Uei : 24/11/2017

Barcelona : la Sagrada Família acabada dins dètz ans !

L’edifici imagenat per Antoni Gaudí deuriá èsser acabat en 2026, data del centenari de sa mòrt.

Rendètz-vos dins dètz ans ! Es a aquel moment que se poirà remirar la catedrala de Barcelona dessenhada per l’arquitècte Antoni Gaudí, (1852-1926). Los arquitèctes actuals espèran complir son òbra faraonica pel centenari de sa mòrt. L’edifici es bastit a 70 % e finançat exclusivament per las visitas raportant 36 milions d’euros per an. Sèm nombroses a aver visitada aquela catedrala situada al còr de la capitala catalana. Fasèm partida de las generacions que l’auràn vista en òbras en se demandant s’anàvem viure pro vièlhs per la veire acabada. Serà causa faita.

Un jòc d’assemblatge A l’ora d’ara, la bastison es fisada a Jordi Faulí, un arquitècte catalan de 57 ans. Es lo seten cap-arquitècte a perseguir l’òbra de Gaudí. Venon de pausar doas còcas de betum sus las doas sacristias bastidas l’an passat. Mercés a las tecnicas modèrnas, lo trabalh pacient e menimós que podiá èsser l’edificacion d’una catedrala sembla ara a un simple assemblatge de pèças. Lo trabalh mai exigent pertocarà a las finicions e especialament lo coloratge de las diferentas seccions de la catedrala. Pasmens, los arquitèctes se liuran mai a un jòc de reconstitucion que non pas de construccion dins la mesura que los plans daissats per Antoni Gaudi foguèron destrusits per un encendi en 1936, al cors de la guèrra civila. Gaudí lo catalanista Tota sa vida, Gaudí faguèt pròva d’un amor dels grands per son país. Los indicis mancan pas. Los simbòls catalans son omnipresents dins son òbra, coma la crotz de Sant Jòrdi. Pendent sa joventut, volguèt conéisser son país. Faguèt partida de l’associacion catalana d’excursions scientificas amb tot un fais de passionats de l’art, de l’environament, de la cultura e de la lenga de Catalonha. Gaudí èra la frucha d’un periòde de reconquista de l’identitat catalana, dins la segonda mitat del sègle XIX, en meteis temps que lo nòstre Felibrige. Calrà pas mancar l’escasença de visitar l’òbra de sa vida quand serà completa. Serà alara la basilica mai nauta del mond. Après 134 ans, de generacions d’artesans se seràn succedits (de paire en filh) a aquelas òbras. Partejaràn amb los bastisseires medievals aquel sentiment de fiertat de veire lo trabalh acabat.

Fòto : © Guy Le Page

Militants occitanistas en sostien aus Catalans

La situacion que s'ei abastardida enter lo poder centrau e las autoritats separatistas ger en Catalonha. Quauques dias abans la tienguda deu referéndum a favor d'autodeterminacion de Catalonha, la polícia espanhòla qu'interpellè 13 gavidaires independentistas, membres deu govèrn, l'executiu regionau catalan.

Au demiei deus arrestats, Oriol Junqueras, ministre de l'Economia. Segon Mariano Rajoy, « aquera deriva separatista qu'ei anticonstitucionau ». La Guardia Civil que miè 22 perquizicions dens divèrs ministèris regionaus a Barcelona.

Los Catalans que baishèn lèu per las arruas entà manifestar davant lo govèrn catalan. Carles Puigdemont, cap de l'executiu catalan, que declarè : « L'Estat espanhòu que suspenó de facto l'autogovèrn de Catalonha ».

Los elegits favorables au referéndum que son convocats davant la justícia e perquizicions que son miadas entà sasir documents que pertocarén lo referéndum catalan.

Ferriòl Macip Bonet, capredactor deu Jornalet qu'èra en dirècte au matin sus l'antena de Ràdio País tà balhar l'estat d'esperit qui regna a Barcelona despuish ger : ETV Ferriòl M.B 

Las reaccions deu mitan occitan qu'ei viva despuish lo còp d'Estat. Lo Partit Occitan que partatgè la soa preocupacion per la situacion en Catalonha suu net : « Lo govèrn de Madrid que pren lo rosc d'ua escala en Catalonha ». Lo Partit Occitan que saluda las manifestacions pacificas de milierats de Catalans qui « apèran a la defensa de la democracia e qui afirman en disant “ Votarem ! ” », çò escriven los militants occitanistas. Que cranhen totun que las decisions presas peu Purmèr ministre espanhòu, Mariano Rajoy e son govèrn, non sian « de natura a méter en perilh la democracia ».

Lo Collectiu occitan en solidaritat per Catalunya que manifestè lo son sostien aus vesins catalans dens un comunicat e qu'organiza en sostien dab « lo procèssus democratic, legitima e contra la repression en Catalunya », ua manifestacion doman cap a 19 òras davant la mairia de Pau (64).

Lo Partit de la Nacion Occitana que denóncia tanben « vigorosament » lo còp d'Estat e que s'estona que l'Union Europèa e demore « escandalosament » silenciosa fàcia ad aquera situacion. Lo PNO qu'apèra los Occitans a participar a las manifestacions organizadas en Occitània tota davant los Consultats d'Espanha.

Dens un tweet, Benoît Hamon que reagí publicament en deplorar l'actitud deu govèrn espanhòu : « lo govèrn espanhòu qu'a tòrt d'atisar las tensions atau ».

Quitament se los separatistas e son majoritaris au Parlament regionau despuish 2015, la societat catalana que demora partatjada sus la question de l'independéncia. Totun, mei de 70 % deus Catalans que vòlen exprimí's via lo referéndum.

« Sisif e “ la vièlha ” »

A vosautres, o sabi pas mas a ieu fa plaser de vos tornar trobar aprèps gaireben dos meses, una abséncia tròp longa de mon punt de vista… desempuèi un pauc mai de vint ans que, cada setmana, tiram camin ensems ! Alara, aqueste editorial es coma una rintrada… E la rintrada es per un pauc totes dins la mesura que julhet e agost son los meses causits majoritàriament pels Franceses per se pausar qualques jorns. Pels Occitans son los meses propicis a la florison dels festenals e autras manifestacions – escòlas o universitat d’estiu, jornadas d’estudis, etc. – que s’esfòrçan de metre nòstra lenga e nòstra cultura en valor. Mas, dins nòstra republica, los occitanistas que trabalhan a la promocion de la lenga e de la cultura nòstras semblan Sisif e son rocàs. A, es pas coma en çò de nòstres vesins e cosins de Catalonha, diràn d’unes. La situacion es desparièra çaquelà amb una istòria desparièra tanben. A l’escasença del chaple de la setmana passada, poguerem veire los Barcelonins e los autres Catalans non solament comuniar dins la dolor mas comuniar en catalan – quitament se l’espanhòl èra pas exclús ! Lo quite rei d’Espanha – politica obliga – qu’èra vengut amb lo primièr ministre foguèt escridassat en… catalan ! Òm pòt somiar al jorn que, en Occitània, los manifestants, reivindicaràn en… occitan. Sens pensar als lendemans que cantan, podèm çaquelà constatar amb satisfaccion que, demest los drollets que van tornar trobar lo camin de l’escòla, n’i que van anar dins una seccion bilingüa de l’ensenhament public o dins una calandreta. Dins un mond globalizat, las gents an besonh de raices mai que jamai mas los òmes politics o vòlon pas comprene, eles que vivon fòra-sòl. Es donc pas lo trabalh que manca als Sisifs de nòstre temps que refusan la fatalitat e vòlon pas veire la vièlha crebar !

 

Andriu de Gavaudan

  • Publicat dens Éditos

Atemptats — Fin de la traca deu terrorista e solidaritat deu PNO dab los Catalans

Lo doble atemptat perpetrat en Catalonha dijaus passat a Barcelona puish a Cambrils, qu'a hèit 15 morts e mei de 120 nafrats. 

L'autor de l'atemptat de Barcelona qu'estó tuat ger, au ras de Subirats a 50 km a l'oèst de Barcelona. Quan los agents s'apressèn, l'òmi qu'aubrí la soa camisa entà revelar ua cinta d'explosius (qui's revelarà faussa arron). Que cridè « Allahou akbar ! » abans d'estar tuat peus agents. Suus onze membres de la cellula, sèt que son morts e quate autes qu'estón arrestats per las fòrças de polícia. Que seràn tradusits davant la Hauta Cort de justícia de Madrid, competenta taus ahars de terrorisme. 

Lo ministre de l'Interior, Gérard Collomb, qu'anonciè divés passat voler collaborar dab los psiquiatres entà descobrir los individús susceptibles de radicalisà's, un protocòle navèth qui tornaré hicar en question la nocion de « secret medicau ». La termièra franco-espanhòla que beneficiarà d'ara enlà d'ua susvelhança doblada a la demanda de l'Estat francés. 

Dens un comunicat, lo Partit de la Nacion Occitana qu'exprimí la soa solidaritat dab los Catalans en aqueth periòde tragic : « Aprèp la vila occitana de Nissa,  aprèp Oagadogo, la tièra negra contunha. Ara doas vilas de Catalonha, Barcelona e Cambrils son nafradas dins lor carn per d’atacas terroristas islamistas. Lo Partit de la Nacion Occitana exprimís sa solidaritat amb totes los Catalans, fraires dels Occitans per la lenga e la cultura. L’Estat islamic e Al Qaida son un cranc que cal desrabar defòra coma al dintre de nòstras societats per totes los mejans militaris e policièrs disponibles. La lucha contra lo terrorisme islamista necessita tanben la mobilizacion de totes e en particular dels musulmans que viscan en Occitània, en Catalonha o d’autres países non-musulmans.

Los atemptats semblan espleitats pel cap del govèrn espanhòl e pel rei d’Espanha per apelar a l’unitat d’Espanha al moment que se sarra la data del referendum del 1èr d’octòbre sus la sobeiranitat de Catalonha, referendum enebit pel conselh constitucional espanhòl e pel govèrn espanhòl que vòlon fòrt e mòrt empachar sa tenguda.

Lo Partit de la Nacion Occitana, en mai de sa solidaritat amb los Catalans dins aquela espròva dolorosa, afortís tornarmai lo drech democratic a l’auto-determinacion de Catalonha e sosten lo referendum del 1èr d’octòbre ».

Mèdias : Lo Jornalet a cinc ans !

Los cinc ans del Jornalet se festegèron coma se deu. Pendent tot lo mes d’abril, de las quatre informacions publicadas cada jorn, una pertoquèt a d’eveniments de fa quatre ans, al temps de la fondacion de Jornalet. Se debanaràn tanben d’acampadas per rencontrar los lectors. Ferriol Macip, capredactor del jornal en linha, passèt per Carcassona al mes de febrièr e per Marselha lo 24 de mars. A Barcelona lo 27 d’abril, presentèt un libre dels cinc ans e lancèt una vidèo d’aniversari en linha. Tornarà puèi en Occitània amb un rencontre a Narbona, lo 18 de mai.

Lo punt culminant serà una jornada tota organizada dins una sala d’espectacles de Barcelona, lo primièr de julhet. S’i farà un cors d’occitan, un sopar occitan e tanben una serada animada per un grop de musica tradicionala atal coma los Goulamas’K. Una operacion de finançament participatiu serà lançada per poder pagar los musicians. Ferriol farà puèi sa virada estivenca costumièra en passant per l’EOE de Vilanòva d’Òlt (47), pel congrès de l’AIEO (10-15 de julhet a Albi) e enfin al festenal Hestiv’òc, a Pau, jos resèrva.

 

  • Publicat dens Culture
Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Papagai

Papagai es la revista occitana dels pichonèls. Prepausa cada mes doas istòrias, de jòcs, una pagina de vocabulari e un dorsièr en rapòrt amb un dels dos 

+