Uei : 24/05/2018

Los gavidaires deu jornau independent Le Ravi davant lo tribunau lo 15 de mai per difamacion

Com La Marseillaise e Marsactu, Le Ravi qu’ei un jornau de premsa independenta. Qu’entra dens la soa tretzau annada. La redaccion que mescla los genres, qu’ei a díser qu’ei a l’encòp un jornau dedicat a l’enquèsta, a l’investigacion, mes tanben a l’enveja de restablir los fondamentaus d’ua profession, la deu jornalisme.

« Lo jornalista qui passa per la frinèsta quan las pòrtas e son barradas », çò nse ditz Michel Gairaud. En començar e tà clavar Le Ravi, que s’i pòt trobar dessenhs de premsa, un reportatge dessenhat. L’irreveréncia, un genre qui torna vàder popular despuish l’ataca a la redaccion de Charlie Hebdo lo 7 de genèr 2015.

Per aquestes torns, lo jornau independent provençau que viu un periòde deus particulars puish qu’ei en redreçament judiciari despuish la fin de noveme. Ua fasa que l’equipa a decompausat en dus temps : subervíver prumèr e tornar inventà’s après. Dens aquesta fasa de subervita, Le Ravi qu’a redusit hòrtament los sons efectius. Qu’èran ua equipa de 7 personas, dont 5 equivalents a temps plen. Uei lo dia, que son 6 mes pas que 2 en equivalent temps plen e un tresau pagat a la linha. « Quau que sia la situacion de cadun que demora un engatjament hòrt entà deféner l’existéncia d’aqueste jornau », çò declara lo gavidaire.

Le Ravi qu'ei editat per ua associacion, La Tchatche. Que hè doncas partida d’aquestes mèdias associatius, mèdias independents qui n’apartienen pas a nat gran grop. Qu’ei un mèdia suu quau la redaccion a un gran poder de decision, de contròle de çò qui’s hè. « En deceme de 2014 quan avem anonciat las nostas dificultats, qu’avem lançat çò qu’aperam nosautes “ Couscous bang bang ”, çò precisa Michel Gairaud, ua sòrta de lhevada de hons participativa. Un clinhet a Kiss Kiss Bang Bang dab un comptader. Qu’ei pro ambiciós, que’ns caleré aver 5 102 abonats en 2015, a saber que n’avem adara 1200 ». La redaccion que notè alavetz un vertadèr « efèit Charlie » arron los atemptats. Ua presa de consciéncia que Le Ravi espèra véder perdurar. Qu’an ua istòria dab lo jornau satiric Charlie : « N’èram pas d’acòrdi dab tots çò que disèvan. Sus la question de la libertat de dessenhar, de caricaturar, e tanben de blasfemar, qu’èm tostemps estats darrèr eths. En 2012, qu’avem hèit debats dab Charb a Marselha. Ua dessinatora de Charlie que tribalhava a còps dab nosautes ».

Contra l’estandardizacion

Lo jornau qu’a ua especificitat, qu’ei en Provença, basat a Marselha, e qu’ei difusat dens lo Vauclusa, las Hautas Aups e drin dens las Aups Maritimas. Lo hiu conductor deu Ravi qu’ei la democracia locau e lo son foncionament. Cada mes, la redaccion provençau que hè un « contròle tecnic de la democracia ». Los jornalistas que’s convidan dens un conselh municipau d’ua grana o d’ua petita vila, e que descriven l’amassada minuta per minuta, « drin com un comentari d’ua partida esportiva ». Que podem atau véder la governança deu maire, lo temps de paraula que dèisha a l’oposicion. En PACA, Provença Aups Còsta d’Azur, que son sometuts a ua crisi a l’encòp sociau e identitària dab ua extrèma dreta florissenta, « Qu’èm la region on i a lo mei gran nombre de maires FN de França, la region on i a la sola deputada FN de França, la region on i a los dus sols senators FN deu país ». Segon lo gavidaire qu’avem un problèma de pluralisme de la premsa a l’escala nacionau mes tanben locau. Que i a ua grana estandardizacion au nivèu deus contienguts. Que i a doncas ua vertadèra necessitat de har víver ua premsa independenta.

Ajudas a la premsa

Questionat sus la crisi qui tòca la premsa independenta aquestas darrèras annadas, lo sénher Gairaud que declara que quitament dens lo numeric, qu’ei un camp hèra concurrenciau. Qu’ei hèra mauaisit de s’escàder a convéncer lo monde d’acceptar de pagar informacions. « Un jornau libre ne’s crompa pas, que’s finança, la gratuitat de l’informacion qu’ei ua illusion ». Alavetz que’s pausa la question deu finançament dab publicitat institucionau, qui pesaré sus la qualitat, quitament la « maishanta » qualitat deus jornaus locaus, segon l’òmi. Que’s pausa tanben la question de las ajudas a la premsa. La profession que s’estona de la reaccion d’un Ministre qui’s desvelha despuish los atemptats de Charlie Hebdo « quin ei possible qu’un jornau com lo Charlie, un mensuau satiric, n’agi pas nada ajuda a la premsa ?! ». Que s’ei creat dens lo parçan ua associacion Medias Citoyens PACA (www.mediascitoyens.eu) qui s’ei inspirat deu medish dispositiu en Ròse Aups. « N’èm pas dens logicas lucrativas, n’èm pas aquiu entà enriquir accionaris ». La fòrça deu jornau Le Ravi qu’ei las accions que hè en parallèle. L’associacion qu’ei dens l’educacion populara. Tad eths, estar jornalista n’ei pas sonque escríver articles qu’ei tanben har debàter monde, hicar en plaça dispositius de jornalisme participatiu dens los barris. « Lo noste jornau qu’ei demorat fidèu dens las valors de la profession, verificar las informacions, crotzar las hons, préner lo temps, mei de temps que la premsa classica », ns’explica explica Michel Gairaud. Venut a 2 000 exemplars cada mes, cap a 50 000 visitaires que vienen léger lo contiengut a gratis en linha cada mes.

Dens Le Ravi n° 151, pareishut en mai de 2017, los jornalistas qu'an enquestat sus las finanças de l'Ofici departamentau d'educacion e de lesers (ODEL) de Var a Tolon (83), dens l'article « Los elegits purmèr, los mainatges après ». Que desvelan las resultas deu rapòrt de la cambra regionau deus comptes suu Conselh generau de Var de 2009 e 2015. De 2009 a 2014, lo departament que versè 20 milions d'euros a l'associacion « shens assegurà's de la realitat de l'interès departementau de las soas activitats », çò escriven los jornalistas, e de soslinhar los salaris hèra hauts deus quadres. Que podetz legir l'article aquiu

Arron la publicacion d'aqueth article, Marc Lauriol, conselhèr departamentau LR de Var e l'ODEL que gavida qu'ajornan Le Ravi en difamacion e que reclaman 32 500 euros. Après estar estat tornat tres còps, lo procès deu jornau que's debanarà dimars 15 de mai a 14 h 30 au Tribunau de Grana Instància de Draguinhan. Le Ravi que lança un aperet a abonaments e mei que mei un aperet a mobilizacion tà'us sostiéner au Tribunau lo 15 de mai.

Inf. : www.leravi.org

p10 photo2

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+