Uei : 19/09/2017

Musica : Courtial x Kogane, un duo ròck poderós !

Paulin Cortial e Dimitri Kogane forman un duo d’una granda energia e dobèrt als « featurings »... Coma aquí amb Arnaud Cance e Antoine Charpentier lo 17 de mars al Club a Rodés ! (Fòto Arnaud Vieilledent)

Un aire tradicional se pòt empeutar sus qué que siá. N’avèm encara aguda la demostracion amb lo tròç « La Marion » que se passeja sus YouTube. Aquela vidèo, a penas doas setmanas après sa mesa en linha, foguèt vista 850 còps. Cara e cara, Paulin Cortial a la guitarra e Dimitri Kogane a la batariá tornan prendre aquela cançon que lor grand lor aviá benlèu mormolhada a las aurelhas per las nos melhor destapar en seguida. Atal, aquela cançon contant l’amor malurós d’un boçut per una joventa tan polida coma crudèla se planta sus de riffs e ritmes ròck saturats e enrabiats... E aquò fa de ben. Es coma se lo duo anglés Blood Red Shoes (qu’a adoptada la meteissa configuracion amb guitarra e batariá) èra tombat sus un libre de collectatges d’Al Canton e qu’aviá decidit de ne far un repertòri nòu. Lo clip que fan virar los dos artistas foguèt enregistrat en una presa, en condicions de concèrt. Se vei sus las caras dels dos musicians un grand dinamisme mas subretot un grand plaser a far la musica que los agradan. Lo sentiment es mutual. Quand a acabat d’espiar la vidèo, l’internaute lambdà, pausat davant son ordenador amb los escotaires sus las aurelhas, lo còr fasent tifa-tafa, pòt pas dire qu’una frasa : « ne vòli mai ! ». Aquel primièr tròç « La Marion » es pas qu’una ulhada de çò que lo duo es capable. Son ja prèstas d’autras composicions amb de tèxtes escrits per Cortial mas servant totjorn un ligam amb la cançon tradicionala. S’i entremesclan de motius pròpris als dos genres musicals que s’entrebescan. Mas al final los arrengaments causits pels dos artistas permeton de far l’unitat entre totas aquelas sonoritats. 

Una longa istòria comuna

Fa sèt ans que los dos garris se coneisson. An especialament jogat amassa dins lo grop « Madame Claude », grop de ròck francés ont avián ja per costuma de metre lo rambalh sus scèna. « Avèm totjorn agut enveja de far de musica a dos, çò nos a dit Paulin Cortial, nos sèm totjorn plan endevenguts sus totes los projèctes als quals avèm participat ». Dimitri Kogane (originari de Dordonha) ven mai que mai del jazz e jòga amb tot un fais de grops. Coneissèm mai Paulin Cortial per son trabalh sus las musicas trad’, en particular amb sos parents (Joan-Loís e Rosalina) amb los quals partegèt l’empont al cors de la darrièra Estivada per una creacion (La Setmana n°1056). A aquel moment, en mai de sos parents, cantèt còsta la cantaira Alidé Sans, lo trio Tres a Cantar o encara Antòni Charpentier jogaire de cornamusa. 

Un son « frontal »

Las inspiracions dels dos garis son divèrsas. Per çò qu’es de Paulin Cortial, i a primièr lo grop bearnés Artús que desbartassèt pro de camins per que d’estiles qu’òm pensava impossibles a maridar s’encontrèsson enfin. « An dobèrt de nombrosas pòrtas entre musicas actualas e musicas tradicionalas » çò pensa Paulin. A tanben prestat una aurelha atentiva als californians de Queens of the Stone Age, embaissadors del « stoner rock » dins las annadas 90. Es un son als ritmes repetitius, ipnotics e als efèits pro embriagants sus las guitarras. Amb lo duo Courtial x Kogane, vesèm una autra de las nombrosas còrdas que Paulin ten a la guitarra. Lo son es explosiu, enrabiat, fa venir la sudor... es ròck. « Aviam enveja de far quicòm d’eficaç, de simple, de frontal, çò nos a dit Paulin Cortial, quand causissètz una formula en duo, i sètz un pauc obligat ». Aquela volontat de simplicitat los a quitament butats a se dispensar d’aver un bassista... Aquò rai, que de nombroses grops de ròck an ja causit abans eles de far çò-meteis e puèi lo vòstre setmanièr dispausa pas de pro de paginas per entamenar un debat sus la preséncia necessària (o pas) d’un bassista dins una formacion ròck. La formula en duo foguèt tanben pensada dins la perspectiva de se produire sus l’empont... a mantuns. « Nos agradariá de far de tròces amb de musicians de l’endret ont jogariam, çò nos a dit Paulin Cortial, poiriá èsser qual que siá jogant de qualque estile que siá ». 

Projèctes annèxes

De son costat, Paulin Cortial contunha de menar de collaboracions amb d’autres artistas e dins d’estiles variats. Amb son paire Joan-Loís e lo cantaire-guitarrista-percussionista Arnaud Cance, forman lo trio « Pòm Pogo Dòm » que compausa de títols a destinacion dels mainatges. Cada tèxte escrit a una vocacion pedagogica. S’articula a l’entorn d’un tèma particular, se compausa d’un vocabulari pro ric  destinat a transmetre la lenga e la cultura occitanas als petitons. « Per ieu es essencial pr’amor los ensenhaires mancan encara tròp de material d’aquela mena, çò nos a dit, la creacion pels mainatges es una bona ajuda pels professors ». Es Joan-Loís Cortial (ensenhaire retirat, justament) qu’es a l’iniciativa del trio. Porgís los tèxtes interpretats pels artistas dont d’unes vièlhs de mai de vint ans. La creacion a l’Estivada de 2016 consacrèt lo trabalh comun menat amb l’aranesa Alidé Sans. Fa de temps que los dos musicians viran amassa, en formula mai leugièra. Mesclan armoniosament lor son reggae e ròck acostic. Non solament contunhan de fargar un duo mas un album es dins los tudèls. Elaborat amb de musicians suplementaris, es esperat per la debuta de 2018. L’idèa per Alidé e Paulin es de produire aquel disc en autogestion totala. Per aquò far, anaràn duscas a crear lor pròpri labèl.  En esperant, podèm pas que conselhar als afogats de ròck (stoner o autres) d'anar veire çò que Cortial x Kogane a dins las tripas... Perdon, los tripons !

CLAMENÇ PECH  

Inf. : La pagina Facebook de Courtial x Kogane

  • Publicat dens Culture
Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Papagai

Papagai es la revista occitana dels pichonèls. Prepausa cada mes doas istòrias, de jòcs, una pagina de vocabulari e un dorsièr en rapòrt amb un dels dos 

+