Uei : 23/06/2018

Audiovisual public, una reforma esperada per los qui vòlen mai d'occitan a la television

La manifestacion del 3 de febrièr passat aviá recampat mai de 200 personas per aver « mai d'occitan a la television ». Es lo Collectiu Occitan qu'es a l'origina d'aquela reivindicacion. « A l'ora de la reforma de l'audiovisual public, la question de las missions de la television publica en region se pausa. Quand d'antenas localas son menaçadas de disparicion, lo Partit Occitan prepausa al contrari de renfortir l'ancratge territorial de France 3, per èsser una vertadièra fenèstra d'actualitat de nòstras regions e un ligam amb los ciutadans, a costat d'autras iniciativas privadas com ViàOccitanie », aviá escrigut lo PÒc dins un comunicat abans aquela la manifestacion. « Justament, cal pas faire una contradicion, la television sul web e la television classica son compatiblas. Si on obten mai de preséncia de la lenga a la tele, serà totjorn benefic per l'occitan. I a encara de monde qui agachan la television ! », çò nos diguèt Joan-Pèire Laval del Collectiu occitan.

Lo Collectiu Occitan recampa dotze movements qui demandan « una preséncia quotidiana d'emissions en lenga d'òc sus l'antena e la transformacion de France 3-Occitània en una vertadièra cadena regionala a vocacion generalista ». Lo Collectiu organiza una novèla mobilizacion aquel dimècres 6 de junh a 18 oras 30 davant los sites de France 3 Tolosa, Rodés, Carcassona, Nimes e Montpelhièr.

Se ditz en contacte amb de deputats e declara que serà « hòrt present » al moment de las discutidas del projècte de lei audiovisual a l'Assemblada nacionala e al Senat.

Al moment de sos vòts oficials al mes de genièr, lo President de la Republica aviá fach conéisser sa volontat de refondar l'audiovisual public. Declarèt qu'un debat larg amb l'ensemble dels professionals èra necessari. Sas prioritats : donar una informacion de qualitat en desvolopant l'informacion de proximitat, prepausar de programas distinctius justificant los mejans atribuits, mas tanben « prene en compte la dimension europèa de la creacion en favorizant la co-produccion ». Emmanuel Macron s'èra justificat en disent que l'audiovisual public èra « un miralh tendut a la nacion e deu èsser pensat per totes los publics, totas las practicas ».

La ministra de la Cultura, Françoise Nyssen, presentèt aqueste matin las orientacions de la reforma de l'audiovisual public en preséncia dels dirigents de France Télévisions, Radio France, France Médias Monde, l'Institut national de l'Audiovisuel, TV5 Monde e Arte. Preconiza l'aumentacion dels programas regionals de France 3 e la supression de la cadena France 4 de la television hertziana. L'audiovisual public deuriá investir dins lo numeric, 150 milions d'euros mai per an d'aicí 2022. La reforma cerca a respondre als novèls usatges (programas a la demanda, al numeric, etc.) e a crear mai de sinergias entre los grops. Deuriá far d'economias entre 250 e 500 milions d'euros d'aicí 2022, mai que mai a France Télévisions.

Fòto : País Nòstre

ÒCtele lança una crida a projèctes de documentaris

Dins l'encastre d'un Contracte d'Objectius e de Mejans (COM) signat amb la Region Novèla-Aquitània pel periòde de 2018 a 2020, ÒCtele s'engatja a sostenir la valorizacion de la produccion audiovisuala en lenga occitana.

ÒCtele lança una crida a projèctes de documentaris als autors, realizators e productors interessats. Auretz fins al 25 de març per prepausar vòstras creacions a la webtele. Un comitat de lectura s'amassarà lo 4 d'abril, per estudiar los dorsièrs mandats pels candidats. Analisarà la qualitat editoriala, lingüistica, artistica e la viabilitat economica dels projèctes, qui plan segur respèctan la linha editoriala d'OCtele. Los filmes seràn en lenga occitana.

Podètz mandar vòstras proposicions sus de tematicas socialas del temps actual, sus la plaça de l'occitan dins la Region Novèla-Aquitània e dins lo mond e tanben de retraches de personalitats occitanofònas màgers. OCtele acceptarà pas los reportatges d'actualitat, los magazins de flus e de telerealitat, los filmes institucionals e los documentaris que son bastits sus de collectatges etnografics pertocant a la lenga occitana, ni los filmes qu'an una vocacion etnografica, patrimoniala o lingüistica.

Inf. : Mandar vòstres dorsièrs amb una nòta d'intencion de realizacion, una nòta del productor, un sinòpsi, un scenari, un prètzfach de tipe CNC, lo plan de finançament previsional qu'indicarà los acòrds ja obtenguts, lo CV de l'autor, lo CV del realizator e las referéncias de la societat de produccion. 

De mandar en 2 exemplars sus papièr e un exemplar en numeric a Stéphane Valentin, OC PROD, 77 avienguda dels Lilas — 64000 Pau — Mèl : This email address is being protected from spambots. You need JavaScript enabled to view it. — Site : www.octele.com

Leis olivadas (emission Lenga d'Òc)

Tot just acabat lo periòde de culhida d'olivas, vos prepausam una emission sus aqueu fruch emblematic de Miègterranha. D'onte nos ven l'olivièr ? A ne creire lo geograf grèc Estrabòn son lei Foceans que lo menèron a Marselha e a Nimes. Son espandits sus nòstra costièira dins lei tèrras sud de Miegjorn, onte tròban la doçor de nòstre cèu. Au programa, tòca, sentida e gost... Un reportatge de Claudi Queyrel.

Cinema — 8au edicion deu hestenau Rescontre

L’associacion de produccion audiovisuau en occitan, Tè Vé Òc, que prenerà en carga lo 8au hestenau video amator de metratge brac, RESCONTRE. Que’s debanarà a la Mediatèca de Marguerittes lo dissabte 10 de heurèr de 2018 a 2 òras deu vrèspe dinc a 6 òras 30 deu ser. Que podetz enviar los vòstes filmes corts metratges a l’associacion per mèl a l’adreça This email address is being protected from spambots. You need JavaScript enabled to view it. o au lor adreça postau, 30 arrua deus Gabians, 30900 Nimes. Los corts metratges que deveràn har 15 minutas maximum e estar rodats en Occitania tota en lenga nosta o en francés : « Un hestenau video obèrt a tots, debutants e videastas confirmats. Ficcions, documentaris, collectatges, clips musicaus… Un sol imperatiu : parlar de la vita en País d’òc ».

Inf. : Mediatèca Simone Veil, 4 arrua de la Travette 30320 Marguerittes — Tel. : 06 11 35 49 13.

  • Publicat dens Culture
Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+