Uei : 20/11/2018

Manon Alard, una RAFeta a l'AOF

Jogaira de la còla femenina del Rodés Avairon Fotbòl (RAF), la « RAFeta » fa tanben partida de la còla femenina d'Occitània.

Èra sul camin de l’entrainament. Sortissiam de la dimenjada, doncas la serada seriá ritmada per de mièg-fons e de torns de terren. Pas question de se dispensar del footing del diluns per aquela esportiva amatora. Manon Alard fa partida de l’efectiu de la novèla còla occitana femenina. Creada fa dos ans, aquela seleccion faguèt son primièr match lo 3 d’octobre de 2014 contra las Sorabas (pòble germanofòn de Republica Chèca).

Ara es a mand de far sa primièra Europeada e deuriá far lo viatge amb la còla masculina creada ela en 2004. Per çò qu’es de las colors portadas, Manon fa pròva d’una cèrta coëréncia. En mai de portar las colors de la seleccion « sang e aur » occitana, pòrta tanben las colors « sang e aur » del Rodés Avairon Fotbòl (RAF) ont jòga al pòste de defensora centrala. Per los que son pas d’acarnassits del balon redond : se plaça davant la gardiana. Manon Alard vòl pas venir professionala : « Ai pas forçadament lo nivèl, çò nos a confessat, tant melhor per las filhas qu’o pòdon far, mas se val melhor gardar un mestièr. Ai ja jogat coma mièja-professionala e m’agradava de m’entrainar cada jorn mas la filosofia de vida del professionalisme es pas tròp la meuna ». Trabalha coma professora d’espòrt al collègi de Maintenon a Perpinhan e s’entraina dins la comuna catalana de Cabestany tot en contunhant de jogar amb lo RAF. L’empacha pas d’aver lo sens de la competicion (« me desagrada de pèrdre ! ») mas los enjòcs financièrs importants a l’entorn del fotbòl professional la rebutan.

De Vila Alba a Rodés

La defensora a totjorn jogat e viscut en Lengadòc. Nascuda a Carcassona (Aude), obtenguèt sa primièra licéncia dins lo club del vilatjon de Vila Alba. Aviá alara uèit ans e jogava amb los dròlles. Èra plan integrada al grop e i aviá pas cap de sexisme en son dintre : « Èri costosada, çò nos a dit amb un rire, en contra, i aviá pro de sexisme en cò dels suportaires advèrses. Los ausissiái sovent dire de frasas als jogaires de lor còla, coma “ te vas pas daissar passar per una filha ! ” o quicòm atal ». Cinc ans mai tard, lo club de Vila Alba fusionèt amb lo de Carcassona per venir lo FA Vila Alba-Carcassona. A aquel moment, deviá obligatòriament jogar dins un efectiu femenin, çò que refusèt. I aguèron quatre ans d’interrupcion pendent los quals faguèt de judò, d’atletisme e tanben de caval. Mas lo virús del fotbòl la regantèt pro lèu. Per aquela recabussada (aviá 17 ans), joguèt al club de Carcassona (pendent dos ans) puèi al Montpelhièr HSC (tres ans) e puèi joguèt un primièr còp al RAF, pendent tres ans encara. Anèt puèi al FC Muret (un an), al Tolosa FC (un an) per tornar l’an passat al RAF, al mes de julhet. « Aviá viscudas tres annadas excepcionalas a Rodés, çò nos a dit, ai d’afeccion per aqueste club. Amagui pas que m’agrada de poder jogar en primièra division mas i a primièr la dimension afectiva ».

Lo RAF, còla-coratge

Lo club de Rodés evoluciona dins lo campionat femenin de primièra division. Es un club amator que se pòt fretar a de gròssas maquinas coma Lion, lo PSG e Montpelhièr dont los efectius son compausats de professionalas. Son aquelas còlas qu’ocupavan respectivament las tres primièras plaças a l’eissida de la 22ena jornada. Lo RAF se classava el cinquen, juste après Juvisy e davant Sant-Estève. La mediatisacion del fotbòl femenin progrèssa mas es luènh d’èsser al nivèl de la del fotbòl masculin. Pasmens, las performanças de la còla francesa femenina atal coma lo títol de campionas d’Euròpa de las filhas de l’OL cambièron la plega. Per exemple, pendent la copa del Mond al Canadà l’an passat, lo match d’entrada de las Blavas contra Anglatèrra foguèt seguit per 1,9 milions de personas sus las cadenas W9 e Eurosport. Entre 2011 e 2014, la FFF ganhèt 35 000 licenciadas (sorsa Télérama). N’èran a 83 000 (chifra de 2015) e espèran aténher ongan las 100 000 licenciadas. La bona exposicion mediatica profitèt per exemple al club istoric de Juvisy, en region parisenca. Arribat a las mièjas-finalas de la Liga dels campions en 2013, a pogut multiplicar son budgèt per dos mercés a l’arribada d’esponsòrs e de partenaris novèls. Del costat de las « Rafetas » (las jogairas del RAF), òm deu compausar amb lo budgèt mai petit del campionat. Demest los partenaris del club, i a la comuna de Rodés. A l’escasença de la recepcion del PSG en 2015, lo conse Christian Teyssèdre anoncièt la color : « ganhetz, fasètz de resultats e se parlarà encara mai de vosautras. Atal, poiretz aver un imatge encara mai visible al plan nacional. O meritatz » (La Dépêche, 11 de decembre de 2015). Mai de visibilitat per mai de spectators e mai de mejans, una eqüacion qu’es pas totjorn simpla quand ... òm a pas tròp de mejans. Foguèt pas lo cas del costat de l’Olimpic Lionés amb 5 milions d’euros investits dins sa còla femenina (sorsa : Télérama). Pel moment, del costat del RAF, òm farà mai l’escomesa del coratge e de la susor del front. En esperant d’anar benlèu dins lo darrièr carrat del campionat de França, la « Rafeta » Manon Alard tira camin dins la seleccion occitana. A l’ora d’escriure aquelas linhas, lo grop es pas encara boclat. Lo seleccionaire Sylvain Blaise deuriá far venir de jogairas de Muret, Tolosa, Rodés, Sant-Estève o encara Albi. Las originas audencas de Manon fa que s’identifica a aquesta seleccion. Coma un bon nombre de fotbolaires e de fotbolairas qu’evolucionan al dintre de l’AOF, parla pas encara la lenga. « La grand o apren, mas pas ieu, çò ditz en risent, mas m’i vau metre ! ». Serà una aventura de mai per aquela esportiva que crei primièr a las vertuts del plaser de jogar.

La Setmana

  • L'edicion papèr
  • L'edicion 100 % Numerica

Descobrir las auhèrtas

 

Plumalhon

Plumalhon es un magazine pel 8-12 ans. Prepausa cada mes dos reportatges sus de tèmas d'actualitat, sus de países, d'animals... Prepausa tanben de BD, de jòcs e 

+

Capture decran 2017 11 28 a 11.48.12

Papagai

Papagai es la revista occitana dels pichonèls.
Prepausa cada mes istòrias, jòcs, una pagina de vocabulari e un dorsièr 

+