Uei : 26/09/2017

Tolosa : signatura d'una convencion-quadre per l'ensenhament de l'occitan.

Lo 26 de genièr, la ministra de l'Educacion nacionala Najat Vallaud-Belkacem signèt la convencion-quadre per l'ensenhament de l'occitan amb L'OPLO e los representants de las doas Regions-sòcias, Novèla-Aquitània e Occitània / Pirenèus-Mediterranèa. 

Es cap a onze oras que Najat Vallaud-Belkacem desbarquèt a l'escòla Peire Godolin, un dels sièis establiments bilingües de la comuna de Tolosa. Après aver rencontrat lo director, la ministra s'assetèt al mitan de mainatges de CP per seguir un cors de matematicas en occitan. Primièr intidimidats per la preséncia d'aparelhs-fòto e de cameràs, los enfants seguiguèron lor leçon de faiçon naturala e se paguèron lo luxe d'aprendre d'unes mots d'occitan a la dòna Vallaud-Belkacem. La matinada se clavèt sus una taula redonda amb la còla ensenhaira e de parents. Expliquèron lo foncionament de l'ensenhament bilingüe a paritat orària e tanben las rasons que pòdon menar a marcar son enfant dins un establiment d'aquela mena.

Lo segond temps de la venguda de la sòcia del govèrn foguèt ni mai ni mens que la signatura de la convencion-quadre de desvolopament de l'ensenhament de l'occitan amb la presidenta de l'Ofici Public de la Lenga Occitana (OPLO) e los representants de las Regions qu'i prenon part (Novèla-Aquitània e Occitània / Pirenèus-Mediterranèa). Dins son discors, Najat Vallaud-Belkacem faguèt part de son estrambòrd respècte a las doas grandas reformas menadas pendent lo quinquenat, a saber la lei de refondacion de l'escòla e tanben la reforma del collègi. Las considèra coma una «  oportunitat  » per las lengas regionalas. La Setmana interpelèt la ministra sul fait que la primièra version de la lei de refondacion de l'escòla conteniá pas cap d'allusion a las lengas ditas regionalas e sus las consequéncias de la reforma del collègi sus lor ofèrta d'ensenhament. 

La ministra interpellada

La ministra nos remandèt a las retranscripcion dels debats parlamentaris tocant a la lei de refondacion de l'escòla (portada per son predecessor Vincent Peillon) mas afortiguèt que las lengas ditas regionalas èran plan presentas dins la reforma del collègi. Son efectivament presentas (e de faiçon generalizada) dins los EPI mas quid de las consequéncias concrètas (coma la desaparicion presumida d'opcions d'occitan dins d'unes establiments de l'acadèmia de Montpelhièr) ? Pas de responsa. « Avançam d'un an l'aprentissatge de la LV2 [tre la classa de cinquena, NDR] puèi que fins ara caliá esperar la classa de quatrena, çò nos a dit, aquel avançament s'acompanha d'una augmentacion del nombre d'oras de lengas vivas. Aquò val per las lengas regionalas puèi que pòdon èsser causidas en LV2. Enfin, la reforma del collègi a totjorn previst que los escolans del primari qu'an causit una primièra autra que l'anglés poirián, dins l'encastre de las classas bi-lengas de continuitat, (...) e las lengas regionalas pòdon far part d'aquelas classas bi-lengas. Vos asseguri doncas que i a pas un argument que tenga per dire que la reforma del collègi pòrta prejudici a l'ensenhament de las lengas regionalas ». Presenta dins la sala, la rectora de Montpelhièr Armande Le Pellec-Muller se defendèt. « Avèm mantengut TOTES los dispositius d'ensenhament de las lengas regionalas, çò nos a dit, que siá per l'occitan o pel catalan i a pas agut cap de diminucion, al contrari. (...) Al total, pel bilingüe francés-occitan, primari e segondari confonduts, avèm 22 500 escolans ». 

Quins objectius per la convencion ?

Dins la mesura que l'acadèmia de Montpelhièr fa partida de las acadèmias implicadas dins l'encastre de la convencion-quadre, demandèrem a la rectora se s'anava « alinhar » sus las de Tolosa e Bordèu per çò qu'es dels objectius en matèria de l'ofèrta d'ensenhament. « Nos alinharem sus una dinamica que pasmens partís del nòstre estat dels luòcs de partença, çò nos a dit, tot aquò per se poder donar d'objectius ambicioses, quala que siá l'acadèmia. (...) Ieu çò que m'interèssa, que siá en lenga regionala o en lenga viva estrangièra, es qu'un escolan qu'arriba en seisena siá dins una dinamica plurilingüa. Aquò implica la mestresa de tres lengas : la lenga mairala, una lenga estrangièra e una lenga regionala ».

L'abséncia d'objectius comuns entre las diferentas acadèmias implicadas nos foguèt confirmada per Estève Cròs, director de l'OPLO : « l'objectiu de la desmarcha es d'aver d'objectius que sián partejables, atenhables, mesurables e fixats dins lo temps, çò nos a explicat, l'escasença es 2022. Comprenètz plan que sus una acadèmia coma Limòtges ont sèm mai dins lo lançament d'un procèssus, lo lançament d'una dinamica per l'ensenhament de l'occitan, poirem pas arribar al meteis nivèl que lo de l'acadèmia de Montpelhièr ont l'ensenhament bilingüe representa 1% dels efectius dins lo primari o encara lo de l'acadèmia de Tolosa ont representa 1,9 %. Se farà en foncion de cada territòri. En tot cas (seràn los elegits qu'o diràn), podèm esperar que i aurà d'objectius ambicioses mas realistas per que siá mai qu'una promessa, valent a dire quicòm d'engatjant e subretot realizat a la fin de 2020 ». 

Reaccion de Dàvid Grosclaude

L'ancian conselhièr regional Dàvid Grosclaude, a l'origina de la creacion de l'OPLO, reagiguèt lo quite jorn de la signatura dins un comunicat ont faguèt part de sos regrets tocant a la quita abséncia d'objectius chifrats. « En aqueth tèxte, signat per Najat Vallaud-Belkacem, non i a pas nat engatjament chifrat, çò escriu, las chifras que demoran a negociar e a declinar en cada academia. Qu’ei la clau ; shens aquò los objectius que demoraràn mauclars e blocatges administratius que poderàn tirar tota eficacitat a aquera convencion ». En rapelant en passant que li calguèt far una cauma de la fam, sostenguda per « milierats de personas », per que l'Estat signèsse los arrestats autorizant la creacion de l'Ofici. L'autre punt preocupant per el es la participacion modèsta de l'Estat al budgèt de l'OPLO. « Que senhali qu’au dia de uei, e qu’ac arregreti, la participacion de l’Estat au foncionament de l’OPLO qu’ei mei que simbolica, çò ditz, que representa ua soma globau de 65  000 euros, sia raportada au nombre d’abitants de las duas regions pertocadas per l’occitan, 0,72 centime d’euro per persona ! » Sèm plan luènh, per exemple, dels 860 000 euros versats per l'Estat al budgèt de l'Ofici Public de la Lenga Basca (3,4 milions al total), per l'annada 2016. A veire se aquela part estatala dins lo budgèt de l'OPLO augmentarà amb lo temps.

Clamenç Pech

 

 

Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Papagai

Papagai es la revista occitana dels pichonèls. Prepausa cada mes doas istòrias, de jòcs, una pagina de vocabulari e un dorsièr en rapòrt amb un dels dos 

+