Uei : 19/06/2018

Caroline Paulhan, la passion del vinil

Dempuèi uèit ans, gerís una botiga independenta de disques vinils a Pesenàs. Una escomesa capitada per aquela orleanesa d’origina, afogada de cultura occitana.

I a pas res que destinava aquela joventa, venguda del país d’Orléans, a menar un tal comèrci. Davalèt fa quinze ans de la region Centre per s’installar en Lengadòc (« pel solelh, lo cèl blau e qualques sorires » çò nos a fisat) ont comencèt de trabalhar coma animatora e directora de centre de lésers. D’origina portuguesa, s’es totjorn interessada a las lengas latinas.

Çò que la menèt a trabalhar pendent un an a la Calandreta del Clapàs, situada dins la Ciutat Gèli a Montpelhièr. « L’occitan e lo portugués se semblan, çò nos a dit, aviái enveja de descobrir una autra lenga. Es un exercici que m’agrada. En mai d’aquò, l’occitan se compren lèu ». Son òme, Govinda, qu’a el d’originas guaianesas es un natiu del país de Viòls lo fòrt (còsta Montpelhièr) e vinhairon pel parçan. Tan val de dire que Caroline s’es integrada sens tròp de problèma dins lo païsatge lengadocian. E puèi foguèt l’escomesa. En plaça de s’installar a Montpelhièr, Caroline e Govinda, an causit de s’installar dins la ciutat de Boby Lapointe per dobrir lor botiga de disques. Pensavan far l’ensag per un an e de veire puèi se contunharián. Al cap de uèit ans, podèm dire que l’escomesa es ganhada. La petita botiga « Fai Virar » (dont lo nom foguèt inspirat per una cançon del Massilia Sound System) s’es bastit una practica dont un tèrç ven de Pesenàs. Lo demai es constituit d’erauteses o de toristas. Çò qu’es pas tròp mal per una vila mejana situada a la periferia de Besièrs e de Montpelhièr. Lo besonh de cultura alternativa i es tanben present, al dintre de la populacion. « Avèm visitada la vila e, compte tengut de tot son atrach cultural e toristic, avèm causit d’ensajar » çò nos a dit Caroline Paulhan.

L’emplaçament de la botiga es vertadièrament estrategic. La plaça Gambetta es punt de rendètz-vos plan conegut dels estatjants de Pesenàs. A una carrièra de l’entrada de la vièlha vila, aquela plaça carrada e caladada servís de lòc de recampament e de punt de partença pel Carnaval. Coma lo demai de la vila vièlha, serviguèt de lòc de filmatge pel filme « Cartouche » de Philippe de Broca (1962) amb Jean-Paul Belmondo e Claudia Cardinale. Al dintre de la botiga, los afogats de vinils i tròban lor compte e son pas unicament de DJs que venon a la pesca a la bona bocla per lor sesilha que ven. « I a pas de mena musicala de predileccion, çò nos a dit Caroline, es vertadièrament generalista. La mira es de partejar un maximum dins una granda varietat de tastes. I a d’electrò, i a de ròck, i a de fòlc, i a de reggae, de raggà, de musica occitana, de musicas del monde... es plan mirgalhat ». Es tanben un depaus de venda pels artistas independents del canton. A còps, pòt arribar que de disques interèssen pas degun. Es atal. Per Caroline, respectuosa d’aqueles objèctes, es pas possible de los metre a las escobilhas. A doncas aguda l’idèa de los reciclar en objèctes de la vida vidanta. Atal, aqueles vinils qu’auràn pas agudas las favors dels clients coneisson una segonda vida coma relòtges o autres objèctes decoratius. La botiga Fai Virar fa pas unicament ofici de punt de venda, se pòt tanben far organizatora d’eveniments amb de concèrts per carrièra o alara de concèrts privats. Aquò se debana dins los locals de l’associacion Micro-Sillons, basada dins la comuna de Sant Pargòri, entre Pesenàs e Montanhac. An ja fait venir de nombroses grops del canton coma los grops clapassencs de Swaï (electrò) o encara Aiwa (world) e Rose Betty Klub (jazz e swing). Faguèt tanben venir los marselheses de Pablo y su Charanga (musica cubana). Venguèron encara de musicians plan coneguts dels nòstres lectors, a saber los Doctors de Trobar, grop de hip-hop occitan d’Erau. La quita Caroline s’empacha pas de capinhar las platinas dins un duò batejat « LiYa » ont fa de « mesclanha sonòra ». « Tot aquò se fa dins una idèa de partatge, çò nos a dit, avèm volgut far jogar de grops fòrça diferents. (...) L’idèa nos es venguda en rencontrant de monde que passavan per la botiga e que nos demandavan se organisàvem de concèrts al dintre o juste davant. Atal, dempuèi dos ans, l’afar es vengut seriós puèi qu’organisam quatre seradas per an ».

Inf. : Fai Virar, 11 plaça Gambetta — 34120 Pézénas — Tel. : 06 85 46 12 13 — FB Fai Virar

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+