Uei : 20/07/2018

Dordonha : la cultura nòstra, desvelopaira de territòris

L’associacion Occitània Creativa perpausa d’acompanhar los projiets de desvolopament territoriau per lo biais de la cultura occitana e dau patrimòni immateriau.

Dins una entrevista acordada a Òc Tele, l’ancian conselhier generau Joan Ganhaire parlava de Dordonha coma d’un departament « vièlh e paure ». Fasiá un tableu plan triste de queu país verdejant, charjat d’istòria e de patrimòni de tota surta. Sembla que la banda d’Occitània Creativa aja decidat de mostrar qu’en Dordonha, an pas tròp de moneda mas an d’idadas. Ven laidonc de crebar lo z-uòu aquela associacion mercé a cinc personas d’orizonts diferents dont dos ancians de l’Agencia Culturala Departamentala de Dordonha (François Lagorce e Christian Lavaud), una doctoranta (Alexia Charrier), una foncionària qu’i trabalha en benevòla (Line Simon) e una auto-entrepreneira en conselh juridic per las PME (Marie-Hélène Désert).

Se puesser salariar

A la seguida d’un Dispositiu Local d’Acompanhament (DLA) menat per l’agencia Sirventès (Cantal), se puessen far una idada d’un budget minimau per puesser trabalhar tranquilles : 150 000 euros per an. « Los se faudrà ganhar, çò nos ditz François Lagorce, coordinator d’Occitània Creativa, nos anem salariar progressivament, sus tres ans ». Per atenher aquel enjuec, a saupre ganhar pro de moneda per se puesser salariar, quela futura cooperativa aurà pro de servicis a prepausar a sos clients potenciaus... lo tot sens un centime de subvencion. « Per l’ensemble de las nòstras intervencions, utilizarem la lenga e la cultura occitanas entau coma lo patrimòni cultural immateriau (PCI) coma vectors de desvolopament territoriau » çò nos expliquet François Lagorce. Quò qui vòu dire que, per tot projiet de valorizacion de quilhs dos elements o alora de projiet de valorizacion d’un territòri en generau, los responsables d’Occitània Creativa se ne serviràn coma argument per conselhar las collectivitats, associacions, artistas, entrepresas o malhums culturaus que los contactaràn.

Capture decran 2017 11 28 a 10.19.09

Fòto : la còla d'Occitània Creativa se vòu puesser salariar en tres ans. (DR)

Servicis divèrses

Poiràn tanben far un estudi o un diagnostic tocant a una politica territoriala per lo prisme de la lenga e de la cultura nòstras. Imaginem qu’una comuna o una intercomunalitat vuelha conéisser l’eficacitat de sas mesuras en favor de la lenga e dau patrimòni. Poirà sonar nòstra còla per saupre si a fachas las bonas chausidas dins aquel encastre. « Podèm tanben conselhar una collectivitat [infra-departamentala, NDR] qu’a enveia de lançar una politica en favor de la lenga, çò nos disset François Lagorce, dins las nòstras intervencions, ensaiam d’en primièr de comprendre las grandas linhas de la politica desirada puei d’explicar coma la concretizar. Nos interessarem pas unicament aus resultats lingüistics mas tanben aus resultats en termes de coësion sociala ». Per exemple, aculhissen queste mes daus jovents en servici civic que trabalharàn au prèp de Centres Comunals d’Accion Sociala (CCAS). Quilhs jovents son charjats de botar en plaça dau projiets o de las animacions au prep de personas annaditas. Occitània Creativa lor farà seguir daus moduls de formacion a la lenga e a la cultura nòstras per facilitar lo contacte, puei que devràn anar veire quelas personas vièlhas chas elas. A quò qui fau apondre un servici audiovisuau e la fabricacion de contenguts videò a caractèr promocionau. L’Agéncia Culturala Departamentala de Dordonha los a ja contactats per far cinc videòs-retrachs d’estructuras culturalas dins l’encastre d’un dispositiu dich « residéncia de l’art ».

Una cooperativa en devenir

Chadun de las personas engatjadas utilizarà son saber-far per valorisar la fasabilitat d’un projiet o bentot los ajudar a lo menar devers la reüssita. Demorarà una traça de la naissença d’aquela aventura puei que l’estudianta Alexia Charrier, doctoranta en geografia umana a l’universitat de Pau, mena sa tesi dins quel encastre, en far de « recèrca-accion ». Son subjiet correspond a l’airau de trabalh de l’estructura que l’aculhís puei que tòca au « biais que la lenga e la cultura occitanas entau coma lo patrimòni cultural immateriau pòden èsser mobilizats per facilitar la mutacion sociala d’un territòri rurau ». Lors operacions son pas en concurréncia emb d’autras estructuras. Insistissen sus la complementaritat. Se comptaràn sus lors pròprias fòrças, esitaràn pas a sonar los actors concernits per de reperatges, d’animacions e de coordinacion de las accions. « Nos asseguram d’associar aus projiets los actors que pòden constituir de ressorsas e velham que chadun d’entre ilhs i puessen contribuir dau mielh » çò indica Occitània Creativa sus son site internet. Definissen lor entitat coma una « cooperativa d’intelligencia territoriala », una faiçon poética de parlar d’una aisina au servici dau desvolopament locau e territoriau. Per lo moment, a l’estatut d’una associacion mas sos chapdaus an l’intencion de zo far evolucionar devers un estatut de Cop.47 (cooperativa, lei 47) que se pòt crear sens aver mestier de salariat. Quò qui es previst per la debuta de 2017. L’etapa seguenta, quand auràn desgatjat pro de moneda, serà de crear una SCOP (Societat Cooperativa Obriera de Produccion) que se pòt pas far nonmàs emb un equivalent de dos salaris a temps plen, au minimum. Se parla de lonja d’aur negre o d’aur blau. Emb tant de cervèus mes en relacion e marchant ensemble, se podrà dire que Dordonha es un país « d’aur gris » ! I

nf. : http://occitaniacreativa.org Tel. : 06 08 98 75 17.

France 3 que guarda las soas edicions locaus… dinc a 2021

Lo deputat deus Pirenèus-Atlantics, Vincent Bru, que publiquè suu son compte Facebook diluns passat, un corrièr de la gavidaira regionau de France 3 Navèra-Aquitania. En aqueth, Laurence Mayerfeld qu'avisa los professionaus de la cadena publica de la soa volontat de sosméter au vòte un contracte d'Objectius e de Mejans enter France 3 e lo Conselh regionau lo 23 d'octobre qui arriba. « Aqueth COM que miarà la creacion d'ua cadena regionau en Navèra-Aquitania, qui serà difusada suu hialat cablat e sus las box. Aquera navèra auhèrta televisuau, completada per la difusion TNT hertziana actuau, que permeterà lo manteniment de las 5 edicions locaus (Pau, Baiona, Peireguers, Briva e La Rochela) de Navèra-Aquitania per las tres annadas a viéner », çò anóncia la gavidaira regionau.

Lo deputat deu departament 64 que's regaudí de la reaccion rapida de France 3. Aquestas darrèras annadas, los professionaus de la cadena que s'èran mobilizats dens mantuas regions entà denonciar la barrada de las 16 edicions locaus (de 19 òras 15), qui devèvan estar integradas en partida dens las edicions regionaus.

Fòto : mobilizacion a Baiona tau manteniment de l'edicion locau. (Captura youtube Jacques Pons)

Entervista Amic Bedel : « Un biais de pensar diferent […] amb l'exigéncia de qualitat de produccion comparabla a la dels productors bèls »

Amic Bedel qu'ei realizator e creator de Piget Films. Lo roergat que co-fondè en 2010 lo collectiu Dètz, un grop creatiu de professionaus de l'audiovisuau occitanofònes. Qu'utiliza la lenga nosta dens las soas produccions. Que'ns digó mei sus las rasons qui'u possèn a crear la soa societat de produccion e sus la soa actualitat cinematografica.

La Setmana — Quin vos ei vienuda l’idea de crear Piget Prod ?
Amic Bedel — Al començament de las annadas 2000 èri un jove realizator e aviái enveja de crear de programas en occitan en co-produccion per la television. Lo Benaset Roux m’encoratgèt plan, e tanben la còla de Viure al Pais, ont trabalhavi coma redactor, ambe Clamenç Alet. Ambe mon amic Cédric Viala de Mauresca realizèri a l’ostal, lo pilòte de la seria « Camina ». Anguèri veire la direccion dels programas de France 3 a Tolosa, agachèron mon projècte e me diguèron òc ! Aquí èra plan partit ! Mas quand faguèri lo torn dels ostals de produccion de Tolosa ambe mos pilòtes, degun volguèt pas prendre lo risque d’ensajar de finançar un programa en occitan. Degun. Alara, montèrem Piget coma societat de produccion. Aviái 25 ans e aital faguèri la seria Camina, ambe Piget, per Viure al Pais. Après aquò contunhèrem de desvolopar de filmes en occitan, coma BAL, de corts metratges coma La Fugida, o la seria Còp d’Ala, escricha per Pèire Brun.

LS — E volèvatz desemposcar l’imatge que lo gran public a de la cultura e de la lenga nostas ?
AB — Conéisser la posicion de minorizat aquò’s una bona causa. Èstre mespresat es pas plan agradiu. Ai totjorn agut enveja de fabricar programas de tota mena, documentaris, clips, ficcions, en lenga nòstra... amb un biais de pensar diferent de çò que se vesiá dins los mèdias gròsses, mas amb l’exigéncia de qualitat de produccion comparabla a la dels productors bèls.

LS — Qu’avetz produsit « Paisans de Roergue ». Çò qui vos a sedusit dens aquera aventura ?
AB — Es una aventura parallèla als projèctes creatius de Piget Films o a mon trabalh de realizator. Paisans de Roergue es lo rescontre amb Paulette e André Andrieu, de monde que plan modestament filmèron lo monde paisan dins lor familha de Roergue dins las annadas 60. Filmèron per eles, per ne gardar un sovenir, mas faguèron aquò amb una aplicacion tala, que lor òbra es una òbra de cineastas. Aquò fa que, en editant aquela òbra, comentada en totalitat en occitan per André Andrieu, aquò dona una brava contribucion al - magre- fons cinematografic occitan, e ne sèm plan contents. Es una òbra « patrimoniala », filmada a mièg camin dins lo temps entre Farrebique e Biquefarre de Georges Rouquier, que fa veire la vida paisana sens cap de nostalgia. Pòt donar d’idèas per questionar nòstra evolucion e nòstre biais de viure actual.

LS — Ce sembla qu’i agi mei anar mei de proposicions de scenari (occitans) mes pas pro de productors e de realizators tà lançar projèctes. Quin explicatz aquesta situacion ? Çò que cranhen ?
AB — La produccion audiovisuala classica en França, aquò se passa mai que mai a Paris. I a de monde que se ganhan plan la vida en fasent de programas mai o mens low-cost e mai o mens aganta-colhons. Vesi pauc de causas novèlas e interessantas. Lo cinèma francés vira de redon. I a quauques productors aventurièrs mas son pas gaires. La vertadièra presa de risque es rara. Es ja complicat de produsir un filme d’autor en francés, perqué prendre lo risque de far de filmes en occitan, alara que degun ne demanda ? Se i aviá una demanda e se i aviá d’argent, tot d’un còp, i auriá de monde. La politica publica nacionala d’ajuda a la produccion deuriá èstre bravament mai volontarista per l’expression cinematografica en lengas « regionalas » mas es pas brica lo cas.

Legir l'entervista sancèra dens La Setmana n°1068

Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+