Uei : 21/04/2018

Eleccions estudiantas (64) : lo M22M qu'arriba en cap dab 69 % deus vòtes mes n'obtien pas qu'un sièti au Conselh deu collègi locau

Dus ans a, la lista M22M, aliança enter los estudiants deu Med'Òc, Solidaires étudiant-e-s e Uluka que s'emportè 12 siètis sus 23 a las eleccions organizadas a l'Universitat de Pau e deus País de l'Ador (64). 
Lo M22M qu'ei ua platafòrma creada peus estudiants de l'UPPA deus campus de Pau e de la còsta basca. Qu'ei implicat dens la vita estudianta, tant au nivèu culturau, associatiu, com politic e que tribalha dab las instàncias universitàrias tà conservar formacions de qualitat e un campus viu.

 

Los estudiants deu M22M que's son presentats dimars 27 de març tau renovelament deus siètis de diferents conselhs decisionaus. Que perpausan ua diversitat culturau e lingüistica suu campus, de tribalhar tà un servici public de qualitat e tà ua universitat de proximitat « l'UPPA que deu deféner e desvolopar las soas auhèrtas de formacion entà facilitar l'accès au saber », e ua universitat shens discriminacion.

« Quitament se los sèitis estudiants que son estatutàriament minoritaris au demiei deus conselhs, qu'avem podut har entrar lo noste devís, uei lo dia largament représ per las autas fòrças estudiantas mes tanben per la direccion de l'UPPA. D'aquesta faiçon, qu'avem obtienut avançadas modèstas mes concrètas pertocant enter autes, la plaça de l'euskara e de l'occitan au demiei de l'establiment dab la creacion d'ua comission especifica qui associa estudiant-a-s, ensenhaire-a-s e oficis publics qui a permtut l'adopcion a l'unanimitat d'ua senhaletica trilingua », çò escriu Txomin Podeva, estudiant en sociologia a l'UPPA. Totun, los membres deu M22M qu'an enqüèra tribalh de har entà impausar las lors ideas : egalitat òmis-hemnas, defensa de las condicions d'estudis, transicion ecologica, dret deus estudiants e estrangèrs, vita associativa e sindicau atau com aquits sociaus deus salariats de l'universitat.

A la fin deu vòte deu 27 de març, lo M22M que s'emportè la victòria dab ua larga majoritat. 69 % deus sufragis exprimits tau conselh deu collègi locau e 57,4 % taus conselhs centraus. Los estudiants de l'aliança basco-gascona qu'avón la suspresa de descobrir ua maishanta reparticion deus siètis estudiants au conselh deu collègi locau e que publiquè un comunicat de premsa ger : « Lo M22M qu'a avut la maishanta suspresa de constatar que suus 4 siètis a provedir, que n'a sonque obtienut un. En efèit, l'UPPA qu'a procedit dab precipitacion a ua refonta de la soa organizacion en empeutar ua composanta paulina au campus de Baiona, quitament en compréner aquera composanta, la lista M22M que demora majoritària a 53 % de las resultas deus vòstes exprimits ».

« Dab aquera resulta, que'ns podèvam esperar au mensh 2 o 3 pòstes dens lo conselh d'administracion de l'Universitat, çò nse digó Yannick Pouey, ancian vice-president estudiant de l'UPPA. Qu'ei simplament un negament de democracia ! Que ns'arretrobam au medish nivèu que las autas listas de l'UPPA Avenir e l'UNI (Union Nacionau Interuniversitària) qui an amassat respectivament cap a 30 % e 10 % deus vòtes. Qu'avem relaiat la problematica dens la premsa regionau, basca e occitana. Qu'esperam reaccions, e mei que mei dens lo mitan occitanista »

Que demandan a l'UPPA de préner mesuras immediatas entà respectar las resultas deus vòtes. Qu'apèran los estudiants, lo personau, ensenhaires e cercaires de l'UPPA a'us sostiéner dens la lor reïvindicacion.

Inf. : https://www.facebook.com/m22m.uppa/

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+