisha deu nombre de contractes ajudats, lo Purmèr ministre qu’avèva declarat que n’èran pas un utís vertadèr d’insercion suu mercat deu tribalh. Mes, la DARES, lo servici d’estudis e d’estatisticas de ministèri deu Tribalh qu’avè publicat en març passat ua analisi sus la situacion professionau deus beneficiaris d’aqueth tipe d’emplecs 6 mes après la fin deu lor contracte : 67 % de las personas sortidas en 2014 d’un CUI-CIE e 41 % de las personas sortidas d’un CUI-CAE avèvan un emplec 6 mes après, « en mei d’aquò, 71 % deus sortents de CUI-CIE qu’estón embauchats en CDI en 2014 ». En 2015, los contractes ajudats que permetón la creacion de 21 000 emplecs.

Fin de l'emplec ajudat, fin de las escòlas immersivas ?

La baisha deus contracts ajudats decidida peu govèrn aqueth fin d’estiu qu’ei luenh de har l’unanimitat. Ua grana partida deus sectors professionaus qu’ei tocada, e l’inquietud que s’espandeish.

Aqueth còp dur portat au sector associatiu que seré devut a « la noneficacitat d’aqueths contractes contra lo caumatge » e deu hèit que non sian pas « lo trempolin esperat peus tribalhaires cap au marcat deu tribalh », segon lo govèrn. « Faus ! » que respon lo partit Régions et Peuples Solidaires dont avem entervistat l’un deus membres, Pèire Costa (Fòto DR) :

p8 peirecosta

 

La Setmana — Qu’afirmatz dens un comunicat de premsa que los emplecs ajudats an ua utilitat sociau au contra de çò que declara lo govèrn ?    
Pèire Costa — Dins lo comunicat m’apiègi sus un rapòrt de l’INSEE publicat en març de 2017. Pensi que lo problèma d’aquel govèrnament es qu’a un posicionament public diferent. Comprenèm que lo govèrn aja besonh de far estalvis e cerque totes los mejans de’n far, mas es una causida politica de diminuir de 5 euros los APL, de suprimir la taxa d’abitacion o de suprimir los emplecs ajudats. Çò que ditz lo govèrn e sos defensors es que l’economia non pòt pas èsser encara ajudada, segurament, lo CICE (Crèdit d’Impòst per la Competitivitat e l’Emplec) es ajudat e es una decision e permet de sosténer l’economia. Los arguments avançats pel govèrn son faus. Lo principi pels emplecs ajudats es que l’Estat dona moneda a l’emplegaire per poder emplegar de monde, que siá a un caumaire o un emplec ajudat, dins un cas com dins l’autre, la moneda es lo produch de l’Estat, mas la diferéncia es que l’emplec ajudat produtz una activitat, un servici mentre qu’un caumaire cauma.

LS — Qué pensatz deu procès hèit au contracte ajudat, de la soa utilitat purmèra qui ei destornada au profièit de las associacions qui l’utiliza ?
PC — Es escandalós ! Dins nòstre comunicat, mencionam la situacion dins las escòlas immersivas, an besonh del sosten public, de l’Estat per pagar los ensenhaires perque l’escòla es contractualisada. An besonh de las collectivitats publicas territorialas per sosténer lo fonccionament de l’escòla, vòl dire las ajudas mairalas, los animators, tot plen de monde que son indispensables. Suprimir los contractes ajudats, Diwan lo diguèt e imagini qu’es parièr per Calandreta, es suprimir 3/4 dels emplecs nonensenhaire e es obligar las escòlas immersivas a far autrament e aquò es tanben una decision politica. Ai començat de trabalhar al Collègi Calandreta de Grabèls en 2002, ai començat amb un contracte emplec joven e totes los animators avián contractes ajudats, pas d’animator, pas de collègi. Ai cercat a compréne çò qu’èran los emplecs considerats com ajudats en França e ai descobèrt que i aviá tanben la formacion en alternància, l’aprendissatge e la professionalizacion. En 2016, 590 000 personas èran en alternància.

LS — Quaus son las consequéncias deu gèl deus contractes ajudats ?
PC — Es tot lo mitan associatiu que risca de desaparéisser. Elegits dison que lo Macron a rason, cal professionalizar l’accion, cal aver de monde competents e disponibles, cal aver moneda e subvencions, mas si ne podem pas mai comptar sus las collectivitats territorialas, serà complicat. Es la mòrt del sector associatiu, cultural, esportiu tanben. L’ancian seleccionaire de la còla de França de fotbòl mandèt un tweet per dire que si los contractes ajudats èran suprimits, aurà un impacte negatiu dins lo mond fotbalistic amator. Espèri que lo monde van reagir, van prene consciéncia de la gravitat de la situacion, l’IEO o Calandreta. Quand anatz sul site del servici de l’emplec, la màger part dels emplecs prepausats son d’emplecs ajudats, com va faire l’IEO per fonccionar ? Com va faire Calandreta per fonccionar ? Imagini que lo malhum de las ràdios associativas, i a de contractes ajudats pels jornalistas e los tecnicians, e al meteis temps, aqueras personas son en activitat, perpausan quicòm. 

Entervista Fanny Lartigot

La maurescaduda deus contractes ajudats

p8 lremdeputat

Jean-Marc Zulesi (Fòto HI13300), deputat LREM de las Bocas de Ròse qu’escrivó un article suu Huffingtonpost suu subjècte. Titolat « Pr’amor que vedem a tèrmi long, que’ns cau aver lo coratge de reformar los contractes ajudats », l’elegit que denóncia « l’amnesia » d’uns gavidaires politics, per la màger part « de dreta ». Que rapèra qu’aqueths gavidaires s’insurgivan contra la mesa en plaça deus contractes de generacion e deus emplecs d’aviéner « au nom de la luta contra lo gaspilhatge deus dinèrs publics » pendent lo quinquenat passat, e que portèn lo programa presidenciau de François Fillon qui preconisava reduccions drasticas de la despensa publica en suprimir enter autes los contractes ajudats. Segon lo deputat LREM, que son los medishs qui defenen lo quite fondament d’aquestes contractes. E lo deputat d’ajustar « pas jamei [los contractes ajudats ] n’an demostrat la lor eficacitat dens proporcions qui poscan justificar l’amplor deus finançaments publics engatjats ».

Rentrada mauaisida en las escòlas immersivas
Las manifestacions que's multiplican despuish l'anóncia

Las escòlas immersivas en lenga bretona, las Diwan, tocadas de front per aquera baisha de contractes ajudats, que reagín lèu a l’anóncia governamentau. Atau, lo 2 de seteme, cap a 1200 personas que’s mobilizèn plaça de la Résistance a Quimper, entà sostiéner las escòlas. Un medish acamp que’s debanè lo quite dia a Nantes. 45 pòstes en contractes ajudats qu’estón refusats e 39 autes que demoravan miaçats. Diwan qu’avèva alertat los elegits locaus : « Que demandam ua solucion en urgéncia tà la rentrada. Diwan qu’exerceish ua mission de servici public dab mejans tròp precaris. Que cau desblocar los contractes », perpaus cuelhuts per France 3 Region. Lo 8 de seteme, las escòlas immersivas bretonas qu’avón confirmacion per la prefectura de Bretanha que tots los contractes ajudats èran estats renovelats. Los 104 contractes qui arribavan a tèrmi enter lo 1èr de seteme e lo 31 de deceme de 2017 que seràn tanben renovelats. Las manifestacions previstas los dias seguents que son estadas mantienudas, lo hialat Diwan que desira « demandar un estatut » e que contunha la soa luta. Diwan qu’ei 46 escòlas, 6 collègis e 1 licèu sus 5 departaments de Bretanha, sia 4 270 escolans. Costat occitan, las escòlas Calandreta n’an pas reagit d’ua sola e medisha votz mes separadament. Com ac hasó la Calandreta deu Lis en Bearn, per un comunicat de premsa enviat a las redaccions. Qu’i hè estat de la situacion deus emplegats de la soa escòla : duas personas que son emplegadas mercés ad aqueths contractes. Malurosament, lo purmèr renovelament qu’estó refusat per Pôle Emploi lo 30 d’agost passat, « sia 4 dias abans la rentrada ». L’escòla qu’estó dens l’obligacion de suprimir la garderia de fin de dia per la mantiéner lo matin e « respóner aus besonhs deus pairs qui tribalhan ». Si la situacion non cambia pas, lo dusau contractes ne serà pas renovelat tanpauc a partir deu mes de genèr, atau la Calandreta deu Lis que serà dens l’impossibilitat de fonccionar. Medisha reaccion de las parts de la Calandreta Jansemineta d’Agen. Arron un aperet de la Federacion Calandreta Bearn, ua manifestacion que’s debanè a la Hèire mustra de Pau lo 9 de seteme, au parat de la visita deu Purmèr ministre, Edouard Philippe. « Escòlas Calandreta en dangèr ! Ua solucion de tira », qu’èran los eslogans escandits peus manifestants. Ua delegacion que s’escadó a deishar un dossièr au Purmèr ministre. Au moment de l’escritura d’aqueth article, nada responsa de las parts deu cap deu govèrn. A l’escòla Calandreta de Limós, la Calandreta Limosenca, un vam de solidaritat que’s debanè au moment de l’anóncia deu govèrn. L’escòla que perd la soa gavidaira e la soa ensenhaira de francés. Los pairs d’escolans qu’an lançat ua canhòta en linha entà « conhir la manca de l’Estat ». L’escòla qu’a besonh 6 000 € entà signar lo contracte de 30 òras de la persona en sostien pedagogic e assegurar lo son salari dinc au mes de junh.

Tè Vé Òc : un emplec ajudat en dangèr

Capture decran 2018 04 25 a 15.29.16

Lisa Gros qu’ei presidenta de Tè Vé Òc, ua associacion de produccions audiovisuaus en lenga nosta, basada a Nimes. Creada en 2007, l’estructura qu’emplega ua salariada en contracte ajudat. « Avem un emplec ajudat que s’acaba fin de decembre, ne serem pas tocat perque s’acaba lèu mas çò que i a es que ne’n poderem pas prene un autre. Aquò nos mena a calcular per revisar l’emplec donc trobar de mejans financièrs per contunhar de pagar l’emplegada », çò nse hidè la presidenta. « N’i a que dison qu’es lo mejan esconut de modificar lo nombre de caumaires, per ieu, l’emplec ajudat es un trempolin per finalament crear un emplec. Après la precaritat d’un emplec CAE es evidenta, que l’avem ben vist en Calandreta e alhors. Un emplec ajudat es pas res, al cap de dos ans es acabat. Pensi qu’es domatge de levar una ajuda qu’èra preciósa per las associacions mas es una illusion de creire qu’a cada còp que i a un emplec ajudat, i a una creacion d’emplec. Es pas possible, i a pas los mejans. […] Pensi que ne serà pas la mòrt de las Calandretas per çò que vam ben trobar de solucions. Vesèm ben que de tot biais, la consideracion de l’Estat per las lengas ditas regionalas es zèro, i a gaire de causas favorablas. Me demandi cossí anam avançar… »

Valerie Cazenave-Bernadou, militanta discreta

Valerie Cazenave-Bernadou qu'ei regenta a la calandreta de Banhèras (65), despuish 20 ans. La soa tòca ? Ensajar de convéncer los pairs de l'interès d'estudiar la lenga nosta.

Valérie Cazenave-Bernadou, aquiu ua hemna de ponha. Be sap çò que vòu e çò que ne vòu pas. Quan l’avem contactada, ne tienèva pas especiaument a parlar sonque d’era, o meilèu quiò, mes deu tribalh que hè dab los mainatges de la Calandreta de Banhèras (65). La Calandreta que hestegè los sons 20 ans d’existéncia l’an passat, e la bigordana que hasó partida deus « hòus » com ac ditz, qui’s lancèn dens l’aventura.

Reaccion del Collectiu Périgord Occitan aprèp la declaracion d'una deputada sus l'ensenhament immersiu

Lo 29 de març, la deputada LREM Sylvie Charrière a fach un apròchement entre l’ensenhament de las lengas regionalas e lo terrorisme pendent de discutidas pertocant al projècte de lei per simplificar e mai enquadrar lo regime d’obertura e de contròle dels establiments privats a l’Assemblada nacionala.

Los rets Calandretas serián l’equivalent de rets terroristas. Es del mens çò qu’a deissat entendre la setmana passada Dòna Charrière, la deputada LREM franciliana. Al moment del debat sus l’integracion progressiva de las escòlas associativas immersivas dins l’escòla publica, la qu’es l’actuala vice-presidenta de la comission cultura e educacion de l’Assemblada nacionala, a pas esitat a comparar los rets educatius Calandretas, Ikastolas, Diwan e Bresserolas, a de rets terroristas. Per nosautres, es un insulte. Un insulte als escolans, als professors e als parents de Calandretas. Mas tanben un insulte a las comunas de Peireguers o de Bergerac coma al departament de la Dordonha qu’ajudan las escòlas Calandretas peiregordinas. Fin finala, un insulte a las associacions coma lo Bornat del Peirigòrd e l’IEO-Novelum qu’an totjorn sostengut financièrament nòstras escòlas a l’ensenhament immersiu en occitan. Se las Calandretas son de rets terroristas, i a aicí fòrça de complicis. Alara, siá Dòna Charrière a fach de provocacion per poder existir politicament, siá vòta a l’Assemblada guidada pel sol embòrniament ideologic, sense coneissença de la realitat d’aquelas escòlas que son de segur immersivas en occitan mas laïcas e gratuitas, aculhissent totes los dròlles o desiran. Volèm donc saupre se los 4 deputats LREM de Dordonha son solidaris de tales prepaus injuriós per totes los peiregordins estacats a la lenga e la cultura millenàrias de nòstre país. Sostenèm quitament que nòstras lengas occitanas, bascas o bretonas… intègran totes los dròlles dins un crusòl comun. Que sián eissits d’aicí de longa soca del Peiregòrd o que sián arribats recentament aicí, aprene fòrça jove la lenga locala d’aicí fach d’eles de dròlles que se senton en cò de eles partejant l’amor de nòstre país. Al moment del meteis debat, Alexis Corbière, deputat tanben francilian e pòrtavotz dels Insoumis, a per de son costat sosentendut que las escòlas immersivas èran dangerosas per l’aquisicion del francés coma per la coësion nacionala. Aquiu encara los arguments son ideologics e non fondats. Los dròlles eissits dels rets de las classas coma Calandretas, coma los eissits de las filièras bilinguas publicas, obtenon de resultats equivalents o melhors que los dròlles eissits de las filièras monolingüas. E a çò que sabèm, los extremistas religiós o politics que remeton en causa uèi la Republica, son pas eissits de las escòlas occitanas, bascas o bretonas. Lo Collectiu Périgord Occitan reïtèra son engatjament al près de las escòlas Calandretas coma al près de las classas bilinguas publicas. Uèi, l’ensenhament immersiu es experimentat dins de classas publicas al País-Basco francés e aquerò, gràcia a l’obertura d’esperit e al bon sens del Sénher lo Rector de l’Acadèmia. Perque sèm convencuts, l’avenir de nòstras lengas istoricas de França passa per la transmission escolara e aquerò, dempuèi joves. Dins nòstras escòlas, nos cal desvolopar l’ensenhament bilingüe occitan/francés, que siá en Calandreta o en classa bilingua publica, acceptam pas de nos far insultar per de deputats parisencs que coneisson pas res a la realitat de nòstra lenga e de nòstre país mas qui se permeton de nos jutjar e de condemnar l’ensenhament de nòstra lenga.

Lo Collectiu Périgord Occitan

Per memòria : 

Intervencion de la deputada Charrière : https://www.youtube.com/watch?v=Ooc5MGvTtDkcom/watch?v=Ooc5MGvTtDk

Intervencion del deputat Corbière : https://www.youtube.com/watch?v=UASgVv8QMXQ&feature=share

Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+