Uei : 21/04/2018

Valerie Cazenave-Bernadou, militanta discreta

Valerie Cazenave-Bernadou qu'ei regenta a la calandreta de Banhèras (65), despuish 20 ans. La soa tòca ? Ensajar de convéncer los pairs de l'interès d'estudiar la lenga nosta.

Valérie Cazenave-Bernadou, aquiu ua hemna de ponha. Be sap çò que vòu e çò que ne vòu pas. Quan l’avem contactada, ne tienèva pas especiaument a parlar sonque d’era, o meilèu quiò, mes deu tribalh que hè dab los mainatges de la Calandreta de Banhèras (65). La Calandreta que hestegè los sons 20 ans d’existéncia l’an passat, e la bigordana que hasó partida deus « hòus » com ac ditz, qui’s lancèn dens l’aventura.

Conferéncia sus l'avantatge deu bilingüisme prendiu e innovacion pedagogica a Pau (64)

Lo CREO Aquitània (Collectiu Regionau tà l’Ensenhament de l’Occitan e en occitan en Aquitània) en partenariat dab Oc-bi(associacion de parents e regents de classas bilinguas), sostiengut per la Comunautat d'Aglomeracion Pau Bearn Pirenèusqu’organizan ua conferéncia-debat suus tèmas deus avantatges deu bilingüisme prendiu e de l’innovacion pedagogica divés lo 27 d’abriu a 18 h au Pabalhon de las Arts (Plaça Reiau a Pau, 64).

Legir l'article sancèr ací

Reaccion del Collectiu Périgord Occitan aprèp la declaracion d'una deputada sus l'ensenhament immersiu

Lo 29 de març, la deputada LREM Sylvie Charrière a fach un apròchement entre l’ensenhament de las lengas regionalas e lo terrorisme pendent de discutidas pertocant al projècte de lei per simplificar e mai enquadrar lo regime d’obertura e de contròle dels establiments privats a l’Assemblada nacionala.

Los rets Calandretas serián l’equivalent de rets terroristas. Es del mens çò qu’a deissat entendre la setmana passada Dòna Charrière, la deputada LREM franciliana. Al moment del debat sus l’integracion progressiva de las escòlas associativas immersivas dins l’escòla publica, la qu’es l’actuala vice-presidenta de la comission cultura e educacion de l’Assemblada nacionala, a pas esitat a comparar los rets educatius Calandretas, Ikastolas, Diwan e Bresserolas, a de rets terroristas. Per nosautres, es un insulte. Un insulte als escolans, als professors e als parents de Calandretas. Mas tanben un insulte a las comunas de Peireguers o de Bergerac coma al departament de la Dordonha qu’ajudan las escòlas Calandretas peiregordinas. Fin finala, un insulte a las associacions coma lo Bornat del Peirigòrd e l’IEO-Novelum qu’an totjorn sostengut financièrament nòstras escòlas a l’ensenhament immersiu en occitan. Se las Calandretas son de rets terroristas, i a aicí fòrça de complicis. Alara, siá Dòna Charrière a fach de provocacion per poder existir politicament, siá vòta a l’Assemblada guidada pel sol embòrniament ideologic, sense coneissença de la realitat d’aquelas escòlas que son de segur immersivas en occitan mas laïcas e gratuitas, aculhissent totes los dròlles o desiran. Volèm donc saupre se los 4 deputats LREM de Dordonha son solidaris de tales prepaus injuriós per totes los peiregordins estacats a la lenga e la cultura millenàrias de nòstre país. Sostenèm quitament que nòstras lengas occitanas, bascas o bretonas… intègran totes los dròlles dins un crusòl comun. Que sián eissits d’aicí de longa soca del Peiregòrd o que sián arribats recentament aicí, aprene fòrça jove la lenga locala d’aicí fach d’eles de dròlles que se senton en cò de eles partejant l’amor de nòstre país. Al moment del meteis debat, Alexis Corbière, deputat tanben francilian e pòrtavotz dels Insoumis, a per de son costat sosentendut que las escòlas immersivas èran dangerosas per l’aquisicion del francés coma per la coësion nacionala. Aquiu encara los arguments son ideologics e non fondats. Los dròlles eissits dels rets de las classas coma Calandretas, coma los eissits de las filièras bilinguas publicas, obtenon de resultats equivalents o melhors que los dròlles eissits de las filièras monolingüas. E a çò que sabèm, los extremistas religiós o politics que remeton en causa uèi la Republica, son pas eissits de las escòlas occitanas, bascas o bretonas. Lo Collectiu Périgord Occitan reïtèra son engatjament al près de las escòlas Calandretas coma al près de las classas bilinguas publicas. Uèi, l’ensenhament immersiu es experimentat dins de classas publicas al País-Basco francés e aquerò, gràcia a l’obertura d’esperit e al bon sens del Sénher lo Rector de l’Acadèmia. Perque sèm convencuts, l’avenir de nòstras lengas istoricas de França passa per la transmission escolara e aquerò, dempuèi joves. Dins nòstras escòlas, nos cal desvolopar l’ensenhament bilingüe occitan/francés, que siá en Calandreta o en classa bilingua publica, acceptam pas de nos far insultar per de deputats parisencs que coneisson pas res a la realitat de nòstra lenga e de nòstre país mas qui se permeton de nos jutjar e de condemnar l’ensenhament de nòstra lenga.

Lo Collectiu Périgord Occitan

Per memòria : 

Intervencion de la deputada Charrière : https://www.youtube.com/watch?v=Ooc5MGvTtDkcom/watch?v=Ooc5MGvTtDk

Intervencion del deputat Corbière : https://www.youtube.com/watch?v=UASgVv8QMXQ&feature=share

Conferéncia sus l'avantatge deu bilingüisme prendiu e innovacion pedagogica a Pau (64)

Lo CREO Aquitània (Collectiu Regionau tà l’Ensenhament de l’Occitan e en occitan en Aquitània) en partenariat dab Oc-bi (associacion de parents e regents de classas bilinguas), sostiengut per la Comunautat d'Aglomeracion Pau Bearn Pirenèus qu’organizan ua conferéncia-debat suus tèmas deus avantatges deu bilingüisme prendiu e de l’innovacion pedagogica divés lo 27 d’abriu a 18 h au Pabalhon de las Arts (Plaça Reiau a Pau, 64).

La Serada del Cercle Occitan de Narbona

Dissabte 7 d'abril 2018, sala de las fèstas del Palais del Trabalh a Narbona, lo Cercle Occitan de Narbona a organizat amb l'indispensable sosten de la vila de Narbona, la participacion compliça de Calandretas, la collaboracion totjorn plan eficaça de Ràdio Lenga d'Òc e l'investiment dels membres benevòles de l'associacion, una polida serada festiva e gratuita apelada « la Serada ». 

S'agís d'una serada occitana transgeneracionala, dobèrta a totes, parlant o non « nòstra lenga », que permet d'aprene e de practicar las danças tradicionalas, de descobrir las creacions musicalas occitanas, o tot simplament de passar un moment convivial de « paratge ».  Tre 17 h, cadun a pogut aprene o tornar veire, jos los conselhs de Céline, los pas de danças tradicionalas de nòstre patrimòni cultural.

Las Farfantelas, corala feminina, an acompanhat la degustacion de preparacions saladas e sucradas elaboradas pels parents d'escolans de Calandretas, abans que los dançaires envestiscan la pista de dança. Los musicaires del grop La Talvera an fach bolegar la sala de 21 h a 23 h 30 pel mai grand plaser de las 150 personas presentas.

« Occitana, mas totjorn dins una obertura sul mond, la musica de La Talvera pren sos rasics dins la tradicion mas creada de ligams dins la contemporaneïtat en getant de ponts, d'una generacion a l'autra, d'un continent a l'autre, d'un temps a un autre ». L'associacion organizatora, lo Cercle occitan de Narbona, qui prodiga dempuèi mai de 40 ans de cors d'occitan gratuits a presentat pendent aquela serada son taulièr de libres, diccionaris, CD, DVD, drapèls e de nombrós articles a las colors occitanas.

La Serada foguèt una capitada e mercé plan a totes los dançaires

Visitar lo site : www.cercle-occitan-narbona.fr

Cercle Occitan de Narbona
(Fòto ©Cercle Occitan de Narbona)

  • Publicat dens Culture

Estudiants contra l'ORE — Los blocatges e las manifestacions contunhan

Las universitats occitanas, totjorn en dificultat. L'Universitat Paul Valèry de Montpelhièr travèrsa una de sas crisis mai importantas amb una grèva de 4 meses e son blocatge que la paralisa dempuèi un mes. Los estudiants se mobilizan contra la lei Vidal de l'ORE, relativa a l'Orientacion e la Reüssida dels Estudiants.

L'Universitat occitana a decidit de far passar los examèns als estudiants d'aicí la fin del mes de mai. 780 examens se faràn pel biais del numeric via la platafòrma Moodle o per corric. Una solucion importanta per la direccion per pas penalizar los 20 000 estudiants de la facultat. D'estudiants e sindicats estudiants son pas convençuts pel manteniment dels examèns. Sonque la mitat dels cors foguèron balhats en rason de la grèva. « es un non-respècte de las modalitats inicialas d'examèn, çò qu'es totalament inadmissible. En sabent que per un examèn, cal èsser prevengut doas setmanas a l'avança que totes los estudiants sián al fial », ce diguèt Dyla, estudiant en Istòria L1.

Lo pòste de conselhièr pedagogic departamental en dangièr, lo CREO Lengadòc reagís

L’associacion professionala de l’ensenhament de l’occitan dins l’Acadèmia de Montpelhièr (CREO Lengadòc) recebèt la marrida suspresa d’aprene que lo pòste de Conselhièr Pedagogic Departamental (CPD) en occitan èra menaçat dins Eraut. Aprenguèron la novèla pels servicis academics del departament lo 13 de març passat. Escriguèron una letra adreçada a la Rectora de l’Acadèmia de Montpelhièr, Béatrice Gille, lo 15 de març per fa saupre lor indignacion : « Lo pòste de CPD occitan èra pas estat publicat al movement 2017. Una solucion provisòria èra estada mesa en plaça, solucion garrèla a prepaus de la quala aviam fach saupre nòstra inquietud al sénher lo director academic dels servicis, lo 19 de setembre de 2017 e a dòna lo Rector, lo 26 de genièr de 2018. Uèi, trobam intolerable la supression d’un pòste qui existís dempuèi l’organizacion de l’ensenhament de las lengas regionalas en 1982 (circulara 82-281) e dont la circulara 2001-166 definís la foncion », escriguèt Marie-Jeanne Verny, presidenta del CREO-Lengadòc.

Lo CPD es destinat dins cadun dels departaments de las acadèmias concernidas pel programa e a per mission d’ajudar a la mesa en òbra e al desvolopament de las diferentas modalitats d’ensenhament de las lengas regionalas (circulara 2001-166). Lo CREO met en garda lo Rectorat de Montpelhièr sus las consequéncias qu’aurián la supression del pòste, tot lo sistèma d’ensenhament de l’occitan al primièr gra seriá en perilh. Lo CREO-Lengadòc es sostengut pels sindicats SNUIPP e SE. La mobilizacion es fòrta, « desesperam pas », nos diguèt Marie-Jeanne Verny.

Una peticion contra la supression del pòste de conselhièr pedagogic departamental en occitan dins Eraut es estada lançada suul net a l’adreça : http://www.petitionpublique.fr/?pi=P2018N49966.

« Sense CPD occitan, pas de projècte pedagogic academic en lenga occitana ni de seguit per las escòlas, sense CPD occitan, pas d'amassada departamentala en junh de las classas que participan al projècte, sense CPD occitan, pas d'estagi academic de formacion, sense CPD occitan, pas d'intervencion en lenga e cultura occitanas dins las escòlas ». Los ensenhaires d'occitan d'Eraut amb lo sosten del CREO Lengadòc apèran los ensenhaires, los parents, los elegits, responsables sindicals e los ciutadans que s'opausan a la barradura del pòste de CPD occitan, a manifestar davant lo Rectorat deman, dimècres 4 d'abril a 13 oras 30.

Inf. : Rectorat Montpelhièr, 31 carrièra de l'Universitat — 34000 Montpelhièr — Site : www.felco-creo.org — Tel. : 04 67 66 33 31.

Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+