Uei : 21/11/2018

Lenga nosta dab « Ací qu'èm » sus Souvenirs FM

Que hè dus ans que los auditors de la ràdio landesa Souvenirs FM e pòden escotar drin de lenga nosta dab l'emission bilingua « Ací qu'èm ». Que la podetz enténer cada purmèr e dusau dimenge deu mes de 9 òras a 10 òras sus las ondas de la ràdio o sus internet a l'adreça http://www.souvenirsfm.fr/. Presentada per Jacques Lesgourgues, que tracta de l'actualitat en Gasconha dab cronicas e nombrós invitats.

Dens la darrèra emission difusada lo 7 de genèr passat, Renaud Lassalle qu'èra convidat entà parlar deu son libe « Grammaire gasconne du parler de la Grande-Lande et du Born », e lo contaire Miquèu Baris que presentè « L'avet de Nadau ». La Setmana que hè ua cronica suus numèros deu jornau e sus subjèctes d'actualitat a cada emission d' « Ací qu'èm ».

Peu Jacques Lesgourgues, lo temps que passa viste quan s'amusam au cap d'ua emission : entervista audio

L'emission a viéner que serà difusada lo 4 de heurèr dab au programa l'istòria « Lo Ramonet e la Cadetina » lejuda per Christina, co-animatora d' « Ací qu'èm » e dus convidats, Los d'Ortès, Abel Dupuy e lo navèth director de Souvenirs FM, Jean-Claude Barroumes. 

Inf. : Emission « Ací qu'èm » sus Souvenirs FM 

  • Publicat dens Culture

L'Istòria de las Lanas capvath gravaduras, per Jean-Jacques Taillentou

L'associacion Ací Gasconha, qui tribalha a la promocion de la lenga nosta en lo Baish-Ador, qu'organiza conferéncias mesadèras. Aqueth dimèrcs 8 de noveme, Jean-Jacques Taillentou, president de la societat Borda a Dacs (40) (patrimòni de las Lanas) que presentarà « Les Landes, voyage à travers la gravure ».

Jean-Jacques Taillentou qu'ei l'autor deu libe deu medish nom (Ed. Cairn). « Las Lanas qu'an tostemps atirat los viatjaires deu passat peu son imatge de territòri desconegut e sauvatge, poblat d'òmis e de hemnas au mòde de vita jutjat estranh. Atau, despuish lo sègle XVIIIau, geografes, escrivans, jornalistas, artistas... que's son empressats de córrer aqueras tèrras entà tornar transcríver peus mots e l'imatge las lors observacions ». Lo libe qu'amassa ua causida de gravaduras deu sègle XVIIIau au començar deu Xxau, classadas per tematicas : los mestièrs landés, las tèrras ruraus e boscassèras, las figuras landesas, las credenças, las curiositats e un panorama arquitecturau de las vilas e vilatges landés ».

Jean-Jacques Taillentou qu'ei tanben l'autor de « L'Almanach du Landais 2018 » (Ed. CPE, 2017), « Histoire des naufrages sur le littoral landais » (Ed. Des Régionalismes, 2014) o enqüèra de « L'Histoire du Marensin : de l'Antiquité à la Révolution » (Ed. Des Régionalismes, 2003).

Inf. : 18 òras 30 au Centre Culturau Tivoli, 27 arrua d'Euskadi, 64600 Anglet — Tarifa : 2 €.

  • Publicat dens Culture
Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+