Uei : 17/11/2017

AELOC : Collòqui sus la lenga e l'identitat en PACA

L'Associacion tà l'Ensenhament de la Lenga d'òc organisa lo XIIen Collòqui de l'AELOC lo 25 de novembre a la sala de las fèstas Emilien Ventre a Rosset (13). 

Lo sicut tractat serà « La lenga d'òc e la question de l'identitat en PACA ».

Lo cònse de la vila, los representants de las collectivitats partenàrias del collòqui e los responsables e divèrs actors de l'Educacion nacionala inauguraràn lo collòqui a partir de 14 o 15. La vici-presidenta de l'AELOC, Nathalie Wurbel, parlarà de la situacion de l'ensenhament de la lenga nòstra dins la Region.
A 15 o, Mireille Benedetti, conselhièra regionala e Bruno Genzana, conselhièr regional e vici-president del Conselh Departamental de las Bocas de Ròse interveniràn sus l'identitat regionala.
Christian Lagarde, professor a l'Universitat de Perpinhan parlarà del concèpte d'identitat aplicat a las lengas de França. Son intervencion serà seguida d'un debat amb lo public present.

Pendent una ora, una taula redonda sul subjècte « Contra l'identitat d'exclusion : una lenga per recampar » amb Pierre Blache, inspector de l'Educacion nacionala, Abdelhak Elhadi, Christian Lagarde, Marie-Françoise Lamotte e Mathieu Poitavin.
La darrièra intervencion serà facha per Miquèu Montanaro pertocant a l'autenticitat provençala e l'obertura al mond.

Lo jorn s'acabarà per un concèrt del Duo Montanaro-ki a 18 o 30.

L'eveniment se debana en partenariat amb l'Academia de Niça e l'Associacion l'Aigo Vivo de Rousset. Serà bilingüe. A costat, mòstra, venda de libres e documents, taulièrs de las assocacions partenàrias.
Creada en 1987, l'AELOC recampa de monde que transmeton la lenga d'òc dins lor vida professionala o a títol benevòle atal coma los parents d'escolans que l'estúdian.

Inf. : This email address is being protected from spambots. You need JavaScript enabled to view it. — Site : www.aeloc.fr

Forcauquier : Lo congrès del Fòrum atrai l'engatjament dels elegits

Dins son amassada annala, lo Conselh Departamental dels Alps de Nauta Provença presentèt qualques mesuras per far viure la lenga del país.

Aperaquí 150 personas s’amassèron lo 14 d’octòbre passat a Forcauquier a l’ocasion del congrès annal del Fòrum d’Òc, qu’en aquesta escasença virava a l’entorn del tèma « L’occitan-lenga d’òc e l’espaci rural, quals rapòrts entre lenga e territòris ». L’eveniment atirèt los principals actors de l’occitanisme de la region, d’elegits e de militants, que dempuèi novembre de 2013 pensan ensems l’avenir de l’occitan en Provença, País Alpenc e País Niçard. A prepaus del tèma del congrès intervenguèt la vicepresidenta del Conselh Departamental dels Alps de Nauta Provença, Natalia Ponce-Gassier, que ven d’èsser encargada de la delegacion Lenga e Cultura Regionala. Sa precedessora, Genevièva Primiterra, aviá alestit l’esquèma departamental de la « lenga regionala » que sa collectivitat aviá adoptat a la prima e que deviá sosténer l’ensenhament dins las escòlas comunalas e los collègis del departament. Segon lo rapòrt que publica Aquò d’Aquí, l’elegida planhèt dins son parladís « l’inquietanta baissa d’efectius ». Dins aquel sens denoncièt que i aguèsse pas cap de còla academica per endralhar los ensenhaments, coma se passa tanben dins lo departament de las Bocas de Ròse, e que se comptèsse un solet professor del secondari entre Alòs e Manòsca. Pasmens, lo departament de la Nauta Provença anoncièt son intencion de socializar la lenga amb una politica de visibilitat, de senhaletica en vila e de preséncia dins de mèdias coma lo magazine del Conselh Departamental. En mai d’aquò, la collectivitat desvoloparà d’accions culturalas, coma una jornada de rescontre de bibliotecaris lo 31 de genièr de 2018. L’elegida diguèt tanben que per ela èra essencial d’animar un ret amb la Region, las associacions e d’organismes volontaris coma lo Geoparc de Nauta Provença a Dinha. Enfin, la nòva delegada acabèt son intervencion en demandant a las associacions d’avançar unidas, e en lor disent qu’ela lor ajudariá a menar a bon tèrme una politica per gardar la lenga viva. « Volem dreiçar pereu una descripcion dei luecs ont s’ensenha, se practica, ò se parla de la lenga, ò encara se tròban de ressorsas, coma leis archius departamentaus, lo centre d’etnografia de Salagon e de musèus… », çò precisèt. Lo Forum d’Òc es lo resultat d’una amassada que se debanèt en novembre de 2013, que mobilizèt totes los actors que volián pensar ensems l’avenir de l’occitan en Provença, del País Alpenc e del País Niçard. Se concluguèt amb la necessitat d’una accion collectiva : lo Forum d’Òc, creat per l’IEO Provença, la Mantenença de Provença dau Felibritge, la Federacion Provençala dei Calandretas e las associacions d’ensenhaires AELÒC e APLR (membres de la FÈLCO). Pòrtan ensems la volontat d’una politica lingüistica dins la region. A vocacion de recampar totas las personas moralas que sián d’associacions, de collectivitats localas, d’administracions, d’entrepresas, etc., que vòlon obrar per lo desvolopament e la promocion de la lenga occitana dins la region.

Ferriòl Macip

Una dinamica associativa en Provença per la lenga occitana

A Marselha, au mes de novembre de 2013, se mobilizèron totei leis actors que volián pensar ensems l’avenir de l’occitan en Provença, País Aupenc e País Niçard. Se concluguèt sus la necessitat d’una accion collectiva dins un quadre novèu: lo Forum d’Òc. Lo creèron l’IEO Provença, la Mantenença de Provença dau Felibritge, la Federacion Provençala dei Calandretas e leis associacions d’ensenhaires l’AELÒC e l’APLR (membres de la FÈLCO). Pòrtan encara uei ensems la volontat d’una politica lingüistica dins la region. Lo Forum d’Òc a vocacion de recampar totei lei personas moralas que sigan d’associacions, de collectivitats localas, d’administracions, d’entrepresas, etc., que vòlon obrar per lo desvolopament e la promocion de la lenga occitana dins la region. Una granda campanha d’adesion foguèt mandada per bastir l’ostau comun que mancava en Provença. Leis associacions fondadoiras an vougut que l’adesion siá simpla : gratuita e declarativa. Lei membres dau Forum s’engatjan sus de valors que partejan: l’unitat de la lenga dins sa diversitat « despuei Niça fins a Bordèu » e « de la mar fins a Léger ». Cadun pòu demandar a son associacion d’aderir en aprovant la Carta. Lei membres vòlon desvolopar ensems una politica lingüistica en Provença-Aups-Còsta d’Azur, darriera region qu’a pas signat la Carta de Cooperacion Interregionala e Transfrontaliera de Desvolopament de la Lenga Occitana, a causa dau president de Region d’alora, Michel Vauzelle. Ensems pensan de prepausar d’accions concretas per far avançar la plaça de l’occitan. Dins lo Forum d’Òc, cada associacion, cada entrepresa pòu participar a sa mesura ais accions prepausadas : lo cercle locau ont se practica e s’apren la lenga, tant coma lo club de rugbi ò de botís que la valoriza a son biais. L’union fa la fòrça e la lenga n’a ben besonh. Leis aderents au Forum d’Òc assajan de tractar conjonchament de la plaça de la lenga dins l’educacion, lei mèdias, la vida publica e institucionala, la creacion e l’economia. La fe sensa òbras mòrta es !

IEO Provença

La XXIena edicion dels Grands Jòcs Florals es dubèrt

La XXIena edicion dels Grands Jòcs Florals es dubèrta. Dempuèi 1878, cada sèt ans, los Grands Jòcs Florals onoravan primièr los escrivans en lenga d'òc mai bons, e uèi, las creacions literàrias, culturalas e audiovisualas en lenga dita regionala mai bonas del sud de la França. Lo concors se devesís en 9 categorias : poësia, pròsa, teatre, estudi, pedagogia/didactica, traduccion, cant, clip/film e diaporama.
Los Laureats e Grands Laureats incarnan lo simbòl d'una cultura viva en constanta evolucion e prifondament enrasigada.

Podètz mandar vòstras òbras fins al 31 de genièr de 2018 a mièjanuèch. Lo palmarés serà proclamat lo dissabte 19 de mai de 2018 al Centre Cultural de Bergerac en Dordonha.

Inf. : Felibritge, Parc Jourdan, 8 bis avienguda Jules Ferry — 13100 Ais de Provença — Reglament deus Jòcs Florals sul site www.felibrige.org

Fòto : Angélique Marçais, XXena Reina del Felibrige (DR). La reina del Felibritge es elegida cada annada.

  • Publicat dens Culture

Matieu Casanova : « es un pauc particular en Provença »

Lo 18 de mars se tenguèt una sesilha dau Fòrum d’Òc a Pertús (Vauclusa). Èra l’occasion de prendre la temperatura dau movement en favor de « l’occitan-lenga d’oc » dins lo país. 

 

Per l’essenciau, lei participants au Fòrum d’Òc parlèron de comunicacion. Èra d’alhors la tematica màger d’aquel acampament per faire que leis adesions arriban totjorn mai nombrosas. A l’ora d’ara, lo Fòrum ten un pauc mai de 300 sòcis que siegue de personas fisicas, moralas, d’estructuras o encara d’elegits. Pasmens tot aquò se deu gerir e fau de basas solidas a la comunicacion intèrna coma extèrna. Maugrat sa preséncia sus internet, especialament dau costat dei malhums sociaus, demòra encara fòrça òbra a menar dins aqueu domeni. La situacion en Provença, pasmens, es delicata (La Setmana n°1068) amb una baissa e un redesplegament drastic dei subvencions regionalas. D’uneis operators de terren, sòcis dau Fòrum d’òc coneisson de dificultats sevèras. Se questionan sus lor capacitat a menar d’accions o simplament sus lor pròpria existéncia. Demanderiam doncas a Matieu Casanova, salariat de l’Ostau dau País Marselhés e sòci de la comission cultura e comunicacion, coma lei participants au Fòrum se posicionavan dins aquela marrida passa.

 

La Setmana — Quinas decisions foguèron presas fòra la question de la comunicacion ?

Matieu Casanova — S’agissiá mai que mai de pichòtei decisions estructuralas, coma per exemple la decision de faire una letra electronica mesadiera per assabentar lo monde. Circularà entre nosautres puei servirà per anar cercar d’autrei personas pas forçadament informadas deis activitats dau Fòrum. Èra tanben l’occasion d’una presa de consciéncia dau public present. I aviá gaireben 100 a 150 personas vengudas representar lor associacion a Pertús, çò qu’es pas mau. An ben comprés que i aviá un besonh vertadier de comunicar sus nòstreis accions e de parlar dau Fòrum un pauc pertot.

 

LS — E d’accions un pauc pus « militantas » èran tanben a l’òrdre dau jorn ?

MC — Pas per lo moment. Fau dire que lo contèxt provençau es un pauc particular. Lo Fòrum d’òc es lo recampament de mai d’una sensibilitat pron divèrsas. Es una mena d’equilibri entre la sensibilitat occitanista que coneissèm e la sensibilitat felibrenca. Fa totjorn mestier de gardar aquel equilibri e doncas d’accions concretas, « fisicas », son pas encara previstas perque son pas dins l’ADN de totei.

 

LS — Cossí los sòcis del Forum d’Òc se posicionan respècte al redesplegament de las subvencions regionalas ?

MC — Lo president dau Forum, qu’es Guy Revèst (un felibre), aguèt un discors pron ofensiu a Pertús. Condemnèt clarament (sens lei nommar) aquelei que fin-finala fan pas grand causa per la lenga, que vòlon contunhar lei meteissei garolhas e nos empachan d’avançar tot simplament. I a pas agut de presa de paraula dirècta a destinacion deis elegits, especialament aquelei que son encargats dei subvencions. Lo Fòrum a ges de finançament. Es « finançat » per leis adesions dei cinc associacions fondatoras [AELOC, APLR, Calandreta, Felibrige e IEO, NDR] mai per l’ora avèm pas ges de subvencion.

 

LS — ... Aquò dona una cèrta libertat de paraula ?

MC — (rire) Sabi pas s’aquò dona una cèrta libertat de paraula perque la tòca es d’anar cercar aqueleis ajudas publicas. Per poder foncionar, fau un salariat permanent per la comunicacion. Es indispensable se volèm contunhar de créisser. D’un biais o d’un autre, faudrà ben anar cercar aquela moneda.

 

LS — I a una solidaritat que s’es creada entre sòcis dau Fòrum, respècte a aquela situacion ?

MC — Encara un còp, es un pauc particular en Provença. I a un respècte mutuau entre nosautres emai siguem fòrça diferents. Es ja pas mau, ai enveja de dire. Cadun respècta la vision qu’a l’autre de la cultura, de la lenga, etc. Fasèm totei d’esfòrç per trabalhar ensems e es ja quauqua-ren quand sabèm qu’en Provença foguèt pas totjorn ansin entre occitanistas e felibres, per exemple. Nòstrei esfòrç se centran mai que mai sus aquela ententa comuna e sa visibilitat.

 

LS — Coma se pòrta l’Ostau dau País Marselhés d’aquesta passa ? Avèm agut parlat dins una edicion precedenta de dificultats ligadas a la baissa de las subvencions regionalas e una risca d’arrèst de las subvencions de la part de la comuna de Marselha. La situacion a evolucionat ?

MC — Non pas ges. Çò qu’ensajam de far es tot simplament d’anticipar. Nos siam donats d’objectius chifrats per tota l’annada. Es a dire que cada mes nos fau far rintrar tant de moneda per èsser segurs de poder gardar nòstre locau. Es un enjòc de gardar aquel otís indispensable qu’avèm creat. Es un local pron polit. Nos permet d’aculhir d’artistas, de concèrts e d’obradors que se tenon aquí cada jorn.

 

LS — Capitatz a tenir los objectius ?

MC — Aquò va segon lei mes. L’estiu es un pauc complicat que i a pas grand monde. Agrada mai ai gents d’anar a la plaja (rire) ! L’activitat es doncas mendra. Siam a trabalhar sus un projècte de pichòts festivaus occitans a Marselha que se debanarián entre lo mes de mai e de junh. Nos anam tanben virar cap a d’accions « patrimonialas ». L’objectiu es de prepausar regularament de visitas istoricas de quartiers e de la vila, per diversificar lei mejans de finançament.

 

ENTREVISTA CLAMENÇ PECH

 

Inf. : http://forumdoc.orghttp://www.ostau.net 

Bastir una comunicacion eficaça per lo fòrum d'òc

Lo congrès annuau dau collectiu d'associacions occitanistas e felibrencas de Provença se debanarà aqueste dissabte 18 de març a Pertús (84). La tòca es de contribuir ai reflexions actualas e questionar la plaça de la lenga e de la cultura nostrei dins un contèxte actuau pas fòrça favorable. Lo tèma chausit es « bastir una comunicacion eficaça per lo fòrum d'òc ». La jornada serà inaugurada per l'intervencion dau president dau Fòrum, lo felibre Guy Revest. Lei debats seràn virats devèrs la comunicacion, « una prioritat » segon leis organizators. Après un estat dei luecs de la promocion de la lenga a Pertús, Renaud Savy (de l'agéncia Komgourou) prepausarà de conselhs per utilizar mielhs leis otís de la comunicacion numerica. Mireille Benedetti, cònse-adjoncha de La Ciutat, conselhèra regionala e presidenta de l'Agéncia Regionala per l'Environament, asajarà de respondre au besonh de dinamizar lei ressorças dau Fòrum « per un messatge comun ».

Lei tres comissions dau Forum d'Òc s'acamparàn de 15 o 30 a 16 o 30, per menar de debats sus lo desvolopament duradís, lei poders locaus, la comunicacion, l'ensenhament e la formacion. Lei trabalhs en comission seràn restituits e discutits en public. Matieu Casanova, baile de la comission Cultura e Comunicacion dau Fòrum, presentarà enfin lei chausidas fachas en matèria de comunicacion per lo Fòrum, un objectiu essenciau d'aquela passa en Provença.

Inf. : Ostau de la cultura e deis associacions, 167 carriera Resini, 84120 Pertús / Corric —This email address is being protected from spambots. You need JavaScript enabled to view it./ Tel. — 06 84 73 67 65 / Site — forumdoc.org

Provença : Marca-mal se passeja

Lo vent vira en Region PACA ? Es l'impression qu'aviam a la seguida de la fòrta baissa de la subvencion regionala acordada a la federacion provençala de Calandreta. Aquò foguèt confirmat per d'autras baissas dins las ajudas acordadas a d'autras associacions occitanistas de la region.

Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Papagai

Papagai es la revista occitana dels pichonèls. Prepausa cada mes doas istòrias, de jòcs, una pagina de vocabulari e un dorsièr en rapòrt amb un dels dos 

+