Uei : 14/12/2017

Canadà : Regèt de la lei sul bilingüisme dels jutges

Lo 25 d'octòbre, los deputats a la Cambra de las comunas votèron per un projècte de lei que mira a render obligatòri lo bilingüisme en cò dels futurs jutges a la Cort màger de Canadà, sens cap de besonh de l'ajuda d'un interprèt.

Lo projècte de lei sul bilingüisme dels jutges es estat depausat pel deputat neodemocrata François Choquette, e foguèt regetat amb la majoritat dels membres del Partit Liberal. Pas que 17 deputats liberals an apiejat lo projècte de lei.

Questionat per Ràdio Canadà, Marc Serré, deputat de Nickel Belt expliquèt que la validacion d'aquel projècte auriá entraïntat una modificacion de la Constitucion del Canadà, çò que lo govèrn de Justin Trudeau considèra pas pel moment.

Pasmens, lo Primièr ministre s'èra engatjat i a qualques meses a seleccionar de jutges bilingües a la Cort màger.

Es lo quatren còp que lo projècte de lei es depausat.

Un grop d'universitaris a recentament produsit un tèxte collectiu pertocant al regèt del projècte de lei pels liberals. Tornan metre en question l'engatjament dels liberals envèrs la defensa de las lengas oficialas, « Quales son los defensors de las lengas oficialas dins lo govèrn federal ? » Los 9 signataris son Linda Cardinal, Guillaume Deschênes-Thériault, Martin Normand e François Rocher, de l'Universitat d’Ottawa, Michel Doucet de l’Universitat de Moncton, Stéphanie Chouinard del Collègi militar reial del Canadà, Rémi Léger de l’Universitat Simon Fraser, Valérie Lapointe Gagnon e Claude Couture de l’Universitat de l’Alberta.
« Lo regèt del projècte de lei privat sul bilingüisme dels jutges de la Cort màger pels liberals es encara mai estonant e decebent que pendent la darrièra campanha electorala lo Primièr ministre presentava lo Partit Liberal del Canadà com lo del bilingüisme ».
Legir la letra aicí.

François Choquette cèrca un autre biais de tornar prepausar un emendament a la lei sus las lengas oficialas.

Fòto : Cort màger Canadà ©Wladyslaw

Ai'Ta que desmonta panèus non-bilingües en Bretanha

Membres deu collectiu breton Ai'Ta, qui milita tà la defensa de la lenga bretona, que desmontèn panèus non-bilingües deu Parc Naturau Regionau deu Gòlfe deu Mòr Bian (Fòto).

En octobre de 2015, l'Estat e la Region Bretanha que signèn ua convencion pertocant a la transmission de las lengas de Bretanha e au desvolopament deu son usatge dens la vita vitanta. Qu'ei dens aqueth encastre qu'aus entorns deu gòlfe, ua senhaletica bilingua qu'ei estada hicada en plaça peu Parc Naturau Regionau, quauques mes a.

Totun, lo collectiu Ai'Ta qu'arremarquè que los panèus installats per la direccion interdepartamentau de las Rotas ne son pas mei bilingües tot au long de las vias express. Ai'Ta qu'assegura voler perseguir aquera accion de desmontatge deus panèus e que demanda ua senhaletica bilingua francés-breton paritària sus las quate vias en Bretanha.

Fòto d'ostreïcultura sus l'isla d'Arz, signada Ji-Elle

Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 
Capture decran 2017 11 28 a 11.48.12

Papagai

Papagai es la revista occitana dels pichonèls. Prepausa cada mes doas istòrias, de jòcs, una pagina de vocabulari e un dorsièr en rapòrt amb un dels dos 

+