Uei : 19/02/2018

Mòrt de l'autor occitan Jòrgi Gròs

L'autor e militant occitanista Jòrgi Gròs se moriguèt divendres 16 de febrièr a l'atge de 95 ans. Nascut a Nimes en 1922, Jòrgi Gròs foguèt institutor e adèpte de las tecnicas Freinet, de qui èra un amic personal. Son enfança a estada noirida d'occitan, lenga practicada en familha mas tanben lenga literària d'Antoine Bigot, que fòrça de nimesencs aimavan recitar las faulas. Es l'autor de « Lo batèu de pèira » (1984), « Còntes de la Fònt de Nimes » (1997) o encara « Lei bugadièiras blavas » (2014).

Sos contes son per la màger part destinats als dròlles mas fòrça s'adreçan a un public adulte. « Es segurament la conjugason entre l'umor, l'espontaneïtat e l'umanitat del contaire-pedagòg, son escota del monde, sa mestresa d'una lenga rica, justa e variada dins sas tonalitats e la sciéncia critica de l'erudit, qu'explican la qualitat de son òbra », çò contèt l'Universitat Paul Valéry de Montpelhièr sul site 1000 ans de literatura d'Òc.

Florian Vernet, professor emerit e gran escrivan pedagòg, conclusiá son prefaci als « Contes de las garrigas nautas » : « Aqueles tres contes, com totes los qu'a escriuts pendent sa vida, valon tanben per la lenga, aquel occitan de Provença tant fluid, tan elegant, tant classic... Un dels miracles dels contes capitats, es aital de rendre accessible e sensible a totes la diversitat, la beutat de còps tragica e la vertiginosa complexitat del mond ».

Una de las doas calandretas de Nimes pòrta son nom. La FELCO e lo CREO Lengadòc asseguran lor collèga Claudina Paul del CREO Lengadòc e tota la familha de lor amistat entretesida. Rendon un primièr omenatge a Jòrgi Gròs en partejant sa biografia aicí.

Sos obsequis se debanaràn dijòus 22 de febrièr. Visitas possiblas de 9 o 30 a 10 o 30 a la cambra funerària Pascal Leclerc, 47 bd Talabot a Nimes. Un darrièr omenatge li serà rendut lo 22 al Crematorium de Nimes a 11 oras.

Fòto : Mari-teleoc

  • Escriut per

Fasètz la Lenga en Cabardés del 6 al 17 de març

L'associacion Fasètz la lenga organizèt divendres 16 de febrièr, un loto occitan dins la sala de la Tor. La crompa dels cartons, l'enonciat de las chifras e dels nombres, los comentaris especific al numerò sortit e fin finala los ganhaires qui s'escridan « quina » tot èra exprimit en occitan, çò qui rendèt la serada saborosa e de còps fòrça amusanta.

L'associacion Fasètz la lenga a per objectiu de far viure e conéisser la lenga e la cultura occitanas dins totas lors formas d'expression dins 5 vilatges partenaris del Cabardés : Aragon, Mossolens, Puègnautièr, Ventenac Cabardés e Vilagalhenc.

Fasètz la lenga prepausa una programacion musicala e artistica del 6 al 17 de març sul territòri del Cabardés per festejar l'occitan coma cal.

Lo 6 de març, a 18 o 30 a l'Espaci René-Douce, Ventenac (11), vernissatge amb Cossí que siague, corala que fa partida de l'associacion. Canta un repertòri compausat de cançons tradicionalas, cançons d'autors contemporanèus e de creacions. Serà seguit d'un concèrt de la cantaira aranesa Alidé Sans a 20 o 45. Pendent la jornada, Joan Jaume Delpotz contarà dins las escòlas.

Lo 7 de març, Yan Lespoux, ensenhaire, doctor en istòria contemporanèa, farà una conferéncia suls rapòrts entre l'escòla francesa e la lenga occitana d'un biais istoric, a la Sala Emilien-Combes de Mossolens.

Lo 11 de març, Claudi Alranc farà una serada amb sos « Contes de la França d'en bas ». Es un comedian, autor dramatic e contaire originari de Pesenàs en Eraut. Es lo fondator del Teatre de la Carriera qui a prigondament marcat lo teatre en general e teatre occitan en particular aquestas 30 darrièras annadas. L'eveniment se debanarà a la Maison del Cabardés, camin de la Gourguine, a Aragon.

Inf. : Programa del 6 al 17 de març sul site : fabrica.occitanica.eu/fr/agenda/19148 — Tel.: 06 31 55 58 57 — FB : fasetzlalenga — Carta d'abonament pels espectacles pagants : 40 € (espectacles dels 6,10,16 e 17 de març)

  • Escriut per

« Los mots e lo baston »

Me permeti de vos recomendar de legir lo libre « Los mots e lo baston » de David Grosclaude. Es un libre que me sembla utille. Al punt ont ne sèm, amb un engatjament plan limitat de l’Estat (per èsser aimable...) e d’un sosten tanben plan limitat de la classa politica (per èsser aimable un 2nd còp), aquel libre, de mercès lo raconte de l’experiéncia personala de l’autor, insista sul fach que la question de las lengas es politica e non pas simplament culturala. A tanben lo meriti de far veire als occitanistas que l’accion que menam (o que deuriam menar) es plan mai qu’una question d’affèct, e que deu èsser organizada racionalament, tecnicament, en fargant los utisses institucionals que cal, coma l’OPLO per exemple; e que un còp en plaça, los cal butar per los adujar a far çò que devon far.

Ditz tanben que cal d’ambicion per la transmission de la lenga, e aver pas crenta de demandar tant coma los autres, sens complèxe, per tant d’obtener una politica publica... Explica enfin una causa simpla, es a dire que l’ accion per l’occitan deu marchar sus las doas cambas : institucionalizacion d’un costat, volontarisme e militantisme de l’autre. En gròs, « Los mots e lo baston » son aqui per ensajar de nos deresvelhar, e per tornar metre un pauc de colors a la revendicacion occitana... Lo libre es plan escrich, agradiu, sia en occitan-gascon de qualitat (de bon legir per tot occitanofòne) e tanben en francés, çò que pòt èsser plan utille per alfabetisar un elegit, o per explicar al vòstre vesin perque cal transmetre l’occitan... Còsta 12 €, çò qu’es pas car rapòrt a d’autres libres qu’avètz ja crompats, que valon pas tripeta, e que còstan lo doble.

Alan Rainal

  • Escriut per

La Nueit de l'Ors / Carnaval Biarnés 2018

Lo Carnaval Biarnés que vien d’acabà’s a Pau. Deu 8 au 11 de heurèr, los hestaires qu’an passat la barrèra deu hred tà har la hèsta dab lo Rei Sent Pançard. Que comencè lo 8 de heurèr dab la famosa Caça a l’Ors. Ad aqueth parat, lo slamaire Bruno Viougeas (deu grop L’Envoûtante) que perpausè un slam poetic, plan ficelat e originau suu desvelh de l’Ors.

L'autor de « Petite histoire d'Occitanie » a l'Ostal occitan de Narbona uèi

Jean Sagnes es un istorian e especialista de l'istòria contemporanèa, notadament de la del Lengadòc-Rosselhon. Es l'autor dels libres « Jean Jaurès et le Languedoc viticole » (Presses du Languedoc/Max Chaleil, 1988), « La révolte du Midi cent ans après, 1907-2007 » (PUP, 2008) e « Les Biterrois membres de l'Académie Française » (PUP, 2009). L'an passat, sortiguèt « Petite histoire d'Occitanie » a las edicions Cairn. Jean Sagnes prepausar d'explorar l'ensemble geografic nomenat « Occitània », unit entre autres per la lenga.

Uèi, es convidat a venir presentar son trabalh a partir de 18 oras a l'Ostal occitan de Narbona. Un moment d'escambis es previst amb lo public.

Inf. : Ostal Occitan de Narbona, 31 carrièra Jean Jaurès — 11100 Narbona — Tel. : 04 68 65 15 60 — Fb : ostal.occitan

Capture decran 2018 02 16 a 11.30.16

  • Escriut per

Mireia Boya libra

L’anciana deputada de la Candidatura d’Unitat Populara (CUP), Mireia Boya, que compareishó davant la justícia espanhòla pertocant a la soa participacion dens l’organizacion deu referéndum d’autodeterminacion de Catalonha deu 1èr d’octobre.

Arron duas òras d'audicion, la militanta aranesa qu'ei sortida libra lo 14 de heurèr. Qu'a reafirmat que la declaracion d'independéncia deu 27 d'octobre n'èra pas « simbolica ». Totun, Boya ne's considèra pas com satisfèita « quan quate d'enter nosautes son tostemps en detencion ». Segon era, la detencion n'a pas arren a véder dab la justícia mes constitua ua « venjança ».

Mireia Boya qu’organizè ua conferéncia de premsa a Lheida, en Catalonha, lo 12 de heurèr entà s’exprimir suu subjècte e declarar oficiaument que responerà a la convocacion deu jutge Pablo Llarena : « La procedura de la Cort Major qu’ei estada bastida sus un rapòrt de la Guardia Civil chic fondat objectivament, parciau e partida beneficiària de çò sus qué pòrta ». E la militanta d'ajustar : « Qu’avem hèit un referéndum e que l’avem ganhat. Que’ns cau reïvindicà’u amassa. E si devem transformar l’acús qui’ns ei hèit en un procès politic vertadèr entà desvelar la fàcia vergonhosament antidemocratica de l’Estat, qu’i vam. Que sasiram las instàncias internacionaus se cau. Los en fàcia que’s creden juridicament hòrts, nosautes, que credem que la justícia politizada ei lo feblèr de la democracia dont se reclama l’Estat ».

Que devèva presentà’s davant la justícia aus costats d’Anna Gabriel, anciana deputada e pòrtavotz de la CUP, mes aquesta qu’obtienó lo repòrt de comparucion au 21 de heurèr.

  • Escriut per

Festenau vidèo e cinèma Rescontre 2018 (emission Lenga d'Òc)

La 8encha edicion dau Festenau se debana aqueste còp dins la Mediatèca de Marguerittes, pròche Sant Gervasi ont la manifestacion nasquèt. Lo festenau presenta una seria de filmòts realizats per d'amators e de còps que i a de professionaus. I trobam una majoritat de lèu vists en occitan e/ò sus la cultura d'aquí. Dubert en totei e a gràtis, l'eveniment s'espandís sus una tantossada cada an en febrièr. Un reportatge d'Amada Cròs.

Carnaval sul site Occitanica

Carnaval arriba sus la mediatèca numerica Occitanica. Trobaretz de documents e ressorças al torn de l'eveniment festiu. Qué son fecas e godilhs, nombrosas cançons de Carnaval en occitan, de tèxtes dels jutjaments de Carnaval e mai d'informacions sus los autres Carnavals en Occitània.

Article entièr

Carnaval sus la mediatèca numerica Occitanica

Carnaval arriba sus la mediatèca numerica Occitanica. Trobaretz de documents e ressorças al torn de l'eveniment festiu. Qué son fecas e godilhs, nombrosas cançons de Carnaval en occitan, de tèxtes dels jutjaments de Carnaval e mai d'informacions sus los autres Carnavals en Occitània.

La mediatèca numerica collectiva Occitanica, foguèt creada en 2011 pel CIRDÒC de Besièrs. Dona accès al patrimòni cultural e a la documentacion en lenga occitana. Es un projècte participatiu qui repausa sus la participacion d'una quarantena de partenaris com universitats, collectivitats, associacions, centres de documentacions o encara de bibliotècas.

Inf. : http://occitanica.eu/ www.locirdoc.fr — CIRDÒC, 1 bis, baloard Du Guesclin — 34500 Besièrs.

  • Escriut per
Subscribe to this RSS feed

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls. Prepausa cada mes doas istòrias, de jòcs, una pagina de vocabulari e un dorsièr en rapòrt amb un dels dos 

+