Uei : 21/10/2017

L'Academia deu gallò qu'a un an

La purmèra Academia deu gallò qu’estó creada lo 16 de seteme de 2016 per tres ahuecats de las lengas ditas regionaus : lo lingüista Patrice Deriano, l’informatician Denis Lefeuvre e la cargada de comunicacion Gwenaëlle Lefeuvre. Arron aver hèit lo constat de la situacion critica deu gallò, los creators de l’Academia que decidín de reagir entà « provar qu’aquera lenga possedeish las ressorças e l’adaptabilitat d’ua lenga modèrna » e mei que mei rénder au public gallofòne, la fiertat de las soas originas e la soa lenga. La tòca deu trio qu’èra de sauvaguardar los fondamentaus lingüistics deu gallò e de’us difusar lo mei largament possible.

Lo site qu’existeish tanben en anglés e qu’ei hèra present suus hialats sociaus çò qui’u permet d’aver ua visibilitat au delà de las termièras.

« Qu’ei tanben en participar a projèctes numerics internacionaus entà installar lo gallò au ras d’autas lengas deu monde » que lo gallò se hè chic a chic conéisher internacionaument, çò expliquè lo lingüista Patrice Deriano aus nostes confrairs de Ouest France.

Qu’ei possible de’s formar en linha au son ritme e a gratis suu site dab un metòde d’aprenedissatge, ua gramatica e un gran diccionari trilingüe (gallò-francés-anglés). L’Academia deu gallò que perpausè los sons servicis aus candidats a las eleccions legislativas de 2017 en auherir d’arrevirar a gratis la lor profession de fe.

Inf. : http://www.academie-du-gallo.bzh/ADG/site-fr/adg-presentation.html

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Papagai

Papagai es la revista occitana dels pichonèls. Prepausa cada mes doas istòrias, de jòcs, una pagina de vocabulari e un dorsièr en rapòrt amb un dels dos 

+