Uei : 20/01/2018

XVIIIau Collòqui d'onomastica a Tolosa

Despuish dimèrcs e dinc au ser, que's debana lo 18au collòqui d'onomastica a Tolosa. Qu'ei organizat cada dus ans e qu'a per tèma augan la circulacion lingüistica e l'onomastica occitana.

Lo collòqui que comencè suu tèma de las circulacions lingüisticas, las categorias denominativas e las lors relacions en onomastica en preséncia de Jean-Louis Vaxelaire, professor a l'Universtat de Namur en Belgica qui parlè de las tipologias onomaticas, e de Daniela Butnaru de l'Institut de filologia romana qui s'interessè a las relacions enter uns noms de lòcs rebatuts dens un diccionari toponimic.

L'endedia, las discutidas que pertocavan las relacions enter categorias dens lo domèni de la toponimia. La cercaira Marcienne Martin, de l'Universitat de La Réunion que hasó ua presentacion suu subjècte « Deu totemisme a la toponimia : l'exemple deus grops amerindians ».
Jean-Claude Bouvier, professor emerit d'Ais-Marselha Universitat que presentè « Deus “toponimoïdes” aus toponimes. Quauquas reflexions sus l'emergéncia deus toponimes dens l'escriut e dens l'orau ».

Uei, lo tèma tractat qu'ei l'onomastica occitana dab convidats especialistas com Hervé Lieutard de l'Universitat Paul-Valéry, Aitor Carrera de la Cadièra d'Estudis Occitans de l'Universitat de Lhèida, Paul Burgan, SFO, o enqüèra Patrick Sauzet, professor a l'Universitat Jean Jaurès de Tolosa. Pierre Bréchet, president de l'IEO qu'explicarà cap a 16 òras 30, quin restituir la soa toponimia tà ua lenga minorizada e quin estructura ua dinamica associativa en hialat.

Lo collòqui qu'ei organizat per la Societat francesa d'onomastica (SFO), lo laboratòri CLLE-ERSS (CNRS - Universitat Tolosa Joan Jaurès) e Lo Congrès permanent de la lenga, dab lo sostien de la DGLFLF, de la Region Occitania/Pirenèus-Mediterranèa per l'OPLO, e de l'Universitat Joan Jaurès de Tolosa.

Programa deu Collòqui

  • Escriut per

La dictada 2018 qu'ei lo 27 de genèr !

Lo rendetz-ve annau de la Dictada occitana que torna e que serà lo 27 de genèr de 2018. Que’s debana tradicionaument cada darrèr dissabte deu mes de genèr. L’eveniment que’s debanarà dens mei d’un quarantenat de vilas occitanofònas dont Besièrs, Castras, Foish, Niça, Nimes, Aurentja, Peçac, Vic de Fesensac. A Selhac en Corresa per exemple, la 15au Dictada occitana que’s debanarà a 10 òras 30 au collègi de la vila (6 avienguda Jean Vinatier). Lo tèxte que serà dictat per escolans e lo lor professor d’occitan, sénher Chabrerie, abans d’estar corregit. Tà v’inscríver, contactatz lo 05 55 27 01 60 o per mèl a l’adreça This email address is being protected from spambots. You need JavaScript enabled to view it.. A Gramat (46), la dictada que’s debanarà a 14 ò 30 a la mediatèca de la vila (avienguda Louis Mazet). Un eveniment organizat per l’IEO d’Òlt, en aliança dab l’associacion Aquí l’Òc e Aventurine 46. Que trobaratz mei d’entresenhas en contactar l’associacion This email address is being protected from spambots. You need JavaScript enabled to view it. o per telefòne au 05 65 38 84 63.

Ua jornada gascona qu'ei organizada peu parat a Soston (40-sala Rouchéou) lo 27 de genèr. Que començarà dab un talhèr de danças tradicionaus a l'estúdio Gyms Associatives arrua de Moscou de 10 òras 30 a 12 òras. La dictada que's debanarà a comptar de 16 òras. La poetessa occitana Mayo que harà un concèrt a 18 òras. Un repaish qu'ei organizat seguit d'un bal gascon dab Can e Gat (15 € repaish e bal, 5 € sonque lo bal).

Terra d'Òc, lo cerc locau d'estudis occitans 16 (C.L.E.O. 16/24) qu'organiza la dictada occitana a Charreç (16-sala polivalenta). Que serà un tèxte de Saint Exupéry qui serà dictat a partir de 14 òras 30, abans d'estar corregit. Lo dia que s'acabarà en musica dab un bal fòlc animat peu grop Balrousse a comptar de 17 òras. Entresenhas mei : Jean-Claude Nicolas au 05 45 70 40 52 o per mèl a l'adreça : This email address is being protected from spambots. You need JavaScript enabled to view it. — Tarifas : 5 € dictada e 5 € bal.


A Besièrs, lo Centre Interregionau de Desvolopament de l’Occitan (CIRDOC) qu’arcuelherà los participants de la Dictada. Que començarà a 14 òras 30 e que serà seguida a 15 ò 30 d’un balèti obèrt a tots dab F. Carcassés e M. Frinking Carcassés. Que’vs cau inscríver a l’adreça : This email address is being protected from spambots. You need JavaScript enabled to view it.. Despuish l'an passat, los participants que pòden causir enter l'opcion 1, peus començants, un tèxte de completar e l'opcion 2 qui serà la mei tradicionau d'un tèxte dictat. Las inscripcions ad aquera dictada occitana que s’en hèn au près deu Centre Occitan del País Castrés abans lo 25 de genèr, Tel. : 05 63 72 40 61. Corric : This email address is being protected from spambots. You need JavaScript enabled to view it..

  • Escriut per

Occitan — Auhèrta d'estagi au Parc Naturau Regionau de Miuvaches en Lemosin

Lo Parc Naturau Regionau de Miuvachas en Lemosin que cèrca un estagiari tà desvolopar lo son programa de formacion a la cultura e a la lenga occitanas.

Dens lo projècte de Carta 2018-2033, lo PNR que desira har víver l'occitan entà mantiéner lo patrimòni deus rics, car au son territòri. Dens l'encastre deu « Contrat de Parc », lo plan d'accions 2018-2020 deu parc, que programan mantuas accions dont un plan de formacions e de sensibilizacion a la cultura e a la lenga en foncion deus publics ciblats e deus besonhs.

L'estagiari qu'averà per mission la mesa en plaça d'aqueth programa de formacion. Qu'organizaratz purmèr ua formacion generau taus elegits e agents deu Parc qui servirà d'experimentacion abans lo començar deu programa de formacion globau sus 2 ans.

  • Escriut per

Culturas ruraus en perilh

Carcarèrs-Senta-Crotz. Dissabte 13/01, a Carcarèrs e Senta Crotz (Lanas) se debanarà un collòqui de la Societat de Bordà-Patrimòni de las Lanas. Lo tèma : « las culturas ruraus en perilh ».. Au miei d’intervencions barrejadas qu’arremarcan l’intervencion deu sociològ Pierre Bitoun (Perqué las societats modèrnas e sacrifican los paisans?) La quasi condemnacion de las caças tradicionaus, la plaça e lo ròtle de la lenga nòsta serán tanben evocats.

De la question de l’identitat…

L’an passat, en heurèr de 2017, au parat de l’amassada generau de la Societat de Bordà-Patrimòni de las Lanas a D’Acs, es organizat un desbat sus « l’identitat landesa ». Un gran moment ! Susquetot que los dessenhators deu jornau Sud-Ouest, Lasserpe e Marc Large, cadun en carn e en òs, illustran en dirècte lo desbat. Aqueth trufandèrs qu’an, com tostemps, lo gredon escarniu.

  • Escriut per

Mèdias occitans — Dus servicis civics tà desvolopar l'auhèrta de produccions en òc

La Federacion Interregionau deus Mèdias Occitans (FIMOC) dont hè partida Vistedit/La Setmana, que perpausa dus servicis civics. Las lors missions que començarén a partir deu 24 de genèr per ua durada de 8 mes, 24 òras per setmana. La Federacion que vòu atau desvolopar accions qui favorizan l'accès a tots a l'auhèrta de las produccions audiovisuaus, radiofonicas e editoriaus en lenga nosta.

Qu'a per tòca de realizar un estat deus lòcs a l'atencion deus sons membres e deus sons partenaris publics/privats e deus lectors, auditors e telespectators. Que miarà ua enquèsta sociolingüistica dab los volontaris tau monde sensibilizats a la problematica de la sauvaguarda, de la promocion e de la difusion de la lenga occitana.

La plaça e la representacion deus mèdias occitans dens la societat qu'ei l'un deus enjòcs màgers de l'enquèsta. Atau, que's poderà avalorar las acostumas de consum de la produccion accessibla uei lo dia e las atentas deus divèrs publics.

Aquiu las missions qui seràn enter autas hidadas au volontari : prospectar las estructuras e las associacions relais, anar a l'encontre deus publics visats au parat d'eveniments culturaus occitans suu departament deus Pirenèus-Atlantics, realizar sondatges o enqüèra anar encontrar aus mèdias membres entà amassar informacions sus las lors produccions.

La FIMOC qu’a per tòca d’arrecaptar l’ensemble deus mèdias de l’economia sociau e solidària qui causeishen, estatutariament, dens lors supòrts respectius, de promòver e de difusar la lenga e la cultura occitanas. Qu'a per mira d'estar un organ que permet la representacion, lo sostien, la concertacion, la mutualizacion deus mejans tecnics e umans deus mèdias sòcis. Que participa activament a la reflexion suu desvolopament deu sector, dab la creacion d’apèrs de tribalh e de projèctes collectius.

Inf. : Consultar l'anóncia ací www.fimoc.com

  • Escriut per

De desinformacion e mala fe amb lo jornal satiric provençal L'Estrasseta

Dempuèi qualques jorns circula sus internet « L'Estrasseta », qui se presenta coma un jornal satiric provençau de « Desinformacion, mauvolença e marrida fe ! ». Es disponible en linha sul FB de la còla e suls sites https://issuu.com/estrasseta/docs/estrasseta1 e https://gallery.mailchimp.com/7375bf709f3b026a47b9cd800/files/57a421c4-d56e-4365-a0d3-15ebc01f9a53/estrasseta1.pdf

La Una representa lo personatge de Sinok dins lo filme de las annadas 80 « Les Goonies » amb la frasa « Per 2018… Tolosa, capitala dau monde ! Gneee !! », aquò dona lo ton qu'a causit d'emplegar « L'Estrasseta ».

Lo primièr article del jornal es un bilhet d'opinion consacrat a la crisi de l'occitanisme. L'autor descortica çò qu'a provocat e provòca la crisi de contunh del movement. Comença amb la malescaduda de las darrièras manifestacions d'Anèm òc e las reivindicacions foscas dels occitanistas : « Qu'un movement que presica de lònga la decentralizacion de l'Estat siegue pas capabla de s'organizar d'espereu en defòra d'aqueu sistèma, quina revirada per l'occitanisme ! Tanben fau mencionar lo fach que jamai degun comprenguèt çò que demandiam exactament a n’aquelei manifestacions. Una oficializacion de la lenga ? 50 pòstes per an au CAPES ? Mai d’aligòt a la cantina ? ».

Dins lo bilhet, torna tanben sul novèl nom de las Regions Lengadòc-Rosselhon / Miègjorn Pirenèus, que faguèt polemica : Occitània/Pirenèus-Mediterranèa, en precisant que « Coma previst, lei frontièras d'aquela region s'impausan ja dins lei mèdias, e donc dins la tèsta de la gent, coma lei limits d'Occitània ». E l'autor d'acabar per una conclusion puslèu pessimista, en se pausant una question sus la capacitat dels occitanistas a far ausir lor votz, que vos daissam descobrir dins sa version numerica L'Estrasseta.

Prepausan dins las doas darrièras paginas d'actualitats amb un agach umoristic. 

Inf. : Descobritz L'Estrasseta sul Facebook del jornal provençal a o mai d'informacions sus : This email address is being protected from spambots. You need JavaScript enabled to view it.

 

  • Escriut per

« L'ADN occitan » per Jef Sénégas

Lo 1ièr de decembre, lo rocker narbonés, Jef Sénégas, cantèt sa cançon « L'ADN occitan » acompanhat de musicians e cantaires al Parc dels Espòrts de Narbona (11) abans la partida de rugbi de Pro D2 RCNM-Vannes. 

La cançon (en francés) foguèt anonciada coma lo novèl imne de la Region Occitània/Pirenèus-Mediterranèa e las reaccions foguèron vivas demest los occitanistas. Jef Sénégas acceptèt de respondre a qualques questions al moment de la polemica. Nos expliquèt que la creacion de « L'ADN occitan » datava pas de uèi :

Entrevista audio

Inf. : https://www.facebook.com/jef.senegas https://twitter.com/JefSenegashttp://jefcircus.fr/artiste — Mèl : This email address is being protected from spambots. You need JavaScript enabled to view it.

  • Escriut per

Que hè lo « buzz » dab la soa canta « Cannelle »

L'artista bearnés Kalune que hè lo « buzz » despuish fin de deceme dab lo clip video « Cannelle ». La canta que conta l'istòria de l'orsa Cannelle, tuada per un caçaire de la vath d'Aspa en 2004.

Atjat de 23 ans a l'epòca, lo cantaire qu'estó marcat per l'eveniment, mei que mei pr'amor qu'avè vist traças de pas d'ors quan èra pichon en passejà's dens las montanhas. Mescla de rap e cançon francesa, lo tròç que torna lançar l'istòria de l'orsa entà « denónciar lo desastre ecologic que vivem ». Lo subjècte qu'ei important aus uelhs deu Bearnés, en ligam dab l'associacion Pays de l'ours ADET.

A l'ora d'ara, la video que compta mei de 240 000 vistas e los imatges causits dens lo video clip qu'an hòrtament contribuits a l'escaduda de la canta. Que vedem ua gojata, un orsat en peluisha dens la man, passejà's dens las montanhas dab plans largs de la Vath d'Aspa.

Arron « Le Mal de Terre », « Cannelle » qu'ei lo dusau títol deu purmèr àlbum sòlo de Damien Kalune. Que sortirà lo son àlbum « Amour » en autoproduccion en 2018, entà « non pas depéner d'ua Major e deu son accionariat ».

Inf. : Véder lo clip video « Cannelle »

  • Escriut per

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls. Prepausa cada mes doas istòrias, de jòcs, una pagina de vocabulari e un dorsièr en rapòrt amb un dels dos 

+